Deu 20 | BNP | STEP | E Moses i ta tabu i ta maea, “Na tahuna mu vano mu vaubi turane huriki a pile ne mua mu matai a maka karis a hos e huriki a tara na vabinga ri ala kupo hateka, naha ni mangenge ne ria. A vuhuna e BAKOVI DAGI a Vure ne mua i bole tala mua o Egipto, i taparaki valai mua koea, bara i matakari mua.

‏ Deuteronomy 20

A Vinara na Vabinga

1 E Moses i ta tabu i ta maea, “Na tahuna mu vano mu vaubi turane huriki a pile ne mua mu matai a maka karis a hos e huriki a tara na vabinga ri ala kupo hateka, naha ni mangenge ne ria. A vuhuna e BAKOVI DAGI a Vure ne mua i bole tala mua o Egipto, i taparaki valai mua koea, bara i matakari mua. 2 Na tahuna mu ngalai e huriki a pile, a prister tara ge pesi ge vara e huriki a tara na vabinga ge ta maea, 3 ‘O huriki a bakovi o Israel, mu longo kamumu. Ngane bara mu vaubi. Naha ni mangenge ne huriki a pile, nahea ge malulu a limane mua, nahea ge vakulu a tagane mua. 4 A Vure ne mua bara i turane mua, i tuhori mua mu mulangi na vabinga.’

5 “Muri e huriki a ubu na tara bara ri taki e huriki a nugumaheto ri ta maea, ‘Ge tahoka ranga bakovi koea ri hae karaba a ruma ne ria, i uka ma ri made vona ma, i uka ma ri nana a Vure ge gamaia? Ge tahoka ranga koea, ri gi hamule na tanga, ma ri gi bole a vuranga na vabinga ge bole a viri ranga a ruma ne ria. 6 Ge tahoka ranga bakovi koea ri varo karaba a hania na vain ne ria, i uka ma ri rata a vain ma? Ge tahoka ranga bakovi maea ge ria koea ri gi hamule na tanga, ma ri gi vurua na vabinga ge bole a viri ranga a maka hania na vain ne ria. 7 Ge tahoka a bakovi ranga koea ni habikari a ngatavine ne ria? Ge tahoka ranga bakovi maea koea, ri gi hamule na tanga, ma ri gi vurua na vabinga, ma ge parangi a bakovi ranga a ngatavine ni habikari ne ria.’

8 “E huriki a ubu ri gi taki tabu ria ri gi ta maea, “I tahoka ranga bakovi koea ri mangenge i vakulu a tagane ria? Ge tahoka a bakovi maea koea, ri gi hamule na tanga, ma ri gi rata e huriki a nugumaheto ranga ri gi mangenge.” 9 Na tahuna ri rata lobo a maka ngava, ri gi vulaki e huriki a bolekori na tara takutaku na vabinga.

10 “Na tahuna mu ngaru ni vaubi na tanga i tahoka a nure dagi, mu lokovonga tabukoi vona, muga mu taki e huriki a tahotanga mu ta maea, ‘I kamumu hateka si gi valongo mai a ngava nahea si gi vaubi. Mu habi tavulea a tanga iea ge valai ne mia.’ 11 Ria ri gi longo mai mua, ri gi tala a maka logo na nure dagi, mu matakari ria ge ria a vorakato ne mua. 12 Pali ri gi marikoi a ngava ne mua, ri ngaru ni vaubi ne mua, e huriki a nugumaheto ne mua ri gi pesi haluia a tanga. 13 E BAKOVI DAGI a Vure ne mua bara i tuhori mua, mu bolea a tanga. Na tahuna mu bolea, mu rabalaki lobo e huriki a bakovi ri made vonga. 14 Pali mu bole e huriki a ngatavine, e huriki a koma, a maka bulmakau, turana a maki ne ria ranga na tanga. A maki lobo ne huriki a pile mu rata na ningaru ne mua, a vuhuna e BAKOVI DAGI i habi ne mua a maki nga. 15 Mu rata mavonga kunana na maka tanga ri pesi basi na malala ne mua.

16 “Na tahuna mu bolea tara tanga i pesi pololilo na malala e BAKOVI DAGI ta ge habia ne mua, mu rabalaki lobo e huriki. 17 Mu rabalaki e huriki a Hiti, e huriki a Amor, e huriki a Kenan, e huriki a Peres, e huriki a Hivi, e huriki a Iebus, i ramaia a ngava e BAKOVI DAGI i taki mua vona. 18 Mu rabalaki ria, ma ri gi tovo mua na naro i muma hateka ni kavurike a maka vure ne ria, bara mu rata a naro hale ne BAKOVI DAGI a Vure ne mua.

19 “Na tahuna mu vaubi mu gu bolea tara tanga, mu pesi haluia na parava i kupo, mu tolo puru a maka kai ri pesi tabukoi na tanga, naha ni tolo vurokia a maka kai ni kani, a vuhuna a maka kai i uka ma ria a pile ne mua. 20 A maka kai ranga mu tolo mu rata a maki ge tuhori mua na vabinga, ge harena na tahuna mu ratapile e huriki a pile ne mua mu bolea a tanga ne ria.”