Rev 19 | BEF | STEP | Ya hulago nani kokulumagu bona'magihi li gehesa sipi'alo enali nogo'ani napa keheli'ohuna. Enali ma lite li'ahana: Hu'mamofihi fokehi lilo. Lubuto bise nasana to sekele mamu'a hiti fana meha'a to amuya'a legege huto mino'ehinamo ya'ma Hu'mamofihi aitogago ni'ibe.

‏ Revelation of John 19

1 Ya hulago nani kokulumagu bona'magihi li gehesa sipi'alo enali nogo'ani napa keheli'ohuna. Enali ma lite li'ahana: Hu'mamofihi fokehi lilo. Lubuto bise nasana to sekele mamu'a hiti fana meha'a to amuya'a legege huto mino'ehinamo ya'ma Hu'mamofihi aitogago ni'ibe. 2 Ai'a kaga loko nohina'a bati huto lama'na ka lise'namo ni'ibe. Mokolo a'i sipi ai noto noto bona'i moko lise'na hapi fito epito enele'mo sibina hulata hu'ehina ai foipana pa soto osahi emi'ehina. Ya nohuto Hu'mamofihi pana'alobo'a enoho fili'ahanamagihi golapo kumu aitoga mino'ehina ya'ma ai osahi emito apa so su ho'ehibe lite li'ahana. 3 Ya lite lilete Hu'mamofihi fokehi lilo lite aku'i lite sipi hepa'i Bebilonitogati logo lokiya'a tiba tiba huto mino lito buto minalina'mu yabe, lite li'ahana. 4 To olopa kaba bona'i luga'a 24 to kene'i amuya moloto minolatana loebe loebe enalapusa fite Hu'mamofihi sekele mamu'a hiti kefa hisalo mino'ehina ai'i fokehi lite ma lite li'ahana: Lama'naka yabe. Hu'mamofihi fokehi lilo.

Hu'mamofihi sipisipi nala'amofihi ya'ma a'i li emi'ehina ka'a

5 Ya hulago sekele mamu'a hiti kefa hisa ni'ina kegi'agati nogo mone ma luto huto hu'ehina: Hu'mamofihi kele kele yagapana'a lenali ya'ma agoya hi emilo. Limite nehana tite nehana silaga'i koli'a hiti kehelite minelata hi'ahanamo ya suhi hite fokehi lite minalo. 6 Ya lite lago nani bona'magihi li gehesa yamagihi enonogo sipi aku'i keheli'ohuna ya'ma nagami'i lisahi sipi suhi huto ito kokililika suhi huto noligo ka sipi ma luto huto hu'ehina: Hu'mamofihi fokehi lilo. Sipi Bomo Hu'mau amuya enebe ligi'ehina boti ai kibina bomofihi foya'a huto hu lamana nohibe. 7 Ya hu'ehina'mu lali legelo bito komopatigu bati hinogo kehelito gi'a liyafa huto le'mo ho tilune. Hu'mamofihi sipisipi nala'amofihi a'i le'mo emilina kana'a ma'asi heneti'ehibe. Enali ai liha'a lolo hilune'mu le'mo hetofa hi'ahabe. 8 Enali liha'a koholi gukete gulu gulu ho'ehina Hu'mau emi'ehina'a i kololo bi ete'ahana. Ya'ma kata i kololo bi'ehina'a Hu'mamofihi bona'amagi foya lamana'a li'ahanamo ni'ibe.

9 Kaga ya luto huto higo agelouba kaga mone ma luto lu nimi'ehina: Kai ya huto fayahi koyobo. Hu'mamofihi sipisipi nala'a ya'ma a'i le'mo emilina kana nose'na nalabe luto elesa molo epi'ehina bona'a enali kehelilabe luto lenofokehi lilo. To mone hiti lu nimito ma luto lu'ehina: Ka nokelepuna ya'ma Hu'mamofihi ka legeya'amofihi lamana'a lu nokumube. 10 Ya luto lu nimigo nalapusa fito lipi emilube luto nohugo o'e noluto ma luto lu'ehina: Ya melubo. Nani kele kele bo kalalukafita kigiboka Yesu lu hokolo hu'ehina ka'a li pili kete lilata nehana bo enali enalalu'anifita nohube. Kai Hu'mamofihi aigo ya'ma lipi emilane, luto lu'ehina.

Yesu lu hokolo hu'ehina kauba mono ka leli'ali bona'i enele'mo babahi higo mono ka lilata hi'ahanamo ni'ibe luto lu'ehina.

