Heb 10 | BJR | STEP | Yuda máqanna Mooseena sándufa faqa úiqaana maqa aináina faqa innaarúnai mári ainainna miná amanandá kai máridanoo síara foora ínoo máridanoo. Náaru kambíqaaninna ainaina amanandá oórudupirana amanandá kái máridanoo. Mooseena úiqaana maqaki Mooseena sándufamau fi̱daqa moodáa tatufi̱ra óosana kai áukuana áukuana aandáu kai suqá ámu maríqau. Dóo miqídaqa náqimasee mi-sandufána Ánutufi̱nnai ani máriasa ánoonáikamma nímaqaannoo fee, sía amana.

‏ Hebrews 10

1 Yuda máqanna Mooseena sándufa faqa úiqaana maqa aináina faqa innaarúnai mári ainainna miná amanandá kai máridanoo síara foora ínoo máridanoo. Náaru kambíqaaninna ainaina amanandá oórudupirana amanandá kái máridanoo. Mooseena úiqaana maqaki Mooseena sándufamau fi̱daqa moodáa tatufi̱ra óosana kai áukuana áukuana aandáu kai suqá ámu maríqau. Dóo miqídaqa náqimasee mi-sandufána Ánutufi̱nnai ani máriasa ánoonáikamma nímaqaannoo fee, sía amana. 2 Mooseena sándufasáa Ánutunara amooqíqa innaaru qímariasa kúqaa ánukamma nímaqasainaqau misá nári numóora nisaurírana taikáseefau márini, aandáu maqee maqee qaindásaa tatúfi̱ maríafa faqa sía márini. 3 Áukuana aukuana aandáu tatúfi̱rafa mifá faiqí ánaasee nári numóora náaqoo áuqaifaqa maqee maqee aandáu tatúfi̱daqa. 4 Burimakáu fi̱díka faqa mimmí fi̱díka faqa mifá sía amana uqanna faiqí ánaasee mandáinaina númoo maráqunnisáannoo.

5 Miqí marúnara ásauku mundírafa maa-maqánasaa qúmiraree qímasee maaqí qímasee Ánutuna qímaminau.

Anée aandáu arusée qaindásaa tatúfi̱ranara,
ákooqaidanoo,
Anée faiqí qifaaqa deedaqammá qimaqáinanoo.
6 Anée aandáu arusée qaindásaa múduka tatúfi̱ranara
ákooqaidanoo, numóo maráquanínna aandau suqaranara ákooqaidanoo Yísufa miqí qímasee Ánutuna qímaminau.
7 Minára Yísufa maaqí qímasee kaifáa Ánutuna qímaminau.

Óo Ánutu dóo qinée maaqóo máridaqa.
Aneenná íriranannai kai qiníara ía.
Mooseena sándufakí qiníara ákara rínau. Dóo mi-maú kai
qiníara ía. Yísufa miqí qínoo.
8 Yísufa miqí qímaqoonara qinée ínni maaqí qímasee qímannimianaura. Yísuna indaarúqaa ufa maaqímminoo máridanoo.

Óo Ánutu anée aandáu arusée suqá ámiranara
ákooqaidanoo sía máraaqaaídana, faiqí numóo rukáranara
aandáu qaindásaa tatúfi̱ranara ákooqaidanoo.
Yísufa mi-aandausá tatúfi̱marunara írinoo sándufamau fi̱daqa miqímariaafoo qímaseenoo káqi Ánutufa minára akóo akaa ímarunara qinau.

9 Yísuna ínaaqianna ufa maaqí qídanoo,

Óo, Ánutu, dóo qinée maaqóo máridaqa.
Aneenná íriranannai kai qiníara ía.
Ásauku mundírafa mi-ufamaú fi̱danoo. Óoqai aandáu tatúfi̱maruna mara áqu taikáseenoo fúka narí amaqí fi̱díka miná ámaaqaki quqáseenoo maasára kuqu qímaqanau. 10 Yísufa ásauku mundírafa Ánutuna áidiramaú kai fi̱danoo narí afaaqa aandáura foora Ánutuna moodáa karí kai aru áminau. Miqúnara kai maasá numóo ikairi fi̱ndaukáma qumaqanau.

