1Jo 5 | CebULB | STEP | Si bisan kinsa nga nagtuo nga si Jesus mao ang Cristo gihimugso sa Dios. Ug si bisan kinsa nga naghigugma kaniya nga gikan sa Amahan naghigugma usab sa iyang mga anak.

‏ 1 John 5

1 Si bisan kinsa nga nagtuo nga si Jesus mao ang Cristo gihimugso sa Dios. Ug si bisan kinsa nga naghigugma kaniya nga gikan sa Amahan naghigugma usab sa iyang mga anak. 2 Pinaagi niini atong masayran nga atong gihigugma ang mga anak sa Dios--sa dihang atong gihigugma ang Dios ug gibuhat ang iyang mga mando. 3 Kay kini mao ang gugma alang sa Dios--nga atong gitipigan ang iyang mga mando. Ug ang iyang mga mando dili usa ka palas-anon.

4 Kay ang tanan nga gihimugso sa Dios mibuntog sa kalibotan. Ug kini mao ang kadaogan nga mibuntog sa kalibotan, bisan ang atong pagtuo. 5 Kinsa ang usa nga mibuntog sa kalibotan? Ang usa nga mituo nga si Jesus ang Anak sa Dios.

6 Mao kini siya nga miabot pinaagi sa tubig ug dugo--si Jesu-Cristo. Miabot siya dili lamang pinaagi sa tubig, apan pinaagi sa tubig ug dugo. 7 Kay adunay tulo nga nagpamatuod: 8 ang Espiritu, ang tubig, ug ang dugo. Kining tulo adunay panag-uyon.

9 Kung nakadawat kita sa pagpamatuod sa katawhan, ang pagpamatuod sa Dios mas labaw. Kay ang pagpamatuod sa Dios mao kini--nga siya mismo nagpamatuod mahitungod sa iyang Anak. 10 Siya nga mituo sa Anak sa Dios adunay pagpamatuod sa iyang kaugalingon. Si bisan kinsa nga wala mituo sa Dios naghimo kaniyang bakakon, tungod kay wala siya mituo sa pamatuod nga gihatag sa Dios mahitungod sa iyang Anak.

11 Ug ang pamatuod mao kini--nga ang Dios naghatag kanato sa kinabuhing walay kataposan, ug kini nga kinabuhi anaa sa iyang Anak. 12 Siya nga nakabaton sa Anak nakabaton sa kinabuhi. Siya nga wala makabaton sa Anak sa Dios wala makabaton sa kinabuhi.

13 Kining mga butanga nga akong gisulat kaninyo aron nga kamo masayod nga kamo adunay kinabuhi nga walay kataposan--nganha kaninyo nga nagtuo sa ngalan sa Anak sa Dios. 14 Ug mao kini ang pagsalig nga atong nabatonan sa iyang atubangan, nga kung mangayo kita ug bisan unsa sumala sa iyang kabubut-on, naminaw siya kanato. 15 Ug kung nasayod kita nga naminaw siya kanato--bisan unsa ang atong pangayoon kaniya--nasayod kita nga anaa kanato ang bisan unsa nga atong gipangayo kaniya.

16 Kung si bisan kinsa ang nakakita sa iyang igsoong lalaki nga nakabuhat ug sala nga dili mosangpot ngadto sa kamatayon, kinahanglan mag-ampo siya nga ang Dios maghatag kaniya ug kinabuhi. Naghisgot ako niadtong adunay sala nga dili masangpot sa kamatayon. Adunay sala nga mosangpot sa kamatayon--wala ako nag-ingon nga kinahanglan siya mag-ampo mahitungod niana. 17 Ang tanang dili pagkamatarong kay sala--apan adunay sala nga dili mosangpot sa kamatayon.

18 Nasayod kita nga ang tanan nga nahimugso sa Dios dili magpakasala. Apan ang usa nga nahimugso sa Dios nagtipig kaniya nga luwas, ug ang daotan dili makapanakit kaniya. 19 Nasayod kita nga iya kita sa Dios, ug nasayod kita nga ang tibuok kalibotan nailalom sa pagdumala sa usa nga daotan.

20 Apan nasayod kita nga ang Anak sa Dios miabot na ug gihatagan kita niya ug panabot, nga masayod kita kaniya nga tinuod, ug nga kita anaa kaniya nga tinuod--bisan sa iyang Anak nga si Jesu-Cristo. Siya ang tinuod nga Dios ug ang kinabuhi nga walay kataposan. 21 Minahal kong mga anak, pagpahilayo kamo sa mga dios-dios.