‏ Mark 4

Qesiŋ gilgil azigö dopkeu

Mat 13.1-9, Luk 8.4-8

1Jisösnöŋ kunbuk o aŋgö jitŋe geba könahiba kusum eŋgiyök. Kusum eŋgiiga ambazip kambulelembenöŋ yaŋgöreŋ anda tokogetka waŋgenöŋ öŋgöba o aŋgö qakŋe anda tarök. Tariga ambazip pakpak yeŋön aŋgö göraŋe saknöŋ tokoget. 2Mewö tokogetka dopkeu gwötpuk jiba kusum eŋgiyök. Kusum eŋgiba kewö jiyök.

3“Mötket! Azi kunŋan nene kötŋi qesiŋ gilmamgöra nupnöŋ anök. 4Anda qesiŋ giliga kötŋi tosatŋan köna jitŋe geba kölget. Geba kölgetka (warawen) neiŋi neiŋi kaŋgota mi nem teköget. 5Kötŋi tosatŋan köt jamönjiŋnöŋ geba kölget. Geba köla miaŋgöreŋ gölme gwötpuk qahö miwikŋaiget. Gölme dutŋi qahö ahöyöhaŋgöra korapŋi zilaŋ kotket. 6Kotketmö, wehönöŋ kota enguba jem kutum eŋgiiga jalöŋini qahöpköra soholiba gororoŋgöget. 7Kötŋi tosatŋan siriuret wahiŋinambuknöŋ miaŋgöreŋ geba kölget. Geba kölgetka mieŋön kota qem turugetka böbölohot mem eŋgiget.Mewö aka ölŋi qahö kuŋguget. 8Kötŋi tosatŋan gölme ölöpŋe geba kölget. Geba köla korapŋini jula wahöta ipŋinaŋgö ölŋini ölöpŋi asuhuget. Tosatŋan kötŋini 30, Tosatŋan kötŋini 60, tosatŋan 100 miaŋgö dop ahum sehiget.” 9Mewö jiba jim teköyök, “Kunŋan urukezapŋambuk malja ewö, yaŋön mönö dopkeu ki kezap ala möt kutuma.” Mewö. ^a

Jisösnöŋ wanigöra dopkeu jiyök.

Mat 13.10-17, Luk 8.9-10

10Kambu ketaŋi yeŋön deŋda angetka Jisösnöŋ nanŋök tarök. Nanŋök tariga gwarekurupŋi 12 aka tosatŋi liliköm waŋgigeri, mi mohotŋe dopkeu kieŋgö könaŋinaŋgöra qesim waŋgiget. 11Qesim waŋgigetka kewö meleŋda jiyök, “Anutugö bemtohoŋe aŋgota malbingö keu tölapŋi mi eŋgöra aukŋe jibi möt kutuzemö, yaigep maljei, yeŋgöra mi pakpak mönö dopkeunöhök asuhumakza. 12Mewö asuhuiga

‘Nanŋini jeŋinan yuai ekagun könaŋi töndup qahö möt kutume.
Nanŋini Kezapŋinan keu törörök mötagun könaŋi töndup qahö möt asarime.
Mi möt asaribeak ewö, mönö ölöp uruŋini meleŋgetka Anutunöŋ siŋgisöndokŋini mosötpawak.’” ^b

Jisösnöŋ dopkeugö könaŋi jiyök.

