Revelation of John 18
Babiroonia máqusa Ánutufa nárú taikóo ufafa.
1Qinée Yoohaneesa mi-ainaináusa qáfamasee moo qángiroo qáfaqiafana. Ánutufa narí afeeka firaaná ámufanoo innaarúnaindari maqásaa qumuroofanoo miná aréenarafa firaaqóo aiqáma maqa maaqasaa aréeneenoo káaqa qáma̱qinau. 2Mifá firaa kari maaqí qímasee naméera qinau. Mifá dóo kurídinoo firaa Babiroonia máqusa dóo áqufinoo kurídinoo. Mi-nakundúnaki áfaannauqa faqa nimanauqáindi qikairí faqaasauqa faqa ufiniuqá áfaanna ufini kai fídiaqaa írafauqa kai máridanoo. 3Mi-maqusánaasa nári úmmuarirana faiqí ánaasee narí deedéepa narí deedéepirana uáinna nammariara foora ánaamuru máriasa níminoo ínnee naaqée qímasoofaqa néeneeusa máridaqa. Maqásaaqaraasa ánaamuru karaambáiqauqa Babiroonia faqa úmmuaridaqa náafeeqeeusa máridaqa. Aiqáma máaqa máaqa pisinísa uqéeree maríasa Babiroonia máqannaasa káaqa aináina moómoo irairaaímarinanoo minánnai munnimma moómoo maree maríasa máridaqa.4Mi-qanqiroofá miqí qímasoofanoo innaarúnaindaraa ufa qinée Yoohaneesa moo íriqiafana. Mifá maaqí qímasee Ánutuna ufa írimariasa qímanniminoo qinau.
Óo qiní qíku qísauku ínnee mi-maqusánakiqari dóo ániaqa. Ínnee sía misá mandóosanaki kéeqaaqa miqíqa sía misá náriranaki faqa kéeqaaqa.
5Mi-maqusánaasa mandáinaina fannoo narámuaaqa narámuaaqa ínoo óorufíifanoo meerái innaarúnai óoru máridanoo. Ánutufa misá mandóosana qáfaidanoo íridanoo.
6Misá ínni mandaíkamánnimaqóondee kai ínnee quándaki nári nímiaqa. Misá ínni mandáikamánnimaqoona ákiaqara ínnee quándaki qaaraikámandee nímiaqa. Misá mandá nammari ínni nímunara ínnee quándaki mi-kaafánaki kai idáqainna nammarina firaaqóo nímifaqa naaqa.
7Babiroonia máqannaasa nári nifaaqa aréenarana faqa nári moómoo ámiqira ainaina faqa náriqa máraqau. Mi-ainainná amana kái ínnee aupúrarana faqa ikífaafau qírana faqa misá nímiaqa. Misá náriara úriqararausee qímariana sía maasá keekoopáu máridau. Maasá sía ikífaafau qianáuree qímariana ákiaqara aupúrarana faqa ikífaafau qírana faqa nímiaqa.
8Misá miqí qímaria mandáinaina ákiaqara misá firaaqóo nídafirana faqa namúana faqa aurírana faqa ikífaafau qírana faqa aandaróo nárirana faqa aiqáma ainaina moodáa kari misá nifaaqa quqásaaqa. Misá mi-maqusáfa idá qáma taikáannoo. Karaambáiqa Ánutufa misá ufa írimarifa afeeka úriqararafa márifa máridanoo.
9Mi-qangiroofá Babiroonia máqusara káqi qínoo qinau. Maa-maqa maaqánasaaqaraa karaambaiqauqa Babiroonia máqusaindaraa mandainaina máree maríasa mi-maqusána idáqainna idámuna qáfamasee firaaqóo ikíráqeefaranoo. 10Misá mi-maqusána aupúrarana qáfamasee rufíasee níanai tatíaqa máridaqa maaqí qímasee faiqíara foora mi-maqa maaqána qímamifaranoo. Óo mandáinaina, Óo náaquqara ainaina maa-firaa afeeka maqusá Babiroonia moodáa faasaana kai aní mandóosana ákiaqara kurídi taikáananoo.
11Maqásaa pisinísa fasiqauqa faqa mi-maqusánara ikíráqaida maaqí qifáranoo, sía mi-maqannáasa kafáa maasá ámiqira ainaina marasée feefaurú qímifaranoo. 12Sía kafáa moó fannoo maasá kóora faqa siruáa faqa firaa feefauru áqimaria óosana óosana óoniuqa faqa marasée feefaurú qímifaranoo. Sía kafáa moó fannoo maasá ámiqira qámunna óosana óosana saasáakoona árirana faqa fidíka árirana faqa marasée feefaurú qímifaranoo. Sía moó fannoo maasá ámiqira saqari faqa eereefanta aanainnái áuqimaria ainainna faqa firaa feefaurú áqimaria saqárinannai áuqimaria ainainna faqa booróosannai faqa qáinnannai faqa ámiqira óoninnai faqa áuqimaría ainainna sía kafáa marasée feefaurú qímifaranoo. 13Sía moó fannoo ooruku óosana óosana faqa ámiqimasee áfundimaru ainainna faqa makáqa nammari faqa fadaméena faqa parauáqa faqa ráisa faqa burimakáu faqa sipsípa faqa qóosa faqa qóosa rarisée mari karana faqa karabúsa aináinira faiqi faqa faiqí nimana faqa sía moó fannoo kaifáa mi-ainaináusa marasée munnimma qímifaranoo.
