Luke 8

Shwarab mhi-dumdang Jesu tull bh’am

1Bwoon bii mihhse mwopp bhi Jesu y’aa mwaan dum v’ur khishikhitt kihh v’ur kwangpee mwopp, tihh kihh satt Pwoo’wurett kaah dhenglong khi Naan diy. Zheppkamm khinyi w’u kaghapaad baa’vel seh mwopp dang nyi, 2kihhsheh kihh pakk shwarab w’u gyet Jesu pwat kihh riin wu’bis dhighin mwopp, yakhal bar mwopp pwoo v’ur shw’al zag. Maryamu w’u gyet mwopp kihh peet Magdalin, w’u gyet Jesu pwat kihh mumullung pwoghovel dhighin nyi seh gyet a kihmeh dhighin mwopp. 3Kihh Yuwana, mat khi Kouza, Gwoohyon khi mhi-naahluh khi Hiridus; kihh Susanna; kihh pakk shwarab ni mwopp dhess dyi, w’u gyet mwopp kihh bham Jesu kihh zheppkamm keeniy dhighin sarrkad keeru. ^a

Shumpwoo kaah g’u fwa sherem

Mat 13:3-23; Mar 4:3-20

4Kaarooh dw’uu gurum mwopp dhess kihh bag kihpee Jesu diy, yakhal pakk mwopp dhess kaah pwat v’ur tughuzyill mwopp ja kihpee nyi dyi, bhi satt shumpwoo mhize mwopp le, 5“M’ee g’u fwa sherem dhebhenn gyet dum fwa sherem keeniy. Kaarooh nyi kaah fwa sherem ni, bhi pakk chaat pwoo arr, bhi gurum mwopp treng kihh shiiy ruh, yakhal bul mwopp chakk sherem ni dyallang. 6Pakk sherem ni mwopp chaat kih gwakhapp-laar. Dhangg kaarooh mwopp dhoghol bhee weett, bhi mwopp shikhir fyaa, p’ee baah mwopp kad pee wu’log mou. 7Pakk sherem ni chaat dhighin ghir, bhi ghir ni mwopp nan dang mwopp, harr mwopp shwaa bhall khimwopp. 8Dhangg pakk sherem dhebhenn ni mwopp chaat kih loonyill wu’rett, bhi mwopp bhee, mwopp nan, mwopp la zhepp dhaa kihmeh, kihmeh.” Kaarooh kyes laa’pwoo mhize, bhi peet satt kihh dhekheh niy bhall-bhall le, “Gwooh kihh kom klihngpee, bhi klihng oou!”

Yakshiiy shumpwoo kaah g’u fwa sherem

Mat 13:10-17; Mar 4:10-12

9Bhi zheppkamm khinyi mwopp nang phi nyi le, “A mihyeh a shiiy khi shumpwoo mhize ni?” 10Jesu pring mwopp le, “Naan pihh m’an mhi zokk mhi dhenglong keeniy a wunn, dhangg kihpee kakhar gurum mwopp diy bhi nyi a sh’i v’ur shumpwoo kyekk,
“tihh, ‘Mwopp kihh dyee diy,
dhangg mwopp p’ee naah nyi mou,
tihh mwopp kihh klihng diy,
dhangg mwopp p’ee manshiiy nyi mou.’ ^b

11“A mihhse a shiiy khi shumpwoo ni: Sherem ni a pwoo khi Naan. 12Sherem w’u chaat pwoo arr a mwooh kihh klihng pwoo khi Naan ni, dhangg Shetan kihh shikhir ji m’ang pwoo ni lhi’baa phitukhup mwopp abet, tappseh mwopp pihhzeenn harr mwopp kad bh’am mou. 13Sherem w’u chaat kih gwakhapp-laar a mwooh mihh mwopp klihng pwoo khi Naan ni, bhi mwopp dhoghol lapp nyi sh’i rettyit weett, dhangg baah pwoo ni kad pee p’ee zhwal seen dhighin mwopp mou. Mwooh kihhsheh ni kihh pihhzeenn a p’ee pee lee kyekk. Mihh zheell taah bhi mwopp shikhir pal wakba. 14Sherem w’u chaat dhighin ghir a mwooh mwopp dhoghol klihng pwoo khi Naan ni weett, dhangg kaarooh mwopp kaah sokihkyeen kihh y’on, bhi v’ur annshik p’ee bii mhi yill mhize, kihh orr long, kihh v’ur klihngshangg mhi yill ni mett bhall khimwopp, harr baah mwopp nan putshiin mou. 15Dhangg sherem w’u chaat kih loonyill wu’rett a mwooh kihh klihng pwoo khi Naan ni bhi mwopp lapp dhen-en ru sh’i phitukhup w’u kihmeh, sh’i phitukhup wu’rett, harr mwopp g’ung sh’in dhakk’wurett.

