James 3
Maasá qífauru idáti miqírafa minára qímaqoofa.
1Qiní qíkaqaafasaa Yísuna ufara suqímaríasakiqari ínnikiqari sía moómoosa ufasáa rakísirausaikiqa máriaqa. Maasá ufasáa rakísirausa afeeka ufa Ánutufa kásooqaqee qímiannoo, káqiqeesa óorudupinoo nímiannoo. Maasá aiqáma áaqeemariasa máridaqa. Faiqí ánaasee moó fannoo narí óokiqari sía áaqainafa dóo mifá ánoona paqúrimaseenoo dóo narí afaaqa áinaina márirana faqa andeeqásee rakísida máriannoo. 3Maasá qáinnannai qóosa óoki aakú amaqáseeqa miná úqirausa fídaqa quanda quanda ímarifanoo aatáta fídanoo. Sípa minára faqa íriaqa firaa ainaina tiá máridanoo ooruku námmariki fídanoo úfai firaafá fuaqée márifanoo fídanoo minakí mári kiateenafa káqikaa sitiaqa quandée marifanoo fídanoo.5Maasá qífauru rirímma káqikaa ainaina máridanoo firaa ufa tiá rirímma uqéeraidanoo. Káqi idátiara foora firaa qusau nanda utaurídanoo. 6Maasá qífauru idáti miqírafa máridanoo narí máriqooqari aiqáma mandáinaina óosana óosana aiqáma maasá qifaaqasása daráanidanoo. Mi-idatífa Sadanna idáti qumbísee quándakinoo maasá aiqáma márirana nírana qumbíqaraidanoo.
7Faiqí óoqai faqa maqee faqa amaná káasau ainaina óosana óosana aandau fee ufini fee noodáanna fee maqámau nímari ainainnee fírifanoo reendeéniannoo. 8Nári nífauru kai faiqí óoqaindari sía reendeénimariafa máridanoo. Sía amana faiqí rafáaqafírana amana máridanoo sukúfa minakí qumbiqánoo máridanoo. 9Maasá minakíqari maasá qíkoona maasá karaambáiqara minakíqari dúfi dúfi qídaqa kafáa quándaki Ánutufa narí amana kái maasá qiqoónausa áuquqoosa níquraraidaqa. 10Dúfi dúfi qírafa faqa níqurararafa faqa moodáa dookiqari kaímma ururáidanoo. Óo qiní qíkaqaafasaa máriasa mi-ainaináfa sía andeeqánoo máridanoo. 11Maqákiqari ururée mari nammarifa sía moodáa aamaraindari sukáqee marífa faqa ámiqimarifa faqa ururáidanoo. 12Sía faafísa námufaqa keefáadi íraannoo. Sía kamúkamuna sánda fannoo faafísa íraannoo. Sía ooruku námmari fannoo faqa nammári uqanna fabaqa íannoo. Maasá nífauru fannoo kai qaaraikídanoo.
(Maaqóo misá saqári sía márifaqa káqi maaqóoqaraa saqári áuquraidaqa. Faafísa maaqóoqaraasaindi Yuda máqannaasaindi miná fooqáafa asumu faafis máridanoo. Keefáadiara oorifa sáqari fee qímariqau. Kamúkamúnara kareepa fee qímariqau.)
Sandáaqaindaraa irirana faqa maqásaaqaraa írirana faqa mi-irirannára qímaqoo úfafa.
13Ínniki moó fannoo naríara írirana faqaasee aiqáma ufa óosanara írimarunausee qímarifa dóo mi-fasiqáfa narí ámiqira máriranannai faqa ámiqira qumáraranannai faqa reendeénirana námufaqa narí írirana námufaqa koorooíanifeera.14Anee aneenná ámuqusa óokiqari sukáqarafa faqa rairaiqírafa faqa aináinara káaqa rírafa faqa úrinana anée únna qímariananoo sía aneenná íriranara úriqarar fee qía. 15Mi-iriráfa sía innaarúnainadari qúmidanoo maa-maqa maaqánasaaqaraafa máridanoo sía innaarúnaindaraafa, áfaannaindi máridanoo. 16Rairaiqírafa faqa óonititée anititée írafa faqa máriqoo miqóo dapi marirafa faqa mandáinaina óosana óosana faqa máriqoo máridanoo.
17Innaarúnaindaraa írirafa indaarúqaafa sía ikairí fáifa ámiqirafa mifá náaree indaarú dóo miná miqóoqari asooárana nímirafa faqa fisoo físooirafa faqa aiqámausara áqoondikirana faqa miqímarifa faiqíara qimudáoo qírafa qumbiqánoo máridanoo mi-innaarunaindaraa iriráfa mifá ámiqira narana unakúseenoo áfaaridanoorá foora ámiqira óosana nímimarifa mifá sía qaara ufa qírafa márifa. Miná márirana faqa sía qaaraíkinoo máridanoo. Innaarúnaindaraa írirafa miqíminoo máridanoo. 18Asooéemariasa nári ámiqira márirana qaqamara fooqíara asooáranaki úmmaqusaafanoo minakíqari ámiqimmandee andeeqárafa kambíqaidanoo.
Copyright information for
BJR