Rom 9 | BOJ | STEP | E Kristus aqa tamo deqa e niŋgi anjam bole merŋgwai. E niŋgi gisaŋ anjam merŋgwasai. Qotei aqa Mondor na e areqalo ebeqnu deqa e qalieonum, ijo anjam endi bole.

Romans 9

Pol a Israel naŋgi qa are gulubeiyeqnu

1 E Kristus aqa tamo deqa e niŋgi anjam bole merŋgwai. E niŋgi gisaŋ anjam merŋgwasai. Qotei aqa Mondor na e areqalo ebeqnu deqa e qalieonum, ijo anjam endi bole. 2 Ijo anjam agiende. E gaigai are tulaŋ gulubeibeqnaqa are koba qaleqnum. 3 Ijo areqalo koba agiende. Qotei na e taqal waibim Kristus na e qoreibosim ijo was qu agi Jekop aqa leŋ naŋgi olo kamba eleŋqajqa deqa e are koba qaleqnum. Osim deqa e gaigai Qotei pailyeqnum. 4 Jekop aqa leŋ naŋgi Israel tamo. Deqa Qotei na naŋgi aqa segi aŋgro qa minjrej. Naŋgi Qotei aqa riaŋ ti aqa siŋgila ti uneb. A na aqa anjam bunuj ti aqa dal anjam ti louqajqa kumbra ti naŋgi enjrej. Osiqa iŋgi bole kalil a na nami naŋgi enjrqa marej qaji di enjrej. 5 Naŋgo moma utru naŋgi nami ñam koba ti soqneb. Naŋgoq dena Kristus a ŋambabej. Kristus a segi Qotei. A iŋgi iŋgi kalil naŋgo gate. Deqa iga bati gaigai aqa ñam soqtoqnqom. Bole.

Kumbra Qotei a Israel naŋgi qa yej qaji deqa Pol a marej

6 Qotei na ijo was agi Jekop aqa leŋ naŋgi di eleŋosai deqa e gaigai naŋgi qa are gulubeibeqnu. Deqa Qotei aqa anjam nami marej qaji di uloŋej e? Sai. E qalie, tamo gargekoba naŋgi Israel naŋgo leŋ dena ŋambabeb ariya naŋgi kalil Israel tamo tiŋtiŋ sai. 7 Iga endegsi marqasai, “Israel naŋgi Abraham aqa leŋ na ŋambabeb deqa naŋgi kalil aqa aŋgro tiŋtiŋ.” Iga degsi marqasai. Qotei na nami Abraham minjej, “Aisak aqa leŋ na segi ino aŋgro tiŋtiŋ naŋgi brantqab.” 8 Anjam di aqa utru agiende. Tamo naŋgi mandam tamo naŋgo leŋ na ŋambabeb qaji naŋgi Qotei aqa aŋgro tiŋtiŋ sai. Tamo naŋgi Qotei aqa anjam nami marej qaji di qusib bole qa marsib naŋgo areqaloq di siŋgilatqab qaji naŋgi segi Abraham aqa aŋgro tiŋtiŋ sqab. 9 Agi Qotei na nami Abraham endegsi minjej, “Bati e nami giltem qaji di brantimqa e olo ni qa botqa ino ŋauŋ Sara a aŋgro mel oqas.”

10 Qotei aqa anjam bei dego unu. Rebeka a bati qujai qa aŋgro aiyel Eso wo Jekop wo ŋambabtnjrej. Naŋgo abu qujai agi gago moma utru Aisak. 11 Ariya Qotei aqa kumbra gaigai dauryeqnu qaji di a dauryosiq aqa segi areqalo na aŋgro qujai giltej. A aŋgro aqa wau qa are qalosai. A segi na metosiq giltej. Deqa Rebeka na aqa aŋgro aiyel naŋgi di ŋambabtnjrosaisonaqa naŋgi aiyel kumbra bole ti kumbra uge ti yosaisonabqa Qotei na Rebeka endegsi minjej, “Aŋgro namo ŋambabqas qaji a di aŋgro bunu ŋambabqas qaji aqa wau tamo sqas.” 13 Agi Qotei aqa anjam bei nami endegsib neŋgreŋyeb unu, “E Jekop qalaqalaiyonum. Ariya e Eso qalaqalaiyosai.”

14 Qotei a kumbra degyej deqa iga kiersi marqom? Qotei a kumbra uge yej degsi marqom e? O was qu, iga degsi marqasai. 15 Agi Qotei na nami Moses endegsi minjej, “E tamo bei qa are boleibqa are soqnim e a qa are boleibqas. E tamo bei qa dulqajqa are soqnim e a qa dulqai.” 16 Deqa Qotei na tamo bei giltqas di tamo aqa areqalo na sai. Tamo aqa wau na sai. Qotei aqa segi are bole na a tamo bei giltqas. 17 Agi Qotei na nami Isip naŋgo mandor koba endegsi minjej, “E na ni mandor koba atem unum. Di kiyaqa? E na ijo siŋgila kobaquja ni osormitqa tamo uŋgasari kalil naŋgi unsib ijo ñam osib sawa sawa kalilq dia mare mare laqajqa deqa e ni mandor koba atem.” Qotei aqa anjam di nami neŋgreŋyeb unu. 18 Deqa was qu, iga endegsi qalieonum. Qotei a tamo bei qa are boleiyqa are soqnim a tamo deqa are boleiyqas. Ariya a tamo bei aqa areqalo getentqa are soqnim di a getentqas.

