Mar 11 | BJR | STEP | Yísufa narí faiqi námufaqa faiqí ánaasee faqa Yeerusaree máqusa aaqá óoruree qaara káqikaa maqusa núqu Beetapaisa faqa Beetani faqa mi-maqusa qandá naaqá óoruree Oorifa áaqana aaqá óoru raqau. Óorureenoo narí faiqi námukinaana qaaraqánda Yísufa narí niqiqéenoo indaarú fuaqée qímasee qímanniminau.

‏ Mark 11

Yísufa doonkísaa Yeerusaree máqusai óoru fínau.

(Mataioo 21:1-11; Ruka 19:28-40; Yoohanee 12:12-19)

1 Yísufa narí faiqi námufaqa faiqí ánaasee faqa Yeerusaree máqusa aaqá óoruree qaara káqikaa maqusa núqu Beetapaisa faqa Beetani faqa mi-maqusa qandá naaqá óoruree Oorifa áaqana aaqá óoru raqau. Óorureenoo narí faiqi námukinaana qaaraqánda Yísufa narí niqiqéenoo indaarú fuaqée qímasee qímanniminau. 2 Ínneeqara fímaría maqusafa márinaki óonureeqa fúka doonkí ákoona áfaandama ítirana saqárisaa sándannai anukakí qusúsee saqárisaa qusúqaafanoo márina paqúrifaranoo. Sía faiqí moó fannoo miná ataufakasáa óoqu marifí fía káqi máridanoo, ínnee miná sánda idukúsee mi-doonkína máree ániaqa. 3 Faiqí moó fannoo ínniqárara náqi fee ída fee miqída fee qífaqa ínneeqara maaqí qímasee qímamiaqa, maasá úriqararafa maa-doonkína saika máridanoo taikásainanoo aaqee uqanna múqu nímiannoo fee qifaqa ani máraidaqa.

4 Yísufa miqí qímasee qímannimufaqa miqandá óonuree qáfoofanoo doonkí ákoona áfaandama ítirana paqúriqau, mifá maqúsasaa moo máaqa kooqíki mári saqarinasaa qusúqoofanoo márinau. Miqandá óonu qáfee idukí márufanoo akaqáusa maqúsasaa márusa anirée qiqau, 6 Náqiraree máraidee qufaqa miqandá Yísuna ufa kái qímannimufaqa dóo máree fuaqée qiqau. 7 Miqandá mi-doonkína mara máree Yísufuqoo míniseeqa nári óosana marasée nári qamunna miná ataufakaaqa ufíqisoofanoo Yísufa minásaa óoqu marifínoo Yeerusareenni óoru fínau. 8 Faiqí ánaasee moómoosa Yísuna qáfamaseeqa nári karaambáiqa ímaru oosanna máreeqa nári siuta raipáqueeqee aanásaa ufíqimarufaqa akaqáusa saqári ásaana ámanee namufaqaana dínni dínni anaadóokina saqári ateekéeqee aanásaa ufíqisoofanoo mi-maú doonkí fannoo finau. Fímarufaqa moómoosa ínaaqiannai faqa óorinni faqa fídaqa maaqí qímasee fáaqaridaqa asasídaqa qiqau Ánutuna firaaqóo amooqiaqa. 10 Maasá qíkoona Dafidina quqúsaki márianinna karaambaiqana Ánutufa ámiqi ámiqiani. Karaambáiqa Ánutuna áuqusaa Yísufa úridanoo. Ánutuna firaaqóo amooqiaqa.

11 Miqí qídaqa áfiaqa óoru fíufaqa Yeerusaree táunnaki kéeqafufanoo Yísufa misá amaana máqa firaanáki kéeqafufanoo aiqáma ainaina aiquqíiseenoo dóo rafúdamakufanoo dóo eendídanoommifoo qímaseenoo narí faiqi námu qísaukuqara taikásee qíkunni óoqu qaara marasée nífiqamareenoo kafáa Beetani máqusai óoqu fínau.

Yísufa faafísa fooqáa saqari áqinau.

(Mataioo 21:18-19)

12 Misá faiqée iqáqoofaqa Beetani máqusaindari Yísufa Yeerusareenni óoru fídanoo áararoofanoo Yísufa qáfoofanoo faafísa fooqáa ira saqari níanai márufanoo qaqama íranoo fee márinoo sía fee márinoo qímaseenoo aaqá óonuree qáfoofanoo ámanee kai márufanoo qaqama íree marú aukuana sía márunara sía iranau. 14 Yísufa miná qáfamaseenoo mi-faafisána áqinau anée maqee maaqóoqari náaru náaru anísaaqaraana sía faiqí moó fannoo aní qaqama náannoo. Miqí qu úfana Yísuna faiqi námu íriqau.

Yísufa amaana máqaki makéeti marúsa niqiqanau.

(Mataioo 21:13-17; Ruka 19:45-48; Yoohanee 2:13-22)

15 Misá kafáa Yeerusaree máqusai óoru kéeqafufanoo Yísufa misá amaana máqa fíqu fíqumma quqúsa áuquqoonaki kéeqafufanoo minakí faiqí úmmuari marú makéeti marúsa óoru rapatutumméeqeenoo nífaqasoofaqa rafúdamaki fífainiqau. Minakí márusa faiqí ánaasee káqi munnimma marasáida amaana máqakinaa munnimma faiqí ánaasee nimisáidaqa minásaa qaraana áti munnimma ookáa mándee úmmuaramásee máraaneera miqí maríqau. Yísufa misá qaindáuqa faqa misá munnimma minásaa quqáqoonáuqa faqa aiqáma óoru qumáree téeqi taaqimaseenoo nakipurúna faiqí ánaasee bisinísaiki marúsa faqa misá óoqumari marú siaqausa faqa maréeqee téeqi taaqi máqinau. 16 Akaqáusa ummaara máree maríasa amaana máqa fíqu fíqu áuqira ququsa fíruqíaki fímarusa faqa qáoo qufaqa minakí sía fiqau.

