‏

PILIMONI Pilimoni 'ina leta Paulo 'ileleya

Pilimoni tauna Yesu 'ana tomuliya 'aigeda, ma 'ina hewali 'aigeda sanina Onesimo 'idena sineya, ta muliyetega Paulo mahetena sihelobaloba tupwa Loma 'oina. Paulo Onesimoina Yesu tetelina 'ihe'iteya ta 'ihemiseya. Coinega Paulo Pilimoni 'ina leta 'ileleya ta 'abehega Onesimo 'itauye ma Pilimoni 'ihasili, ma Onesimo 'inuwasam, ta 'itoehila 'ina hada.

‏ Philemon

Loyauwedo

1Yauwedo tasigu Pilimoni, 'owa Yesu Keliso 'ina topaihowa 'aigeda, gide taugu. Ma taugu Paulo deliya bo'i silagugauwa Yesu Keliso 'ina paihowa weyahina, ma bewa Timoti 'i'abihetegau ta bewa 'ino leta 'aleleleleyawa. 2Ma 'ima helau mabwaiyami 'oimiya, 'owa ma nuhudai Apiya ma tasidai Alikipo, tauna ba'idada tahehetapewa Yesu Keliso 'ina paihowa weyahina, ma wete 'ima helau tohekalesiyao mabwaiyadi taudi 'ino hada silolotapwalolo 'oidiya. 3Cida Bada Yesu Keliso ma Tamada Yehoba 'idi helauwega tuwa wamiya yaliyaya.

Pilimoni mumugana bwebwe'ana

4Wasau yahesagoha pwaiya beno 'ino helau ma 'ino hemisa 'ida Bada Yesu 'oina, ma 'ana tomuliyao mabwaiyadi wete 'oidiya, 'oinega tuta mabwaiyana 'igu 'ahwanoi 'oidiyega ma'igu loyauwedo, Yehoba 'oina weyahiu. 6Nuwanuwagu ma 'ida he'iya'iyagu Keliso 'oinega 'ida 'abihewaiwaiyego ma wete ginaula mabwaiyadi bwebwe'adi Keliso 'oinega silatulatuma 'uda sanapudi. 7Tasigu, 'ino helauwega tohekalesiyao 'u'abihetediya ma 'adi lotohona 'i'abihe bwebwe'aneya, ma 'ino helau ta wasau bwebwe'ana yahesagoheya, ta yayaliyaya madouna.

Paulo nuwanuwana ma Pilimoni 'ida tagwale Onesimo 'oina

8Nuwanuwagu ma helauwega ginaula 'aigeda 'upaihowa. Taugu Paulo, 'ino bada, ma deliya yamiyamiya Yesu Keliso weyahina, 'oinega sawasawahigu ma Keliso saninega yaloinego ma ginaulaina 'upaihowa, ma tuwa hesi, helauwega yahegwaego, 10beno ya'ahwanoiyego natugu Onesimo weyahina, tauna 'ima miya deliya 'oinega ya'ahwa natuneya, 'ina hemisa Keliso 'oina weyahina.

11Mwalo loheyaina Onesimo 'ino paihowa 'oiuwa geya bwebwe'ana, ma bewa 'inuwabuiya ta 'ina paihowa 'oiguwa bwebwe'ana, ma wete yasanapuya mumugana weyahiu 'ibwebwe'ana pwaiya. 12Coinega Onesimoina yahesumana hileyawa, ta ma'igu nuwagala, 13weyahina nuwanuwagu yanuwahi ma tauna 'ihesuwahego ma 'i'abihetegau 'igu miya deli 'oina. 14Ma nata geya yanuwanuwahi, weyahina 'owa 'ana toloina. Ma wete nuwanuwagu 'ino tagwala 'oiguwa helauwega 'upaihowa ma sahena 'igu he'i'ima 'oinega.

15Nuwana bewa tauna huhuna ta Onesimo 'i'ebesinegowa tuta muhemuhena tuwa, ma 'eguma 'ihilawa nata ba'idau wamiya hataya. 16Mwalo tauna 'ino topaihowa, ma sauga bewa geya 'abehega 'ihetopaihowamo, ma tauna wete ta'ahwa tasine Yesu Keliso 'oinega. Tauna bo'i ya'ahwa tasineya, ma 'owa 'ilobwainegowa ma 'u'ahwatasina moisa, weyahina tauna 'ino topaihowa ma wete tasiu 'ida Bada 'oinega.

17Pilimoni 'owa ma taugu ta'ahwa tasineya, 'oinega 'agu helau 'oiuwega, 'eguma yahapwesawa, gide wete Onesimo 'utoehila. 18To'aha gide mwalo 'ina pui, nana 'ana haga 'ulagu, 'abwa taugu yahemaise. 19Taugu Paulo bewa nimaguwega yalelelele 'abehega mabwaiyana yahemaise hegumwali. Ma hesi sahena 'a haga 'oiguwa weyahina yagwaegwae, beno mwalo taugu 'igu paihowega ta yaluyaluwau 'i'ehau pwaiya. 20Cae tasigu, nuwanuwagu ma Keliso saninega Onesimo 'uhelauwe, ma 'ina pui 'unuwasam, beno 'abihetena madouna 'oiguwa, ma 'ane 'agu lotohona 'ibwebwe'ana mabwaiyana. 21Cigu nuwatuhu bewa yaleleyawa, ma'igu hemisa ma 'abehega 'igu gwaeyedi 'uhesagohedi, ma 'umuliyedi, ma wete 'u'abihemadou.

22Ginaula 'aigeda wete nuwanuwagu, beno 'igu 'ebe'eno 'ino hada, 'u'atububu, weyahina yanuwatuhuya 'abehega 'ino 'ahwanoi Yehoba 'oina 'oinega ma muhemuhena ma deliyega silihasigau ta yatauyawa 'oiuwa.

23Epapila ba'idagu Yesu Keliso 'ina paihowa weyahina ta deliya silagumaiya, ma Epapilaina 'ina helau 'oiuwa. 24Gide wete taudi ba'idagwao 'apaipaihowa: Maki ma Alisitako ma Dimasa ma Luke, 'idi helau wete 'oiuwa.

25Cida Bada Yesu Keliso tuwa yaluyaluwau 'ihehelauwe ma 'umiya bwebwe'ana.

Taugu Paulo.