‏ Genesis 30

1Raseera námmarifa narí ánasaana faiqi námu níndafeenoo Yakooboona áqinoo qinau. Anée faiqì sía qiní mara qímianaqa qinee káqi márianabaqa kúquanauranoo.

2Yakooboofa minára írufanoo árana qoofanóo qinau. Qinee Ánutusau máridau. Ánutufa kai aní ititá ámaqaidanoo.

3Miqí qímasoofanóo Raseera námmarifa qinau. Máà qiní aináini mári manaaqáfa Biriqaa námmarifa márinoo qinée miná aní ámiqa. Anée miná fáqa faiqéenana faiqì mara ámia. Áminanoo faiqì maqasáinanoo qiníndi kámmiannoo. Miqímasee qinée faqa faiqi ánausa márianaura. (Mi aukuannái mi maqannáasa óosana miqí márusa máriqau.) 4Raseera námmarifa miqí qímasee narí aináini marú manaaqána miná áuqu Biriqaa námmarina Yakooboona amisoofanóo miná faqa sakasée faiqanau. 5Miqímmasoofanoo Biriqaa námmarifa ámuaqu qáikinoo máriiufanoo Yakoboona faiqì akoonaiqí máqanau. 6Maqasoofanóo Raseera námmarifa qáfamaseenoo qinau. Doo maqee Ánutufa qiní óosanara andeeqára óosana fee qímasee qiní innaaru qírana iriséenoo dóo akoonaiqí qíminoo. Miqí qímaseenoo Raseera námmarifa mi faiqína áuqu Dannaa neé qinau.

7Mi manaaqáfa Biriqaa námmarifa marikínoo kaifáa ámuaqu qáikinoo máriiufanóo akoonaiqí moó máqanau. 8Raseera námmarifa miná qáfamaseenoo qinau. Qinée qeeqá qínasaana faqa firaaqóo rairai qímasee qinée úriaaqareeqee qímaseenoo mi faiqína áuqu Napatari feé qinau.

9Reeaa námmarifa faiqi máqarana taikáseenoo narí aináini marú manaaqána áuqu Siripaa námmarina narí áfaaqi Yakooboona mara áminau. 10Ámufanoo minásaa faiqì akoonaiqí moó máqanau. 11Reeaa námmarifa qáfamasee qinau. Óo qiní ámiqimma qisáinara mi faiqína áuqu Kadafa neé qinau.

12Siripaa námmarifa marikínoo kafaa akoonaiqí moó Yakooboona faiqì máqanau. 13Reeaa námmarifa miná fáqa naríara maraséenoo qinau. Dóo qinee firaaqóo asasídaqa. Maqee ánaaseeuqa qiníara asasírafee qímasee dúqu reefáranoo. Minára iriséenoo mi faiqína áuqu Aseera feé qinau.

14Reeaa námmarina ámaaku Reeubeenáfa sakumma néemaru kamúqoo ándanda kinai nídanoo faiqì máqee marú andandána qaqama paqúrinau. Mi aqamána áuqu mandareeka márinau. Miná paqúrimáseenoo mara máreenoo míni narí ánoona Reeaa námmarina áminau. Raseera námmarifa miná qáfamaseenoo Reeaa námmarina qímaminoo qinau. Amanée mandareeka qaqama akaqána qiní faqa qíminnaree.

15Miqí qufanóo Reeaa námmarifa narí qimaminoo qinau. Anée qiní qifaaqi marasáanafa kaifaa qiní qímaaku mandareeka qaqama márararee fée qídanee. Miqí qufanóo Raseera námmarifa qinau. Aní ámaaku márai mandareekána qaqama qiní qíminaqa dóo Yakooboona aní ámiananoo aní fáqa faiqáannoo.

16Eenée márufanoo Yakooboofa aináinaindari aniroofanóo Reeaa námmarifa aanái óonu áfiqeenoo ánidanoo qímaminau. Doo qinée mandareeka qaqama Raseera námmarina ámiqa. Mifá miná ákiiqara maqee éendaki aníara qiní faqa faiqáannee qinoo. Miqí qufanóo Yakooboofa eedóo qímasee Reeaa námmarina fáqa sakasée faiqanau.

17Ánutufa Reeaana innaaruqirána iriséenoo dadaaqufanóo Reeaa námmarifa kafáa ámuaqu qáikinoo faiqì akoonaiqí máqanau. Moodáannai qísauku námu Yakooboonasáa máqanau. 18Reeaa námmarifa maqaséenoo qinau. Qinée qeeqá aináinirá mánaaqa qeeqá qifaaqi ámiafánnanara maa faiqína Ánutufa qiní qíminoo. Mifa minára iriséenoo mi faiqína áuqu Isakaraneé qinau.

19Reeaa námmarifa marikínoo kafáa ámuaqu qáikinoo akoonaiqí moo máqanau. Dínni ani moodáa maraséenoo Yakooboonasaa máqanau. 20Maqaséenoo qinau. Ánutufa idaaqíra áinaina káqi qíminoo. Maqee dínni qísauku taikásee dínni ani moodáa 6 máraunnanara qini qifaaqi qiníara áidiannoo. Mifa minára iriséenoo mi faiqína áuqu Seeburuna fée qinau.

21Miná ánaaqianna Reeaa námmarifa mánaaqa maqaséenoo Dinnaa námmari fée qinau.

22Miqóoqari Ánutufa Raseera námmarina innaaru qírana iriséenoo dadaaqufanóo faiqi máqarana amanaíkinau. 23Mifá ámuaquqáika máfufanoo faiqi akoonaiqí maqaséenoo qinau. Ánutufa qiní qisaurírana taikéenoo qiní faiqi akoonaiqí qíminoo. 24Raseera námmarifa minára iriséenoo qinau. Karaambáiqa qiní faiqi moó akoonaiqí qímiani. Miqí qímaseenoo mi faiqína áuqu Yóoseefaa née qinau.

