2Th 1 | BJR | STEP | Ínnee Teesaroonika máqannaasa Ánutuna ufa írimariasa ínnee maasá qíkoona Ánutuna áiku ásauku maqásaa fasiqa anaasee máriasa Ánutuna ásauku mundírana karaambáiqa Yísunaindi faqa máriasa qinée Pauroosa ínni ákara rúmannimaqaidaqa, qaara fasiqa Sirasisa Timootisa faqa ínni ákara rúmannimaqaidaqa.

‏ 2 Thessalonians 1

1 Ínnee Teesaroonika máqannaasa Ánutuna ufa írimariasa ínnee maasá qíkoona Ánutuna áiku ásauku maqásaa fasiqa anaasee máriasa Ánutuna ásauku mundírana karaambáiqa Yísunaindi faqa máriasa qinée Pauroosa ínni ákara rúmannimaqaidaqa, qaara fasiqa Sirasisa Timootisa faqa ínni ákara rúmannimaqaidaqa.

2 Innaarúnai níkoona Ánutuna faqa Ánutuna ásauku mundírana karaambáiqa Yísuna miqandá káqi nári áfaarirana faqa nári naundurá asooárana faqa ínni nímiani.

Yísufa kafáa qumuréenoo Ánutuna ufa rukíee maríasa náruannoo.

3 Óo qiní qíkaqaafasaauqa maasá ínniara maqee maqee Ánutufinai dúfi dúfi qímamaqaidaqa. Ínnee Yísuna saqárikirafa firaaqóo kambíqainara iriséeqa sía minára dúfi dúfi qiana áaqaannoo. Ínniara Ánutufinnai dúfi dúfi qímarunafa andeeqáidanoo. 4 Ínnee Teesaroonika máqusanaasa Yísuna ufa írimarianasáara nárírana faqa óosana óosana aupúrarana faqa káqi máraqa fímariana faqa Yísuna ufa káqi íriqa fímarianara faqa iriséeqa máaqanna máaqanna fídaqa ínni ámiqira óosanara amaana máqaki kéeqee máriasa qímannimidaqa qeeqá qimooqídaqa.

5 Ánutuna andeeqára náríra ufa ánoona kásooqaqee maaqí qímasee kambíqaannoo, ínnee maqee Yísuna ufasáara aupúrarana máraqa fímariana ákiaqara kásooqaqee maaqímminoo máriannoo. Mi-aupuraráfa Ánutuna márira ququsaki kéeqarana amanaikámma nímaqaannoo. 6 Ánutufa narí andeeqára óosana maraséenoo ínni aupúrararana nímimariasa miná ákiaqara nári faqa aupúrarana nímiannoo, ínnee miná ufasáara aupúrarana máreemariasa asooárana nímidanoo maasá faqa nímiannoo. 7 Karaambáiqa Yísufa innaarúnaindari narí afeekafaqáa qángiroo námufaqa idá aurunamu faqa koorooíra fáasaana asooárana maasá nimiséenoo aupúrarana misá nímiannoo. 8 Miqímmandee kooroomáfinoo Yísufa Ánutunara sía írimariasa faqa maasá karaambáiqa Yísuna ámiqira fasaasa ufara níkoo nikaa ímariasa nárírana nímiannoo. 9 Yísufa náaru náaru taikárana misá níminaqa náaru náaru karaambáiqa máriqooqari níanai náadumasaa máridaqa sía miná aréenara afeeka qáfeefaranoo. 10 Mi-faasaannásaa Yísufa maasá faqa aiqáma narí áiku ásauku amooqírana írirara qúmuannoo, aiqáma miná ufa írimariasa náaquqarana faqa márarara qúmuannoo. 11 Maasá mi-ainaináfa kambíqaaninnanara iriséeqa maqee maqee ínni Teesaroonika máqusanaasara innaaru qídaqa Ánutufa ínni naundurái naakápaifaqa miná ufamau uqéerara aatata fímariafanoo minára qídaqa. Ánutufa ínni dadaaqínaqa ínni márirafa nírafa uqéerara áana amana kái fuaqéera innaaru qídaqa. Ánutufa narí afeekannái ínnee Ánutuna ufamau fíranara ámiqiranee qímariana ánoonaikiani, ínnee miná saqárikira saika faqa ánoonaikiani. 12 Ínnee miqífaqa aiqámausa ínni andeeqárana qáfamasee Yísuna áuqu aréenarana amooqífanoo Yísufa quandáfi ínni nimooqíannoo, Ánutufa faqa Ánutuna ásauku mundírafa karaambáiqa Yísuna faqa káqi áfaariranannai maa-ainaináfa máriannoo.