‏ Luke 8

Ambi tosatŋan Jisös naŋgöba anget.

1Miaŋgö andöŋe Jisösnöŋ liliköba taonŋi taonŋi aka miriŋi miriŋi miaŋgöreŋ anda Anutugö bemtohoŋgö könaŋi jim asariba Ölöwak Buŋa keunöŋ ambazip uruŋini kuŋguba malök. Gwarekurupŋi 12 yeŋön yambuk mohotŋe anget. 2Mewöyök ambi tosatŋan yambuk anget. Ambi mi mutuk kawöl eŋgöhöi ömenöŋ kölköljiŋjiŋ mem eŋgii malgetka Jisösnöŋ mem ölöwak eŋgiyök. Ambi mi kewö: Maria qetŋi kun Magdalagö ambia qetket. Jisösnöŋ yaŋgö uruŋeyök öme 7 közöl eŋgii kota anget. 3Ambi kun qetŋi Joana. Yaŋgö apŋi qetŋi Kuza yaŋön kiŋ Herodkö jakömbuak miri miaŋgöreŋ gawmangö moneŋ galömŋa malök. Ambi kun qetŋi Susana, Yeŋön aka ambi tosatŋi gwötpuk yeŋön nanŋini moneŋ inapŋinan Jisös aka gwarekurupŋi könanöŋ galöm köla naŋgöm eŋgiget. Mewö. ^a

Qesiŋqesiŋ azigö dopkeu

Mat 13.1-9, Mak 4.1-9

4Ambazipnöŋ taon dop miaŋgöreŋök öröba Jisösgöreŋ kaba kambulelembenöŋ tokogetka Jisösnöŋ dopkeu kun kewö jiyök:

5“Azi kunöŋ nene kötŋi qesiŋ gilmamgö anök. Anda qesiŋniga kötŋi tosatŋan köna jitŋe geba kölget. Geba kölgetka ambazipnöŋ tim tökötahögetka könakemba (warawen) neiŋi neiŋi kaŋgota mi nem teköget. 6Kötŋi tosatŋan köt jamönjiŋnöŋ geba kölget. Geba köla miaŋgöreŋ gölme oŋambuk qahö miwikŋaiba korapŋi kota soholiba gororoŋgöget.

7“Kötŋi tosatŋan siri uret wahiŋinambuknöŋ geba kölget. Geba kölgetka mieŋön öröröŋ kota eŋgoŋgita qem turuba böbölohot mem eŋgiget. 8Kötŋi tosatŋan gölme ölöpŋe geba kölget. Geba köla jula wahöta ölŋini ölöpŋi asuhuba handötkö dop ahum sehiget.”

Keu mi jim teköba qet ketaŋi kewö qerök, “Kunŋan urukezapŋambuk malja ewö, yaŋön mönö dopkeu ki kezap ala möt kutuma.” Mewö.

Jisösnöŋ denöwögöra dopkeugö könaŋi jiyök.

Mat 13.10-17, Mak 4.10-12

9Mewö jiiga gwarekurupŋan dopkeu kiaŋgö könaŋaŋgöra Jisös qesim waŋgiget. 10Qesim waŋgigetka jiyök, “Anutugö bemtohoŋe aŋgota malbingö keu tölapŋi mi eŋgöra aukŋe jibi möt kutuzemö, tosatŋi yeŋgöra mia dop keunöŋ jibi mörakze. Mewö möta nanŋini jeŋinan yuai ekagun könaŋi töndup qahö ek kutume. Nanŋini kezapŋinan keu törörök mötagun könaŋi töndup qahö möt asarime.” ^b

Jisösnöŋ dopkeugö könaŋi jiyök.

Mat 13.18-23, Mak 4.13-20

11“Dopkeu miaŋgö könaŋi kewö: Köt qesiŋ giljawi, mi Anutugöreŋ Buŋa keu. 12Nene kötŋi köna jitŋe geba kölgeri, mi kewö: Ambazip tosatŋan Buŋa keu mötzemö, mi mötketka Bölöŋi Toŋan kaba uruŋini meleŋda Suepkö buŋa akepuköra keu kötŋi mi uruŋineyök qeköba eŋguaŋgirakza. 13Nene kötŋi qesiŋniga köt jamönjiŋnöŋ geba kölgeri, mi ambazip söpsöpŋi kun. Yeŋön Buŋa keu möta mi sösöŋgai qakŋe möt aŋgön kölakzemö, uruŋine geba jalöŋini qahö megeraŋgöra nalö töröptökŋi miyök möt nariba malgetka esapesapkö nalöŋe mönö tala eŋguma.