Mat 13.18-23, Luk 8.11-15

13Jisösnöŋ toroqeba kewö jii mötket, “Dopkeu miaŋgö könaŋi kewö. Mi kude möt asarize ewö, dopkeu tosatŋi pakpak jimami, mi mönö denöwö möt asaribeak? 14Dop Keu miaŋgö könaŋi kewö: Qesiŋgilgil azinöŋ Buŋa keu qesiŋda gilja. 15Nene kötŋi köna jitŋe geba kölgeri, mi kewö: Buŋa keu qesiŋ gilgetka ambazip uruŋine gezapmö, mi mötketka Satanöŋ miaŋgöreŋök kaba keu uruŋine qesiŋget geyöhi, mi qeköba eŋguaŋgirakza. 16Nene Kötŋi qesiŋniga köt jamönjiŋnöŋ geba kölgeri, mi mewöyök ambazip söpsöpŋi kun. Yeŋön Buŋa keu möta miaŋgöreŋök sösöŋgai qakŋe möt aŋgön kölakze. 17Mewö ahakzemö, uruŋine jalöŋi qahö ahöm eŋgimapmö, nalö töröptökŋi miyök kin köhöiba malme. Buŋa keugöra aka kahasililiŋ me sesewerowero asuhuiga nalö miaŋgöreŋök mönö tala eŋguma. 18Nene kötŋi qesiŋniga siriuret wahiŋinambuknöŋ geba kölgeri, mi kewö: Yeŋön Buŋa keu mötketka uruŋine geza. 19Gezapmö, gölmenöŋ malmalgö waimanjatŋi aka moneŋ inap memegö urukönöpŋi ahuba lömbörim eŋgimakzal. Qetbuŋaŋinambuk akingö köpösöŋgögetka sihim kömbönaŋi bölöŋi tosatŋan mewöyök uruŋine dumgöba Buŋa keu böbölohot mem waŋgize. Mewö aiga ölŋini qahö gilipitŋi (ambetakŋi) akŋe. 20Nene kötŋi gölme ölöpŋe qesiŋniga geba kölgeri, mi ambazip kewöŋi: Yeŋön Buŋa keu kezap ala möta möt aŋgön köla pöndaŋ kinda ölŋini miwikŋaimakze. Tosatŋan keu jit mohoknöhök kötŋi 30 miwikŋaimakze. Tosatŋan ölŋini 60, tosatŋan keu köt mohot mohot mieŋgö ölŋini 100 mem sehiba miwikŋaimakze.” Mewö.

Lampe mi asakŋi neŋgimapköra ahöza.

Luk 8.16-18

21Jisösnöŋ keu kun kewö jiyök, “Kunŋan lambe me kiwa memba ohotiriba kimbut me dum bapŋe alma me qahö? Mi waniŋe alma? Mi mönö miaŋgö dum tatatnöŋ aukŋe alma. 22Mewöŋanök yuai kun asambötket ahözawi, mi mönö aukŋe asuhum tiŋgitmapköra ahöza. Yuai kun köl turuget ahözawi, mi mönö luluŋget kötulmapköra aka ahöza. 23Kunŋan urukezapŋambuk malja ewö, yaŋön mönö dopkeu ki kezap ala möt kutuma.” Mewö. ^{c , d}

Denöwö diwelopmen ahuza?

24Jisösnöŋ keu kewö jii mötket, “Keu mötzei, mi mönö möt aŋgön köla urukönimŋine ala köl guliba malme! (Mewö malgetka uruŋini diŋgiiga mötmötŋinan qariiga möt kömume.) Iŋini tosatŋi yeŋgö keuŋini kewöta jim tekömei, Anutunöŋ mönö jimkutukutuŋini mohot miaŋgö dop nanŋini keuŋini kewöta jim teköma. Dop mi mönö oŋgita likepŋi meleŋ eŋgima. 25Miaŋgö könaŋi kewö: Kunŋan mötkutukutuŋambuk maljawi, Anutunöŋ mönö mi toroqem waŋgiiga malmapmö, kunŋan mötkutukutuŋi qahö maljawi, Anutunöŋ mönö mötmötŋi moröŋi ahözawi, mi mewöyök qeköba waŋgitma. Mewö. ^{e , f}

Buŋa keu kötŋi mi korapŋambuk.