14Pisinísa ímaria fasiqausa Babiroonia máqusara maaqí qímasee qifáranoo. Babiroonia máqannaasa ínnee níqaararee márifaqa adíafaa ímarifaqa máree maría ainainausa dóo kukéeqafinoo, aní munnimma moómoo faqa aní adíafaairafa káaqa qáranasaa márina dóo taikéenoo sía kafáa paqúrinnaranoo. 15Pisinísaiki maría fasiqausa Babiroona máqannaasa ámiqira ainaina feefaurúmasee minánnai firaa munnimma máree marusa mi-maqusána aupúrarana qáfamasee rufíasee níanai tatíaqa márida ikíraqéesee soofaaramáseeqa maaqí qifáranoo. 16Óo maa-firaa maqusa mandáinaina náaquqarafa kambíqanoo máridanoo. Mi-maqusáfa ánaaseera foora saasáakoona árirana faqa fidíka árirana faqa afisírafa kóora áuqimaria oondana faqa firaa feefaurú áqimaria óoniuqa faqa afaaqa áuqirafa dóo maqee dadí taikáfinoo.
17Miqí qímaseenoo mi-qangiroofá sípa kiatéenara maaqí qinau. Aiqáma sípa kiatéenauqa faqa nári pooskúrauqa faqa nári pasindíauqa faqa aiqáma ooruku námmari ámuaqumau nídaqa aináini marúsa Babiroonia idámuna qáfeeqa níanai tatíeeqa ikíráqeeqa maaqí qifáranoo. Sía moo máqusa maa-firaa maqusa áuqu faqaafa miqírafa máridanoo. 19Miqí qímaseeqa kookooma afaqá qumáree níkiaqa ámoondúnna kukupámaseeqa maaqí qifáranoo. Óo mandáinaina náaquqarafa firaa maqusa áuqu faqaafa kukéeqeenoo. Aiqáma sípaki nusa ooruku námmari ámuaqumau nusá maa-maqusánakinaasa aináina moómoo nimisáida firaa munnimma máree marunausa dóo dauní mi-aiqama ainaináfa qáma taikéenoo.
20Mi-qangiroofá miqí qímaseenoo quándakufanoo Ánutuna áiku ásauku Babiroonia máqusara qímanníminau. Ínnee innaarúnai máriasa faqa Ánutuna áiku ásauku faqa Yísufa niqiqoo fásiqausa faqa Ánutuna tamummáqara fasiqauqa faqa ínnee aiqáma asasiaqa. Mi-maqusáfa ínni nári ifa miná ákiaqara Ánutufa maqee mi-maqusána árifanoo kurídinoo asasiaqa.
21Miqí qímasoofanoo qangiroo moo ámudaanái̱ qímarufa óoni firaatiá minánnai mi-aukuanná máru fasiqanaaseesa sakuma andaana andaana rímariqau. Mi-oonínna fooqáa tia rafúsu qumáreenoo ooruku námariki áranaiqi áqinoo qinau. Mi-firaa maqusána áuqu faqaana Babiroonia máqusa óoni áqunnana amana kái áqusainanoo kukéeqafinaqa sía kaifáa qáfeefaranoo. 22Minakí piripúnna árimariasa faqa káqikaa ufireena fuaqée maríasa faqa firaa ufireena kookáanauru fuaqée maríasa faqa aiqáma musíka fuaqée máriasa faqa sía kaifáa mi-maqusánaki qáfeefaranoo. Óosana óosana ainainí maríasa misá kúkusi maríafa sía kafáa írifaranoo, qaindi áfai faqa síammírifaranoo. 23Sía minakí qóoma qáannoo sía kafáa nimundárana tutúqirafa máriannoo. Babiroonia máqusai pisinísa ímarusa faqa aiqáma máqannaa pisinísa ímarúsa faqa úrinaaqararausa máriqau. Ínni áukainaina máraqa nuasa náriqa únnaqira áukainainannai aiqáma máqannaasa níkaruqidaqa.
24Ánutufa narí áiku ásauku fidíka faqa narí tamummáqara fasiqauqa fidíka faqa aiqáma maqásaa kúqimarusa faqa Babiroonia máqusaki paqúrunara nárírana nímiannoo.
Copyright information for
BJR