11 Yuda máqannaa aanáiqikirausa faasaambáasaana aiqáma faasaana moómoo aandau tatúfi̱mariqau. Moo fáasaana tatúfuna miqíkai ímariqau, moómoo aandau tatúfi̱maruna faiqí numóo rukárana amana sía máruna fi̱fa̱u kadáapirida tatúfi̱mariqau. 12 Ásauku mundírafa sía miqínau. Mifá moodáa karí kai moodáa ámira áminau. Náaru náaru faiqí numóo taikáaninnana ákiaqara aru áminau. Aru amiséenoo innaarúnai Ánutuna aaqá miná ásauku uqannái óoru óoqumarínoo máridanoo. 13 Miqóo máridanoo Yísufa Ánutunara narí namuqáa maréeqee áramandunnai quqáaninnanara áfeesida máridanoo. 14 Moodáa kari aru ámiranannai Yísufa mandáinaina óoqai faqa maqee faqa rukánnimaqee mariasa náaru náaru kúqaa andeeqárana níminau.

15 Ánutuna náaquqara andeeqara maraquna fannoo ásauku mundírana dadaaqída maaqí qídanoo.

16 Qinée misá faqa moodáanaki kíra ufa maaqí qídaqa.
Mi-faasaannáfa qinée qeeqá qifaaqa aru ámianna
faasaanna áiqaráinaqa qeeqá sándufa misá nímuqusaki
quqásaanaqa misá mi-maú kai fi̱da máriaqeera.
Misá nitikúraki faqa ákara rúmasaanaqa sía uqanna
aunúaqeera.
17 Miqí qímaseenoo Ánutuna maraquna fannoo maaqí qídanoo.

Qinée maaqóoqari sía kafáa misá áaqarana faqa misá
mandáinaina ikairí faqa síamma írianaura aunúqannammá
nímaqasaanaura.
18 Maasá mi-ufána irisée minára maaqí. Ánutufa maasá mandáinaina minnísainna kamuqoo fi̱fau aandáu arusáida tatúfi̱ maríafa dóo taikéennoo.

Maasá Ánutuna aaqá ániaqeera qídanoo.

19 Qiní qíkaqaafasaa Yísufa kúqinoo narí fi̱díka adíoonannai maasá sía rufi̱aidaqa káqi mána mána nifaaqa quqásee Ánutuna náaquqara óosiranaki kéeqaanaura. 20 Mifá fúka aana maasára afi̱sínoo. Káqi márira aana Ánutunasaa ititára qámunna anaqíseenoo afi̱sínoo, narí afaaqara qamunna kíkiqa úsidanoo. 21 Maasá aanáiqikirafa fi̱raafá mifá Ánutuna máaqasaa rakísirafa máridanoo.

22 Dóo maasá minára iriséeqa Ánutuna aaqá adeedí ániaqa. Kúqaa aneenná ámuqusakiqari Ánutunara rídana dóo Ánutuna aaqá adeedí ániaqa. Aneenná írirana mapukúsee minásaa rusírafa dóo adeedí ánia. Óoqeenáa mandáinaina aní áakirana afaimmá quqáseenana ánukarafa ánia. Aneenná afaaqa ámiqira nammarinnaira foora fi̱ndaukámasee Ánutuna aaqá adeedí ánia.

23 Maasá innaarúnai máriranara ásasidaqa áfeesidaqa kooroo ídaqa. Maasá mi-asasira afeesirána ámiqimmandee qumáraaqa. Ánutufa narí qíma afeekaikíra ufa sía minnísaannoo mifá qumáraannoo minára ámiqimmandee rakísi qumáraaqa.

24 Maasá naríara naríara úriqarara ainainee qímasee nímuqusirafa márianinnanara fuki faakí qímase nísaukukoo dadaaqíra dadaaqírafa kambíqaani. Narí ámiqi ámiqirana faqa fuki faakí qímasee narí dadaaqí narí dadaaqiaqa.

25 Akaqáusa amaana máqaki maqee suqíranara níkooqaidanoo. Ínnee sía miqíaqa maqee maqee suqúaqa. Karaambáiqa qúmira faasaanara qúsararanara irisée narí fuki faakí narí fuki faakí qímasee Ánutuna ufara suqúaqa.

