Exodus 27
Ínnee aandáu tatúfi fandinna qáindána áuquaqa.
(Rafúdoo 38:1-7)
1Ínnee akasia sáqari marasée minánnoo tatúfirana suqára qainda áuquaqa. Miná kísaaqandanai faqa qúsandanai faqa amana amana kai mariani 2.2 metres. Maqásaaqari úrirafa qaara faqa qaara faqa áiku 4 amana 1.3 metres máriani. 2Miná qaara fáqa qaara faqa átisaa aanaira foorá áuqinoo máriani. Tatúfira qáinda moodáa saqari fannoo kai átimau faqa qámbaanai faqa aanai faqa moodáa saqarinnái kai áuqusaifanoo máriani. Mi aiqama ainaináusa booróosannai rafáaqa fuaqa. 3Mi tatufirána suqéemaria qaindanásaa suqée maría ainainausa booróosannai kai áuquaqa. Fadaméena dándaki áqufínnana afaqée mária futufitáusa faqa savóorauqa faqa uqnauríra pirítauqa faqa táfa fooqáa írana áti saaée irana faqa idá áuni afaqée maría futufitáusa faqa aiqáma booróosannai kai áuquaqa. 4Ínnee fukaa ásaana booróosannai áuqusee booróosannai kai ánaanu faqa áuqusee qaara faqa qaara faqa átinni quqáaqa. 5Mi fukaa asaanáfa tatúfira bukisa aundurái kasaaqaí óoqeeqánoo qámbaanai máriani. 6Akasia sáqari tatúfira qáinda qáindusi fandínnana qaaraqandá maraséeqa booróosannai miqandá rafáaqafuaqa. 7Mi qaindána máree fuaqée qífaqa káì mi saqari qandá dínni dínni anaanukí áususaifaqa máree fuaqa. 8Tatúfira qainda indooíra sáqarinnai kai aundurá fáqaana áuquaqa. Qinée áaqanasaa aní uqafíqaa fánandee másee áuquaqa.Ínnee Yáaweena úiqaana máqa fíqu fíqu dápu rakíaaqa.
(Rafúdoo 38:9-20)
9Ínnee ámiqira sánda sufusée áuquqaa qámunnanannoo úiqaana máqasaa quqúsara foora áuqu ititáaqa. Súani afu dínni ataaqeenni South miná kísaaqa 44 metres máriani. 10Mi qamunnána dírifandínnana booróosannai dapu 20 áuqusee mina kúradee fandínnana ámaaqa miqí kai másee 20 áuqusee siruáannai táfara foora mina amana kái áuqusee auníri fandinna sáqarina faqa minánnai kái áuquaqa. 11Súani afu dínni ataaqeenni iandee kái iqa dínni ataaqeenni faqa miqi kái íaqa.12Súani kéeqee marí qaannai dapu qúsándanai 22 metres máriani. Miná dapu sáqari 10 faqa miná ámaaqa áuqirafa faqa 10 kái máriani. 13Kafaa súani óosana qaannai kooqí máru tinai fáqa urúanai inóo márina amana kai 22 metres máriani. 14Súani óosana qáannai East kooqí máriani. Mi kooqína dínni dínni díri fandínna qámunnafa 6.6 metres máriani. Mi kooqína dínni dínni qaarammoo dápu faqa mina ámaaqa faqa dínni dínni qaarammoó kai máriani.
16Kooqíki dírira qámunna 9 metres kísaaqa ámiqira sípasipa asausí dirindáasianda faqa pánnoonanda faqa faéenánda fáqa marasée mi qamunnánasaa óosana óosana ámiqira ákara ruaqa. Mi qamunnána quqée fandínna saqarina qaara fáqa qaara fáqa 4 máriani. Miná rakíqee fandínnana qaará faqa qaara fáqa ki miná ámaaqa áuquaqa. 17Aiqáma dapu fíqu fíqu qírafa siruáannai rafáaqa fúqaa saqárinasaa ootúpanóo máriani. Minásaa qamunna díri fandínnana táfara foo íranauqa siruáannai áuquaqa. Mi saqarísa rakíqee fandínnana ámaaqauqa booróosannai áuquaqa. 18Quqúsa afuqai kísaaqa kamu 44 metres máriani. Miná qúsa kamu 22 metres máriani. Quqúsasaa dírira qámunna miná óorufirafa 2.2 metres maqásaaqari óorufuannoo. Mi qamunnána ámiqira qamunna káqikaa sándannai súfirafa afeeka máriani. Miná dapu óosanaki booróosannai amaaqa áuqirafa maqáki máriani. 19Úiqaana maqaki óosana óosana aináinira áinainauqa aiqáma booróosannai áuqirafáuqa kai máriani. Úiqaana maqa áti mau ápupuka árifandínna aikausa booróosannai kai áuquaqa. Úiqaana máqa dapu rakíqárana qumáraanífee qímasee ápupuka áqoosai faqa afuqai faqa arifandínafa aiqáma booróosannai áuqira ápupuka kaí máriani.
Qóomauqasaa rakísira saika.
(Aanáiqikirana 24:1-4)
20Moosee anée Isaraee máqannaasa qímanniminaqa oorifá sáqari qaqamakínaa fádameena ámiqirana kai mínisaifana aiqáma éendirana minánnoo qóoma qumbíà. 21Áaroonafa narí faiqi námu faqa qiní Anutusa náaquqara úiqaana máqaki moodáanaki kíra búkisa ititée mária qamunna náaquqara óosiranaki qóomauqa quqáaqa. Miqóo qiní qífusaa eendí márinaqa qumbísaifanoo qámammareenoo iáqarana kai raqúru ámiani. Maa naamuaqira ufána Isaraee máqannaasa faqa misásaa ani arua kínausa faqa náaru náaru áfaqaaqa.
Copyright information for
BJR