Mat 16 | BYX | STEP | De ama Parasiqena ngen ama Sadusiqena ra men sagel ma Iesus be re narliip te siquat na qa. I ra ruqun na qa ip ke rekmet ne a nge ama rletki ama dlek pem ki i qi nev uusep ip te lu.

‏ Matthew 16

Ama Judaqena Araa Barlta Ra Siquat Ma Iesus

Mak 8.11-13 Luk 12.54-56

1 De ama Parasiqena ngen ama Sadusiqena ra men sagel ma Iesus be re narliip te siquat na qa. I ra ruqun na qa ip ke rekmet ne a nge ama rletki ama dlek pem ki i qi nev uusep ip te lu. 2 Dap ma Iesus ka virliit ba ra ma’, “Aip suunun de ngene tuqun ma’, “Bigia de ama nirlaqa ama atluqa i raquarli ama aavul dai ama nguin-nguin nget lua sagel ama nirlaqa qat dan.” 3 Be aip lua i se bigia de ngene tuqun ai diiv ama qaik i raquarli ngenet lu ama aavul i ama nguin-nguin nget per ama uusepka de ngen ama qeluin. Liirang iara dai iirang ngerel sil sever ama niirl ama atlu nget de ngen ama qaik. Aip ngenet lu liirang aa ver ama uusepka de ngen drlem ama rarlimini ve iirang angera rleng. Dai saqikka raqurla dai iara dai ngenet lu ama tekmeriirang i iara iirang nget den. Liirang aa dai saqikka iirang ngere siquat. Dav ai de ngenet lu liirang aa de quasiq ai ngene mali re ama rarlimini ve liirang angera rleng. 4 Ama qaqer ama vura vet lunger iara ama niirl dai re narliip tet lu ama rleriirang ama dlek pem iirang. Dap lura dai diip kuasiq ai re lu a qeni ama rleriini ama dlek pem iini dap katikka liina i murl ma ^{▼▼16.4Ma Jona dai ama Slurlka aa Aamki na qa, be murl kurli qa dama serlikka aa rlan per ama niirl ama depkuas. Baiv aa de ama Ngemumaqa qe iames na qa.}Jona.” Baiv aa de qa mir ianai navet luqia ama luqupki dap kurli ra.

Ma Iesus Ke Teqerl Aa Risura Sever Ama Judaqena Araa Barlta

Mak 8.14-21

5 De ma Iesus ke ne aa risura ra merarlik men ama qerlapka be seruarl. Dap ma Iesus aa risura dai ngerlangken per a ra be quasik ta ral a nge ama bret. 6 De ma Iesus ka meraqen sagel aa risura ma’, “Aitaap ngen naa ne ama Parasiqena araa lengiirang ama viirang. I iirang ngere riirl ip taquarl ama Yis i ai de ra tu nget pe ama bret.” 7 De ma Iesus aa risura rel sil ba na sever ama rarlimini ve lungera ama lengi angera rleng. Be ra ruqun ma’, “Ani ma Iesus ka meraqen taqurla i raquarli ngerlangken per a uut be quasik uur ral a nge ama bret.” 8 Dap ma Iesus dai sa qat drlem liina i rel sil ba na sever iini. Taqurla de ma Iesus ka snanpet na ra ma’, “Ngu lu ngenel sil ba na sevet liina ai quasik ngen dal a nge ama bret i nanaa? A ngen a tuaqevep dai ama gil-nget. 9 As kua quasiq ama ngilka mer a ngen a asdem? De qua quasik nge drlem sever ama bret ama ngeriqit i lura i ra mes nget dai ama 5,000 ne ama quatta? De ngen drlem ai ama qaqet ta mes be verleset, de ngu lu kua ngen buuv ama gatta ne lunger aa i ama qaqet ta mes bedem nget?” “Ii.” 10 “De qua ngen drlem sever ama bret ama ngeriqit ngen a iim, i ama qaqer ama 4,000 na ra, ta mes nget? De qua quasik ngen drlem sever ama gatta i buup na nget i ngen buup nget i lua i lura ra mes be verleset? 11 Taqurla dai quasiq ai ngua meraqen sagel ngen sever ama bret. Dap ngu lu quasik ngen drlem liina i nanaa? Dap ngu tuqun a ngen ip maikka ngenet lu de ngene taqa uas tiq ama Parasiqena ngen ama Sadusiqena araa rletki ama vuqi, i qi ip taquarl ama Yis i ai de ra tu nget pe ama bret ip ngere riirl. 12 Baiv aa de ma Iesus aa risura rat drlem ama rarlimini ve lungera ama lengi angera rleng i ma Iesus kel sil na nget. De quasiq ai ma Iesus ka ruqun aa risura ip tet lu riq ama Yis i ai de ra tu nget pe ama bret. Dap ma Iesus ke tuqun a ra ip tet lu riq ama Parasiqena ngen ama Sadusiqena araa lengi i ai de re su na nget.

