Mar 4 | BJR | STEP | Yísufa kaifáa Kariree námmari áfainni óoqu máridanoo Ánutuna ufa miqóo suqí marúsa qímannimi marínau. Faiqí ánaasee moómoo miná ufa íriraree qímasee aiqáma aniréeqa Yísuna ititásoonara mifá kanúqaki akarámafufanoo nammáriki áfiqa quqáqoofanoo múnu kásoomásee máridanoo minakíqari nammári áfaisaa faiqí ánaasee márusa Ánutuna fasáasa ufa qímannímimarínau.

‏ Mark 4

Qaqama aaqée mári ufafa.

(Mataioo 13:1-9; Ruka 8:4-8)

1 Yísufa kaifáa Kariree námmari áfainni óoqu máridanoo Ánutuna ufa miqóo suqí marúsa qímannimi marínau. Faiqí ánaasee moómoo miná ufa íriraree qímasee aiqáma aniréeqa Yísuna ititásoonara mifá kanúqaki akarámafufanoo nammáriki áfiqa quqáqoofanoo múnu kásoomásee máridanoo minakíqari nammári áfaisaa faiqí ánaasee márusa Ánutuna fasáasa ufa qímannímimarínau. 2 Yísufa sía akooqóo qímanniminau, quandára ufakiqari qímannímidanoo maaqí qímasee qímanniminau.

3 Ínnee ámiqimmasee íriaqa faiqí moó fannoo maasá Yuda máqannaasa óosana máreenoo maqá rúmaseenoo ráisa fooqáana úmmaqirara miná qaqama marasée minaki aaqásoofanoo ururanau. 4 Mifá miqóo aaqáidanoo akaqá qaqama fannoo aatáta níku rée máriaqoo faqa áqufufaqa ufiniuqa anirée miná kai námasaqau. 5 Akaqá qaqama óoni meemái maqáki márufanoo minásaa maqá óodaa márunasaa aaqásoofaqa sía moómoo maqa márunara maqá tootooqí marúnara dauní ururámafi márufanoo súani firaafá qoofanoo miná atuka sía meemái kéeqoonara súani árufanoo aadánusinau. 7 Aaqásoofanoo akaqá qaqama amuka faqáafa márunaki áaqamakinoo áqufinoo kambíqafufanoo amuka faqáa ainaina fannoo miná arusaifanoo mandáikinoo márida sía qaqama íreenoo. 8 Akaqá qáqama fannoo ámiqira maqasaa áqufufanoo maqákiqari ururéenoo kambíqafinoo dóo qaqama íreenoo, akaqáfa óodaa íreenoo akaqáfa ámiqimasee íreenoo akaqáfa fíqaramasee íreenoo.

9 Yísufa mi-ufána qímannimidanoo maaqí qinau. Ínnee náaqoofaqaasa kai maa-ufána qímannimunnana íriaqa.

Yísufa quandárufa qímanniminau.

(Mataioo 13:10-17; Ruka 8:9-10)

10 Qímannisoofaqa fufaqá Yísufa naríaraa márufaqa akaqáusa miná faiqi námu qísauku qara taikásee qíkunni ooqu qaara márarausa faqa anirée quandára ufa óosanara iroofanoo qimanníminoo qínau. 11 Ánutufa narí quqúsakinaa qumeé írirana qímannimiannee qímasaifaqa qímannímidaqa akaqáusa áqoosai máriasa quandára ufa kai qímannímunaqa íridaqa. 12 Tamummáqara fásiqauqa misára maaqí qímasee ákara ríqau. Misá maqee maqee qáfaidaqa sía qáfeefaranoo.

Misá iriqaraasamásee síamma írifaranoo. Misá írifau Ánutufinnai ubeekáma fifánoofau misá mandáinaina ákiaqara minnínnisani.
Minára qinée Yísusa quandára ufa kai qímannímidaqa.

Qaqama aaqára ufa óosana koorooufá.

(Mataioo 13:18-23; Ruka 8:11-15)

13 Yísufa narí faiqi námufaqa faiqí akaqáusa faqa qaqama aaqáranara irámmirufanoo maaqí qímaseenoo akooqóo kooroomásee qímanníminau. Ínnee sía fee mi-quandara ufána óosana íridee. ínnee sía miná íriqa náqi fee mándee aiqáma quandára ufa írifaree. 14 Qaqama aaqée marí fasiqafa Ánutuna ufa qaqamara foora aaqáidanoo. 15 Moo kári akaqá ufa faiqí naundúraki aanásaara foora aaqásaafanoo íriafanoo Sadannáfa ufiniara foora miná aaqee uqanna aakúeeqee áqidanoo. 16 Akaqá fasiqa ánaasee naunduráki óoni maqásaara foora qaqama fannoo áqufidanoora foorá mi-ufána irisée asasamásee marasaafanoo sía meemái ánoona óoqu fínara sía kísaaqasaa máridanoo, mi-ufána saara ummaara fee, áriranee, kambíqafifaqa dauní minnísaidaqa. 18 Akaqá fasiqa ánaasee amuka faqáa ainainaki aaqée mária qaqamara fooqáana máridaqa. Misá Ánutuna ufa iriséeqa maaqóo mária ummaara kadáapirirafa faqa munnimmara rímariafa faqa óosana óosana ainainara rímariafa faqa mi-ufáusa kai Ánutuna ufa radámusaifanoo sía qaqama íraidanoo. 20 Akaqá fásiqa ánaasee ámiqira maqasaa aaqée mária fara foora máridaqa, misá Ánutuna ufa irisée máraanara qaqammara foora íraidanoo akaqáfa óodaa íraidanoo akaqáfa ámiqimásee íraidanoo akaqáfa fíqaramasee íraidanoo.