14“Nene kötŋi qesiŋniga siriuret wahiŋinambuknöŋ geba kölgeri, mi kewö: Yeŋön Buŋa keu mötketka uruŋine gezapmö, gölmenöŋ malmalgö waimanjatŋi aka moneŋ inap memegö urukönöpŋi ahuba lömbörim eŋgimakza. Qetbuŋaŋinambuk akingöra köpösöŋgögetka sihim kömbönaŋi bölöŋi tosatŋan mewöyök uruŋine dumgöba Buŋa keu böbölohot mem waŋgize. Mewö aiga ölŋini qahö gilipitŋi akŋe. 15Qahöpmö, nene kötŋi gölme ölöpŋe geba kölgeri, mi ambazip kewöŋi: Yeŋön Buŋa keu kezap ala mötketka uruŋini ölöpŋi geŋmoŋi qahö miaŋgöreŋ geiga sohobapukö mökösöŋda 8kapaŋ köla galöm kölgetka ölŋini ölöpŋi ölöpŋi miwikŋaimakze.” Mewö.

Yuai asa-asambötŋi pakpak mi aukŋe ahuma.

Mak 4.21-25

16“Kunŋan lambe me kiwa ohotiriba kimbutnöŋ kude köl turuma me dum bapŋe qahö alma. Mi qahöpmö, mi miaŋgö dum qakŋe ali tatma. Tata asariiga tosatŋan miri uruŋe öŋgöbingö mötzei, yeŋön miaŋgö asakŋi eka ölöp öŋgöme.

17“Mewöŋanök urunine yuai kun asambötket tölapŋe ahözawi, mi mönö aukŋe asuhum tiŋgitma. Yuai kun köl turuin ahözawi, mi mönö luluŋgetka kötula ahöma.

18“Miaŋgöra Anutugö keu mötzei, mi mönö urukönömŋine ala mötmöriba köl guliba malme. Kunŋan mötkutukutuŋambuk maljawi, Anutunöŋ mönö mi toroqem waŋgii qarimapmö, kunŋan mötkutukutuŋi qahö maljapmö, ‘Miambuk maljal,’ jizawi, Anutunöŋ mönö mötmötŋi moröŋi mi mewöyök qeköba waŋgitma.” Mewö. ^{c , d , e}

Jisösgö nam-munurupŋi.

Mat 12.46-50, Mak 3.31-35

19Jisösnöŋ mewö jiba maliga nam munŋan i ekingö kagetmö, ambazip kambu ketaŋan ölököba gwözöŋgeraŋgöra kösutŋe anbingö osiget. 20Osiba kingetka kunŋan kewö jii mörök, “Göhö nam-mungan mönö yaigep kinda gi gekingö mötze.”

21Jii mörökmö, Jisösnöŋ kewö meleŋda jii mötket, “Ambazip ki Anutugö Buŋa keu möta tem köla köl gulimakzei, mieŋön mönö nöŋgö namni aka munurupni akze.” Mewö.

Jisösnöŋ jiiga raidimbom göröŋ qeyök.

Mat 8.23-27, Mak 4.35-41

22Wehön kunöŋ Jisösnöŋ gwarekurupŋi kewö jii mötket, “Mönö mosöta o aŋgö kutuba likepŋe aŋgotpin.” Mewö jiiga waŋgenöŋ mohotŋe öŋgöba o aŋgö qakŋe anget. 23Anda opo seri möröreŋgögetka luhutnöŋ naŋgöiga angetka Jisösnöŋ gaun ahöyök. Ahöiga luhut raidimbom o aŋgönöŋ gila siri kunduriga waŋge uruŋe geyök. Geba numbuŋe qemamgö aiga ayuhubingö aket.

24Ayuhubingö aka gwarekurupnan anda möndöba jiget, “Kembu Ketaŋamnini, mönö nini aŋgönöŋ ayuhubingö akzin.” Mewö jigetka imbiŋi möta luhut aka o aŋgögö siriŋi kewö jim qetal etkiiga ösumŋiran eriga nöŋ qeba ahöyök.

25Mewö aiga jii mötket, “Eŋgö mötnaripŋini mi denike?” Mewö jiyökmö, yeŋön awöwöliba qem sömbuŋini möta jiget, “Yei, azi kia mönö denöwöŋan malja? Yaŋön mönö luhut aka köwet siri jim kutum etkiiga jitŋi tem köl waŋgizahot.” Mewö.

