‏ Matthew 26

E Huriki a Prister Ri Ngaru ni Rabalakia e Isu

(Markus 14:1-2; Lukas 14:1-2; Ioanes 11:45-53)

1E Isu i taki lobo a ngava nga, muri i taki e huriki a murimuri vona, i ta maea, 2 ^a “Mu lohoka vona a Habu na Nipagepolo bara i bele muri na parava i rua. Na parava iea a Tuna Bakovi bara ni habi na limane huriki a pile. Muri bara ri paditatea na kai tavalavala.”

3Na tahuna iea e huriki a prister dagi, e huriki a gare ri vapopo na roho dagi na prister dagi tara, a rana e Kaipas. 4Ri varodo a ngava ri gi lakavu kapilohoa e Isu, ri gi rabalakia. 5Lakea ri ta maea, “Nahea si gi ratea na habu ra naro iea, ma ge vaubi e huriki.”

E Isu Ni Biri o Betani

(Markus 14:3-9; Ioanes 12:1-8)

6E Isu i made o Betani, na ruma e Simon, ra bakovi hosi i ratapilea a patala. 7 ^bE Isu i made na dede, lakea a ngatavine tara i valai vona, i bolea a ulo ni rata na kedo a alabasta. A ulo i vona a nibiri mangisipa ni kona na moni dagi. I guru langea na gine Isu.

8Na tahuna e huriki a murimuri ri masia a ngatavine i rata mavonga, ri kanikaha, ri ta maea, “I navai i guru tavulea a mangisipa iea? 9Ra mangisipa iea, bara ni habi na viri tara, bara i konea na moni dagi, lakea a moni bara ni habi ne huriki a matasia.”

10Pali e Isu i lohoka vona a nitane ria, lakea i taki ria, “I navai mu padimomoa a ngatavine iea? A naro i ratea nau i kamumu hateka. 11 ^cE huriki a matasia bara ri made vakaroro turane mua. Pali iau i uka ma ga made vakaroro turane mua. 12Na tahuna i guru a mangisipa langa na gigu, i kisi puru iau, bara ni tanu. 13A taki muholi mua, na tanga lobo na malala ni vara vona a Velenga Kamumu muri ma, a naro i ratea a ngatavine iea bara ni vakalongo, e huriki ri gi luhoi mule ia.”

E Iudas

(Markus 14:10-11; Lukas 22:3-6)

14Muri e Iudas Iskariot, ra turane huriki a murimuri ala ravulu a polona i rua, i lakea ne huriki a prister dagi, 15 ^di ta maea, “Iau ga habia na limane mua e Isu, pali a ra maki mu gu habia nau?” Lakea ri konea na moni silva i ravulu tolu (30). 16I vakatubu vonga e Iudas i virokanea a dala ge habia e Isu na limane huriki a pile.

E Isu i Kani Turana e Huriki a Murimuri

(Lukas 22:7-14,21-23; Ioanes 13:21-30)

17 ^eNa mugana parava na Habu na Bret i uka Is, e huriki a murimuri ri valai ne Isu, ri nanea, “I vai a hini o ngaru mi gi rata puru a maki ni kani vomu, go luhoi mulea a Habu na Nipagepolo?”

18E Isu i koli, i ta maea, “Mu dili na tanga dagi, mu masia a bakovi tara. Mu takia, ‘A mari ni tovo i ta maea, a parava nau i valai tabukoi. Ga ratea a Habu na Nipagepolo na ruma vomu turana e huriki a murimuri nau.’” 19Lakea e huriki a murimuri ri muri mai a ngavane Isu, ri vano ri rata puru a maki ni kani na Habu na Nipagepolo.

20Na rodo i made na dede turana e huriki a murimuri ala ravulu a polona i rua, ri kani. 21Na tahuna ri kakani, e Isu i taki ria, “A taki muholi mua, a viri tara ne mua bara i habi iau na limane huriki a pile.”

22Ri longoa a ngava iea, ri dodo. Lakea ria takutaku ri nanea, “Bakovi Dagi, ma ge iau?”

23 ^fE Isu i koli, i ta maea, “Ra viri i lutu puru a bret na kap nau, bara i habi iau ne huriki a pile. 24A Tuna Bakovi bara i mate, i manga a nita ni here puru hosi. Pali ra bakovi i habia na limane huriki a pile, a Vure bara i ratapilea! Bara i kamumu hateka e kinana i uka ma ge podea hosi.”

25Muri e Iudas, ra viri bara i habia e Isu ne huriki a pile, i ta maea, “Mari ni tovo, ma ge iau?”

E Isu i koli i ta maea, “I manga a hini o taki.”

A Bret a Vain

(Markus 14:22-26; Lukas 22:15-20; 1 Kor 11:23-25)

26Na tahuna ri kakani, e Isu i bolea a bret, i kavurikea a Vure, i kevea, i habi ne huriki a murimuri, i ta maea, “A bret iea a bobogu. Mu bolea, mu kania.”

