2 Corinthians 6
1Iau a leho turana Vure, lakea a taki tora mua, naha ni ngalahere a naro kamumu a Vure i rata virihi hita vona. 2 aA nitana Vure i ta maea,“Na parava a vulakia, a longo ioe.
Na tahuna a parava i bele ta ga korimule ioe, a kori ioe.”
Mu longo valai! A parava a Vure i vulakia i bele pali. Mona a parava a Vure ge korimule e huriki vona.
A Maregoa i Bolea e Paulus
3Iau i uka ma a ratea tara maki ge rata e huriki ri gi sibo. I uka tara maki ni gi matai na leho nau ga rata halea. 4A maki lobo a rata i vakasiri manga iau a vora na Vure. A hatenono na tahuna a bole a nimadihi, a maregoa, a vuranga, 5 be huriki ri hotu iau, ri ru dili iau na bavi, e huriki ri vapopo, ri vakamadihi iau. A leho hateka. I uka ma a mahita. A vitolo. 6 cA vakasiri manga iau a vora na Vure na tahuna a made malamala. A tahoka a lohokanga. A hatenono ne huriki. A rata kamumu e huriki. A Hanu Kiripiripi i made turagu. A ngaru muholi e huriki. 7 dA vakasiri manga iau a vora na Vure a vuhuna a ta muholi vakaroro. A nitora na Vure i tabuli nau. A naro malamala nau i manga a bainat a galeu nau. 8A vakasiri manga iau a vora na Vure na tahuna e huriki ri togo iau, na tahuna e huriki ri biu iau, na tahuna e huriki ri harogi iau, na tahuna e huriki ri kavurike iau. Ri rata manga iau a nitamina vora na Vure, pali iau a vora muholi na Vure. 9 eE huriki ri rata manga i uka tara viri ge lohoka nau. Pali e huriki lobo ri lohoka nau. Ri rata manga a mate, pali iau a mahuri. Iau ni vakamadihi, pali i uka ma a mate. 10A made dukuduku, pali a vivi vakaroro. A made manga a matasia, pali a rata e huriki ala kupo ri tahoka a mahala. A made manga a uka liu a maki, pali a maki lobo ne nau.11Iau a here kavakava lakene mua e huriki a Korin, a ngaru hateka mua. 12A ngaru hateka mua na hategu, pali mua i uka ma mu ngaru hateka iau. 13 fA ngaru mu gu ngaru iau i manga iau a ngaru mua. A ta maea, i manga a vara e huriki a koma.
A Roho na Vure Mahuri
14 gNaha ni rihi e huriki i uka ma ri luhoi torea e Kristo, a vuhuna e huriki ri malamala ri vaperesi ne huriki ri putu puru a vinara. A ra maki kamumu ge bele na tahuna e huriki ri laho na nipara na Vure, ri gi laho turane huriki ri laho na uvo? 15Re Kristo, ge valongo mai navai a ngava turane Satan? A viri i luhoi torea e Kristo, ge vaveru navai turana viri i uka ma i luhoi torea e Kristo? 16 hNi gi ru dili navai a nitamina vure na Roho na Vure? Pali hita a roho na Vure Mahuri. I manga a ngava a Vure i takia hosi, i maea, “Iau ga made turane ria, ga laho turane ria. Ge iau a Vure ne ria, ge ria e huriki a ngate nau. 17 iE Bakovi Dagi ta maea,‘Mu malele ha ne huriki i uka ma ria a ngate nau,
naha ni laho turane ria.
Naha ni dili na maka naro katoki ne ria,
lakea bara bole dili mua,
18 jge iau e tamane mua,
ge mua e huriki e tugu a bakovi a ngatavine.
Iau e Bakovi Dagi Tuhaka Hateka a ta maea.’”
Copyright information for
BNP