26Jisösnöŋ dopkeu kun kewö jiyök, “Anutugöreŋ bemtohoŋi mi kiaŋgö dop: Azi kunŋan nuwe anda nene kötŋi qesiŋda gilma. 27Qesiŋda gila anda suŋgem silim ahöba wahöta ahöba wahöriga nene kötŋaŋgö korapŋi jula korakze. Denöwö jula korakzei, mi nanŋak qahö möt kutuza. 28Gölmenöŋ nanŋök nam köli ölŋi asuhumakza: Mutuk ipŋi, könaŋgep ölŋi aka miaŋgö andöŋe ölŋaŋgö kötŋi mi körek asuhuba qarim teköme. 29Ölŋi qarim teköba öliiga ölŋi memegö nalöŋi aiga welenqeqeurupŋi melaim eŋgiiga souŋini kapeŋkapeŋgöŋi jitŋinambuk memba ölŋi membingöra nupŋe anme.” Mewö. ^g

Nejoŋ kötŋaŋgö dopkeu

Mat 13.31-32,34, Luk 13.18-19

30Jisösnöŋ dopkeu kun kewö jiyök, “Anutugö bemtohoŋi mi wanatpuk dop albinak me wanat söpsöp keu jiba jim asaribinak? 31Mi nejoŋ kötŋaŋgö dop kewö akza: Kötŋi mi morö közözömŋi. Mi gölmegö nene köt pakpak mieŋgö eretŋini akza. Mewö aiga nup gölmenöŋ esize. 32Esizemö, jula wahöta yöha pakpak eŋgoŋgita qariba böröŋi ketaŋi gili anje. Mewö gili angetka könakembagö neiŋi neiŋi mieŋön aipŋini miaŋgö aumŋe alakze.” Mewö.

Jisösnöŋ dopkeu gwötpuk jiyök.

33Jisösnöŋ dopkeu mewöŋi mewöŋi mi gwötpuk jiba mala Buŋa keu jiiga mötket. Möt kutugeraŋgö dop mi jiiga möta malget. 34Nalö dopkeuŋi pakpak mi dopkeunöŋ jiba malök. Keuŋi kun öne kude jiyökmö, gwarekurupŋi yembuk nanŋinök malgetka keu pakpak mieŋgö könaŋini mi jim asarim eŋgiba malök. Mewö.

Jisösnöŋ jiiga raidimbom göröŋ qeyök.

Mat 8.23-27, Luk 8.22-25

35Wehön miaŋgöreŋ mare aiga Jisösnöŋ gwarekurupŋi kewö jii mötket, “Mönö mosöta aŋgö kutuba likepŋe aŋgotpin.” 36Mewö jiiga ambazip kambu eŋgömosöta Jisös waŋgigetka waŋgenöŋ tari anget. Waŋge tosatŋi mi mewöyök yembuk awataŋ anget. 37Angetka raidimbom ketaŋan ömtöröp (töröpŋanök)giliga sirinöŋ waŋge uruŋe gegetka waŋge numbuŋe qemamgö ahök. 38Mewö aiga Jisösnöŋ waŋge teteköŋe tata qömböŋnöŋ nariba gaun ahöyök. Gaun ahöiga gwarekurupŋan anda möndöba jiget, “Hei böhi! Nini aŋgönöŋ ayuhubingöra akzin. Miaŋgö waimanjatŋi kun mötzan me qahö?”

39Mewö jigetka imbiŋi möta luhut aka siri kewö jim qetal etkiyök, “Mönö bököba öne ahönöŋ!” Mewö jiiga luhutnöŋ döŋgöiga sirinöŋ nöŋ qeba ahöyök. 40Mewö aka kewö jim eŋgiyök, “Iŋini mönö wuanöŋgöra keŋgöt mötmöt azia akze? Denöwögöra aka Anutu qahö möt narize? Sömbuŋini mönö öne mötze.”

41Jiiga awöwöliba qem sömbuŋini möta eraum mötket, “Yei, azi kia mönö denöwöŋan malja? Yaŋön mönö luhut aka köwet jim kutum etkiiga jitŋi tem köljahot?” Mewö.