Matthew 22
Wanin Dawol Fian em Fakam Weng te.
1Beli, Yesus e iti fakam weng makso bokoyemomele: 2“Abiil tikin em gawman keloke ding dim e fakam weng kaleem bakatetew keloke te.”, yangse kale.- “Emisik kamok fian mak em min e 'Waneng mak kulo yo!', angse kasike, waneng kulomin ding em mewso kese ding kabalak e, alew e wanin dawol fian mak memen kese te.
- Keko beli, kamok fian beem teleko, 'Ne kunum waneng ka kel wensanbiliw biilo yetemo yo!', angse ding dim bakate, e atemete: Ilim ken minggilinba kunum mak atemeko, elo bokolewomele:
Dasuw Kawtiw im Dakalasiliw em Sang te.
15Beem ding dim bakate, ^Falisi kunum i wensaneko, ikalem dim bokolew bokolew kesomi, bokolomeliw: “Nu nono keko, Yesus em nulo bokoyemoke yan weng beem dulum elote nu elo geelewokoluw a!”, ange ange kesiliw kale. b 16Kesomi, i ikalem yenggelewkabiliw kunum mali so, emisik kamokim Kelot em ken kunum mali iso, alik alik biilo yemdaliwi, i Yesus em mit mewso unsiliw kale. Uneko, elo bokolewomeliw: “Kukuyemin kunum kutaka! Nu kal keluwete: Ku kunum waneng ilo fein weng kuw kukuyemsomi, bakayembelew kunum kute te! Ku kawtiw wiin banim ikal, wiin so kawtiw ikal, alik alik ilo diwkuw diwkuw fein weng kuw bakayembomi, Sunbin-Got em fein deiw kukuyemkabelew kunum kute te. 17Kasike kame, ku kom ibolow fukunin be nulo bokoyema! Nu Ulom em emisik kamok fian em sawa weng geleweko, elo kisol anung mak dukalewbokoluw, beni ba?', kangeko, dakalaluw te.”, dangsiliw kale. 18Dangiwi, Yesus e ikalem ibolow fukunin wa wa be atemeko, kal kelete: 'I funum funum kenembiliw kai!', angse kasike, e ilo bokoyemomele: “Fimdi famde kunum yutaka! Nimtew angom ete yu nelo dasuw kenemeko, kiskis konem kebiliw a? 19Yu uneko, tum win on kisol mak de teleko, kalenemina!”, yangse kale. Yangei, i uneko, fein, tum win mak de talsiliw kale. 20De teliwi, Yesus e ilo dakalalomele: “Yu tum win dim beem dukusiliw kiskiw be atemeko, kanem kiskiw so, wiin so be nangeko, bokonemina!”, yangse kale. 21Yangei, i yan weng bokolewomeliw: “Ulom em emisik kamok fian eteka!”, dangsiliw kale. Dangiwi, e ilo bokoyemomele: “Kasike, yu Ulom em emisik kamok fian kebe beem eisneng dukalewbokoliw kate, Sunbin-Got ete kuw akalem eisneng beelo dukalewboliwka!”, yangse kale. c 22Yangei, i em yan weng beem dulum elote yol yol angesomeliwi, sak kolewsiliw kale.^Satyusi im Dakalasiliw em Sang te.
23Beem ding dim bakate, mali ^Satyusi kawtiw mak teleko, Yesus elo funum weng mak bokolewsiliw kale. Satyusi kawtiw biim ibolow fukunin e kanekote: Mali kuansiliw kawtiw i finik so keko, nam iti baba teinokoliw te!', angakabiliw kawtiw ite te. d 24Kame, i elo funum dakalamin mak bokolewomeliw: “Kukuyemin kunum kutaka! Moses e nulo kukuyemin weng mak dukuko, bokoyemomele: 'Kunum mak aul banim keko, kuanei, kuanse kunum beem awkunum be awkunum beem kalun kayak kasike, e kalun waneng buulo kuluumoka! Kuluumei, yemkal i aul mak dukuliw tewe, aul be kuanse awkunum beem aul keloke te.', yangse kale. e 25Kame, ku num mutuk dim kanese sang be kilila! Kunum ben kel yangmel i bisiliw te. Emisik e waneng mak kuluse kate, aul banim keko, kuanse te. Kuanei, auk teben awkunum be kalun bu kuluko, 26aul banim keko, akati kuanse te. Kuanei, yemamas kel awkunum akati kalun buulo kuluumeko, aul banim keko, kuanse te. Alik alik ben kel awkunum bi waneng buulo kulusiliw kate, aul mak dukulinba kesomi, dow so banim keko, kuansiliw te. 27Kuaniwi, fe e, waneng kalun bukati kuansu te. 28Kame, kuankemin