1 Corinthians 3
Aiqámausa Ánutunaindi kai máridaqa.
1Óo Koorinti máqannaasa qiní qíkaqaafasaa óoqai qinée ínni maqúsai máriaafanausa, ínnee sía maraquna faqaasara foora faiqí faiqi íriranamau fímarufaqa qinée sía maraquna íriramau ínni qímannimiqiafana. Ínni írirafa maa-maqa maaqánasaaqaraa írirafa ínniki márinara Yísuna saqárikiranaki ínnee sía faiqíara foora máriafanoo faiqi ánaaqiara foora aamína máriafanoo. 2Ínnee sía faiqíara foora máriafanoo faiqi ánaaqiuqa írirana fooqáasa márufaqa qinée sía nárana uqanna nímiqiafana náammara foora ínni nímiqiafana, ínnee nárana uqanna sía amanaíkufaqa ninúqiqiafana. Dóo maqee áukuana faqa sía amana ínnee nárana náaqaa ínoo máridanoo. 3Ínnee maa-maqa maaqánasaaqaraasa naanna rée maríasa áaqaida miqímarifanoo, ínnee naríara naríara rairai qídaqa ufa rainée márianannái maa-maqa maaqánasaaqaraasa naanna rée maríana áaqarafa kooroo ídanoo. 4Ínnikiqari Koorinti máqusanaa Yísuna ufara suqímariasakiqari moó fannoo qinée Pauroona áiku ásauku márida miná ufamau fída fee qídanoo kafáa moó fannoo qinée Apooroosana áiku ásauku márida miná ufamau fídee qímasaida áaqaida miqí qímariafanoo sía fee mi-oosanáfa ínnikina maqásaaqaraasa naanna rée maríana kooroo ídanoo fee. Dóo kooroo ídanoo.5Apooroosa faqa Pauroosa faqa maaqandá úriqararaqandee máridee sía úriqararaqanda márisa máridaqa. Maaqandá fífau Ánutuna aináinira fasiqaqara kai máridaqa, ínni rarisámeeqee Yísuna saqárikiranaki quqée maríaqanda kai máridaqa. Maaqandá karaambáiqa saiká áadu áadu nímimarunnaqanda kai máridaqa.
6Qinée Koorinti máqusai ínni íriranaki qaqammara foora aaqásaafananoo Apooroosafa anirée nammáriara foora adíasoofanoo Ánutufa kambíqarana áminau. 7Aaqée mari fasiqafa faqa nammári adíee mari fasiqafa faqa kái fífau máridanoo, Ánutufa kambíqarana ámufa mifá ánoona máridanoo.
8Aaqée mari fasiqana saiká faqa nammári adíee marí fasiqana saiká faqa amana amana kái máridanoo. Ánutufa náadu náadu narí aináini marína ákiaqara feefaurú kásooqaqee nímiannoo. Maaqandá moodáanaki Ánutuna aináiniranaki máridaqa aináinidaqa ínnee áfuqa qámbaanai Ánutuna aináinirafa máriafanoo. Qinée Pauroosa moo áinaina kíkiqa úsuanaura, ínnee Koorinti máqannaasa Ánutuna máaqa máriafanoo. 10Ánutufa máaqa usakée maría iriranna qiní qímusa máridaqa máaqa usakárana akoofása qinée faakána faqa máaqa atuna faqa arusáunanoo moó fannoo asáanidanoo. Qinée andeeqásee máaqa atuna arusáunanoo moó fannoo sía fífau máaqa asáaniannoo andeeqée mari fasiqafa íreeda ámiqimaseenoo kai máaqa asáaniannoo. 11Ánutufa narí ásauku mundírana Yísuna dóo moodáa faakana narí máaqaki rakíqeenoo, sía amana moo fáakana rákiarafa máriannoo dóo mifá kai máriannoo. 