‏ Matthew 22

Maren lömbuaŋgö söpsöp keu

Luk 14.15-24

1Jisösnöŋ kunbuk könahiba söpsöp keunöŋ keu kewö jiyök, 2“Suepkö bemtohoŋi mi kiaŋgö dop akza: Kiŋ azi kembunöŋ nahönŋaŋgöra maren lömbuaŋ areŋgöba mözözömgöyök. 3Mözözömgöba welenqeqeurupŋi melaim eŋgiba kewö jiyök, ‘Nöŋön ambazip tosatŋi maren lömbuaŋnöŋ kamegö mötzal. Iŋini mönö yeŋgöreŋ kolek anda kamegö jiget mötme.’ Mewö jii anda jigetmö, ambazip mieŋön mi möta kabingö tököba taŋqaŋ aket.

4“Miaŋgö andöŋe welenqeqeurup tosatŋi kunbuk melaim eŋgiba kewö jiyök, ‘Ambazip kamegöra jiali, mönö yeŋgöreŋ anda kewö jime: Mötket, nöŋön lömbuaŋgö neneŋamni lök mözözömgöbiga tatza. Nöŋgö bulmakau aziŋi aka bulmakau tosatŋi gumohom eŋgiinga kelökŋinambuk akeri, mi eŋguba ohom qeraköinga yuai pakpak lök jöjöröba ahöza. Iŋini mönö maren lömbuaŋnöŋ kaget.’

5“Mewö jii angetka ambazip mieŋön keu miaŋgö kezap qahö algetmö, nönöŋgan aka laŋ anget. Tosatŋan nene nupŋine angetka tosatŋan kölköl-örörö nupŋine anget. 6Tosatŋan kiŋgö welen-qeqeurupŋi qelanjiba eŋgömemba öröm ureim ak eŋgiba eŋguget kömuget. 7Kömugetka kiŋgö irimŋi seholiiga yarö kambuŋi melaim eŋgiiga anda kinda eŋguget kömukömu azi mi köndeŋ eŋgiba taon miriŋini mi ohogetka jeyök.

8“Miaŋgö andöŋe kiŋnöŋ welenqeqeurupŋi yeŋgöra kewö jiyök, ‘Maren lömbuaŋ mözözömgöinga jöjöröba tatzapmö, ambazip kamegöra jiali, yeŋön mönö sösöŋgainöŋ kakagö dop ölöpŋi qahö akze. 9Miaŋgöra iŋini mönö köna soŋanöŋ aka miri sombemŋi sombemŋi miaŋgöreŋ anda ambazip mi me mi miwikŋaim eŋgimei, i mönö maren lömbuaŋnöŋ kamegöra jiba kapaŋ köla kuŋgum eŋgime.’

10“Mewö jiiga welenqeqeurupŋan mosöta könaŋi könaŋi miaŋgöreŋ anda ambazip mi me mi miwikŋaim eŋgigeri, mi körek pakpak öröm tokom eŋgiget. Ambazip ölöpŋi aka bölöŋi mewöyök mi mewö kagetka maren lömbuaŋ mirinöŋ kokolak qeiga tebol liliköba tatket. 11Tebol liliköba tatketmö, kiŋnöŋ i eŋgekŋamgöra kaba miaŋgöreŋ azi kun maren lömbuaŋgö maluku tuatŋi qahö köli geiga ehök. 12Azi mi eka kewö jii mörök, ‘Alani, gi maren lömbuaŋgö malukuŋi qahö löŋgöta töndup denöwögöra miri kiaŋgö uruŋe kazan?’ Mewö jiiga azi miaŋön keuŋi bököiga ölöŋ tarök.

13“Mewö tariga kiŋnöŋ welenqeqeurupŋi kewö jim kutum eŋgiyök, ‘Mönö azi mi memba köna böröŋi jöhöba yaigep gilgetka pandamanöŋ gema.’ Miaŋgöreŋ malmeaŋön mönö sahöt gigilahöba irimŋini yöhözömgögetka qetŋi qeri malme. 14Keu miaŋgö dop Anutunöŋ ambazip sehisehiŋan kamegöra jiyökmö, awamdökŋi yeŋön keu mi möt aŋgön köla kaba Anutunöŋ kambu möwölöhöm eŋgiyöhi, mönö yeŋgö sutŋine kaŋgotme.” Mewö. ^a

Takis alalgö Jisös esapköm waŋgiget.

