Luke 11

Jesu sh’in kamm kaah dhangNaan

Mat 6:9-13; 7:7-11

1Par’meeh shi, bhi Jesu kaah dhangNaan m’ee pee shi. Kaarooh khibhid dhangNaan ni, bhi kihmeh dhighin zheppkamm khinyi satt nyi le, “Gwoohyon, ghi katt munn kihh dhangNaan kaa Yohanna Gu-Baptisma katt zheppkamm keeniy mwopp seh.”

2Bhi Jesu satt mwopp le, “Mihh wunn dhangNaan bhi wu le,
“‘Puup mu,
Ghi l’e tihh mu kyeer shumm gha dhen a Wu’bhangg,
Dyinn dhenglong keegha ji o’h!
3Ghi pihh biisoh munn kooh phiranggyeh,
biisoh keemu w’u shi’puus, shi’puus.
4Ghi fwa shigbis keemu mwopp munn,
p’ee wu’munn zag mu kihh fwa
dheldyikihh w’u koohweeh kihh sh’in munn.
Tapp ghi looh munn
dhighin kammpee w’u shwal-shwal mou.’”

5Bhi Jesu satt dyi zheppkamm keeniy ni mwopp le, “A weeh dhighin wunn w’u kaddhangg nyi kihh m’ee shaar niy, dhang shaar nyi ni ji kihpee nyi diy naar khipar satt nyi le, ‘Shaar na, ghi pihh dihhkopp mhi gihkhill gutt a’n kunn, 6p’ee m’ee shaar na tong mwaan ji sam mhizeb a’n nihghinse khipar, dhangg baah a’n kihh mee’bii p’ee pihh nyi mou.’

7“Bhi kyed diy pring shaar niy ni a dhighin luh le, ‘Tapp ghi daam’pee a’n mou, pwooluh baa a w’u shishakhat, yakhal zhepp nah mwopp kih pee’saam dang na; pee’mhinyi bhi baah a’n p’ee mak yakhal p’ee pihh mee’bii gha mou,’ a’ng? 8Ih kihh satt wunn, kooh dyinn nyi p’ee yakhal tihh pihh gutt ni diy shaar niy pee’rooh nyi a shaar nyi mou, weett kihhsheh bhi p’ee dyiin’shibii khi gwoh ni bhi niy p’ee yakhal pihh kapp bii w’u kihh re’bhet nyi.

9“Pee’mhinyi, bhi ih kihh satt wunn, wu kihh dhang, bhi Naan p’ee pihh nyi wunn; wu kihh lyap, bhi Naan p’ee l’e tihh wu kad; wu kihh bwappee, bhi Naan p’ee wangg pwooluh wunn. 10P’ee koohweeh w’u kihh dhang, bhi Naan p’ee pihh nyi gwoh ni; koohweeh w’u kihh lyap, bhi Naan p’ee l’e tihh kad diy; yakhal koohweeh w’u kihh bwappee, bhi Naan p’ee wangg pwooluh nyi.

11“A weeh dhighin wunn w’u a puup, w’u kadmihh em gha diy dhang sherep pwoo gha, bhi kan ghi pihh a w’oo nyi? 12H’aa kooh diy dhang a aaz’koo oh, bhi kan ghi pihh a dhekher nyi? 13Dheeh kad kan wu’wunn, w’u kooh bhalang phirooh wunn a mwoohbis, w’u man pihh zhukhum wu’rett zhepp wuh mwopp, dhangg dheeh diy a Puup wu w’u tihngg kih dhengNaan a’ng? Ai nyi p’ee pihh Riin Wu’bhangg mwooh mwopp dhang phi nyi!”