Ma Pita Qa Sil Ai Ma Iesus Dai Ma Kristus Na Qa

Mak 8.27-30 Luk 9.18-21

13 De ma Iesus ka mir iasai saver ama qerlingki ma Sisaria Pilipai. De ma Iesus ka ruqun aa risura ma’, “Ngua dai ama qaqer araa Rarlimka. Dap ngu lu ama qaqet ta tu araa qevep ai nemka na ngua?” 14 De ma Iesus aa risura ra virliit ma’, “Iari dai re tuqun ai ngi dai ma Jon, i ai de qe qukmes te ama qaqet. De iari re tuqun ai ngi dai ma Ilaisa. Dav iari re tuqun ai ngi dai ma Jeremaia, dap kua ngi navet lura i ama Ngemumaqa aa Aamki na ra.” 15 Baiv aa de ma Iesus ka ruqun aa risura ma’, “Dap ngen dai ngene tuqun ai nemka na ngua?” 16 De ma Saimon Pita qa virliit ma’, “Ngi dai ma Kristus i ama qaqet mai araa Iameska na ngi. I ama Ngemumaqa i qe iames masmas dai aa Uimka na ngi.” 17 De ma Iesus ka virliit ma’, “Saimon, ngi i ma Jona aa uimka, dai mager iv ama arlias per a ngi. I quasiq ai a qek nanari naver ama aivetki i qa sil ba ngi ne lungera ama lengi. Dap katikka Gumam i qa vuusep dai qa van a ngi re lungera ama lengi. 18 De ngu sil ba ngi, ai ngi dai gia rlenki ma Pita. (I ve ama rlenki ara rleng dai ama dulka.) I diip ngua raarl ne gua Lautu-vem-ki vet luqa ama dulka. De ama qerlingki i ama altingki ver a qi dai quasik mager iv ara dlek sep gua Lautuqi are ves. 19 De diip ngu qurl a ngi re ama kiqena ip ngere taarl ne re ama Ngemumaqa aa luqupki ama atluqi vuusep. I aip per ama Slurlka aa rletki iara ver ama aivetki de ngi pesdet sere ma Satan aa rleriirang dai saqikka diiv ama Ngemumaqa ka pesdet serem iirang pe uusep. De saqikka ariq aip ngi periktem se iari iara per ama aivetki namene ma Satan aa dlek dai saqikka diip pe uusep dai diiv ama Ngemumaqa qe veriktem se ra.” 20 De ma Iesus ka ruqun aa risura iv ai de qula ra sil bareq a qeq ai ma Kristus na qa.

Ma Iesus Kel Sil Barek Aa Risura Ai Qa Dai Diip Ke Ngip

Mak 8.31-38 Luk 9.21-27

21 De ianai de ma Iesus ke rarles i qel sil bareq aa risura ai diip ka tit savet ma Jarusalem, be diip ke tal ama getget nagel ama tekmeriirang i buup. I diiv ama Judaqena araa barlta de ngene lura ama barlta nep ma Lautu, de ngene lura i ai de re su ne ma Moses aa lengi dai diip ten ban a qa re liirang aa ama merlenka-vem-iirang. De ma Iesus ka sil bareq aa risura ai diip te veleng ka. Dap diip naser ama niirl ama depguas de diip ka raarlviit naver ama aapngipki. 22 De ma Pita qa mit se ma Iesus savet garli be qa taqen sagel ka ma’, “Gua Barlka, maikka quasik maget. I liina dai quasik mager iv iini nge ren per a ngi.”

23 De ma Iesus ka ruqun ma Pita ma’, “Satan. Ngi iit sasek gua rleng. I quasiq ai ngia tat naver a ngua. I quasiq ai ngia tit naser ama Ngemumaqa aa tuaqevep. Dap ngia tit naser ama qaqer araa tuaqevep.”

24 Baiv aa de ma Iesus ka ruqun aa risura ma’, “Ariq a qek never a ngen ke narliip ka tit naser a ngua dai mager ip ke manep nas de ngerlangken per a qa ne aa tekmeriirang. De mager ip ke teving se gua rletki ip taquarl iaq i qe tal aa lalemka. Dai diip ke na ngua. 25 Katikka ariq aiv iak i quasik ke narliip ka tit naser a ngua i arik ma qa lenges nanas dai diip kuasiq ai qe raneng aa iames. Dav ariq aip nemka i qa tu aa qevep sever a ngua be qe lenges nanas, dai diip luqa qe raneng aa iames. 26 De ariq aiv iak i qa raneng ama tekmeriirang mai naver ama aivetki, dap ke lenges nanas, de liirang aa ama tekmeriirang dai diip kuasiq ai iirang ngere raat never a qa. I liirang aa mai dai quasik mager ip ke vandem per a nas ne a qeni. 27 De ama qaqet mai araa Rarlimka dai saqiaskerlka diip ka ren ke ne aa Mam aa ansinki de ngen aa Angeluqena. De lua dai diip ke guirltik bareq ama qaqet. I diip ke guirltik ba ra ne liirang aa i qatikka ai de re tekmet niirang. 28 De maikka ngul sil ba ngen ne ama revan. I a ngen be iari i qurli ra iara dai diip kuasiq ai re ngip nauirl baiv aa de saqiaskerlka nguat den. Be diip te lu ngua i nguat den pe gua ansinki ip ngu uas i ama King na ngua.