Mak 12.13-17, Luk 20.20-26

15Miaŋgö andöŋe Farisi (Köna keugö kapaŋkölköl) yeŋön anda eraum möta Jisös qesiba keugö bötaknöŋ öröi gwaröhöm waŋgibingö areŋi alget. 16Mewö areŋ ala gwarekurupŋi aka premiö Herodkö pati-alaurupŋi tosatŋi melaim eŋgigetka Jisösgöreŋ kaba kewö qesiba jiget, “Böhi, göŋön azi ölŋi akzani, nini mi mötzin. Göŋön ambazip tosatŋi qahö eŋgek soriba tosatŋi qahö qepureim eŋgimakzanmö, dop mohotnöŋ kewöt neŋgimakzan. Miaŋgöra kuŋgum gihigetka qahö goŋgiba ketaŋi qahö esuhum eŋgimakzanmö, Anutugöreŋ köna mi keu ölŋaŋgö dop kusum neŋgimakzan. Göŋön Anutugöreŋ keu diŋdiŋi miaŋön öŋgöŋgöŋi eretŋi mohot pakpak jim qindiŋ ak neŋgimakzan. 17Miaŋgöra keu kiaŋgöra denöwö mötmörizan, mi jinöŋ mötpin. Nini sisa-kiŋgöra takis ala miaŋön Mosesgö Köna keu siŋgibin me qahö?”

18Mewö qesigetka areŋini muneŋi möt kutuba kewö jii mötket, “O urumeleŋgö silesile azi, iŋini mönö wuanöŋgöra keugö bötaknöŋ al niŋgibingö esapköm niŋgize? 19Ölöp takis alalgö moneŋi kun kondel niŋgigetka eki.” Mewö jiiga silwö moneŋ (Kina 5) kun memba kaget.

20Kagetka kewö qesim eŋgiyök, “Dagöreŋ imut aka qet mi ki ohoget ahöza?” 21“O mi sisa-kiŋgöreŋ,” mewö meleŋda jiget. Jigetka kewö jii mötket, “Mewö aiga yuai sisa-kiŋgö imutŋambuk buŋaŋi akzawi, mi mönö yaŋgöra al waŋgime. Yuai kun Anutugö buŋaya akzawi, mi mönö Anutugö buŋa qeme.” 22Mewö jii möta yaŋgöra gwötpuk welipköba mosöta yaigep anget. Mewö.

Kömupnöhök wahötwahötkö Jisös esapköm waŋgiget.

Mak 12.18-27, Luk 20.27-40

23Sadyusi (Jike nupkö kapaŋkölköl) yeŋön ‘Kömugeri, yeŋön kude wahötme,’ jiba malget. Nalö miaŋgöreŋ yeŋgöreŋök tosatŋan Jisösgöreŋ kaba kewö qesim waŋgiba jiget, 24“Böhi, Mosesnöŋ kewö jim kutum neŋgiyök ahöza, ‘Azi kun ambi meiga nahönbörat qahö ahui kömuiga munŋan ölöp malöŋi memba mala gwölönarök qiwikŋaim waŋgiiga datŋaŋgö qet bisiba malma.’ 25Mötnöŋ, nalö kunöŋ darumun 7 malget. Datŋini mutukŋan ambi memba mala gwölönarökŋi qahö öne mala kömuyök. Kömuiga munŋan malöŋi mi meyök.

26“Memba mala kömuiga munŋi kunŋan malöŋi mi meyök. Meiga miaŋgö andöŋe munŋi kunöŋ ambi miyök meyök. Mewöŋa mewö darumun 7 pakpak yeŋön ambi mohok miyök memba gwölönarök qahö mala kömum teköget. 27Kömum tekögetka qöndökŋi malöŋini mi mewöyök kömuyök. 28Göŋön ‘Kömugeri, yeŋön guliba wahötme,’ jizanmö, nini mi qahö möt narizin. Mötnöŋ, azi 7 pakpak mi öröröŋ wahötpeak ewö, ambi mohok mi anömŋina meget malöhaŋgöra aka mönö dagö anömŋa akawak?”

