Heb 1 | BON | STEP | Sasa cabu ca Acejiyame te bucurage padare piiyepu bucurage maramara gaabe ca mime kaakesaare bine mene jaajananemuge teeme mename biname bime cabu ca.

‏ Hebrews 1

Acejiyame me Mene Aboclomteji Gyene Teeme Bägrä me Ireclota cabu ca

1 Sasa cabu ca Acejiyame te bucurage padare piiyepu bucurage maramara gaabe ca mime kaakesaare bine mene jaajananemuge teeme mename biname bime cabu ca. 2 Yepä, ai ceräcerägääbu padare cabu tabe mibibine mene nijananinige teeme Bägrä cabu ca. Teeme Bägrä peese nyene lui me kaakesea ca tabe ai gawecewe piiyepu iyeta cabucewe apaclyera gwidape bine itu tewenemuji. Piiyepu teeme Bägrä peese nyene lui ne Acejiyame itu jejuji yageyame äbitame iyeta gwidape tääpume ceräcerägääbu padare cabu. 3 Tabe saapaclyäruge Acejiyame me jamyacu apaclyera cama; cuta tabe Acejiyame cama yepä pana opo gyene. Tabe teeme kokrerage mene cama iyeta gawecewe piiyepu cabucewe gwidape bine teeme maramara gaabe cabu ire jetwenenemige. Tabe biname bine kälyä jewenemuji teeme niiyaniya mule cabu ca, piba cabucewe je adnatuji Iyeta Kokre cama Acejiyame me camu poto je.

Aceji Bägrä Lui Baborage Gyene Mename Seemo cabu ca

4 Aceji Bägrä pui name pi baborage äbituji iyeta mename seemo cabu ca, epu pana pui ngii Acejiyame lui teebine ecäruji lipu baborage gyene mename seemo bime ngii cabu ca. 5 Yoo, Acejiyame licarage nuuja mename seemo ne jejuji, yepä Bägrä ne taatu jejuji egä,

“Maane cäme Bägrä gäte;
cane page määme Babe me bäbitine.”
Cuta piiyepu tabe lica nuuja mename seemo poto cidi me jejuji, yepä Bägrä poto cidi me egä,

“Cane teeme Babe me pagege äbita;
piiyepu tabe cäme Bägrä me pagege lenaja.”
6 Yoo, padare liba mameta ge Acejiyame teeme uuge Bägrä ne ätyepame ai gawecewe cabu me, tabe piba jejuji egä,

“Iyeta Acejiyame me mename seemo cina miiji Bägrä ne awepyeräja.”
7 Siige, agesa Acejiyame me mene teeme mename seemo poto cidi me,

“Cane cäme mename seemo bine buuwemope pana me jaawenemune;
Yoo, teepi lui cäme kaakeseayame gemi,
cane teebibine muye wädräji pana me jaawenemune.”
8 Yepä, teeme Bägrä poto cidi me tabe jiicenige egä,

“Maane lui Acejiyame gäte, lui puupu ne jepänenite biname bine peema cita ca waadename,
peei puupu lui määme yene iyeteta ngälu cäco.
Maane biname bine conocäco yaawadanemute.
9 Maane toracarage singi conocäco mule tääpume, yepä niiya mule bine jäägyemute.
Peei name pi cane, määme Acejiyame, meebine itu naajujine,
piiyepu ngenecu gege nääcärujine,
cane liba caburage naawenujine iyeta weeme nuuja bime cabu ca.” Siige.
10 Acejiyame te Bägrä poto cidi me cuta nuuja taje jejuji egä,

“Maane lui Yageyame gäte, maane ai gawecewe ne itu jewenujite niinäce padare cabu.
Maane cuta cabucewe ne jewenujite määmerage ime ca.
11 Teepi iyeta cirege apesera, yepä maane taatu cire naanajepi.
Teepi iyeta sasa cire läbitipesi cäbletääpe pana.
12 Maane teebibine cire iyeblengemepi tuwängle tääpume,
epu pana biname te cäbletääpe ne lipu yiiremutuge, yääclubicuge.
Yepä, maane iyeteta gäte; lica cirege sasa me äbita.”
13 Yoo, Acejiyame apu mene licarage jaajuge teeme nuuja mename seemo ne egä,

“Adnati cäme camu poto cidi ca,
ngälu cane määme cubuyame bine
määme ernge gawe me cire yaacranemepene.”
14 Yoo, mename seemo teepi ngena pana gemi? Teepi iyeta seemo gemi lui cina Acejiyame tääpume kaakesea jewenenemisi. Tabe teebibine jäätyepemuge pui biname bine ätityeräjame lui cina niiya cabu ca cirege äsecrera iyeteta ireclota teeme cabu ca cirege päpäname.