Qóoma qumbírana quandárana kíkiqa usirafa.

(Ruka 8:16-18)

21 Yísufa káqi qímannimidanoo qinau. Faiqí moó fannoo qóoma qumbímaree dífaani ameemaanai sía minní quqáidanoo béeta ameemaanai sía minní quqáidanoo akooqóo quqáqaifanoo káaqa qáanifeera. 22 Miqíkaimmásee kásooqaqee aiqáma kukéeqee marí ainaina óosana óosana Ánutufa maréeqee akooqóo quqáannoo aiqáma rafáaqa fímari ainaina faqa akooqóo quqáannoo. 23 Ínnee náaqoo faqaasa íriaqa.

24 Yísufa kafáa maaqí qímasee qímanníminau, ínnee náaqoo írimari ufanara ámiqimandee rakísiaqa. Anée nána ufa fee faiqí ánaasee níminanoo Ánutufa mi-ufánannai kai aninná rafáaqa fú amaqáannoo sía aneenná qínnana amana káifau ani rafáaqafuámaqaannoofau fíqaramasee aní rafáaqafúamaqáannoo. 25 Faiqí moo áinaina uqaqée márinnana moo fáqa Ánutufa ámiannoo. Faiqí moó fannoo aináina síainnana káqikaa ainaina márinnana Ánutufa mara márainanoo káqi sámu uqanna máriannoo.

Qaqama narí kai kambíqarana kíkiqa usirafa.

26 Yísufa kaifáa qímanniminoo qinau. Ánutuna quqúsa maqásaa fasiqa anaaseeki sía akooqóo kambíqaidanoo kukéeqanoo mári ifa kambíqeenoo akooroo ídanoo, mifá faiqí moó fannoo narí áfuqaki qaqama aaqáidanoora foora kambíqaidanoo. 27 Mi-fasiqáfa qaqama aaqásee eendáki faiqéenoo fáasaana narí aináinai óonuree anirée miqí márifanoo dóo qaqama aaqáqaifa dóo kambíqafinoo. Mi-fasiqáfa sía kambíqarana óosana írifanoo narí kai dóo kambíqafinoo. 28 Maqá fannoo náamma ámifanoo kambíqafinoo qaqama íraidanoo. Indaarú úmmaqusainanoo radíqifinoo áfumu kambíqafinoo dóo ururéenoo áfufeenaarinoo dóo qaqama íreenoo qaqama ánoona kambíqaidanoo. 29 Qaqama akuqámafifanoo mi-fasiqáfa paipána qumáree ateeká maree múnu máaqaki quqáidanoo.

Qúmini qaqamara foorá radíqifinoo firaafáikidanoo.

(Mataioo 13:31-32, 34; Ruka 13:18-19)

30 Yísufa káqi qímannimidanoo moo qúandara ufa qímannímidanoo irámmirinoo qinau. Ánutuna maqásaa ququsakina faiqí ánaasee máriasa nánara fooree máridee. Nana quandára ufannai fee kooroo ianáuree. 31 Qinee maaqí qímasee qímannimianaura, qúmini qaqama fooqáana káqikaana faiqí moó fannoo miná maramáreenoo úmmaqusainanoo kambíqafinoo firaa tia saqáriara foora aiqáma aakaaqakínaa andanda úriqararafa máridanoo. Miná ásaana firaanáikinanoo ufini anirée miná ásaana auqaánai ánaamu usakáidaqa.

33 Yísufa narí ufa óosana oosana quandára ufakiqari faiqí ánaasee nári írirana amana kái qímannimínau. 34 Sía sía quandára ufakiqari qímanníminau quandára ufakiqari kai qímanními marínau. Mifá narí faiqi námufaqa náaduma márunnai mínni mi-quandara ufána óosana kooroommánníminau, maqee maqee miqímmi márinau.

Yísufa ufannái úfai ámakaura taikánau.

(Mataioo 8:23-27; Ruka 8:22-25)

35 Mi-faasaanná eenóofanoo Yisufa narí faiqi námu qímanniminoo qinau. Dóo ánifaqa sípaki akarámafinaqa Kariree fárummaki fítaqamareeqa muqáfainni níanai fuaqa. 36 Misá eedóo qímasee faiqí ánaasee minnísee Yísufa óoqu marúnaki akarámafufaqa Yísuna áfiqee farúmaki fiqau, akaqáusa máriqa kanúqaki misá sáimbaqa fiqau. 37 Misá farúma qámbaanai fímarufanoo úfai firaafá úqinoo nammári ámakaurufanoo sípaki nammári téeqinoo qumbíqararinau. 38 Yísufa kanúqa átinni ákiaqa qunúsaa rúmasee faiqaqéeufaqa miná faiqi námu rufíasee anirée áfaurida qiqau ufasáa rakísirafa fíndifua maasá kaqí kaaqóo nammáriki ukúqnaidaqa kúqirarammidaqa anée sía fee maasára íridanee. 39 Yísufa fíndifinoo úfaira doo sáa qímasee nammáriara ámakaura dóo taikáa qufanoo úfai úqirafa taikéenoo nammári ámakaurirafa taikáfinoo dóo firaaqóo dái̱ qímáfinau. 40 Dái̱ qímáfufanoo Yísufa quándakinoo narí faiqi námu níqidanoo qímanniminoo qinau Ínnee nánaree rufíaidee. Ínnee qiní saqárikirafa síaisee máridee qufaqa misá firaaqóo rufíasee náaquqoofaqa narí qímami narí qímami qiqau. Maa-fasiqáfa nánee, sía faiqí faqa áfaannauqa faqa kai miná ufara eedóo qídaqa, úfai faqa nammári faqa miná ufara eedóo kai qídaqa.