29Mewö qesigetka Jisösnöŋ meleŋda kewö jii mötket, “Iŋini keu jim sohoze. Urumeleŋgö Buŋa Kimbiŋi aka Anutugö kukösumŋi qahö möt kutuzeaŋgöra mönö jaŋjuŋ ahakze. 30Ölŋa, kömupnöhök wahöta nalö miaŋgöreŋ awanöm qahö akŋemö, garata yeŋön Suep mire maljeaŋgö tandök aka malme.

31“Mötket! Kömugeri, yeŋön guliba wahötmegö keuŋi Anutunöŋ eŋgöra jiyöhi, iŋini mi lök oyoŋget me qahö? Keu mi kewö, 32‘Nöŋön Anutu Abrahamgö Kembu, Aisakö Kembu aka Jeikobkö Kembuya mala kota maljal.’ Anutunöŋ kömukömuŋi yeŋgö Kembuŋini qahöpmö, malmal köhöikŋi maljei, mönö yeŋgö Kembuŋina malja.” 33Jisösnöŋ mewö ambazip kambu kusum eŋgii möta welipköget. Mewö. ^{b , c , d}

Jöjöpaŋ keu bohonŋi yahöt mi denöwö?

Mak 12.28-34, Luk 10.25-28

34Sadyusi (Jike nupkö kapaŋkölköl) yeŋön Jisös qesim waŋgigetka meleŋda jim soroköiga keu bök akeri, mi Farisi (Köna keugö kapaŋkölköl) yeŋön möta kaba tokoget. 35Yeŋgöreŋök böhi kun Köna keu törörök möt kutuyöhi, yaŋön kaba Jisös bötak ala kewö qesim waŋgiyök, 36“Böhi, Mosesgö Köna keu uruŋe wani jöjöpaŋ keu mi bohonŋi ketaŋi akza?”

37Qesim waŋgiiga meleŋnök, “Bohonŋi ketaŋi mi kewö, ‘Gi urugi jömukŋi, uŋagi jömukŋi aka mötmötki jömukŋi miaŋön mönö Kembu Anutugi jöpaköba malman.’ 38Miaŋön jöjöpaŋ keu bohonŋi aka mutukŋi akza. 39Jöjöpaŋ keu miaŋgö alaŋi kewö, ‘Nangi jöpaköm aŋgumakzani, mewöŋanök mönö ambazip pakpak jöpaköm eŋgiba malman.’ 40Jöjöpaŋ keu yahöt mi mönö Mosesgö Köna keu aka kezapqetok ambazip yeŋgö Buzup Kimbi pakpak mieŋgö bohonŋina akza.” Mewö. ^{e , f , g}

Kraist mi kiŋ Deiwidkö Kembuŋi aka gwölönarökŋi.

Mak 12.35-37, Luk 20.41-44

41Farisi (Köna keugö kapaŋkölköl) yeŋön kaba tokogetka Jisösnöŋ kewö qesim eŋgiyök, 42“Iŋini Kraistköra denöwö mötze? Yaŋön mönö dagö nahönŋa akza?” Mewö jiiga meleŋda jiget, “Mönö kiŋ Deiwidkö gwölönarökŋa akza.”

43Jigetka jiyök, “Mewö akzapmö, denöwö aka Uŋa Töröŋan Deiwid sölölöhöm waŋgiiga yaŋgöra ‘Nani Kembuni,’ qeta kewö jiyök,

44‘Anutunöŋ kinda nöŋgö Kembuni kewö jii mörök, Göŋön mönö kaba nöŋgö böröni ölŋe tatnöŋga nöŋön nalö sutŋe kerökurupki tim tötala luhut al eŋgiba göhö köna tambö gwaröŋe al eŋgimam. Nalö mi kam kuŋgumawaŋgö dop mönö asak-mararaŋnöŋ ki tatman.’
45Deiwidnöŋ nanŋak mewö jiba qetŋi ‘Nöŋgö Kembuni’ jiza. Kembuni jiba mönö denöwö aka yaŋgö gwölönarökŋi mohot akawak?”

46Mewö jiiga miaŋgö kitipŋi kunöŋ kun meleŋmamgö osiba keu bök kinget. Sömaŋi miaŋgöreŋök körek yeŋön Jisös kunbuk keu kungö qesim waŋgibingö kölköldömdöm aka mosötket. Mewö. ^h