kawtiw im iti yemkalfolokoliw ding dim kabalak e, waneng bu kanem kalel keloku ye? Nimtew angom? Kunum yangmel ben kel alik alik bi ulo kulusiliw kasike.”, dangeko, funum weng be Yesus elo dangsiliw kale. 29Dangiwi, Yesus e ilo yan weng bokoyemomele: “Ibolow so benesiliw kunum yutaka! Yu Sunbin-Got em fut tem kayak bose weng so, Sunbin-Got em kitil so, alik alik be atin kuw akokow kebiliw te! 30Sunbin-Got em kawtiw ilo yemkalfoloke ding dim e, kawtiw i nam kunum waneng kulew kulew kemokoliw te. Nimtew angom? I Sunbin-Got akalem yemdakamin finik imdiw kelokoliw kasike. 31Kate, yu kilele ibolow fukunina! Yu Sunbin-Got em bokoyemeko, akalem fut tem bose weng be teing bokolinba kebiliw a? E yukalem sua sua kel alenaliw aliwol kumel im dulum elote bokoyemomele: 32'Ne Abalakam so, Aisak so, Sekow so, yelimel biim Sunbin-Got nete te!', dangse kale. Dangse kate, Sunbin-Got e kuansiliw kawtiw im Sunbin-Got bate! E finik so biliw kunum waneng im Sunbin-Got ete te!”, yangse kale. f 33Yangei, kawtiw ka biliw kawtiw alik alik i em kukuyemse weng be kiliko, yol yol angsiliw kale.Emisik Sawa em Weng te.
34Beli, Yesus e ^Satyusi kunum biilo yan weng ken ati kuw bokoyemei, i weng banim keko, bontem net keyemsiliw kasike, mali ka biliw ^Falisi kunum i bongguko, Yesus em mit mewso talsiliw kale. 35Telesomeliwi, im mutuk ka be Sunbin-Got em kukuyemin sawa weng em kak kunum mak moko, Yesus elo kiskis weng mak dakalako, bokolewomele: 36“Kukuyemin kunum kutaka! Nalem Sunbin-Got em sawa weng e mali ilo bakileweko, emisik sawa be ya?”, dangse kale. 37Dangei, Yesus e yan weng bokolewomele: “Ku kukalem Sunbin-Got Kamok Fian elo ibolow mutuk fian dulewolewka! Kukalem finik so, ibolow so, fukunin so, alik alik be bongguko, Sunbin-Got em dim kuw fewtoko, kolew bolewka! g 38Be emisik fian sawa angse weng bete te. 39Kate, mali sawa mak beemdiw atin kuw fian ete te. Kukalem ibolow mutuk fian e kukalem dim bikembe beemdiw, yom mewso biliw kawtiw mali ilo ikati ibolow mutuk fian kukuyem kemolewka! h 40Sawa weng alew kale kilele aluwbew tewe, sawa weng biso, Sunbin-Got em bontem dim bakamin kunum im bakabiliw sawa weng biso, alik alik sawa bi bongguko, bikati aluweko, fein gelewbelew te!”, dangse kale. i^Mesaya e kante?
41^Falisi kunum biim bonggusiliw ding bakate, Yesus e ilo dakalalomele: 42“Yu nimtew ibolow fukuniwete: 'Sunbin-Got em ^Mesaya e kante a? E kanem mulkis ete?', angeko, ibolow fukunbiliw a?”, yangeko dakalase kale. Dakalalei, i yan weng bokolewomeliw: “Emisik kamok fian Debit e Mesaya em kunum mongom keloke te.”, dangsiliw kale. j 43Dangiwi, e bokoyemomele: “Kate, nimtew angom ete emisik kamok Debit be Sunbin-Finik so gekeko, Mesaya beelo bokolewomele: 'Nem kamok fian kutaka!', dangse a? Nimtew angom ete e Mesaya beem dulum elote bokolomele:44'Sunbin-Got Kamok Fian e nem Kamok Fian elo bokolewomele:
'Ku nem yuk teing kitil so dim kel teineko,
ding fensomelewi, ne kom maka ilo yemdalii, i teleko,
atin kuw kom kitil afak kel teinokoliw te.',
dangse te.',
Yu ibolow fukuniwete: Nimtew angom ete e angse weng be bokose ya? k 45Yu kilele ibolow fukunina! Sim Fut kale kel, Debit e Mesaya elo 'Nem Kamok Fian', dangse kasike, Mesaya esik nimtew angom ete 'Debit em mulkis te!', dangbiliw a?”, yangse kale. 46Yangei, i ki keko, weng yan weng mak bokolinba kesiliw kale.
Beem ding dim uneko, belei, mali kunum mak i finganeko, elo iti dakalakamin weng mak dakalalinba kesiliw kale.
Copyright information for
BHL