Koholi hosi yagamofihi megesa'alo mino'ehina bomofihi ka'a

11 Ya noligo nani nubu bu golago buto kokuluma hokolo nohigo hosi yaga koholi mone bu go'ohuna. Ya nohugo megesa'alo mino'ehina ai gi'a keheli ule'ale huse lina'a huto minolata hu'ehina to lama'na ka lulata hu'ehina yabe. Ai kaga'ani loko hilata foya to luba'a hiti foya li sibi mehuse fotogo huto bo lilata nohibe. 12 Bu'a luga luga ya'ma logo guluya mehi suhi huto mino'ehina. To lataha'alo ya'ma sipi bomofihi kakili'a babu luto bi'ehina. To gi'amofihi fayahi gobisalo mino'ehina ya'ma ai'ago leka soto kehelilata nohibe. 13 To i kolo bise gu'a ya'ma golahi fele ete'ahana to gi'a Hu'mamofihi bagaguti ka'alo mino'ehina bomo yabe lite mele'ahana. 14 Ai nobigo kokulumagu gimi hiti bo li gehesa sipilo gukete'ani koholina fayaha'a hiti i kolo bite nehite hosi yaga koholi'aloko tite minelete mege'i melete ya'ma bi'ahana. 15 Bagaguti ya'ma emita'i mone yatamalo sage'a limito mino'ehina anatu ya'ma noto noto bona'i enohoto enebe ligilibe. To aeoni fatusa mone li'ohuto kaba hu epalalube'mu hibe to enali ya'ma bai nagami'i legeya'a i sala kolenogo nogoya'a limilata ya suhi huto Hu'mau amuya bo ai ita bise gofana laga mehinana'a li huto huto foipa bona'i i sala ko epoloto suhi huto pa solata foya lilube'mu hibe. 16 I kolo bise gukete'alo to lu'alo melete ya'ma gi'a fayahi ma lite keye'ahana: Kigihiti bo kai asaga enigihiti bona'mofihi afo'anigi to kibina bo kai asaga enikibina bona'mofihi afo'aniga nohane luto koyoto molo'ehina.

17 Ya hulago nani nubu egolago buto agelo mone yegelo nohigo bu go'ohuna. Ai yalo nohuto nama hokolo kapogu helete bila ela nehago asagatoga ka sipi luto kehe i epito lu'ehina: Hu'ma logo efahi sipi nokayanagihe. Ete li gehesa hilo. 18 Ya nehite enigihiti bo enali'i enugufa meme'ani to luba kaba bomagihi enugufa meme'ani to gimi bomagihi enugufa meme'ani to hosi yagamagihi hiti enemegesalo mine'ahanamagihi enugufa meme'ani to yege yege bona'i hiti kele kele panana'ani to nagalugu minete to fa'mene minana'a to tite nehana'a limite nehana'a enali enugufa meme'ani nalabe luto lu'ehina.

19 Ya luto lulago nani akafu yagakafa to noto noto bomagihi gihiti bo'ani to luba bona'ani gonamu tamu'a ete li gehesa hite nehago bu go'ohuna. Enali ya'ma hosi yaga koholi'aloko mino'ehina bo ai hiti luba yagapana'a gonamu tamu'a hiti luba enahalune lite heneti'ahana. 20 To akafu yagakafa ai hiti to faga faga mono ka loli'ali bo ai ya'ma akafu yagakafamofihi bulo topa hose nasana suhi huto li'ehina bo hiti naga'i etimi'ahana yabe. Ya'ma faga faga mono ka loli'ali bo ai koyapa'i akafu yagakafamofihi meha'a enalapusa fi emi'ahana bona'i to akafu yagakafamofihi omiha'a enogobisalo fayahi ge'ahanamagi hiti topa hose foya'atu enali'i komopa'ani le'mo sibi sibi hu'ehina. Yana bo hiti to akafu yagakafa hiti enele'moto logo'a hiti nagami hefunugu kala efahi logo loto nohinagu ya'ma he'mi etatogo mefilise hite limi'aha'ina. 21 Limila'igo luba bona'atitimofihi ya'ma hosi yaga koholi'amofihi megesa'alo mino'ehina ya suhi huto baga'aguti emita'i yatamalo leke ho limiloto enoho gehesa hu'ehina. Ya hulago asaga namamagi henetite enugufa meme'ani nete nete neenumu hi'ahana.