26 Maasá Ánutuna ánoona ufa íridaqa káqi íridaqa mandáinaina máraqa fi̱fi ínaqa moo ámiqira ainaina Ánutuna ámimarínafa sía mi-numooná rukáannoo náaru náaru máriannoo. 27 Miqínna fasiqafa náaru kambíqaaninna ufa íriranara rufi̱asee áfeesianno. Mi-karí mi-fasiqáfa ufa qírana iriséenoo fi̱raa idaqéemari idánaki qámataikáannoo. Miqímasee Ánutuna ufara sía fee qímariasa aiqámausa minakí aupúreefaranoo. 28 Mooseena sándufa máru kamuqoo faiqí moó fannoo mi-sandufána ámeesuqirafa qaara fasiqee qaaramoo fásiqée qáfamasee ufa qufanoo sía miná áfauee máriqau. Dóo mifá kúqimarinau.

29 Faiqí moó fannoo Ánutuna ámaakuara ákooqainafa miná árirafa fi̱raaqóo fi̱qaranoo máriannoo. Mi-fasiqáfa Ánutuna moodáanaki kíra ufa fi̱díkara narí mi-fasiqána numóo rukásainnanara qíkoo fee qínafa faqa Ánutuna áfaari mari maraqunara faqa mandúfa qínafa, mi-fasiqána árirafa sía Mooseena aanna ráannoo, fi̱qaranoo máriannoo. 30 Maasá Ánutunara faqa miná ufara faqa íridaqa mifá maaqí qinau. Faiqí mandáinaina ákiaqara nárirafa qiníndi máridanoo fee qinau. Mifá kaifáa maaqí qinau. Karaambáiqa narí áiku ásauku ufa irisée mandóosana márinanoo náruannoo sía márina sía náruannoo. 31 Mifá miqí qídanoo qinée minára maaqí qídaqa, káqi márira Ánutuna ásaukuki áqufi̱nafa fi̱raa nárirafa káaqa náaquqée marífa máridanoo.

32 Indaarú ínnee Ánutuna ufa íru aukuanna mi-aukuannára maqee ínni náaqoo áuqaidaqa. Mi-fasannái Ánutunara asasírafa qóomara foora káaqa qámannimaqóofaqa qáfamasee kadáapi rúmasee nídafi̱marufaqa Ánutuna ufamau fi̱fi̱ufaqa sía kudoosaápaqau. 33 Akaqá faasaana faiqí ánaasee aiqámausa nífusaa ataasá átaasa ínni qímannimaqee mandáikammá nímaqaqau. Moo kari faiqí ánaasee Yísuna ufa írimariasa nárí maríafaqa ínnee faqa misá ummaara dadaaqíqa akooqóo óonuree misá nísaukunnai dadaaqíqa ámiqimma nímaqaqau. 34 Ínnee karabúsaki máriasa dadaaqídaqa nárana múnu nímiranannai misá aupúrarana ínne faqa máree maríafanoo. Faiqí ánaasee anirée áanoomasee ínni máaqakinaa ainaina aiqáma animáree fi̱fuafaqa sía ínnee minára nóori runúafanoo, ínnee asasa kái mándee maríafanoo. Ínnee ínneeqa maa-maqánasaaqaraa qúmiasanara fífau óorudupira ainainee qímasee innaarúnai úriqarara náaru márira ainainara máridanoo fee qímasee sía ikíraqaafanoo, ínnee asasímariafanoo.

35 Dóo maqee faqa ínneeqa paasóosirana sía quqáaqa. Mifá márifanoo miná feefaurú náaru márirana nímiannoo ubiqáfi márirafa ínniki máriani. Ínnee sía ubiqáfinaqa sía amana Ánutuna íriranamau fi̱fáranoo, sía miná qíma afeekaikíra márira innaarúna qúmiasana máreefaranoo. 37 Ánutuna ákara ubiqáfi máriranara maaqí qídanoo.

Káqikaaqóo qúmirafa qúsasaa qúmuannoo.
Sía kísaaqasaa fi̱fau máriannoo dóo qúmuannoo.
38 Qiní qíku qísauku andeeqárausa máriasa maqee maqee
qinísaa írirana rusísee máriqa fifi ínaqa mi-mariránara kai qiní dídiannoo. Misá minára níkooqee márinausa misára qiní faqa qíkooqaannoo.
Ánutuna ákara maasára miqí qínoo máridanoo. 39 Faiqí akaqáusa Ánutufi̱nnai fúani qímasee fífi ífaqa aanái óonuree máparaamáki óonurandee quándaki idá áqufidaqa. Maasá sía misá naanna ráidaqa. Maasá ámiqimmandeeqa Ánutuna mandaaqáifanoo dóo Ánutufa maasá asumu máraannoo.