Yakooboofa Rábannana faqa miná aináini márunara ufaqu úfafa.

25Raseera námmarifa Yóoseefaana maqasoó kámuqoo Yakooboofa Rábanna maaqí qímasee qímaminoo qinau. Anée amanée qiní quqásainaqá qeeqá máaqai fúà. 26Qinée aní aináinammásaunana qímianna anaaseesá nári faiqi námu faqa qíminaqa máree fúà. Qinée ámiqimmásee aní aináina íunnanara anée minára íri máriananoo.

27Rábannafa minára iriséenoo qinau. Qiní afuneé fánnoo aníara qíma qímifaqa iriséeqa anée qiní faqa márunnaqoo Ánutufa qiní aináina ámiqi ámiqifanóo firaa qóo kambíqafinoo máridanoo. 28Qinée minára íridaqa anée aneenná feefaurúara qínaqa qinée aní ámianaura. 29Yakooboofa miná iriséenoo kafáa qímaminau. Anée qiní aináinirana óosana ámiqimmasee írimariananoo. Qinée aní aandáù ainasáa rakísi máriafananoo qiní rakísirana ameemaanai márida moómoo kambíqee irairaá ímariqau. 30Qinée ániafanna kári aní aináina óodaa káì márinau. Qinée maaqóo ani máridaqa aní aináina aiqámai áuqaunanoo Ánutufa dadaaqifanóo firaanáikinoo máridanoo. Qinée maqee qeeqáree qíanna áinainausa máraanaura.

31Miqí qíma soofanóo Rábannafa írinoo narí qímaminau. Dóo anee qíananoo náqifee másee feefaurú aní ámianauree. Miqí qufanóo Yakooboofá qinau. Sía anée feefaurú munnimma aina qiní qímià. Qeeqá qíànnana kai qímià. Qinée káqi ani sipsípasaa rakísi márianana qiní maa iriránara anee eedóo qínaqa aní sipsípasaa rakísianaura. 32Qinée maqee ani sipsípauqa máriannai óonuree aiqáma takóosa takóosira sípsipauqa faqa mimmí miqíranauqa faqa sipsípa ánaaqi rudúqariranauqa faqa máraanaura. Mi feerúnara kai qiní dídidanoo. 33Qinée andeeqásee máraanaura anée kásooaqee aneenná óonu réenana qáfaà. Éekara árira sípsipa qiníndiki márinana éekara fée dundúqarira mímmi fée qiníndiki márinana qiníara qúmuara miaanoo qíà.

34Rábannafa miná íriséenoo asasa mándee qinau. Eeóo maasá anée qíanandeemmianaura. 35Mi faasaanná qumeé kai mimmí ákoona takóosa takóosa íranauqa faqa mimmí ánaasee miqíranauqa faqa éekarasai rundúqasai írana faqa rundúqarira sipsípauqa faqa moodáanaki quqáseenoo narí faiqi námuara qufaqá misásaa rakísiqau. 36Rábannafa Yakooboonara máraandoo qímasee narí mimmí sipsípa mara máreenoo narí faiqi námusaa quqásoofaqa níanai qaaramoó áfuru aanái faiqée óonuráaqaa irannai munu quqásee rakísi máriqau. Máree fífufanoo Yakooboofa akaqá sipsípauqa máfisoosásaa kaí rakísi márinau.

37Rábanna sipsípasaa maqúsai rakísida máridanoo saqári amimiuqá ateekáseenoo moodaá mau apata ruatá áquseenoo éekara ári márutinai quandáseenoo sipsípa nammári née marúqoo rakíqanau. 38Sipsípa mimmí nammári náidaqa miqóo ani ráidaqa náafeeqaambaaqaa rímariqau. Yakooboofa mi saqarísa sipsípauqa difáaniki nammári neemarúqoo rakíqaqoofanoo marufaqa sipsípauqa nammári nárara aniréeqa mi saqarína qáfaidaqa ákoonauqa ánaasee náafeeqaambaaqaa riaqéera rakíanau. 39Mimmíuqaindi miqóo miná qafaidaqa ákoonauqa ánaasee náafeeqásoofaqa ákarakauríra ánaaqiuqa máqaqau. 40Yakooboofa sipsípauqa nífiqeenoo ákarakauríra mímmiuqa máruqoo múnusaina sipsípa ákoonauqa ákarakaurírana qáfaidaqa ánaasee sipsípa náafeeqasáifaqa miqírana máqaaqeera nífiqee finau. Miqí márunannoo Yakooboofa ákarakauríra ánaaqiuqa naríndiki maréeqaida áaduma quqee márufanoo moómookí márinau. 41Nifaaqauqá fáqaa sipsípa faqa mímmi faqa náafee qaambaaqaa rírara ufanoo Yakooboofa mi saqari asaanáusa maréeqee nammári néemaruqoo rakíqeesoofaqa minakíaqa nídaqa náafeeqee máriqau. 42Nímudaani ánaaqi ummooqúkiqa nusá náafeeqara rufanóo Yakooboofa sía mi saqarísa rakíqanau. Miqímmásee máru fanoo Rabananaindi ámudaani ánaaqi ummooqukírafauqa kaí márufanoo Yakooboonaindi nifaaqauqá faqáasa ámiqirausá kaí máriqau. 43Mi oosannánannai Yakooboofa moómoo ákinaina faqáafa márinau. Miná sipsípa mimmí moómoo uqanna máriqau. Miná aináinira fasiqauqa faqa ánaaseeuqa fáqa kamméerauqa faqa doonkíuqa fáqa moómoo qumbiqáqa máriqau.