Ömenöŋ bau uruŋine gegetka azinöŋ ölöwahök.

Mat 8.28-34, Mak 5.1-20

26Jisösnöŋ gwarekurupŋi yembuk toroqeba opo seri möröreŋgögetka luhutnöŋ naŋgöi anda o aŋgö kutuba Galili prowins likepŋe Gerasa gölmenöŋ aŋgotket. 27Miaŋgöreŋ aŋgota saknöŋ öŋgöi azi ömeŋambuk kun mi taonöhök kaba Jisös miwikŋaiyök. Azi mi qaksirinöŋ mala qamöt köteŋi esiba urorohoget ahögeraŋgöreŋ ahöm malök. Nalö köröpŋi opo maluku qahö löŋgöta miri kungö uruŋe qahö ahömalök.

28Ömenöŋ nalö köröpŋi öröm ureim waŋgiiga azi gwötpukŋan börö takŋi qeba könaŋi tapepnöŋ (muŋgamuŋga) jöhöba galöm köla malgetmö, tapepŋi öröi tiŋgitqiŋgiriga ömenöŋ kuŋguiga gölme qararaŋkölkölŋe anda laŋ malök. Miaŋgöra Jisösnöŋ ömeŋi mi kewö jim kutum waŋgimamgöra ahök, “Öme bölöŋi, gi mönö kota azi ki mosöta anöŋ.” Mewö jimamgö aiga Jisös eka silata gölmenöŋ kösutŋe geba qet gigilahöba kewö qerök, “Aek Jisös, gi Anutu öŋgöŋgöŋaŋgö nahönŋi akzan. Gi mönö denöwö ak niŋgimamgöra ki kazan. Nöŋön ulet gihizal: Gi sihimbölö könöpŋambuk kude ak niŋginöŋ.”

30Mewö jiiga kewö qesiyök, “Gi qetki niŋi?” Ömewöröme gwötpuk uruŋe geba malgeraŋgöra “Qetnini lijön jizin” jiget. Mi nanine keunöŋ Kerök kambu ketaŋi. 31Mewö jiba Jisös kewö ulet waŋgiget, “Gi neŋguataŋgöba öme löm dutŋi qahö miaŋgöreŋ gebingöra kude jim kutum neŋgiman.”

32Kösutŋine kunduŋi marömŋe miaŋgöreŋ bau kambu ketaŋi kun gwözözak uruŋe kuluŋda malget. Miaŋgöra ömenöŋ kewö jiba ulet waŋgiget, “Gi ölöp jinöŋga nini bau mieŋgö uruŋine gebin.” Ulet waŋgigetka “Mönö anda geget.” Jiba jim kutum eŋgiyök. 33Jim kutum eŋgiiga azi uruŋeyök kota anda bau uruŋine geget. Gegetka bau kambu yeŋön mönö luhuba nembönembönöŋ anda jororoŋgöba o aŋgönöŋ geba nemulahöba kömuget.

34Mi asuhuiga bau galöm yeŋön mi eka taon aka miri morömorö miaŋgöreŋ ölöŋ unjurata anda keu buzupŋi mi jiget mötket. 35Jiget möta ambazip sesegilgil yeŋön yuai asuhuyöhi, mi ekingöra kaget. Kaba Jisösgöreŋ kaŋgota azi uruŋeyök ömenöŋ kotkeri, yaŋön könaŋe tariga miwikŋaiget. Opo sileötaŋi törörök jöhöba uruŋi amöriiga imbi mötmötŋi pakpak asuhuiga eka awöwöliget. 36Azi ömeŋambuk malöhaŋön denöwö ölöwahöhi, mi jeŋinan ekeraŋön jiget mötket.

37Möta gwötpuk awöwöliba qem sömbuŋini mötket. Miaŋgöra Gerasa gölmegö ambazip kambu pakpak yeŋön Jisösnöŋ eŋgömosötmapköra ulet waŋgiget. Ulet waŋgigetka liliŋgöba anmamgö waŋgenöŋ öŋgömamgö ahök. 38Öŋgömamgö aiga azi uruŋeyök ömenöŋ kotkeri, yaŋön kaba Jisösbuk mohotŋe anda malmamgöra qesiyök. Mewö qesiyökmö, Jisösnöŋ qetala melaim waŋgiba kewö jiyök,

39“Gi mönö liliŋgöba mirige anda Anutunöŋ aŋgöletot ketaŋi ketaŋi ak gihiyöhi, miaŋgö kösohotŋi jinöŋga mötme.” Mewö jiiga anda Jisösnöŋ aŋgöletot ketaŋi ketaŋi ak waŋgiyöhi, miaŋgö keuŋi mi taon uruŋe liliköba miri dop jim sehiyök. Mewö.

