a9Mat 10.22;
b13Mat 10.22
c15Dan 9.27, 11.31, 12.11;
e21Dan 12.1, Ind 7.14;
f26-27Luk 17.23-24;
h29Ais 13.10, 34.4, Eze 32.7, Joel 2.10,31, 3.15, Ind 6.12-13;
i30Dan 7.13, Zek 12.10-14, Ind 1.7
j37Jen 6.5-8;
k39Jen 7.6-24;
l43-44Luk 12.39-40
Matthew 24
Jöwöwöl jikenöŋ köndeŋmöndeŋ asuhuma.
Mak 13.1-2, Luk 21.5-6
1Jisösnöŋ jöwöwöl jike mosöta eriga gwarekurupŋan yaŋgöreŋ kaba jöwöwöl jikegö tohoŋ uruŋe miri tatkeri, mi Jisös kondel waŋgiget. 2Kondel waŋgigetka meleŋda kewö jii mötket, “Miri pakpak mi ölöp eŋgekzemö, nöŋön keu ölŋa kewö jibi mötket: Mi mönö köndeŋgetka mirigö köt kun mi köt kungö qakŋe qahö ahömapmö, qeqelaŋlaŋ aka sahopŋanök ahöma.” Mewö.Kahasililiŋ aka sesewerowero asuhuma.
Mak 13.3-13, Luk 21.7-19
3Jisösnöŋ Oil ip kunduŋe anda tariga gwarekurupŋan nanŋinöhök yaŋgöreŋ kaba kewö qesim waŋgiget, “Böhi, keu jizani, miaŋgö ölŋi mönö wanat nalönöŋ asuhum tiŋgitma aka göŋön kanöŋga gölmegö nalöŋan tekömamgö akŋawi, miaŋgö aiwesökŋan mönö denöwö asuhum? Mia ölöp jinöŋ mörin!”4Mewö qesim waŋgigetka meleŋda kewö jiyök: “Kunŋan isimkakalek aiga jaŋjuŋ anbepuköra mönö galömŋini memba malme. 5‘Ambazip gwötpukŋan asuhuba nöŋgö qetne kewö jime, ‘Nöŋön Amötqeqe Toŋi Kraist akzal’. Mewö jiba ambazip gwötpuk tilipköm eŋgime. 6Iŋini yarö mieŋgö buzupŋini aka ötöŋini asuhugetka mörakŋe. Mi möta jönömŋini undubapuköra mönö galömŋini meme. Yuai mewöŋi mi mutuhök asuhumapkö jijiŋa. Mi asuhumapmö, gölmegö nalöŋan mönö miaŋgöreŋök zilaŋ qahö teköma.
7“Kantri kunŋan kantri kun eŋgubingöra wahötme. Ambazip kambu kunŋan kambu kun yembuk aröŋ aŋgubingöra wahötme. Gölmeŋi gölmeŋi miaŋgöreŋ bödiŋi bödiŋi (buöröŋi buöröŋi) asuhume aka kenöŋ ketaŋi ketaŋi mi qözöla memba gölme meleŋni gemakŋa. 8Yuai pakpak mi ambi köröbuknöŋ masi könahiba eŋgumakzawaŋgö dop. Gölmegö nalöŋan mönö miaŋgö dop könahiba tekömamgö akŋa.
9“Mewö akŋapmö, nalö miaŋgöreŋ tosatŋan iŋini uruŋini meleŋgeraŋgöra aka gawman yeŋgö böröŋine al eŋgigetka sihimbölö ak eŋgiba eŋguget kömume. Kantri pakpak yeŋön nöŋgöra aka kazik ak eŋgimakŋe. 10Nalö miaŋgöreŋ gwötpukŋan mötnaripŋini mosöta aŋgönaŋ memba kazik ak aŋgume. 11Kezapqetok ambazip takapulakaŋi gwötpukŋan asuhuba ambazip gwötpuk kilik-kaluk ak eŋgigetka jaŋjuŋ anakŋe.