17 Miqímmáseenoo Yísufa quándakinoo miqóo márusa maaqí qímasee qímanniminoo qinau. Óoqeenaa tamummaqara fasiqauqa ákaraki Ánutufa maa-maqánara maaqí qímasee qímaqoofa máridanoo. Qinée faiqí ánaasee qiní máaqara innaaru qíra maqa fee qiaqée qídaqa. Ánutufa miqí qímaqoofaqa qinée mimaú maaqí qídaqa, ínnee maqee máriasa maa-amaana maqána qumáreeqa úmmuari maríasa kukéeqara máqaikammi máriafanoo.

18 Amaana máqakina aanáiqikirausa úriqararausa faqa Mooseena sándufa iriqaraasí marúsa faqa Yísufa miqí qunára áanoomasee iriséeqa Yísuna kúqarira aanara randée máriqau. Faiqí ánaasee múduka uqanna moómoosa Yísuna ufa írufanoo náaquqoonara aanáiqikirausa Yísunara rufíee marúnara áriranara randáqau.

19 Mi-eenaaniannái Yísufa Yeerusaree máqusasaaqari narí faiqi námu nífiqee moosáa finau.

Faafísa fooqáaira saqari aadánusinau.

(Mataioo 21:20-22)

20 Faiqée iqáqoofaqa fídaqa misá kafáa mi-faafisána fooqáaira saqari aaqá fídaqa qáfoofanoo ámmuqundari aiqáma múqufi óosana amisée aiqáma aadánusinoo márinau. 21 Peetooroofa miná qáfamásee tautúmasee Yísufa mi-saqarína áqunara iriséenoo Yísuna áaramáseenoo qímaminoo qinau. Óo ufasáa rakísirafa anée qáfaa anée aqisáananoo dóo kúqinoo márinoo qufanoo Yísufa narí faiqi námu qímanniminoo qinau. 23 Ínnee maa-ufána irisée sía aunúaqa ínni írirafa Ánutunasaa rusínoo márinaqa ínnee qífandínna ainainara kúqaa kambíqaannoo fee qíqa sía naunduráki qaara irirana íridaqa ínnee maa-amuaqunamúnara rafáuruaki ooruku námmariki áqufua qífanoo Ánutufa kúqaa aníara miqíannoo. 24 Minára qinée ínni maa-ufána faqa qímannimidaqa ínnee moo áinainara innaaru qídaqa ínni írirafa dóo máreera foora miqíunoo qímasee írirana Ánutunasaa rusísaifanoo aiqáma innaaru qímariana Ánutufa ínni nímiannoo. 25 Ínnee ínneeqa mandóosana Ánutunara minníqísaannee innaaru qídaqa ínni mandáikamannímaqáasa misá ummaara aníki márina minnísee aunúsaifanoo ínni innaarúnai níkoofa ínni mandá óosana ákiaqara faqa minínnisaani. [Ínni niqoónausa ínni mandáikamannímaqaifaqa ínni miná irisée sía miná minnísee káqi irimáree fífanoo Ánutufa faqa ínnindi faqa miqí kaimmíannoo.]

Yísunara yáfee qifanée afeekaíkidanee qiqau.

(Mataioo 21:23-27; Ruka 20:1-8)

27 Yísufa kafáa narí faiqi námu faqa Yeerusareenni óorureenoo firaa amaana maqa fíqu fíquira ququsaki kéeqafinoo nímarufaqa minakínaana aanáiqikirausa úriqararausa faqa Mooseena sándufa akoofásauqa faqa anirée irámmiriqa qiqau. 28 Óo Yísu anée maa-maqánaki bisinísaiki maríasa nífaqasaana fuanára anée úriqarara fee máridanee miqídanee. Yáfee aníara qifanée maanakí máriasa nífaqeenee qufanoo Yísufa nári qímanniminoo qinau. 29 Qinée faqa ínniara modáa ufa irámannimaqaanaura. Ínnee qímaqimifaqa qiníara iraaúfana faqa qímannimianauranoo. 30 Yoohaneefa nammári nímimarufa yáfee minára nammári nímianee qufanoo nímimarinau, Ánutu fee faiqí fee qufanoo nímimarinau. 31 Yísufa miqí qímasoofaqa narínni narínni raiqára ufa narí qímami narí qímami qiqau. Maasá náqi fee qianáuree. Maasá Yoohaneenara Ánutufa qímamiifoo qíananoo mifá maasára nánaree ínnee Yoohaneena ufara Ánutuna ufa fée qímasee mi-maú fúaqaana miqídee qíandoora. 32 Maasá Yoohaneenara faiqí kai qímamiaafoo qíanaqa faiqí ánaasee káqiqeesa maasá dárifoora misá Yoohaneenara Ánutuna tamummáqara fásiqee qímariafa márifaqee qímasee Yísuna qímamiqa qiqau, maasá sía aní ufa ánoona írida fee qiqau. Miqí qímasoofanoo Yísufa kafáa nári qímanniminau, Dóo amaná ínnee qiníndiara sía qímaqimiafaqa qinée faqa ínnee qiníara yáfee qímaminoo fee qianára sía qímannimianaura.