Dlengwus kihh pee’dhen keera

Mar 4:21-25

16“Baah gwooh kihh byill dlengwus bhi krum kong dyikihh, kooh dhen der p’aal mou; kihh dhen nyi a kih pee’dhen keera, tihh mwooh kihh ja dhel diy dhighin luh ni mwopp naah peebhangg khinyi. ^c 17Baah mee’bii a w’u zihzok w’u dheng’pee mwopp p’ee wanggpee dyikihh mou. Yakhal baah mee’bii a w’u pihpaah w’u baah mwopp p’ee man nyi, kooh mwopp w’oo kihgaak mou. ^d 18Pee’mhinyi bhi wu lang kom wu rih-rett wu klihng bii w’u wunn phi klihng nyi se: koohweeh w’u kihh bii, bhi mwopp p’ee waa pihh pakk dyi nyi; gwooh noott bii, bhi kooh a bii w’u kihh naah le riy kihh nyi seh, bhi mwopp p’ee y’aa nyi lapp khinyi.” ^e

Nhikhin khi Jesu kihh em’nhikhin nyi

Mat 12:46-50; Mar 3:31-35

19Nhikhin khi Jesu kih em’nhikhin nyi mwopp ja p’ee naah nyi, dhang baah mwopp mak wull kuss kihh nyi mou, p’ee vurr dw’uu khi gurum ni mwopp. 20Bhi m’ee gurum satt nyi le, “Nhikhin keegha kihh em’nangg mwopp kihh dyarrang pwenn phigongg mwopp kihh t’ang naah gha ‘y.”

21Bhi Jesu pringg satt gurum ni mwopp weett le, “Mwooh kihh klihng pwoo khi Naan harr mwopp kyeer, bhi a mwopp a n’aah yakhal a mwopp a em’naa.”

Jesu dharr kihh vivirr

kihh ta’bbhal khi am

Mat 8:23-27; Mar 4:35-41

22Par’meeh shi bhi Jesu dhel dhighin kong’am kihh zheppkamm keeniy mwopp, bhi satt mwopp le, “Mu taah mu dum takhann yit’am wu’zeh.” Bhi mwopp y’aa mwaan dhighin kong’am ni. 23Kaarooh mwopp kaah mwaan kih am dhighin kong’am ni, bhi Jesu taah s’aam. M’ee vivirr kutt vlingpee sam kihdab Kur’am ni, harr am kihh t’ang gam kong’am ni, dheeh mwopp a arr ky’em.

24Bhi zheppkamm khinyi mwopp dum m’ii nyi, mwopp satt le, “Gwoohyon, Gwoohyon, munn p’ee ky’em e’h!”

Kaarooh Jesu m’ii, bhi tepbhelepp vivirr ni, kihh ta’bbhal khi am ni zag, bhi mwopp sam teer, pee dhok klokk. 25Bhi Jesu nang phi zheppkamm keeniy ni mwopp le, “Pihhzeenn keewu a nihyeh?”

Bhi sh’i kihkhirmuut kihh aa’pwoo, zheppkamm ni mwopp kihh nang phi shag le, “A wuyeh se kihhshe? Kihh gabbhelepp kutt mwopp kihh am, harr mwopp klihng nyi ‘y wunn’!”

Jesu bar m’ee guyirr

Mat 8:28-34; Mar 5:1-20

26Bhi Jesu mwopp kihh zheppkamm keeniy mwopp taahwull yill khi Gerasina ▼

▼Gerasina mwopp a gurum w’u mwopp kihh tong m’ee yill w’u mwopp kihh peet Gerasin.

mwopp, w’u yill khimwopp yit shag kihh yill Galili. 27Kaarooh Jesu sam kong’am ni taah k’aa pwoo’kihng, bhi m’ee gurum w’u dhighin tughuzyill ni, w’u kihh mumullung dhighin shin, ji dharr nyav kihkyeen Jesu. Phigyet diy bhi baah gwoh ni kihh lop looh dyi shin kooh tong tuluh mou, kihh tong a kih kihshirr.

