Exodus 9
A Limana Vuranga
A Maka Bulmakau, a Sipsip Ri Mate
1Muri e BAKOVI DAGI i takia e Moses ge lakea ne Parao ge takia, “E BAKOVI DAGI, a Vure ne huriki a Hibru, i ta maea, ‘O longo vona e huriki a viri nau ri gi vano ri gi kavurike iau. 2Ioe bara o hatekakari ria, i uka ma o ngaru ria ri gi vano, o nugu tata ria, 3bara rudua a gilanga dagi ge ratapile a maka bulmakau a sipsip lobo vomu, a maka hos, a donki, a kamel, turana a sipsip, a meme. 4Pali a maka bulmakau a sipsip ne huriki a Israel, iau e BAKOVI DAGI, ga matakari, i uka ma ri gi mate manga ne huriki a Egipto.’”5E BAKOVI DAGI i vulakia a parava i ta maea, “Kuduvi ga ratea a maki iea.” 6Na parava muri i rata a bulmakau a sipsip ne huriki a Egipto ri mate, pali ne huriki a Israel i uka ma ri mate. 7Lakea e Parao i rudu a bakovi ri gi kasisi a maka bulmakau a sipsip ne huriki a Israel ri mate o i uka. Ri matai a bulmakau a sipsip ne ria, ri kamumu kunana. Pali e Parao i tababana ni gigitora, i uka ma i longo ne huriki a Israel ri gi vano.
A Polotarana Vuranga
A Maka Loto
8Muri e BAKOVI DAGI i taki e Moses e Aron, “Muru lakea na roho ni rata a brik ▼ muru bole ranga habulo muru lakea ne Parao. Na tahuna muru luve vona, e Moses ge voro rike a habulo ge matai. 9Ra habulo bara i poko viliha na tabeke lobo ne Egipto. Na tahuna a habulo i boru puru ne huriki a bakovi a ngatavine na maka hos a bulmakau, a loto bara i tuvu ne ria. Muri ri mapoka, ri vakabele a ngarava dagi.”10 bMuri ru bole a habulo, ru vano ru pesi na matane Parao, lakea e Moses i voro rike a habulo. A habulo i vakabele a loto, muri ri mapoka, ri vakabele a ngarava dagi ne huriki a bakovi, a ngatavine, a hos, a bulmakau. 11E huriki a bakovi na malulu i uka ma ri bele ne Moses, a vuhuna i tuvu ne ria a loto turane huriki lobo o Egipto. 12Pali e BAKOVI DAGI i ratea e Parao i gigitora, i uka ma i longo mai e Moses e Aron, i manga a ngava i taki muga e Moses vona.
A Poloruana Vuranga
A Vala-Kedo
13Muri e BAKOVI DAGI i takia e Moses ge lakea ne Parao na hatelanga pokopoko ge taguia ge takia, “E BAKOVI DAGI a Vure ne huriki a Hibru i ta maea, ‘O longo vona e huriki a viri nau, ri gi vano, ri gi kavurike iau. 14Ge uka, ga rudua a vuranga dagi ge ratapile ioe turana e huriki a bolekori, e huriki a viri vomu. Muri bara mu lohoka vona, i uka tara viri na malala ge manga iau. 15Iau a tabukoi kunana ga ratapile e huriki a viri vomu, ga ratapile ria na vuranga, bara ri lobo liu na malala. 16 cPali iau a matataro mua i uka ma mu bole a vuranga ma, ga vakasiri mua vona a nitora dagi nau, lakea e huriki bara ri vakarere a ragu na tabeke lobo na malala. 17Pali ioe o hehe hateka, o marikoi vona e huriki a viri nau ri gi vano. 18Ngane o longo, kuduvi na tahuna maea ga rudu vilia a vala-kedo. Ra vala-kedo maea i uka ma i boru hosi koea o Egipto, i tubu na tahuna e Egipto ni rata rike karaba, i valai i harena mona. 19Ngane o vakuku e huriki ri gi vakaha dili na roho a maka bulmakau turana a maki lobo ri mahuri ri laho polovavo, a vuhuna e huriki a bakovi, a maka hos, a bulmakau i uka ma ri gi dili na roho, a vala-kedo bara i boru langa ne ria, i rabalaki ria.’”20E huriki a bolekori ranga ne Parao ri mangenge vona a nitane BAKOVI DAGI, ri vakaha dili na roho e huriki a vora, a maka hos a bulmakau. 21Pali i ranga e huriki i uka ma ri mangenge vona a nitane BAKOVI DAGI, ri longotaro a nitana, ri mata taro e huriki a vora, a maka hos a bulmakau ri laho polovavo.
