Exodus 15
A Linge ne Moses, e Miriam
1 aMuri e Moses turane huriki a Israel ri kaloloa a linge, ri kavurikea e BAKOVI DAGI:“Si gi kaloloa a linge ge longoa e BAKOVI DAGI,
a vuhuna a nitora vona i dagi hateka.
I voro puru na dari a hos turane huriki ri rike ne ria.
2 bE BAKOVI DAGI i vakatora mia, i rata mia mi kalolo.
I korimule mia.
Ia a Vure ne mia si gi kavurikea,
ia a Vure ne tamane mia
si gi kavurikea a rana.
3E BAKOVI DAGI i gao hateka na vabinga;
a rana e BAKOVI DAGI.
4I taribubu a maka karis,
a tara na vabinga ne Parao.
E huriki a vagana ubu ne Parao
ri pasiri na Dari Vururu.
5A bokona dari i rere tagu ria;
ri pasiri na utu manga a kedo.
6“BAKOVI DAGI, a limamu a kanemu i gao hateka,
i ratapile e huriki a pile.
7Na nitora dagi vomu
o ratapile e huriki ri marikoi ioe.
A rongova vomu i gutu manga a kanono;
i gutu e huriki i manga a kanono i rungani a lulu.
8A bangomu i manga a vilu dagi,
i ratea a dari i rere, i vakalipopo,
i gatuka, i pesi manga a nure.
9“A pile i bibi i ta maea,
‘Ga valili, ga nugutata ria.
Ga bole ga veru a maka mahala ne ria;
a maki a ngaru ni bole bara bole kunana.
Ga lalu talea a bainat nau ga rabalaki ria.’
10Pali ioe o bango tala balaka taku kunana,
a dari i kavitagu ria.
Ri pasiri puru na lilodari manga a kedo.
11“BAKOVI DAGI, i uka tara vure ge manga ioe.
Ioe a hariki dagi, o malamala hateka,
a nitora vomu i dagi hateka.
A bagetua vomu i kamumu hateka.
O rata a maka nivakasiri,
e huriki ri turutu, ri mangenge.
12O toto tala a limamu a kanemu,
lakea a malala i mapuka, i todo ria.
13“O dodo mia, o kori mia
o vakasiri mia na dala.
Na nitora vomu o rupolo mia
na tanga kamumu vomu.
14E huriki bara ri longoa a velengana maki i bele,
ri mangenge hateka.
E huriki a Palestina ranga ri mangenge.
15Nimariu E huriki a matakari o Idom ri mangenge hateka,
e huriki a ubu na tara o Moab i vakulu a tagane ria,
a nitora ne huriki a Kenan i lobo tavula.
16Nimariu Ri masia a nitora dagi vomu,
ri mangenge, ri keri ni ratea tara maki.
Ri pesi tavula kunana manga a kedo,
i harena ne huriki a viri vomu ri vano.
BAKOVI DAGI, ioe kunana o bole tala mia o Egipto,
ngane mi laho malimali.
17Nimariu O taparaki valai mia koea,
mi gi made kamumu na lolo vomu,
na tabeke o hae a roho vomu vona.
18Nimariu BAKOVI DAGI, a nimatakari vomu i tabuli vakaroro.”
19A Dari Vururu i mahasi, lakea e huriki a Israel ri laho polo. Muri e BAKOVI DAGI i ratea a dari i hamule mai a murina, i kavitagu a tara na vabinga ne Parao, turana a maka karis a hos ne ria. 20Muri e Miriam, a propet ngatavine, e kurabane Aron, i bolea a kude i kalolo i raulo turane huriki a ngatavine. 21E Miriam i kaloloa a linge iea,
“Si gi kalolo lakea ne BAKOVI DAGI a linge,
a vuhuna i mulangi na vabinga dagi.
I voro puru na dari a maka hos turana e huriki ri rike ne ria.”
A Naru Nami Hurari
22Muri e Moses i muga ne huriki a Israel ri pea a Dari Vururu, ri laho na parava i tolu lakea na tabeke i ngeki ne Sur, i uka ma ri masia tara naru. 23Na tahuna ri bele na tanga e Mara, ▼ i uka ma ri nua a naru vona, a vuhuna i nami hurari. 24Lakea e huriki ri tahatea e Moses, “A ra mi gi nua ngane?” 25Muri e Moses i vasileki ne BAKOVI DAGI, lakea e BAKOVI DAGI i vakasiria vona tara rahana kai. I bolea a rahana kai i voro puru na naru, i nami kamumu a naru.Na tanga iea e BAKOVI DAGI i habia ne huriki a Israel tara vinara ge toni ria vona ri gi ramaia o ge uka. 26I taki ria, “Mu longo kamumu a nitagu. Iau e BAKOVI DAGI a Vure ne mua. A vakamahuri mua na gilanga. Mu longototo iau, mu rata a naro ge kamumu, mu ramai a maka vinara, a nitovo nau, i uka ma ga ratapile mua na maka gilanga, i manga a hini a rata ne huriki a Egipto.”
27Muri e huriki a Israel ri vano ri bele o Elim. Ra tanga iea i tahoka a naru i ravulu a polona i rua, a kai a det ▼ i ravulu polorua (70). Lakea ri hae vonga a kape ne ria tabukoi na naru.
Copyright information for
BNP