Mat 2 | BOJ | STEP | Maria na Yesus Betlehem qureq di ŋambabtej. Qure di Judia sawaq di unu. Bati di Mandor Koba Herot na Judia sawa taqatesoqnej. Ariya Maria na Yesus ŋambabtonaqa bongar sisiyo qaji tamo qudei naŋgi seŋ oqo sawaq dena walwelosib gilsib Jerusalem qureq di brantosib tamo qudei naŋgi endegsib nenemnjroqneb,

‏ Matthew 2

Bongar sisiyo qaji tamo naŋgi Yesus unqajqa beb

1 Maria na Yesus Betlehem qureq di ŋambabtej. Qure di Judia sawaq di unu. Bati di Mandor Koba Herot na Judia sawa taqatesoqnej. Ariya Maria na Yesus ŋambabtonaqa bongar sisiyo qaji tamo qudei naŋgi seŋ oqo sawaq dena walwelosib gilsib Jerusalem qureq di brantosib tamo qudei naŋgi endegsib nenemnjroqneb, 2 “Juda naŋgo mandor koba ŋambabqo qaji a qabi unu? Iga seŋ oqo sawaq dia aqa bongar unsimqa dauryosim bonum. Iga a qa louqajqa deqa bonum.” 3 Onaqa Mandor Koba Herot a naŋgo anjam di qusiqa a are koba qaloqnej. Tamo uŋgasari kalil Jerusalem qureq di soqneb qaji naŋgi dego naŋgo anjam di qusib are koba qaloqneb. 4 Deqa Herot na Israel naŋgo atra tamo kokba ti naŋgo dal anjam qalie tamo naŋgi ti kalil metnjrnaqa naŋgi bosib koroonabqa a na naŋgi endegsi nenemnjrej, “Kristus a qabia ŋambabqas?” 5 Onaqa naŋgi na kamba minjeb, “Kristus a Betlehem qureq di ŋambabqas. Qure di agi Judia sawaq di unu. Degsi Qotei aqa medabu o qaji tamo bei nami neŋgreŋyej. A endegsi neŋgreŋyej, 6 ‘O Betlehem tamo uŋgasari, nuŋgo qure Judia sawaq di unu. Qure kokba kalil Judia sawaq di unub qaji naŋgi na nuŋgo qure buŋyqasai. Nuŋgo qure dego ñam ti. Di kiyaqa? Nuŋgo qureq dena mandor koba bei tigelosimqa a na ijo segi Israel tamo uŋgasari kalil naŋgi taqatnjresqas. Deqa nuŋgo qure dego ñam ti.’”

7 Onaqa Herot a anjam di qusiqa bongar sisiyo qaji tamo naŋgi lumu na metnjrnaqa naŋgi aqa areq bonabqa nenemnjrej, “Bati gembu bongar di brantej?” 8 Onaqa naŋgi na bongar brantej qaji aqa bati di ubtsib minjnabqa a na kamba minjrej, “Niŋgi Betlehem aisib aŋgro deqa geregere ŋamoiye. Ŋamosib a tal qabi unu di unsib bosib e merbiye. Yim e kamba aisiy a qa louqai.”

9 Onaqa naŋgi Mandor Koba Herot aqa anjam di qusibqa naŋgi Betlehem aieb. Aisib ŋam ateb bongar nami seŋ oqo sawaq di uneb qaji di namo aisiq aŋgro soqnej qaji tal di tiŋsi sonaq uneb. 10 Unsib naŋgi tulaŋ koba areboleboleinjrej.

11 Onaqa naŋgi tal miligiq gilsib aŋgro aqa aniqali Maria wo sonab unjrsibqa aŋgro aqa areq di siŋga pulutosib a qa loueb. Osib naŋgo qasaŋ iŋgi iŋgi qudei ti gol ti goreŋ ti qa ti walaqajqa quleq bole bole di eleŋosib aŋgro atraiyeb. Iŋgi iŋgi di naŋgi nami silali kokba na awaiyeleŋeb qaji. 12 Osib naŋgi tal uratosib olo puluqa laqnabqa Qotei a ŋeiobilqei na minjrej, “Niŋgi olo Herot aqaq di brantaib.” Degsi minjrnaqa naŋgi gam bei dauryosib naŋgo segi qure utruq gileb.

