Rev 15 | BOJ | STEP | Onaqa maŋwa kobaquja bei laŋ goge di brantonaq unem. Unsimqa tulaŋ koba prugugetem. Laŋ aŋgro 7-pela naŋgi iŋgi uge 7-pela ojesonab uneleŋem. Tamo uŋgasari naŋgi ugeugeinjrqajqa deqa iŋgi uge di ojesoqneb. Iŋgi uge di koboamqa gulube bei brantqasai. Iŋgi uge 7-pela di koboamqa Qotei aqa minjiŋ torei koboqas.

Revelation of John 15

Laŋ aŋgro 7-pela naŋgi iŋgi uge 7-pela ojesoqneb

1 Onaqa maŋwa kobaquja bei laŋ goge di brantonaq unem. Unsimqa tulaŋ koba prugugetem. Laŋ aŋgro 7-pela naŋgi iŋgi uge 7-pela ojesonab uneleŋem. Tamo uŋgasari naŋgi ugeugeinjrqajqa deqa iŋgi uge di ojesoqneb. Iŋgi uge di koboamqa gulube bei brantqasai. Iŋgi uge 7-pela di koboamqa Qotei aqa minjiŋ torei koboqas.

2 Onaqa e olo ŋam atsimqa iŋgi kobaquja bei yuwal baŋga bul unem. Iŋgi di tulaŋ jeqilosiq qunuŋ bulej. Yuwal babaŋ gogeq di ŋamyuo puloŋoqnej. Tamo uŋgasari nami wagme juwaŋ ti aqa sulum ti aqa ñam aqa toqor ti qoto itnjrsib qoto siŋgilaeb qaji naŋgi yuwal qalaq di tigelosib Qotei aqa gombiŋ ojeleŋesoqneb. 3 Osib Qotei aqa wau tamo Moses aqa lou ti Kaja Du aqa lou na ti endegsib louoqneb,

“O Tamo Koba Qotei, siŋgila kalil inoq di unu.
Wau kalil ni yeqnum qaji di siŋgila koba.
Iga ino wau di unoqnsim deqa tulaŋ prugugeteqnum.
Tamo uŋgasari sawa sawa kalilq di unub qaji naŋgo Mandor Koba agi ni segi.
Kumbra kalil ni yeqnum qaji di tulaŋ boledamu.
4 O Tamo Koba, ni segi qujai kumbra tulaŋ bolequja yeqnum.
Ino jejamuq di une bei saiqoji.
Deqa tamo uŋgasari kalil naŋgi bati gaigai ni biŋimoqnsibqa ino ñam soqtoqnsib sqab.
Tamo uŋgasari sawa sawa kalilq di unub qaji naŋgi ino areq boqnsibqa ni qa louoqnqab.
Di kiyaqa? Ino kumbra bole kalil ni segi na boleq atekritonum.”
5 Onaqa e olo ŋam atem di Qotei aqa atra tal laŋ qureq di unu qaji aqa siraŋ waqesonaq unem. Tal dia Qotei na aqa anjam bole babteqnu. 6 Onaqa laŋ aŋgro 7-pela iŋgi uge 7-pela di ojesoqneb qaji naŋgi Qotei aqa atra talq dena brantosib oqedeb. Naŋgi gara jugo qat tulaŋ boledamu jigeleŋosib alalag gol na gereiyo qaji dena naŋgo are targaq di kaiŋysib soqneb. 7 Onaqa wagme ŋambile so qaji bei a brantosiq tabir 7-pela gol na gereiyo qaji di eleŋosiqa laŋ aŋgro 7-pela naŋgi di enjrej. Tabir 7-pela di Qotei bati gaigai sqas qaji aqa minjiŋ na maqonaqa enjrej. 8 Onaqa Qotei aqa riaŋ ti aqa siŋgila ti dena qurem koba oqsiqa Qotei aqa atra tal getentej. Deqa tamo bei a Qotei aqa atra tal miligiq gilqa keresai. Laŋ aŋgro 7-pela naŋgi iŋgi uge 7-pela di bilentib koboamqa di tamo naŋgi olo Qotei aqa atra tal miligiq gilqa kere.