Luke 16

Gudhakk w’u a kwallap

1Jesu waa satt pwoo mihhse zheppkamm keeniy mwopp le, “M’ee gulong gyet nhighin w’u nyi kihh m’ee gu’naahlong keeniy. Bhi gurum mwopp ji kihh pwoo wu’bis kaah gu’naahlong ni gwoh ni, pee’rooh kihh t’u long khinyi b’uu. 2Bhi gulong ni peet gu’naahlong ni nang diy phi nyi le, ‘A mihyeh a bii w’u a’n phi klihng nyi kaah gha seh? Ghi phi pwoodhakk mhi dhakk keegha a’n, p’ee baah gha p’ee dheeh a gu’naahlong keena dyi mou.’

3“Bhi gu’naahlong ni satt shin le, ‘An p’ee sh’in a rangg mwasseh? P’ee guluh keena p’ee shen a’n dhakk. Baah a’n kihh bhall mhi sak maarr mou, yakhal yitlwaann p’ee d’aam a’n dhang. 4E’heeh! Ih man bii w’u a’n p’ee sh’in nyi, tihh guluh keena mihh shen a’n diy dhakk, bhi gurum mwopp lapp a’n luh ruh.’

5“Bhi gu’naahlong ni peet kooh meehrangg dhighin mhikaatt khi guluh keeniy ni mwopp lhi’ji. Bhi nang phi gwooh’shee le, ‘Gha kihh kaatt khi guluh keena ih k’ong ayeh kaah gha?’

6“Bhi gwoh ni satt nyi le, ‘Nyi a tuuh mw’oor dhaa kihmeh ‘y.’

“Bhi Gu-naahlong ni satt nyi le, ‘Lapp ran’kwatt keegha, tong seh ghi ran laar paad diy laah-laah.’

7“Nang phi wu’zeh le, ‘Wu’gha ee? Kaatt mag’gha a k’ong ayeh?’

“Bhi gwoh ni lapp nyi le, ‘Nyi a chib alkama dhaa kihmeh ‘y.’

“Bhi gu’naahlong ni satt nyi le, ‘Ghi lapp ran’kwatt keegha ghi ran laar pwoghokunn.’

8“Bhi guluh ni tepgihtt gu’naahlong w’u a kwallap seh, p’ee dyeer’soon wu’kihhsheh.”

Bhi Jesu satt zheppkamm keeniy mwopp le, “Gurum w’u a mhi yill mhize mwopp kihh arr s’oon mhi looh shag mett zhepp mhi peebhangg mwopp. 9Pee’mhinyi, bhi ih kihh satt wunn, wu yak shaar sh’i long mhi yill mhizeh, kooh bhalang phirooh nyi a bii wu’bis, tihh p’ar mihh kyes diy bhi mwopp lapp wunn dhighin luh’tong w’u harr ngaa-ngaa.

10“Gwooh sh’in zeenn kaah bii wu’lee, bhi nyi p’ee sh’in zeenn kaah bii w’u dhess zag. A kihhsheh zag, gwooh sh’in shiinzeenn kaah bii wu’lee, bhi nyi p’ee sh’in shiinzeenn kaah bii w’u dhess zag. 11Kadmihh wu sh’in shiinzeenn kaah long mhi yill mhize, w’u a bii wu’bis, bhi a wuyeh p’ee dhen dihng long w’u a zeenn sarr wuh? 12Dhangg dyi zag, mihh wu sh’in shiinzeenn kaah bii w’u a mhi m’ee gurum, bhi a wuyeh p’ee pihh bii w’u a mug’wuh wunn?

13“Baah kromm kihh mak pihh kaah niy p’ee sh’in dhakk mhiluh vel mou. P’ee kihh mak kwed a rooh nyi p’ee wall wu’zeh, dheeh shiih kihh wu’zeh; kooh pihh kaah niy wu’zeh, dheeh bheez wu’zeh. Pee’mhinyi, bhi baah wunn p’ee mak pihh kaah wuh Naan, yakhal wu pihh kaah wuh shaghal zag mou.” ^a

Pakk kamm w’u Jesu sh’in

Mat 5:31,32; Mar 10:11,12

14Farisiiy mwopp klihng bii w’u Jesu satt seh, bhi mwopp finn pwoo ru nyi, pee’rooh gyet mwopp a mhi dh’om shaghal w’u hett. 15Bhi Jesu satt mwopp le, “A wunn a mwooh kihh le runn a mhi-shigrett kihkyeen gurum mwopp, dhangg Naan man phitukhup wu. P’ee bii w’u zhepp gurum kihh tihghin mwopp pwetd, bhi mwopp a bii-nyakklong kihkyeen Naan.