Jesu mett bhall mhi Beelzebub

14Par’meeh shi bhi Jesu kaah put kihh m’ee mumullung w’u a pwoobhipp. Kaarooh mumullung ni put, bhi gwooh dyinn a pwoobhipp shi y’aa laa’pwoo, bhi aa’phi dw’uu gurum w’u mwopp nhighin. 15Weett kihhsheh, bhi pakk gurum ni mwopp kihh satt le, “Ai kihh pwat kihh mumullung mwopp a sh’i maa’pee khi Beelzebub, ^a w’u a Miskakhamm khi mumullung mwopp.” 16Dhangg pakk mwopp kamm Jesu, mwopp kihh t’ang tihh sh’in m’ee bii’aapwoo w’u put phikihtihngg diy mwopp. ^b

17Jesu man p’an khimwopp bhi satt mwopp le, “Kapp dhenglong w’u shapkaah rah, y’aa kob kihh sat, bhi nyi p’ee ky’em. Yakhal tuluh w’u shapkaah dhel dhighin bhi nyi p’ee pal. 18Ai mihh Shetan diy shapkaah niy y’aa kob kihh shin, bhi dhenglong khinyi p’ee shitt a rangg dharr diy? Ih satt mihhse wunn a pee’rooh wu satt wu le, a’n kihh pwat kihh mumullung nw’aa a sh’i maa’pee khi Beelzebub. 19Mihh kan wu’an ih kihh pwat kihh mumullung mwopp a sh’i maa’pee khi Beelzebub, bhi zheppkamm keewu mwopp kihh pwat kihh mwopp a sh’i wuyeh? Pee’mhinyi bhi a mwopp sh’i kaah ruh p’ee p’ar kwed a mhi-togdyeell wunn kaah pwoo mihhse ni. 20Dhangg kadmihh ih kihh pwat kihh mumullung a sh’i maa’pee khi Naan, ai bhi dhenglong khi Naan ji’wull naar wu.”

21Jesu satt m’ee shumpwoo mwopp le, “Mihh m’ee kokhorong gurum w’u kihh looh’lek dhess kihh tapp luh keeniy, bhi baah mee’bii p’ee bwum long khinyi mou. 22Dhangg mihh m’ee gwooh bhall mett wu’nyi ji taahpee khinyi kihh l’ek harr sokokhorong kaah nyi, bhi nyi p’ee yak looh’lek w’u kihh khig shin dyishig seh, bhi nyi p’ee fw’oom looh khinyi harr shap pakk gurum mwopp zhukhum.

23“Gwooh baah nyi kihshag kihh a’n mou bhi nyi a kob kihh a’n; yakhal gwooh baah nyi chakk bii dang na mou, bhi nyi a phi b’er nyi chiit. ^c

Riin wu’bis kihh mak baa’ji dyi

Mat 12:43-45

24“Mihh riin wu’bis put dhighin gurum bhi kihh mwaan dhel dum dhighin v’ur yill’fii tihh lyap pee w’u tihh tong diy. Mihh kad wonn bhi kihh satt shin le, ‘An p’ee baah dum nah luh keena w’u deh a put dhighin seh.’ 25Mihh ji kad mwopp fett pee ni bhangg-bhangg, mwopp tapp’pee nyi dhakk dhen, 26bhi nyi p’ee dum ji kihh m’ee mhinin riin wu’bis dyi mwopp pwoghovel, w’u wu’mwopp mett wu’nyi nyangg, bhi mwopp p’ee dhel tong dhighin gwoh ni; a kihhsheh bhi kyess khi gwoh ni p’ee bis mett sh’ee khinyi.”

27Kaarooh Jesu kaah laa’pwoo mihhse, bhi m’ee mat dhighin dw’uu gurum ni mwopp piin dhekheh rah satt le, “Wu’rett khi Naan kaah nhikhin w’u l’aa gha, w’u a nhikhin w’u kyeer gha oou!”

28Bhi Jesu pring mat ni le, “Ee’h, weett kihhsheh bhi wu’rett khi Naan a kaah mwooh kihh klihng pwoo khinyi mwopp kyeer.”