12“Iwilele Toŋan sehiba ambazip galöm köl eŋgimawaŋgöra aka urumeleŋ ambazip sehisehiŋi yeŋgö uruŋinan amöriiga urukalemŋinan sörörauma. 13Kunŋan kapaŋ köla köhöiba böŋ qeba kinda maliga gölmegö nalöŋan tekömawi, yaŋön mönö oyaeŋkoyaeŋ buŋa qem aŋguma. 14Anutugö bemtohoŋaŋgö Ölöwak Buŋa ki mönö mutuk gölmegö kantriŋi kantriŋi pakpak miaŋgöreŋ jim sehigetka könagesö dop naŋgönaŋgö keuŋi mötketkun gölmegö nalöŋan miaŋgö andöŋe teköma.” Mewö a , b
Jerusalem sitigö köndeŋmöndeŋ uru-önönŋambuk
Mak 13.14-23, Luk 21.20-24
15“Kezapqetok azi Danielnöŋ köndeŋmöndeŋ uru-önön-ŋambukö keuŋi jii ahöza. Keu miaŋgö dop tosatŋan kaba köndeŋmöndeŋ aka yuai aŋgöjörakŋambuk mi jöwöwöl jike töröŋe alget kiniga ekŋei, - keu ki oyoŋmawaŋön mönö ölöp kezap ala möt kutuma- 16nalö miaŋgöreŋ Judia prowinsnöŋ malmei, eŋön mönö misiŋgöba öröba kunduŋe anme. 17Miri kösutŋe sombemnöŋ malmawaŋön mönö eta gösö yuaiŋi memamgöra miri uruŋe kude öŋgöma. 18Nupnöŋ anda malmawaŋön mönö mewöyök malukuŋi memamgöra liliŋgöba mirinöŋ kude anma.19“Yei! Ambi gölömbuk aka morö juzunöŋ yeŋön nalö miaŋgöreŋ denöwö ösumŋinan anbeak? 20Miaŋgöra yuai mi kie uru me Sabat kendongö nalöŋe kude asuhumapköra köuluköme.
21“Mi kewögöra: Nalö miaŋgöreŋ kahasililiŋ keta bölökŋi asuhuma. Kahasililiŋ dopŋi mewöŋi mi mönöwök nalö kungen kude asuhuba ahöyök. Anutunöŋ yuai pakpak miwikŋaiyöhi, nalö miaŋgöreŋök könahiba nalö kiaŋgöreŋ mala kota nalö sutŋe kun kude asuhuyök. Mönöwök qahö asuhuyök aka könaŋgep nalö kunöŋ kunbuk qahö ahuma. Miaŋgöra mönö köuluköba malme. 22Kembunöŋ wahöjaliŋ nalö mi qahö mem töribawak ewö, ambazip körekŋan mönö ayuhum teköbeakmö, ambazip nanŋaŋgöra möwölöhöm eŋgiyöhi, yeŋgöra aka wehön mieŋgö qötöŋini mem törima.
23“Nalö miaŋgöreŋ kewö jime, ‘Mötket! Kraistnöŋ ki malja,’ me ‘Eket! Amötqeqe Toŋan endu kinja.’ Kunŋan mewö jima ewö, mi mönö kude möt narime. 24Mi kewögöra: Amötqeqe toŋi muneŋi aka kezapqetok ambazip takapulakaŋi asuhuba aŋgöletot aka aiwesök ketaŋi ketaŋi megetka letotme. Mewö letotketka Anutunöŋ ambazip nanŋaŋgöra möwölöhöm eŋgiyöhi, i mewöyök eŋololoŋ mem eŋgimegö esapköba kapaŋ kölgetka jaŋjuŋ akepuk. Eŋön ölöpŋanök galömŋini memba malgetka mi osibeak. 25Mötket! Nöŋön yuai pakpak mi qahö asuhuiga qeljiŋe lök jibi mötze.”
Suep gölmegö azi ölŋan mönö asuhum tiŋgitma.
