Gal 6 | BDD | STEP | Ciyagwao, 'eguma tasidai 'aigeda 'ina pui 'oinega 'ibe'u, 'omi yaluyaluwami pa'alidi watoho ma tasidaina wa'abihedumwalu hila, ma hesi ma'imi mumuga nuhana, ma waboimo wa'itayahigomi nata gide 'omi wete wabe'u.

‏ Galatians 6

Tahelemalema

1 Ciyagwao, 'eguma tasidai 'aigeda 'ina pui 'oinega 'ibe'u, 'omi yaluyaluwami pa'alidi watoho ma tasidaina wa'abihedumwalu hila, ma hesi ma'imi mumuga nuhana, ma waboimo wa'itayahigomi nata gide 'omi wete wabe'u.

2 Cami 'aha'ahalao 'oidiya wahelemalema ma'iyamiyao, weyahina bewa gide 'ada loina Keliso 'oinega, eeta 'ilobwaineya tapaihowa.

3 Ceguma taiya wewelohe, ma 'inuwatuhuya 'abehega tohewasawasa, 'iboinamo 'i'abo hileya. 4 Coinega 'ilobwainegomiya ma 'aigeda 'aigeda 'iboi 'ina paihowa 'ida toho ma 'isanapu mane paihowa bwebwe'ana ma mane galana, 'oinega 'eguma bwebwe'ana, 'ana hepwatu 'iboi 'ina nuwatuhu 'ana lotohona 'oinega, ma geya 'iyana 'aigeda 'ina gwae 'oinega. 5 Ta 'ada 'aha'ahalao 'aigeda 'aigeda taboidamo ta'ahalidi.

6 Tapwalolo 'ana tohe'itao, 'eguma sinasinapu sihe'itegita, 'ilobwainegita ma tobwatobwa ta'ebwaedi, 'eguma to'aha 'oidiya 'ito'uto'upa.

7 Geya'abwa 'uboi 'u'abo'abowego, weyahina geya sawasawahida ma Yehoba ta'abowe. To'aha loheya 'ibeguliya, muliyetega 'ida 'eli. 8 Ceguma mumuga wahi 'oinega 'idauna 'abwa 'eli'eli 'oina galana 'iloba, ma hesi 'eguma Yaluyaluwa Tabuna 'oinega 'idauna, 'abwa yawasina miyamiya hatayana 'i'elidi.

9 Geya'abwa 'ida paihowa bwebwe'adi 'oidiyega ta'ala'ala 'i'iwasa, weyahina 'eguma geya'abwa tawe'a, 'abwa 'eli'eli bwebwe'ana taloba. 10 Coinega 'ilobwainegita ma tuta mabwaiyana 'oidiya tomota baibaiwadi talemedi, ma hesi Yehoba 'ana tohemisao talemedi madouna.

11 Lele bewa matana madouna taugu nimaguwega yaleleya. 12 MeYudiya 'idi 'ila'ilala 'wapidiya 'ana to'upwao geya nuwadi 'igu loguguyaina bewa: 'ada 'abihebwebwe'ana taloba Keliso 'ina 'amasamo 'oinega, ma geya 'wapi 'upwa 'oinega. Coinega sihe'i'imigomiya ma 'idi 'wapi 'upwaina wa'ewa, ta 'adi boda 'ida hemadou, ma wete lo'aleha Keliso 'ina 'amasa kelose 'oina weyahina 'igumwala. 13 Ma hesi wanuwatuhuyahi 'abehega 'wapi 'upwaina 'ana to'ewao 'ilobwainediya ma Mosese 'ina loinao mabwaiyana simuliyedi, ma hesi geya sida muliyediya. Beno tuwa nuwanuwadi 'wapimi wa'upwadi ma bewa 'idi 'ebe gagasa 'imi luhu 'adi boda 'alona weyahina. 14 Ma taugu hesi geya'abwa yagwaegwae hane. Beno tuwa 'ida Bada Yesu Keliso 'ana kelose weyahina yagwaehane, weyahina Keliso 'ana kelose 'oinega mumuga bale'u 'ilohe'amasiya ta 'ina loina 'oiguwa 'igumwala, ma wete taudi mumuga bale'u 'ana tomuliyao silogwahategauwa, tuwa gide taugu to'amasa.

15 Moisa, 'wapi 'upwa geya ginaula madouna, ma 'eguma geya ta'upwa beno wete geya ginaula madouna. Ginaula madouna 'aigeda tuwamo, 'eguma Yehoba Yaluyaluwana 'igihe'ehaugita. 16 Ma mabwaiyada 'eguma loina bewa tamulimuliye, eema Yaluyaluwa Tabuna 'igihe'ehaugita, tauda Yehoba 'ina susu meIsileli moisa, ta 'ina helauwega tamiya daumwala.

17 Bewa tuwa ma tuta 'inaonaoma 'oidiya geya'abwa wete 'eta taiya 'igihe 'wate'wategau, weyahina wahiguwa Yesu 'ina 'ila'ilala simiyamiya, beno weyaedi yalobediya 'ina paihowa 'oina.

18 Tasigwao 'ida Bada Yesu Keliso 'ina helau yaluyaluwami 'oidiya. Emeni.

Taugu Paulo.