27Muri i bole rikea a kap na vain, i kavurikea a Vure. I habia ne ria, i ta maea, “Mua lobo mu ninu vona, 28 ^ga vuhuna a vain iea a daragu, ge pori nau ne vona ni vakatorea a ngava muholi a Vure i rata karaba turane huriki. Ge pori ne vona ni puga vuroki a naro hale ne huriki ala kupo. 29A taki mua, iau i uka ma ga ninu tabu a vain, bara i vano i harena na parava a ninu a vain karaba turane mua na harikianga ne Tata.”

30 ^hRi kalolo lobo a linge vasileki, muri ri lakea na lolo e Oliva.

E Petrus Bara i Nana Rovi ne Isu

(Markus 14:27-31; Lukas 22:31-34; Ioanes 13:36-38)

31 ⁱNa tahuna ri bele vonga, e Isu i taki e huriki a murimuri vona, i ta maea, “A maki ge bele nau na rodo iea bara i rata mua lobo mu ha taro iau, a vuhuna a ngava ni here puru na Hinere i ta maea,

‘Ga rabalakia a matakari na sipsip,
bara ri ha viliha a maka sipsip.’
32 ^j “Pali na tahuna ga mahuri mule, bara muga lakea o Galili.”

33Lakea e Petrus i koli, i ta maea, “E huriki lobo bara ri matai a maki i bele vomu, bara ri ha. Pali iau i uka ma ga ha.”

34 ^kE Isu i koli, i ta maea, “A taki muholi ioe, na rodo iea kunana, muga na kureko ge tangi, bara o nana rovi iau balaka tolu.”

35E Petrus i koli, i ta maea, “Iau i uka ma ga nana rovi ioe. Bara mate turamu!” E huriki a murimuri lobo, ria ranga ri ta mavonga.

E Isu i Vasileki o Getsemani

(Markus 14:32-42; Lukas 22:39-46)

36E Isu i tuli e huriki a murimuri vona, ri lakea na tabeke ni gale e Getsemani. Na tahuna ri bele, i taki ria, “Mu made koea mu dava iau. Ga lakea taro, ga vasileki.” 37I tuli kunana e Petrus, e tune Sebedi ala rua. E Isu i vakatubu ni dodo, ni luhoi lege, 38 ^llakea i taki tou, “Iau a dodo hateka, a nidodo i popote ge rata iau ga mate. Moto made koea, moto matapara, moto mamata turagu.”

39I laho lokovonga popote i tabuli ngala­tudu, i vasileki, “O Tata, ioe bara o ngaru, o bole vurokia nau a nimadihi dagi iea ta ge valai. Pali naha ni ramai a ningaru nau. O ramai kunana a ningaru vomu.”

40Muri i hamule mai a murimuri vona, i matai tou to mahita, lakea i nanea e Petrus, “Ra matou, moto keri ni matapara turagu na kilala i taku kunana? 41Moto mamata, moto vasileki, ma moto go dili na nitoni. A hatene matou i ngaru ni ratea, pali a kakaine matou i uka ma i gao.”

42Lakea i vano i vasileki tabu, i ta maea, “O Tata, ra nimadihi iea, o masia i uka ma ge polo tavula, bara kalohoa. A ningaru vomu.”

43Muri i hamule mai tou, i matai tou to mahita tabu, a vuhuna to matatulu. 44I mavonga i pe kunana tou, i vano i vasileki tabu, i manga a nivasileki vona muga.

45Muri i hamule lakea na murimuri vona, i taki tou, “Ra matou, moto tabana ni mahita, ni malo? Moto longo valai! A kilala i valai tabukoi pali. A Tuna Bakovi bara ni habi na limane huriki a bakovi hale. 46 ^mMoto pesi rike te ge vano! A viri ge habi iau na limana pile i valai ngane!”

E Isu Ni Lakavu

(Markus 14:43-50; Lukas 22:47-53; Ioanes 18:3-12)

47E Isu i tabana ni ta, e Iudas, ra turana murimuri i ala ravulu a polona i rua, i bele. E huriki a prister dagi, e huriki a gare ne Israel ri rudu turane Iudas a bakovi ala kupo. Ria lobo ri nugu a lebo, a bainat. 48Ra bakovi hale iea, ta ge habia e Isu na limane huriki a pile i taki puru ri gi matakilala navia e Isu, i ta maea, “A viri mu masia ga ngurua, ra bakovi iea kunana. Mu lakavua.” 49I mavonga, i malaviriri kunana e Iudas i lakea ne Isu, i ta maea, “Mari ni tovo, a rodo!” Muri i ngurua.

50E Isu i koli i ta maea, “Turagu, o ratea a maki o valai vona.” Lakea e huriki a bakovi ri lakavua. 51 ⁿNgane a bakovi tara i laho turane Isu i lalu talea a bainat vona, i voro, i palakudua a talingana vora na prister dagi.