Josep na Yesus aqa aniqali wo joqsiq Isip gileb

13 Naŋgi gilnabqa bati di Tamo Koba Qotei aqa laŋ aŋgro bei a Josep aqaq aisiq ŋeiobilqei na minjej, “Herot a na aŋgro Yesus qalsim moiotqajqa bosim ŋamqas. Deqa ni tigelosim aŋgro aqa aniqali wo joqsim Isip sawaq giliye. Gilsib di soqnibqa bunuqna e ni mermitqa sawa endeq olo bqab.” 14 Onaqa Josep a qolo tigelosiqa aŋgro aqa aniqali wo joqsiq Isip sawaq gileb. 15 Gilsib di sonabqa bunuqna Herot a moiej. Josep a kumbra di yej deqa anjam bei Tamo Koba Qotei aqa medabu o tamo bei nami marej qaji di aqa damu brantej. A endegsi marej, “Ijo aŋgro mel a Isip sawaq di soqnimqa e dena metit a Isip sawa uratosim ijoq olo bqas.”

Herot na aqa qaja tamo naŋgi minjrnaqa gilsib aŋgro mel naŋgi ñumeleŋeb

16 Ariya Herot a bongar sisiyo qaji tamo naŋgi qa tariŋonaq ugeiyej. Naŋgi a qa bosai. Deqa a qalieej, bongar sisiyo qaji tamo naŋgi a gisaŋyeb. A degsi qalieosiqa minjiŋ ani oqetonaqa aqa qaja tamo qudei naŋgi qariŋnjrnaqa naŋgi aisib Betlehem qureq dia aŋgro mel kiñilala wausau aiyel osaisoqneb qaji di unjrsib kalil ñumeleŋosib moiotnjreb. Qure kiñilala Betlehem jojomq di soqneb qaji dia dego aŋgro mel kiñilala wausau aiyel osaisoqneb qaji naŋgi kalil moiotnjreb. Nami Herot a bongar brantej qaji aqa bati di qalieqa osiqa bongar sisiyo qaji tamo naŋgi nenemnjrej. Di kiyaqa? A are qalej, a na aŋgro mel naŋgi bati deqa ŋambabeb qaji di moiotnjrqajqa deqa. 17 Herot a kumbra di yej deqa anjam bei Qotei aqa medabu o tamo Jeremaia nami marej qaji di aqa damu brantej. A endegsi marej, 18 “Rama qureq dia Resel a akamkobaoqnsiq pailoqnej. Aqa aŋgro kalil naŋgi ñumnab moreŋeb deqa akameqnaqa tamo uŋgasari naŋgi aqa are latetqa yeqnab a naŋgo anjam quqwa uratetnjroqnej. Di kiyaqa? Aqa aŋgro kalil naŋgi moreŋekriteb deqa.”

Josep na Yesus aqa aniqali Maria wo joqsiq olo Israel aieb

19 Ariya Herot a moinaqa Tamo Koba Qotei aqa laŋ aŋgro bei a Isip sawaq dia Josep aqaq di brantosiqa ŋeiobilqei na minjej, 20 “Ni tigelosim aŋgro Yesus aqa aniqali Maria wo joqsim olo Israel sawaq aie. Tamo naŋgi aŋgro Yesus qalsib moiotqa maroqneb qaji naŋgi moreŋekritonub deqa ni olo aie.” 21 Onaqa Josep a tigelosiqa aŋgro Yesus aqa aniqali Maria wo joqsiq olo Israel sawaq aiej. 22 Bati deqa Arkelaus a na aqa siqali Herot aqa sawa osiq Judia sawa taqatesoqnej. Deqa Josep a anjam di qusiqa Judia sawaq gilqa ulaej. Onaqa Qotei a Josep ŋeiobilqei na minjej, “Ni Judia sawaq gilaim. Ni Galili sawaq gile.” 23 Onaqa Josep a Qotei aqa anjam di dauryosiqa Galili sawaq gilej. Gilsiq qure bei aqa ñam Nasaret di soqnej. A di soqnej deqa anjam bei Qotei aqa medabu o tamo qudei naŋgi nami maroqneb qaji di aqa damu brantej. Naŋgi endegsib maroqneb, “Naŋgi a qa maroqnqab, ‘A Nasaret tamo.’”