Matthew 1
Yesus em Awalik Kumel im Wiin te.
1Kale, ^Mesaya Yesus em awalik kumel im wiin te. Yesus e Debit em angin kelei, Debit be Abalakam em min dow ete te. a2Beem sang e kanekote:
- Abalakam e Aisak em alew kese kale.
- Aisak e Sekow em alew kese kale.
- Sekow e Suda so akalem awkunum kumel so im alew kese kale.
- Sekoyakim e Sealtiel em alew kese kale.
- Sealtiel e Selubabel em alew kese kale. b
Kesomeliwi, Debit teleko, Suda kawtiw i Babilon abiw mutuk fian kalo unsiliw ding kabalak e, bakati mutum kel dow kesiliw kale.
Keliwi, biim Babilon alenaliw ding teleko, Malia um ^Mesaya dukusu ding kabalak e, it mutum kel dow kesiliw kale.
Malia um Yesus Dukusu Sang te.
18Malia um Yesus Kulais dukusu sang e kanekote: Kunum mak em wiin e Yosew alenale kale. Kunum be Yesus em auk Malia ulo tonol keumeko, “Kuloki te!”, wangeko, alenale kale. Keko beli, alew bi kule kule kelinba ke alenaliw ding kabalak e, Sunbin-Finik em kitil e waneng buulo aul kumun keumse kale. c 19Keumei, Yosew e watemete: “Ai! U aul kumun kelu kai!”, angeko, koumomin ibolow kese kale. Koumomin ibolow kese kate, Yosew e kiol kuw kunum ke alenale kasike, e kawtiw im kiin dim e “Mesik u inkal keloku kai!”, angomelei, yawal keko, koumomin ibolow memen kese kale. 20Keko beli, Kamok Fian em dabalakamin finik mak fiteweko, kiin dem sin bokolewomele: “Wee! Yosew, kamok fian Debit em angin kutaka! Ku kanelom finganemokolew te! Sunbin-Finik em kitil e Malia buulo aul kumun keumbe kasike, ku waneng buulo kame kulolewka! 21Ku kilele kilila! Auk bu kunum aul mak dukuloku te. Dukului, beem wiin e 'Yesus ▼▼1:21 Yesus em wiin e mongom so te. Beem mongom e kanekote: “Sunbin-Got e num kuankemin kakabuluw deiw be okileweko, sunsun finik so kulomin deiw dim kel koyemkabe te.”
!' dangolewka! Nimtew angom? E teleko, akalem angin im ibolow sili sili kukuw beem kuankemin deiw okileweko, finik so deiw mo koyemomin deiw kukuyemoke kasike. e22Feinka! Sunbin-Got em bontem dim bakamin kunum Aisaya em sua em bokose weng e kame dem gilako, fein ki keloke kasike. E bokoyemomele:
23'Waneng seiw mak kunum so akalinba waneng mak aul kumun kesomi, aul dukuloku te.
Dukului, kawtiw i aul beem wiin e 'Emanuel' dangokoliw te.',
yangse kale.”, angeko, Yosew elo dangse kale. 'Emanuel' beem mongom e kanekote: 'Sunbin-Got nuso be te!' f 24Keko beli, Yosew e baba teineko, Kamok Fian em dabalakamin finik beem dange weng be fein geleweko, Malia ulo kuluse kale. 25Kulusomelei, auk buum kumun kebu ding kabalak e, Yosew e uso kal bonggulinba kese kale. Kesomi, um aul dukusu ding kabalak e, e aul beem wiin e “Yesus” dangse kale. g
Copyright information for
BHL