Acts 18
E Paulus i Vara o Korin
1Muri e Paulus i malaga o Atens, i lakea o Korin. ▼ 2 bNa tahuna i bele vonga i matavisia e Akuila, a bakovi o Iuda, ni poda na tabeke ne Pontus. I valai karaba o Itali turana e girihina, e Prisila, a vuhuna e Kaiser Klaudius i tono tala o Rom e huriki a Iuda. E Paulus i vano ge matai rua. 3 cI made turane rua, to leho palupu, a vuhuna ia a bakovi ni hae a kape, i manga rua. 4Na parava Nimalo lobo i lakea na roho na vaponga, i vata turane huriki a Iuda, e huriki a Grik. I ngaru ge rata ria ri gi luhoi torea e Isu.5 dNgane e Sailas e Timoti ru pea pali e Masedonia. Na tahuna ru luve ne Paulus, e Paulus i vara kunana, i vakalongo e huriki a Iuda ne Isu ia e Kristo. 6 ePali e huriki a Iuda ri hehea, ri harogia e Paulus. Lakea i madihi a hatena, i kurudu pasi a habulo na varakia vona, i taki ria, “Mua bara mu velu, naha ni padi virihi iau na ngava! A maki mua. Ngane ga vakalongo a Velenga Kamumu ne huriki i uka ma ria a Iuda.”
7E Paulus i pe a roho na vaponga, i vano i made na ruma ne Titus Iustus, a bakovi ni kavurikea a Vure. A ruma vona i pesi tabukoi na roho na vaponga. 8E Krispus, a matakari na roho na vaponga turane huriki lobo na ruma vona ri luhoi torea e Kristo. E huriki a bakovi ala kupo o Korin ri longo a ngavane Paulus, ri luhoi torea e Kristo, ni vahilolo.
9Na rodo tara, e Bakovi Dagi i ta turane Paulus na vurena, i ta maea, “Naha ni mangenge, naha ni vulai. O vakalongo mavonga e huriki ne nau, 10 fa vuhuna iau a laho turamu, i uka tara viri ge habi a vuranga vomu. E huriki ala kupo koea, ria a viri nau.” 11Lakea e Paulus i made turane ria na pida i taku, a keva i polotara, i vara ria na nitana Vure.
E Paulus i Pesi na Matane Galio
12Na tahuna e Galio a matakari na tabeke ne Akaia, e huriki a Iuda ri vadili vapopo, ri lakavua e Paulus, ri turaria lakea na muri na nivapelekado. 13Lakea ri ta maea, “A bakovi iea i tovo e huriki ri gi kavurikea a Vure na naro tebi, i uka ma i ramai a vinara.”14Pali na tahuna e Paulus ta ge koli a nitane ria, e Galio i taki e huriki a Iuda, i ta maea, “Mua o huriki a Iuda, a bakovi iea ge putu puru ranga vinara, o ge rabalakia tara viri, bara longo mai mua. 15Pali mu padi virihia na rana vure, na ngava i rata. Mu padi virihia i uka ma i ramai a vinara ne mua. I mavonga mu pelekadoa. Iau i uka ma ga pelekadoa.” 16Lakea i lili tala ria na muri na nivapelekado. 17Muri e huriki a Korin ri lakavua e Sostenes, a matakari na roho na vaponga, ri ubia na matana roho na nivapelekado. Pali e Galio i matataro ria ri gi ratea.
E Paulus i Hamule Lakea o Antiok
18 gE Paulus i made vonga o Korin na parava ranga. Muri i pe e huriki a kabukabu vonga, i lakea o Senkria turana e Prisila, e Akuila. I ali vuroki vonga a vuna, a vuhuna i rata pali a maki tara i ta muholi vona na Vure ge ratea. Muri to rike na aga, to lakea na tabeke ne Siria. 19Na tahuna to bele o Epesus, to vapida. E Paulus kikeri i vano, i dili na roho na vaponga, i ta turane huriki a Iuda. 20Na tahuna ri takia e Paulus ge made turane ria na parava ranga, i koi. 21Pali na tahuna i pe ria, i ta muholi ne ria, i ta maea, “A Vure ge ngaru iau ga hamule valai tabu, bara hamule valai.” Muri i rike na aga, i pea e Epesus.22Na tahuna i bele o Sisaria i sike o Ierusalem, i tagui e huriki a tara ne Kristo ri made vonga. Muri i lakea o Antiok. 23I made o Antiok na parava ranga, muri i malaga, i laho lae na maka tanga na tabeke ne Galesia e Prigia, i vakatora a niluhoi ne huriki a murimuri na tanga takutaku.
E Apolos i Vara o Epesus
24A Iuda tara, ni poda o Aleksandria, a rana e Apolos i valai i made o Epesus. I moro ni ta. I lohoka hateka na Nita na Vure. 25Ni tovo ia pali na dala ne Bakovi Dagi. I habi a hatena ni tovo e huriki, i vakalongo kavakava na maka maki e Isu i rata. Pali i lohoka vona a nivahilolo ne Ioanes kunana. 26I vakatubu ni vara pagapaga na roho na vaponga. I uka ma i mangenge. Pali na tahuna e Prisila e Akuila ru longoa, ru tuveve polo kamumua vona a dala na Vure. 27Muri e Apolos i ngaru ni lakea o Akaia, lakea e huriki a kabukabu o Epesus ri tuhoria, ri herea a raukea i lakea ne huriki a murimuri o Akaia, ri taki ria ri gi taguia na tahuna i bele. Na tahuna i bele vonga, i tuhori kamumu e huriki a Vure i rata kamumu ria, ri luhoi torea, 28 ha vuhuna i vahehe tora turane huriki a Iuda, i vakasiri ria na Hinere, e Isu ia e Kristo.
Copyright information for
BNP