Mak 13.24-27, Luk 21.25-28
26“Miaŋgöra ‘Amötqeqe Toŋan mönö gölme apopamkölkölŋe malja,’ mewö jiget mötme ewö, miaŋgöreŋ mönö kude anme. Me ‘Mötket! Kraistnöŋ mönö miri miaŋgö uruŋe asuhuba tatzawi,’ mewö jiget möta mi kude möt narime. 27Mi kewögöra: Suep gölmegö azi ölŋan kunbuk kamawi, nalö mi mönö wölbilikö dop kewö akŋa: Mi wehön kotkotŋeyök zilaŋ biliksik ala likepŋe wehön gegeŋe dop köla asariba ani ekzini, yaŋön mönö miaŋgö dop asuhuma.28“Sömbup gisakŋan kungen ahöiga, manu köraraknöŋ miaŋgöreŋ öröba tokomakzei, miaŋgö dop asuhuma.” Mewö c , d , e , f , g
Suep gölmegö azi ölŋan asuhuma.
Mak 13.24-27, Luk 21.25-28
29“Wahöjaliŋ nalö miaŋön teköiga miaŋgöreŋök wehön jeŋan injaŋ köliga köiŋnöŋ ömuŋ kölma. Seŋgelau yeŋön suepnöhök teköba etme aka suepnöŋ uturuköiga miaŋgö öröyuaiŋi mi tatatŋini mosöta eŋololoŋ aketka sohoma.30Nalö miaŋgöreŋ Suep gölme azi ölŋaŋgö aiwesökŋan suepnöŋ asuhuiga ekŋe. Nalö miaŋgöreŋ gölmegö könagesö pakpak yeŋön jiŋgeŋ köla sahötme. Sahöta Suep gölmegö azi ölŋi yaŋön suepkö kousu qakŋe kaŋgori ekŋe. Kukösumŋi ketaŋan saköl-diŋdiŋambuk aukŋe asuhuiga asakmararaŋi ekŋe. 31Kaŋgori eketka tömunŋi qainŋi kun ugetka ötöŋi köhöikŋi mötketka Suep garataurupŋi melaim eŋgiiga yeŋön ambazip Anutunöŋ nanŋaŋgöra möwölöhöm eŋgiyöhi, i gölme göraŋi likeplikep euke emuke miaŋgöreŋök kölolohoba eŋguaŋgitme.” Mewö h , i
Geröp ipkö dopkeu
Mak 13.28-31, Luk 21.29-33
32“Iŋini geröp ip eka tandökŋi mötmöriba dopkeu ki mötme. Böröŋan lök oŋambuk aiga sinŋini yoŋgoigetka mi eka möta kewö jimakze, ‘Wehön nalöŋan mönö dopdowiza.’ 33Eŋön mewöŋanök aiwesök miaŋgö dop asuhuiga eka möt asariba könaŋi kewö jime, ‘Jisösnöŋ mönö naŋgunöŋ dopdowiza.’34“Nöŋön keu ölŋi kun kewö jibi mötket: Ambazip ki merak gölmenöŋ maljei, yeŋön qahö kömugetka yuai pakpak jizali, mi mönö yeŋgö malmal nalöŋine asuhuma. 35Suep gölmenöŋ ayapkömahotmö, nöŋgö Buŋa keunan mönö nalö kunöŋ qahö ayapköma.” Mewö.
Jisös kamawaŋgö nalöŋi mi kunŋan qahö mötza.