16“Kamm w’u sh’i W’aar mhi Musa, kihh rooh sh’i r’an khi Mhi-wanggshiiy mwopp dharr a ji khi Yohanna Gu-Baptisma. Mwasseh kihhsheh, dheeh mwopp phi satt a Pwoo’wurett mhi dhenglong khi Naan. A kihhsheh bhi gurum dhess phi tosspee tihh mwopp kad dhel diy dhighin dhenglong khi Naan ni. ^b 17Weett kihhsheh, bhi nyi p’ee fyeell mett tihh yill kihh phikihtihngg mwopp kyes, kad mihh’pee a reb m’ee r’an khi W’aar ni kihh taah yill. ^c

18“Koohweeh w’u tu’dyik mat niy yakhal lapp m’ee wu’zeh, bhi nyi phi sh’in a gaa. Yakhal koohweeh w’u lapp mat w’u mwopp tu’dyik nyi, bhi nyi phi sh’in a gaa zag. ^d

Pwookaah gulong mwopp kihh Li’azarus

19“M’ee gulong shi gyet nhighin, w’u kihh sh’in zhwatt sh’i loohkrhim w’u shik glum’paatt, kihh fwaat linen w’u rett pwetd, yakhal kihh tong soshangg kooh phiranggyeh. 20M’ee gupyaah wu’nyi gyet nhighin zag, shumm nyi a Li’azarus. Mwopp kihh m’ang nyi ji dhen phi fokhol’pang khi gulong ni. V’ur laah mwan bwakk shoopshik nyi kihhdihng’dihng. 21Kihh chakhar le dyinn ri kad pakk biisoh w’u kihh chaat yill ki’byin soh khi gulong ni ri so; harr as mwopp kihh ja bhelem laah khinyi.

22“Pee wull rooh gupyaah ni m’uut, bhi mhi’lop khi Naan mwopp dum kihh nyi sh’i koghob Ibrahim. Gulong ni wu’nyi m’uut zag, bhi gurum mwopp wum nyi. 23Nyi kaah zhing’dhaghal dhighin wusbleng, bhi kaarooh eep yit niy, bhi naah Ibrahim tihngg zhong-zhong, kihh Li’azarus sh’i koghob niy. 24Bhi aa’n dhekheh niy satt le, ‘Daa Ibrahim, ghi naah chikhirr keena oou! Ghi lop Li’azarus tihh t’en phi’leng laa’sarr niy diy dhighin am log liiss nah diy ‘y, p’ee a’n kaah shwaazheell dhighin blam’wus mhize phi’mee satt maah!’

25“Dhangg Ibrahim lapp nyi satt le, ‘L’aa Oo, ghi kakkder rooh gyet dhighin t’ong keegha, bhi wu’gha ghi lapp bii wu’rett, dhangg Li’azarus wu’nyi lapp a bii wu’bis. Mwasseh nyi kaah klihngshangg; wu’gha kaah shwaazheell. 26Baah a kihhsheh kyekk mou, Naan dhen gag m’ee kwal’kong w’u zhizhurruk kihnaar mu kihh wu’wunn, tapp’baa m’ee mwooh kihh t’ang merrep koghob m’uun taah dum koghob mug’wuh, kooh mwooh kihh t’ang merrep koghob mug’wuh taah se koghob muun’muh, mwopp mak merrep mou.’

27“Bhi gulong ni satt Ibrahim le, ‘Daa, ih kihh so’kumbokk gha, ghi lop Li’azarus ni lhidum tuluh khi daa, 28p’ee a’n kihh em’naa wu’daass mwopp paad, tihh dum diy delkom mwopp, tapp p’ar wu’mwopp zag diy ja dhighin pee zheell w’u shwal-shwal mhize ni mou.’

29“Dhanggbhi Ibrahim lapp nyi le, ‘Ai mwopp kihh r’an khi Musa kihh mhi Mhi-wanggshiiy mwopp; bhi em’nangg ni mwopp klihng mwopp sihng.’

30“Bhi gulong ni satt Ibrahim le, ‘Haiyou, kaddhangg dyinn a m’ee gurum waa yakhal kih peemuutt dum kihpee mwopp diy, bhi dyinn mwopp p’ee tu’wapp.’

31“Bhi Ibrahim satt nyi le, ‘Mihh mwopp shiih klihng r’an khi Musa kihh mhi Mhi-wanggshiiy mwopp, bhi kooh dyinn a m’ee gurum yakhal dhighin mwooh mihmwarrap maah, bhi mwopp p’ee pihhzeenn mou.’”