Rev 10 | BJR | STEP | Miqímarufaqa qinée níndafaafananoo qangiroo moó ámudaanai qímarufa innaarúnaindari qúminau. Miná qamunna sía qáfaqiafana qoonnámu qámunnara foorá kai afisírafa márinau, miná ákiqa óondanda fíqu ínoo márinau, miná óori áfiri súani afu miqírafa dároo dáraa ímarinau, miná áikuqara saqári aadána kikíqinoo márifaqa idáree maríandee ímariqau.

‏ Revelation of John 10

Qangiroo moo pápiqa káqikaana rumbárana úqirafa qúminau.

1 Miqímarufaqa qinée níndafaafananoo qangiroo moó ámudaanai qímarufa innaarúnaindari qúminau. Miná qamunna sía qáfaqiafana qoonnámu qámunnara foorá kai afisírafa márinau, miná ákiqa óondanda fíqu ínoo márinau, miná óori áfiri súani afu miqírafa dároo dáraa ímarinau, miná áikuqara saqári aadána kikíqinoo márifaqa idáree maríandee ímariqau. 2 Miná ásaukuki papiqa káqikaana ásaana rúanifeera airíqoofanoo márinau. Mi-qangiroofá qumuréenoo ásauku uqannái aiku ooruku námmarisaa rámaseenoo ásaaqai áiku maqásaa rámaseenoo raióonara foora firaaqóo fáaqarufanoo innaarúnai qírafa dínni qísauku taikásee dínni ani qaara marasoofanoo innaarúnai firaaqóo dárara qímasee faiqíara foo ufa moó qímaminau. 4 Qinée Yoohaneesa innaarúnai qíra ufa irisée ákara ruanéeriafananoo innaarúnaindari qáoo qínoo qísauku dínni taikásee dínni ani qaaraqánda marasée innaarúnai qíra ufa sía ákara rúa, ámiqimasee kukéeqaa qufaqa kukéeqaqiafana.

5 Mi-qangiroofá áiku ooruku námmariki faqa maqásaa faqa roofá ásauku innaarúnai uqéeraseenoo narí amana aqiqámaseenoo qinau. Ánutufa náaru náaru márianafa innaarúna faqa maqá faqa ooruku námmari faqa quqóonafa minakí maru ainainausa áuqunafa márianafa aní áuqu rámasee maa-ufána qídaqa. Sía moo kári faqa Ánutufa nífeesida máriannoo. 7 Ínaaqianna qangiroo narí ufíreena fuaqásainanoo Ánutufa narí óoqai kukéeqaqai dóo quqáannoo, óoqai narí tamummáqara fasiqauqa ámiqira ufa qímannimuna dóo miqóo taikéenoo miqíannoo.

8 Miqí qímasoofanoo innaarúnaindaraa ufa fáasai qímaqimufa kafáa qímaqiminau. Anée qangiroo innai áiku ooruku námmariki faqa maqásaa faqa rámaqa̱i finnai papiqa airírana maqéeina máraa qufaqa qinée Yoohaneesa mifúnnai óonuree mi-papiqána qímiannee qíafananoo qímaqiminoo qinau. Dóo maraséenana námasainanoo áranandaki óoquree aseeúndammíannoo, óokinaa ookasaasá ánoonara foora adíafaammiannoo. 10 Miqí qímasoofaqa qinée miná ásaukukinaa papiqa marasée námasaafananoo dóoki ookasaasára foora adíafaainau, qíranandaki óoqureenoo aseeúndinau.

(Ookasaasá anoona náaru kambíqaaninna ainainara írirana adíafaa írafa máridanoo. Óosana óosana mandáinaina aupúrarana nárirana kambíqaaninafa aseeúndirafa máridanoo.)

11 Miqí másaafananoo qímaqiminoo qinau, anée Yoohaneefa anée kaifáa Ánutuna ufa moómoosasaa quqáa moómoo faiqí ánaasee faqa moómoo máqusanaasa faqa moómoo ufa qímariasa faqa karaambáiqauqa faqa ámiqimasee Ánutuna ámiqira nifaaqooqa faqa mandá nifaaqooqa faqa misá náaku nímaqainanoo misásaa kambíqaani.