Act 24 | BNP | STEP | Muri na parava i lima e Ananias, a prister dagi, turana e huriki a bakovi dagi, e Tertulus a mari na vinara, ri puru valai o Sisiria. Ri valai ri gi padi virihia e Paulus na matana matakari.

e 24:15Ion 5:28-29

‏ Acts 24

E Paulus i Pesi na Matane Peliks

1 Muri na parava i lima e Ananias, a prister dagi, turana e huriki a bakovi dagi, e Tertulus a mari na vinara, ri puru valai o Sisiria. Ri valai ri gi padi virihia e Paulus na matana matakari. 2 Ni gale dili na vaponga e Paulus, lakea e Tertulus i ta rike, i ta maea, “Peliks, ioe a bakovi dagi! Ioe a bakovi na lohokanga, o matakari kamumu mia mi made na nivalemu na parava i kupo, o rata kamumu a maki ri hale na robo ne mia. 3 Na tabeke lobo mi vivi vona a leho o ratea, mi kavurike ioe vona. 4 Pali a koi ni vakapae ioe, lakea a ngaru ioe go pasivalo kamumu, go longoa a nitane mia.”

5 ^aMuri i padi virihia na ngava e Paulus, i ta maea, “A bakovi iea, i vakapae hateka. I piurike e huriki a Iuda na tanga lobo. I muga ne huriki ni gale a tara ne Nasaret. ^{▼▼(24:5)A tara ne Nasaret, a rana tara ne huriki ri luhoi torea e Isu, a vuhuna e Isu a bakovi o Nasaret.} 6 ^cI toni ni vakamutoa a roho na Vure, pali mi lakavua. ^{▼▼(24:6)7Mi ngaru ni pelekadoa na vinara ne mia, pali e Lisias a ubu ne huriki a nugumaheto i valai turana tara na nugumaheto vona, ri kope tala mia, ri bole talea na limane mia. Lakea e Lisias i taki mia, ta e rei a viri i tahoka a ngava ge luve vomu o Peliks.} O nana kamumua ra bakovi iea, bara o matai a maka maki mi padi virihi ia vona i muholi.” 9 Muri e huriki a Iuda ri taga taku, ri takia ra ngava i takia e Tertulus, ta a ngava muholi.

10 A matakari i tolokavea e Paulus, i takia ge ta. Lakea e Paulus i ta maea, “Iau a lohoka vomu, na pida i kupo o matakaria a robo iea. Ngane a vivi ni koli a maka ngava nga. 11 O nana e huriki, bara ri vakalongo ioe vona iau a lakea na roho na Vure o Ierusalem a vasileki vonga rira. A parava i ravulu a polona i rua i lakea pali. 12 I uka tara viri ge matai iau ga hehe turana bakovi tara, o ga piu rike e huriki na roho na Vure, o na tanga dagi, o na roho na vaponga. 13 Ra ngava ri padi virihi iau vona i uka ma i muholi. I uka tara dala ri gi vakasiria vona, ge muholi ra maregoa ri padi virihi iau vona. 14 A ngava muholi i maea: iau a kavurikea a Vure ne huriki a gare ne mia, a ramaia a dala ne Isu. E huriki a Iuda ri takia ra dala ne Isu, ta i uka ma a dala muholi. Pali iau a luhoi tora a maki lobo ni tovo na vinara ne Moses, ni here puru na puhu na raukea ne huriki a propet. 15 ^eIau, i manga e huriki ri padi virihi iau, a pasimata na Vure ge vakamahuri mule na matenga e huriki ri mate pali, re huriki ri kamumu e huriki ri hale. 16 Lakea a toni a bulugu ga laho kamumu na matana Vure, na matane huriki a bakovi a ngatavine, ga hataki kamumu vona a leho nau.

17 “Iau a made basi na pida i kupo. Muri a lakea o Ierusalem, a bole a moni ga habi ne huriki a matasia vonga, ga habi a nihabi. 18 ^fNa tahuna a rata a maka leho nga, ri matavisi iau vonga na roho na Vure, a rata pali a leho na ni vakamatapado iau na matana Vure. I uka ma ri matai iau ga piurike e huriki. Pali ranga a Iuda ri valai o Asia. 19 Ria bara ri tahoka a ngava, bara i kamumu ri gi valai koea, ri gi taki tala. 20 Ge uka, o nana re huriki a Iuda ra ri pesi koea ngane, ri gi vakalongo ioe vona a ra maregoa a ratea na tahuna a pesi na matane huriki na vaponga o Ierusalem. 21 ^gIau a luhoi maea, a ngava i taku kunana a ratea na tahuna a made turane ria. A gale dagi, a ta maea, ‘Iau a pesi na matane mua ngane, a vuhuna a luhoi e huriki ri mate pali bara ri mahuri mule na matenga.’”

E Paulus i Made na Bavi

22 ^hE Peliks i lohoka vona a niluhoi ne huriki ri muri mai a dala ne Isu. Lakea i taki e huriki a Iuda, i ta maea, “Si gi davea a ubu, e Lisias, ge bele taro. Muri bara pelekadoa a ngavane mua.” 23 E Peliks i takia a ubu ge ru dilia na bavi e Paulus, pali nahea ge tagari hatekea. I taki e huriki e turane Paulus ri gi tuhoria.

24 Muri na parava ranga e Peliks i valai turana e girihina, e Drusila, a ngatavine o Iuda. I rudu a ngava ni gi turari valai vona e Paulus, ge longo vona ranga ngava na niluhoi ne Isu Kristo. 25 E Peliks i mangenge na tahuna i longoa e Paulus i vara na naro malamala, na viri ge matakari kamumu a vilona, na Vure ge pelekado hita muri ma. Lakea i ta maea, “Ge lobo ngane a ngava ngi! O vano ke! Muri ma ga malopi, bara talo rike a ngava vomu o valai tabu.” 26 I ngarua e Paulus ge habi kapiloho a moni vona ge vokoa ge vakapagitala ia na bavi. Na parava vakaroro e Peliks bara i talo rike a ngava ne Paulus ge valai vona ge ta turana.

27 I lobo a pida i rua, e Porsius Pestus i kuloi e Peliks, i matakari. E Peliks i ngaru e huriki a Iuda ri gi luhoi ia ge ia a bakovi kamumu, lakea i uka ma i vakapagetalea na bavi e Paulus.