Jairusnöŋ böratŋaŋgöra Jisös köuluköyök.

Mat 9.18-26, Mak 5.21-43

40Ambazip pakpak Jisösgö mambötketka liliŋgöba kaiga kambu köla söŋgaiba öröm waŋgiget. 41Köuluk mirigö keu galöm kun qetŋi Jairus yaŋön kaba Jisösgö wösöŋe geba simin köla miriŋe kamapköra köuluköm waŋgiyök. 42Moröurupŋi qahöpmö, böratŋi mukmorö mohok yambuŋi (yara) 12:gö dop mala kömumamgö ahök. Jisös köl öröm waŋgigetka aniga ambazip kambunöŋ likeplikep ölököba utal waŋgiget. Mewö.

Kawöl ambi kunöŋ Jisösgö malukuŋi misiriyök.

43Utal waŋgiba angetka miaŋgöreŋ sutŋine ambi kun malök. Yaŋön yambu (yara) 12 miaŋgö dop köiŋnöŋ ehiga nalö dop kawöl yöhöiga malök. Yaŋön sile galöm yeŋgö töwaŋini moneŋ inapŋi pakpak gil maliga sile galöm körekŋan mem ölöwakingö osiget. 44Ambi miaŋön Jisösgö andöŋe anda malukuŋaŋgö kitip suŋi misiriiga miaŋgöreŋök sepŋi jöpköyök.

45Jisösnöŋ qesiba jiyök, “Daŋön nömisiriza?” Mewö jiyökmö, ambazip körekŋan mi qaŋ kölgetka Pitönöŋ jiyök, “Ketaŋamni, ambazip kambunöŋ ölököba utal aŋguba kaba goseize.”

46Jiiga Jisösnöŋ jiyök, “Qahö, kunŋan nömisiriiga ösumni kun ani mötzal.” 47Mewö jiiga ambinöŋ “Könaŋamni lök asuhuza,” jiba jönömŋi unduiga kaba Jisösgö wösöŋe simin köla kawölŋaŋgö könaŋi aka misiriba miaŋgöreŋök ölöwahöhi, miaŋgö könaŋi aukŋe jiiga ambazip kambu körekŋan mötket. 48Mötketka Jisösnöŋ kewö jii mörök, “Böratni, mötnaripkan mönö mem ölöwak gihiza. Ölöp urubönjöŋnöŋ anman.” Mewö.

Jisösnöŋ Jairusgö böratŋi mem guliyök.

49Keu mewö jiba kiniga köuluk mirigö keu galömŋaŋgö mireyök kunŋan welen kaba Jairusgöra jiyök, “Böratkan kömuza! Miaŋgöra böhigö qakŋe lömböt toroqeba kude alman.”

50Jiyökmö, Jisösnöŋ keu mi möta köuluk mirigö keu galömŋi kewö jii mörök, “Keŋgötki kude mötman! Mohok-kun akŋan. Mönö ni möt narim niŋginöŋga böratkan ölöwakŋa.”

51Mewö jiba yaŋgö mire anda ambazip tosatŋi eŋgömosöta Pitö, Jon, Jeims aka morö böratkö iwinamŋi iyök eŋguaŋgiri nanŋinök miri uruŋe öŋgöget. 52Öŋgögetka ambazip körekŋan jiŋgeŋ köla sahöta amburereŋ megetmö, Jisösnöŋ jiyök, “Yaŋön qahö kömuzapmö, gaunök ahöza. Miaŋgöra mönö sahöt mosötme.”

53Mewö jiiga gönahit ewö aiga “Mönö kömuza!” möta gön köl waŋgiget. 54Gön köl waŋgigetmö, börat mi böröŋe memba qeta jiyök, “Böratni, mönö wahötnöŋ.” 55Mewö jiiga uŋaŋan liliŋgöiga miaŋgöreŋök wahöta kinök. Kiniga numbu nene waŋgiget nemapkö jiyök. 56Iwinamŋan mi eka welipköyohotmö, Jisösnöŋ yuai asuhuyöhi, miaŋgö buzupŋi kun jiget mötpepukö soŋgo al eŋgiyök. Mewö.