Mak 13.32-37, Luk 17.26-30, 34-36
36“Suep gölmegö azi ölŋan kamapmö, dawinöŋ kam kuŋgumawi, miaŋgö wehönŋi me aua nalöŋi mi kunŋan kun kude mötza. Suep garatanöŋ mi qahö mötze. Anutugö Nahönŋan mewöyök mi qahö mötza. Iwinöŋ nanŋök mi mötza. 37Mönöwök Noagö nalöŋe ambazipnöŋ malmalŋini qemasolokep qakŋe mala ayuhugeri, miaŋgö dop mönö Suep gölmegö azi ölŋan kunbuk kamawaŋgö nalöŋe asuhuma.38“O göulu ketaŋan qahö kaiga qeljiŋe miaŋgöreŋ ambazip nene lömbuaŋ ala o köhöikŋi nemba ambi kenam bohonŋaŋgö alget anda kaiga aŋgömeget. Ahakmeme mewö aka memba qemasolokep malgetka Noanöŋ waŋge uruŋe öŋgöyöhi, silim miaŋgöreŋ teköyök. 39Teköiga wanat yuai asuhumawi, mi qahö mötketka o göulu ketaŋan kaba jinonŋi qahö ayuhum eŋgiyök. Könaŋgep Suep gölmegö azi ölŋan kunbuk kamawi, nalö miaŋgöreŋ ambazipnöŋ mewöŋanök qemasolokep aka mala ayuhume.
40Nalö miaŋgöreŋ azi yahöt nupnöŋ malohotka yetköreŋök kun waŋgita kun mosötme. 41Mewöŋanök ambi yahöt taweŋ urasiba (bunahöba) tatmahori, yetköreŋök kun waŋgita kun mosötme.
42“Kembunöŋ kamawaŋgö nalöŋi me auaŋi qahö mötzeaŋgöra mönö uruguliguli aka malme. 43Gwölö malbingö keu ki mönö möt kutume: Suŋgem aiga kegwek-kahasililiŋ azinöŋ wani nalönöŋ me auanöŋ kamawi, miri toŋan mi mötpawak ewö, yaŋön mönö gwölö mala miriŋi ölöpŋanök galöm meiga qesiŋda öŋgömamgö osima. 44Iŋini ‘Suep gölmegö azi ölŋan nalö kiaŋgöreŋ qahö kaŋgotma,’ jiba mötmörigetka yaŋön mönö nalö miaŋgöreŋök kaŋgotma.” Mewö. j , k , l
Nup azinöŋ silekmalek mala ayuhuyök.
Luk 12.41-48
45“Mewö aiga nup meme ambazip sutŋine daŋön tiŋ kutuba tosatŋi eŋgoŋgitza? Tosatŋan sörörauba nup mosötketka kunŋan mötkutukutu ölöpŋaŋgö qakŋe kapaŋ köla pöndaŋ memakzawi, yaŋön mönö simbawoŋ akza. Miri toŋan ahakmemeŋi kewöta eka kungen anda miriŋaŋgö öröyuaiŋi mi böröŋe ali galöm akŋa. Galöm aka welenqeqeurupŋi jiyöhaŋgö dop köyan köla nalö diŋdiŋe gumohom eŋgimakŋa. 46Mewö köyan köl eŋgiba maliga toŋan liliŋgöba kaba mewö eka mönö simbawoŋ jima.47“Nöŋön keu ölŋi kun kewö jibi mötket: Toŋan simbawoŋ jiba sukinapŋi pakpakö galömŋi kuŋgum waŋgima. 48Kuŋgum waŋgimapmö, nup meme okonŋi yaŋön uruŋan mötmöriba kewö jima ewö, ‘Kembunaŋgö kaka nalöŋan mönö köröpŋi ahöza.’ 49Mewö jiba könahiba nup meme ambazipurupŋi eŋgum ureiba közölömbuaŋ ala söŋgaiba o köhöikŋi nemba uruŋi sohoiga eŋololoŋ silekmalek aka malma.
50“Mewö mala nalö kunöŋ kembuŋi kaŋgotmapköra qahö mambötmawi, mönö miaŋgöreŋ kaŋgotma. Nalögöra ikmaok iŋululuŋ mali mönö aua miaŋgöreŋ kaŋgota 51qeba yaijapaleleŋ mem waŋgiba jim kutuiga urumeleŋgö silesile ambazip ewö könöp sianöŋ geba sihimbölö mötma. Mewö möta sahöt gigilahöba irimŋini yöhözömgögetka qetŋi qeri malme.” Mewö.
Copyright information for
BMU