22Muri e BAKOVI DAGI i takia e Moses, “O toto rike na hunu a limamu, ge boru puru a vala-kedo na tabeke lobo ne Egipto, ge ratapile e huriki a bakovi, a hos, a bulmakau, a maki ni kani na hania.” 23Na tahuna e Moses i toto rike na hunu a kodo vona, e BAKOVI DAGI i rudu vilia a vala-kedo, i kururu, i maravila i puru na malala. Muri a vala-kedo i boru langa na tabeke lobo ne Egipto. 24 dA vala-kedo i boru hateka. A hini i kururu i maravila ni matai, ni longo na tabeke lobo ne Egipto. Ra vala-kedo iea i hale hateka. Hosi e huriki a Egipto i uka ma ri matai a vala-kedo ge boru maea. 25A vala-kedo i ratapile e huriki a bakovi a ngatavine, turana a maka hos a bulmakau, a maki i tabuli polovavo na tabeke lobo ne Egipto. Ra vala-kedo, i ratapile a maki ni varo na hania, a maka kai ni kani a kanena. 26Pali na robo e Gosen, ra tabeke i made vona e huriki a Israel, a vala-kedo i uka ma i boru vonga.
27Muri e Parao i talo rike a ngava ne Moses e Aron ru gu valai vona. Na tahuna ru bele, e Parao i taki rua, “Iau a rata a naro hale pali. E BAKOVI DAGI i rata a naro kamumu, pali iau turane huriki a viri nau mi rata a naro hale. 28A ngaru marua muru gu vasileki ne BAKOVI DAGI ge vakalobo a vala-kedo, a hini kururu. Muri bara longo ne mua mu vano malaviriri kunana.”
29Lakea e Moses i koli, i ta maea, “Na tahuna ga pagitala na tanga dagi ga toto rike a limagu, ga vasileki ne Bakovi Dagi, a vila, a hini kururu bara ru lobo. A vala-kedo i uka ma ge boru tabu. Muri bara o lohoka vona ra malala iea ne vone Bakovi Dagi. 30Pali iau a lohoka vona, ioe turane huriki a bolekori vomu i uka ma mu mangenge ne BAKOVI DAGI a Vure.”
31Na tahuna iea a maka kai kiroko ni rata hotu na kuline ria ri lubu, a maka rais ri moro i ratapile a vala-kedo. 32Pali a maka kanena vit kunana i uka ma ri hale, a vuhuna a maka vit i uka ma ri lua ma.
33Muri e Moses i pea a tanga dagi i pagitala. Na tahuna i toto rike a limana i vasileki ne BAKOVI DAGI, a vila, a hini kururu ru lobo. A vala-kedo tara i lobo ni boru. 34Na tahuna e Parao i uka ma i longo a hini ge kururu ge maravila, ge matai a vala-kedo ge boru, i rata a naro hale tabu turane huriki a bolekori, ri gigitora, ri koi ne huriki a Israel ri gi vano. 35Muholi hateka, e Parao i gigitora hateka, i uka ma i longo ne huriki a Israel ri gi vano, i manga a ngava e BAKOVI DAGI i taki polo ne Moses.
Copyright information for
BNP