Heb 1 | BDD | STEP | Mwalohene hali tuta ma hali tuta 'oidiya, ta nuwatuhu baibaiwana 'oidiyega Yehoba 'ina gwae palopitao 'i'ebwaediya, ta taudi sihepwaileya tubudao 'oidiya.

‏ Hebrews 1

Yehoba Natuna weyahina

1 Mwalohene hali tuta ma hali tuta 'oidiya, ta nuwatuhu baibaiwana 'oidiyega Yehoba 'ina gwae palopitao 'i'ebwaediya, ta taudi sihepwaileya tubudao 'oidiya. 2 Ma 'ebelosaloha tauda 'ida tuta 'ina gwaeyao 'ihepwailediya 'oida natuna 'oinega. Yehoba natunaina 'ihesinuweya, ma 'abehega ginaula mabwaiyadi 'oidiya 'ihetoloina, ta mwalohene natunaina ba'idana ginaula mabwaiyana sihemasalehediya. 3 Ma Yehoba natunaina tamana 'ina 'asilala 'i'asi'asilalae ta tauna Yehoba 'ana 'oleya gide. Ma 'ina gwae waiwaina 'oinega ginaula mabwaiyana galewa ma bale'uwa 'i'abi'abi yahidi. Ma 'ida puiyao 'oidiyega 'ibuyogita ma muliyetega 'imiyatoiya Yehoba Tomiyahane hedade 'ina 'ebeulanega. 4 Tauna aneloseyao 'imiyahane sinediya, ma saninaina Yehoba 'i'ebwaeya anelose sanidiyao 'imadou sinediya.

5 Weyahina geya 'eta tuta Yehoba anelose 'eta 'oina 'ida gwae,

“Cowa natugu, nige bo'i ya'ahwa natunegowa.”
Geya wete anelose 'eta weyahina 'ida gwae,

“Taugu 'oiguwa 'ida 'ahwatamana, ma tauna 'oina yada 'ahwanatuna.”
Gwaeyedi bewa natunamo weyahina 'igwaenediya. 6 Ma tutaina 'ina tautuwa 'ihesumaneyama bale'uwa, 'igwaeya,

“Aneloseyao galewa sawasawahidi ma tauna 'oina si'etuluha.”
7 Ma hesi aneloseyao weyahidi 'ina gwae hagana, 'igwaeya,

“Yehoba 'ina aneloseyao 'ihemasalehediya, 'oinega 'idi tauya gide yaumai, ma 'ina topaihowaedi gide 'aiwe ninima.”
8 Ma hesi natunaina weyahina 'igwaeya,

“Cowa Yehoba ma'ino loina dumwaluna nata 'uloina hataya.
9 Mumuga bwebwe'ana nuwau 'i'eweya ma galana 'a didiga. Coinega 'ino Yehoba bo'i 'iheholoigowa yaliyaya moisa 'oinega, ta 'ino yaliyaya 'iyamwao 'idi yaliyaya 'imadou sinediya.”
10 Ma 'aigeda wete 'ina gwae natunaina 'oina 'igwaeya,

“Bada yo, tuta nugeta 'oina bale'u 'uhemasaleheya ma nimauwega galewa 'upaihoweya. 11 Ginaulaedi 'abwa silohesa hesawala ma 'owa 'umiyamiya, ma ginaula mabwaiyadi sihemiyamiya gide 'wama, 12 ma 'unupilidi gide 'ale'o, ta 'adi 'ita 'i'egibui, ma 'owa geya'abwa 'ugibugibuigo ta hesi 'umiya hataya.”
13 Ma hesi, Yehoba geya 'aigeda wete anelose 'oina 'ida gwae,

“Cigu 'ebeulega 'umiyatoi ma 'ana siga 'a 'alehao yalagu dobihedi 'aeu gabulena.”
Ma bewa gwaeina natunamo 'oina 'igwaeneya.

14 Ta anelose taudi yaluyaluwa tuwa ma tohalewasa, taudi Yehoba 'ilagudiya ta 'abehega si'abihetegita tauda taiyawedi 'eguma 'abihetena weyahina 'ihesinuwanegita.