12Óosana óosana máaqa usakée maríasara foora máridaqa akaqáusa ámiqimasee faiqí ánaasee dadaaqídaqa mapukú nímaqaidaqa, akaqáusa sía ámiqimasee mapukú nímaqaidaqa moó fannoo kóora fooqáa íranannai máaqa ásaanimarifa ámiqirafa máaqa ásaanimarifa máridanoo, moó fannoo miná óorudupirana siruáannai máaqa ásaanimarifa máridanoo. Moó fannoo miná óorudupirana firaa munnimma áqimaria oonínannai ásaanimarifa máridanoo. Moó fannoo miná óorudupirana saqárinnai ásaanimarifa máridanoo. Moó fannoo miná óorudupirana eeféedannai máaqa ásaanimarifa máridanoo. Moó fannoo misá óorudupirafa fiáarúnnai máaqa ásaanimarifa máridanoo. Ínni Koorinti máqannaa Yísunara qímannimiqa máaqa atuna rakíqannimaqaannee qíafanausa máriafanoo máaqa ásaana ímariasara qúnnana misá miqóoqari ínnikina ookáamandee máaqa ásaanara foora moó faqa moó faqa qídaqa. 13Ásauku mundírafa qúmuaninna aukuannai máaqa ásaanira óosana aiqámausa nífusaa kooroo íannoo. Mi-faasaannána Ánutuna idá fannoo aiqáma fasiqa aináinirana qámafinoo kooroo íannoo. Mi-idáfa aiqámausa aináinirana amanamándainanoo miná ánoona kooroo íannoo. 14Faiqí moó fannoo máaqa atunasáa ookáamandee usakée marína idá sía qáma taikásainanoo Ánutufa miná qáfamaseenoo mi-fasiqánara ámiqimmandee usakée foo qímasee feefaurú ámiannoo. 15Faiqí moó fannoo mandáinainannai usakée marína, idá qáma taikásainanoo sía feefaurú ámiannoo. Mi-fasiqáfa mifá káqisámu innaarunai asumu máriranaki fúannoo máaqakiqari ráudamakinoo idáuru ánaaqi aináina sía úqirafa káqi sandáannoo.
16Ínnee maaná íridee sía fee íridee ínnee Yísuna ufara suqímariasa Ánutuna amaana máqara foora máriafanoo, Ánutuna maraquna fannoo narí máaqara foora ínniki máridanoo. 17Moó fannoo Yísuna ufa suqímarinanaki misá raiqára úfee óosana óosana mandá ufa níminaqa raindáanifánoo Ánutuna máaqara foora rapée ínanoo Ánutufa mi-fasiqána kurídisaannoo. Ánutuna amaana máqa náaquqarafa ánukarafa máridanoo ínnee misá mi-maqáfa máriafanoo.
18Sía moó fannoo narí narí ákaru qíannoo. Ínniki moó fannoo naríara maqásaa fasiqaki írirana faqasee qímarifa narí maqásaa irirana amooídanoo sía ánoona írirana fáifa, mi-fasiqáfa naríara uréeqafinoo reendeenámafinanoo miqóo amaná ánoona írirana óosana áraannoo. 19Maqásaa fasiqauqa íriranee qímariana Ánutufa minára fúrufara qídammiafoo qídanoo. Óoqeenáa tamummaqara fasiqa minára maaqí qímasee ákara rínau.
Ánutufa írirana faqaasa qumáree nári firaa iriranaki ufaanakíara foora náridanoo.
20Tamummáqarafa moó fannoo minára maaqí qímasee ákara rínau.
Karaambáiqa firaa irirana faqaasa íriranara fífau ainaina máridanoo fee qídanoo.
21Ínnee Koorinti máqannaasa minára irisée sía moó fannoo faiqí írirafa áfeekainainara irisée amooqíannoo. Ínnee Koorinti máqannaa Yísuna ufara suqímariasa káaqa rakéekaamásee akaqáusa Pauroosanaindifée qídaqa akaqáusa Apooroosanaindi fee qídaqa akaqáusa Peetooroonaindi fee qídaqa áaqaida miqí qímariafanoo. Ínnee sía misáindi máriafanoo misá ínnindi máridaqa. Aiqáma maa-ainainná ínni dadaaqí marí ainainausa máridanoo. Pauroona faqa Apooroosana faqa Peetooroona faqa maa-maqa maaqáfa faqa káqi márirana faqa kúqirana faqa maqee máriana faqa náaru márinnana faqa aiqáma maa-ainaináusa ínni dadaaqí marí ainainausa máridaqa ínnee ásauku mundíranaindi máriafanoo kafáa ásauku mundírafa Ánutunaindi máridanoo. Ínnee minára irisée fífau ámmuqundari qídaqa Pauroonaindi fee Apooroosanaindi fee Peetooroonaindi fee qímariafanoo Ánutunaindi máridammia.
Copyright information for
BJR