Gangg mhilyap bii’kattshiiy

Mat 12:38-42

29Kaarooh dw’uu khi gurum ni mwopp kihh sihkhitt bwull, bhi Jesu satt le, “Gangg mhize ni a gangg wu’bis. Mwopp kihh t’ang seeh mwopp naah a m’ee bii’kattshiiy dhangg baah Naan p’ee pihh m’ee bii’kattshiiy mwopp dhel kih mhi Yunana mou. ^d 30P’ee kaa gyet Yunana dhen a bii’kattshiiy p’ee gurum w’u gyet khishikhitt Nenevi seh, bhi L’aa khi Gurum p’ee kwed a kihhsheh zag p’ee gurum w’u gangg mhize ni mwopp. ^e 31P’ar Puus Dyeell, bhi Matlong w’u gyet yill w’u Koghob Wu’bhakk, w’u a yill Sheba, p’ee yakhal dharr dyeell kihh gurum w’u gangg mhize ni mwopp harr tep mwopp, p’ee wu’nyi gyet tong bhakk yill w’u zhong-zhong k’aa diy tihh klihng yak’soon khi Miskakhamm Solomon diy. Dhangg wu naah, m’ee gwooh mett Miskakhamm Solomon se, bhi wu shiih klihng nyi. ^f 32P’ar Puus Dyeell, bhi Gurum w’u gyet khishikhitt Nenevi p’ee yakhal dyarrang dyeell kihh gurum w’u gangg mhize ni mwopp harr mwopp trep mwopp, p’ee gyet wu’mwopp tu’wapp kaarooh mwopp klihng pwooNaan w’u Yunana satt mwopp. Dhangg wu naah, m’ee gwooh mett Yunana se. ^g

Kamm kaah peebhangg kihh pee’kwoo

Mat 5:15; 6:22,23

33“Baah gwooh kihh byill dlengwus zok kyeen’pee, kooh kurum kong dyikihh mou; ^h kihh dhen nyi a kih pee’dhen keera tihh mwooh kihh ja dhel diy luh ni mwopp naah peebhangg khinyi. 34Yit gha a kaa dlengwus mhi shoopsak se. Mihh yit gha kakhamm kihh naahpee rih-rett, bhi shoopsak kihhdihng p’ee gam kihh peebhangg; dhangg mihh dheng’pee yit gha kakhamm mou, bhi shoopsak p’ee gam a kihh pee’kwoo. 35Ghi kihh kangg tappseh peebhangg w’u dhighin gha bhi nyi rah a pee’kwoo kan. 36Pee’mhinyi, bhi mihh shoopsak kihhdihng gam a kihh peebhangg, harr baah m’ee bheep ni dhighin pee’kwoo mou, bhi shoopsak ni p’ee bhangg kihhdihng, kaa dlengwus kihh bhanggpee gha se.”

Jesu tepbhelepp Farisiiy kihh

Mhikamm-w’aar mwopp

Mat 23:1-36; Mar 12:38-40

37Kaarooh Jesu kaah laa’pwoo bhi m’ee g’u Farisiiy nang nyi p’ee dum soh kihshag kihh riy, bhi dum tong p’ee soh ni. 38Kaarooh g’u Farisiiy ni naah kad Jesu vwang-angg sarr niy dhangg y’aa so soh maah, bhi aa’phi nyi. 39Bhi Daah Jesu satt nyi le, “Wunn Farisiiy mwopp wu kihh sar kihbwoon zhangg kihh kihbwoon kong mwopp, dhangg dhighin phitukhup wu gam a kihh bukhurpee, kihh v’ur dhakk’wubis. 40Wunn a m’ee nakk e’h! Naan g’u l’e kihbwoon bii mwopp, a nyi l’e dhighin mwopp zag mou aa’? 41Wu put kihh bii w’u dhighin phitukhup wu seh, kaa zhukhum w’u mwopp kihh put kihh nyi se, bhi koohmeeh p’ee dhen a wu’bhangg wunn.