19 Ariya nuŋgo ambleq di tamo bei a endegsi merbqas, “Qotei a kumbra degyeqnu deqa a kiyaqa iga olo une ti qa mergeqnu? Tamo yai a aqa segi areqalo dauryosim olo Qotei aqa areqalo gotraŋyqa kere? Tamo dego bei sosai.” 20 O tamo, ni tamo kiero deqa ni Qotei ŋiriŋtqam? Tamo bei na mandam osim web gereiyim web na tigelosim endegsi minjqas kio, “Ni kiyaqa e degsi gereibonum?” A degsi minjqa keresai. 21 Web gereiyo tamo a aqa segi areqalo na mandam oŋgol aiyel osimqa web aiyel gereiyqas. Web bei tulaŋ boledamu gereiyqas. Di iŋgi goiqajqa. Ariya web bei bolesai laŋa wau qudei qa gereiyqas. Web gereiyo tamo aqa kumbra di uge kio? Sai. Di kumbra bole.

22 Qotei a segi dego kumbra di yeqnu. A na aqa minjiŋ boleq atimqa tamo kalil naŋgi aqa siŋgila kobaquja unsib qalieqajqa deqa a kumbra di yeqnu. Qotei a tamo qudei naŋgi qa minjiŋ oqetnjreqnu deqa naŋgi padalqa tariŋeqnub. Ariya Qotei na naŋgi urur padaltnjrosaieqnu. A naŋgi qa tariŋsokobaiyeqnu. 23 Di kiyaqa? Aqa areqalo agiende. Tamo uŋgasari kalil naŋgi aqa riaŋ ti aqa siŋgila ti unsib qalieqajqa deqa. Ariya Qotei a tamo qudei naŋgi qa are tulaŋ boleiyeqnu. Deqa a na naŋgi so bole ti ñam koba ti enjrqajqa atej unu. Di dego tamo uŋgasari kalil naŋgi unsib qalieqajqa deqa Qotei a naŋgi qa tariŋsokobaiyeqnu. 24 Tamo Qotei a naŋgi qa are boleiyeqnu qaji naŋgi di agi iga tamo uŋgasari Qotei na metgej qaji iga. Iga Juda naŋgo segiq dena bosai. Iga sawa bei bei qaji naŋgoq dena dego bem. 25 Agi Hosea a nami Qotei aqa medabu osiqa anjam bei endegsi neŋgreŋyej unu, “Tamo nami ijo tamo sosai qaji naŋgi di e na olo ijo segi tamo qa minjrqai. Tamo nami e na qalaqalainjrosaioqnem qaji naŋgi di e na olo qalaqalainjrqai. 26 E nami sawa bei bei qaji tamo naŋgi endegsi minjrem, ‘Niŋgi ijo tamo sai.’ Ariya bunuqna e na naŋgi olo endegsi minjrqai, ‘Niŋgi ijo segi aŋgro unub. Agi e Qotei ŋambile unum qaji.’”

27 O was qu, Aisaia a Israel naŋgi qa are qalsiq deqa a Qotei aqa medabu osiqa anjam endegsi marej, “Israel aqa leŋ naŋgi ulul bul tulaŋ gargekobaqab. Ariya Qotei a naŋgoq dena tamo quja quja segi eleŋqas. 28 Tamo Koba Qotei a na tamo uŋgasari mandamq endi unub qaji naŋgo une qa minjrsim naŋgi urur padaltnjroqujatqas.” 29 Agi Aisaia a nami anjam bei endegsi marej, “Qotei siŋgila koba ti unu qaji a na iga quja quja uratgonaq soqnem. A na iga padaltgosai. Padaltgej qamu iga Sodom ti Gomora ti bulosim kalil padalekritem qamu.”

Israel naŋgi Qotei qa naŋgo areqalo siŋgilatosai. Deqa naŋgi Qotei aqa ŋamgalaq di tamo bolesai

30 Deqa iga kiersi marqom? Iga endegsi marqom. Sawa bei bei qaji naŋgi tamo bole une saiqoji sqajqa gam ŋamosaioqneb. Ariya naŋgi gam iteb. Gam agiende. Naŋgi Yesus qa naŋgo areqalo siŋgilateb gam dena naŋgi tamo bole une saiqoji soqneb. 31 Ariya Israel naŋgi Moses aqa dal anjam dauryqajqa waukobaoqneb. Naŋgi are qaloqneb, gam dena naŋgi tamo bole une saiqoji sqab. Ariya naŋgi dal anjam dauryoqneb gam dena naŋgi tamo bole une saiqoji sosai. 32 Di kiyaqa? Naŋgi tamo bole une saiqoji sqa marsib Yesus qa naŋgo areqalo siŋgilatosai. Naŋgi maroqneb, “Iga segi waukobaosim dena iga tamo bole une saiqoji sqom.” Naŋgi tal aqa ai utru quraqyosib maŋgaleb. 33 Agi Qotei aqa anjam bei nami endegsib neŋgreŋyeb unu, “Niŋgi quiye. E na tal aqa ai utru bei giltem unu. Deqa tal aqa ai utru di tamo naŋgi quraqyosib maŋgalqab. E na tal aqa ai utru di olo osiy tal siŋgilatqajqa deqa Saion qureq di tigeltit sqas. Tamo naŋgi tal aqa ai utru deqa naŋgo areqalo siŋgilatqab di naŋgi jemainjrqasai.”