52 ^oLakea e Isu i takia, “O ru mulea na murina a bainat vomu, a vuhuna e rei a viri i vaubi na bainat bara i vurua na bainat. 53Iau bara ngaru, bara takia e Tata, bara i rudu valai a tara bulolo ne huriki a agelo, ri gi kori iau. 54Pali i uka ma ga rata mavonga, a vuhuna bara rata mavonga, ge bele muholi navai a ngava ni here puru na Hinere?”

55 ^pNa tahuna iea kunana, i taki e huriki ri vapesihi vonga, i ta maea, “Mu rata manga iau a panaho, mu nugu a lebo a bainat, mu valai ni lakavu iau. Na parava lobo a made na roho na Vure, a vara vonga. Pali i uka ma mu lakavu iau. 56Pali a maka naro nga ri bele ge bele muholi a ngava i here puru e huriki a propet.” E Isu i ta lobo, muri e huriki a murimuri ri ha taroa.

E Isu Ni Pelekado

(Markus 14:53-65; Lukas 22:54-55,63-71; Ioanes 18:13-14,19-24)

57E huriki ri lakavua e Isu ri turaria lakea ne Kaipas, a prister dagi. E huriki a mari na vinara na lotu, e huriki a gare ne huriki a Israel ri vapopo pali vonga. 58E Petrus i muri gosi basi popote vona, i lakea liu na mataruma na prister dagi. I dili pololilo, i made puru turane huriki a tagari, ge masia ri gi rata navia.

59E huriki a prister dagi turane huriki a tara na kot ne huriki a Iuda ri matakana a nitamina ngava ri gi padi virihia e Isu vona, ri gi rabalakia. 60E huriki ala kupo ri valai ri rata a nitamina ngava, pali i uka ma ri matavisia tara ngava ge kamumu.

Muri a bakovi ala rua ru valai, 61 ^qru pukatala a ngava, ru ta maea, “Ra bakovi iea i ta maea, ‘I kara iau ga pukea a roho na Vure, muri ga hae mulea na parava i tolu kunana.’”

62Lakea a prister dagi i pesi rike, i ta maea, “I navai i uka ma o taratoto? O luhoi navai vona a ngava ni padi virihi ioe vona?” 63 ^rPali e Isu i vulai mavonga. Lakea a prister dagi i nanea, “A taki ioe na rana Vure Mahuri, o vakalongo mia ngane, ioe e Kristo, a Tuna Vure?”

64 ^sE Isu i koli, i ta maea, “A ngava mu takia pali. Pali ngane ga vakalongo mua lobo, i vakatubu ngane mu gu masia a Tuna Bakovi i made na limana kanena na Viri i Tuhaka. Bara mu masia i pesi langa na bubu na hunu, i puru valai.”

65 ^tNa tahuna a prister dagi i longoa a ngavane Isu, i rapea a varakia vona, i ta maea, “Ra bakovi iea i ngaru ni bolea a murina Vure! E rei a viri si gi longo tabua? Mu longoa pali na ngavana, i ngaru ni bolea a murina Vure. 66 ^uMu luhoi navai?”

Ri koli, ri ta maea, “Ge mate.”

67 ^vMuri ri kalupe tahoa a matana, ri ubia. E huriki ranga ri tamarea a tulina, 68ri ta maea, “Kristo, o ta propet ne mia ngane, e rei a viri i ubi ioe?”

E Petrus i Nana Rovi ne Isu

(Markus 14:66-72; Lukas 22:56-62; Ioanes 18:15-18,25-27)

69E Petrus i made polovavo na mata­ruma. A vora ngatavine tara i valai maia, i takia, “Ioe tara o turane Isu, ra bakovi o Galili.”

70Pali i lavuni na matane ria lobo, i ta maea, “Iau i uka ma lohoka vona a ngava o takikia.”

71Muri e Petrus i vuru tala na logo, lakea a vora ngatavine tara i masia, i taki e huriki ri mamade vonga, “Ra bakovi iea i laho turane Isu, ra bakovi o Nasaret.”

72I lavuni tabu, i kaba, i ta maea, “Iau i uka ma lohoka vona a bakovi iea!”

73I uka ma i tabaka hateka, e huriki ri pepesi vonga ri takia e Petrus, ri ta maea, “Muholi hateka, ioe a turane ria. Mi longokilalea a tabelemu.”

74Pali ngane e Petrus i taba rike na maki hale tara ge ratapilea, i kaba, i ta maea, “Iau i uka ma lohoka vona a bakovi iea!”

Malaviriri kunana a kureko i tangi. 75 ^wLakea e Petrus i longovisi a ngava e Isu i takia vona, “Muga na kureko ge tangi barama, bara o nana rovi iau balaka tolu.” Muri i pagitala i kilu, i upu rike a nangi, i tangi.