42“Mak kihh wunn dihkhillihkk, wunn Farisiiy mwopp! P’ee kooh bhalang phirooh wu kihh pihh tullkaah Naan, mhi bii w’u kaa shirrongg mwopp kihh nyebhez, kihh kakhar v’ur pin’bwan ni mwopp dyi weett zag, weett kihhsheh, bhi wu kor shwanzeenn yakhal baah wu kihh wall Naan mou. Dyinn wunn p’ee sh’in a mihhse ni mwopp, baah kihshag kihh yet rooh wunn phi dhoghol sh’in nyi seh dheeh noott sh’in mou. ⁱ

43“Mak kihh wunn dihkhillihkk, wunn Farisiiy mwopp! P’ee wu kihh lyap a n’an peetong w’u tihngg kihkyeen dhighin Luh’kang mwopp; yakhal wu kihh dh’om a rooh gurum mwopp kihh yibyid wunn sh’i togpee kih luhtukk. 44Ai mak kihh wunn dihkhillihkk! P’ee wunn a kaa kihshirr w’u mwopp byirripyit, harr gurum mwopp kihh lass mwaan dyikihh dhighin shiin’man.”

45Bhi kihmeh dhighin Mhikamm-w’aar mwopp pring Jesu le, “Gukamm, dhighin bii w’u ghi satt seh, bhi ghi kas wu’munn zag e’h.” 46Jesu pring nyi le, “Mak kihh wu’wunn zag dihkhillihkk, wunn Mhikamm-w’aar! P’ee wu kihh treng gurum mwopp kihh n’an loohtekhenn mhi W’aar w’u shwal-shwal, dhangg baah wu’wunn wu kihh fw’ang pakk loohtekhenn ni kooh sh’i m’ee laa’sarr wuh mou.

47“Ai, mak kihh wunn dihkhillihkk! P’ee wunn phi gab’zhakham dyak v’ur kihshirr Mhi-wanggshiiy mwopp rih-rett, Mhi-wanggshiiy w’u gyet a puup wu shi mwopp twa bhi kan! 48Ai mihhse kihh kamm le wu’wunn sh’i kaah wuh zag wu tupp’pwoo wu le wunn tuppbwoonn bii w’u gyet puup wu ni mwopp sh’in seh. P’ee puup wu gyet wu’mwopp twa Mhi-wanggshiiy ni mwopp, dhangg kan a wunn a m’ee mhi gab’zhakham dyak kihshirr mwopp dhak ser’seh o’h! 49Pee’mhinyi, bhi Naan satt dhighin shwan’soon keeniy le, ‘An p’ee lop Mhi-wanggshiiy kihh zhepp’lop lhidum mwopp; mwopp p’ee twa pakk, yakhal mwopp le’zheell pakk.’”

50Jesu sokihkyeen kihh laa’pwoo le, “A kihhsheh bhi Naan p’ee lyap shig teghem Mhi-wanggshiiy w’u gyet puup wu mwopp bheer weett, phi’wu yill ni shee diy, a sarr gangg mhize ni; 51sh’i w’u shee diy teghem Habila harr jiputt teghem Zakariya, w’u gyet mwopp t’u kihnaar kibyin’biizhukhum kihh LuhNaan seh. Ih kihh satt a zeenn wunn, Naan p’ee lyap shig teghem gurum mihhseh ni mwopp weett a sarr gurum w’u gangg mhize ni mwopp. ^j

52“Mak kihh wunn dihkhillihkk, wunn Mhikamm-w’aar mwopp! P’ee wu m’ang pin’wangg mhi arr man Naan lhi’baa; wu’wunn sh’i kaah wuh wu dhel dhighin mou, yakhal wu duakhar arr mwooh kihh t’ang dhel ruh dhighin piy.”

53Kaarooh Jesu yet tuluh khi g’u Farisiiy ni, bhi Mhikamm-w’aar, kihhsheh kihh Farisiiy mwopp zag, mwopp y’aa ving’yit nyi, mwopp kihh bhokhonbhelepp pwoo nyi sh’i t’al. 54Mwopp kihh lang’bhongg nyi nyakk tihh mwopp kad arr y’aa nyi diy sh’i m’ee pwoo w’u shaahseh diy put pwoo nyi dihhreh mou oh.