28Kaarooh naah Jesu, bhi taah yill tekhem nyi, y’aa arrap wall kihh dhekheh niy bhall-bhall le, “A mihyeh kang munn kihh gha ayeh, Jesu L’aa khi Naan W’u Mettweett oou? Ih kihh so’kumbokk gha, tapp ghi ninnshiin a’n mou.” 29Gwoh ni satt kihhsheh a pee’rooh baa dyinn Jesu khi t’en gabbhelepp riin wu’bis ni le gw’ar put dhighin gwoh ni. P’ee yit dhirrihkk bhi riin ni mihh yakhal bhi k’aa kaah gwoh ni. Mwopp mhinyi mwopp shwaa dyan nyi, sarr kihh kwag, sh’i tenggshaghal, kihh as-shaghal, yakhal mwopp tong tapp nyi, weett kihhsheh, mihh yakhal bhi kihh kossok tenggshaghal ni mwopp, bhi riin wu’bis ni kihh pirryit nyi shen nyi lhidhel dum dh’em.

30Bhi Jesu nang phi nyi le, “Shumm gha a mihyeh?” Bhi gwoh ni lapp nyi le, “Shumm nah a Munn’dwuu ‘y.” (P’ee gyet dw’uu mumullung mwopp dhess dhel dhighin gwoh ni.) 31Bhi mumullung ni mwopp y’aa so’kumbokk Jesu matt tapp shen mwopp lhidum bleng’kwoo mou.

32M’ee dw’uu tughuzluh gyet mwopp tapp nhighin shi’bwut bwumm ni, bhi mumullung ni mwopp so’kumbokk Jesu tihh yet mwopp pwat diy dhel dhighin tughuzluh ni mwopp kyekk, bhi Jesu yetpee mwopp. 33Kaarooh mumullung ni mwopp pwat dhighin gwoh ni, mwopp dhel dhighin tughuzluh ni mwopp, bhi dw’uu tughuzluh ni mwopp pwoorrpee sam tu‘ru‘ru’ru sh’i m’ee z’or bwumm ni, mwopp sam rwa dhighin am’kur ni, mwopp ky’em rihh’wit!

34Kaarooh mhitapp tughuzluh ni mwopp naah bii mihhseh, bhi mwopp shwa reen, mwopp duam yakshiiy ni dhighin khishikhitt ni kihhsheh kihh kwangyill ni mwopp weett. 35Bhi gurum mwopp tuud pwat duam p’ee naah bii w’u yakhal seh. Kaarooh mwopp jawull kihpee Jesu diy, bhi mwopp kad gwooh mumullung mwopp pwat dhighin nyi seh kihh tong tekhem Jesu, kihh looh shin, yakhal kaah nyi baa’ji dihhreh, bhi bhaann chaat bwut mwopp. 36Mwooh dyinn mwopp naah bii ni kihh yit ru, mwopp yakshiiy arr w’u gwoh dyinn kihh mumullung dhighin shin seh kad bar diy gurum ni mwopp. 37Bhi kapp dw’uu gurum w’u koghobyill khi Gerasina ni mwopp dhang phi Jesu tihh dhel yet mwopp diy, p’ee khighiy shwat mwopp pwetd; bhi Jesu waa dhel dyi dhighin kong’am ni tihh waa’baa diy.

38Bhi gwoh mumullung mwopp pwat dhighin nyi seh so’kumbokk Jesu le riy kihh t’ang dumdang gw’ar. Dhangg Jesu dh’om mou, shenn nyi a kih arr w’aa, satt nyi le, 39“Waa ghi dum tuluh, dum ghi yakshiiy n’an bii w’u Daah Naan sh’in gha.” Bhi gwoh ni l’ang kihh arr w’aa, y’aa fwabhelepp kaah bii w’u Jesu sh’in riy koohneeh dhighin khishikhitt ni.

Pwookaah reep khi Jariyus kihh

mat nhi dheer teghem

Mat 9:18-26; Mar 5:21-43

40Kaarooh Jesu baa’taah, bhi dw’uu gurum mwopp kang nyi sh’i rettyit, p’ee dyinn mwopp weett kihh tong a tapp nyi. 41Bhi m’ee gurum w’u shumm nyi a Jariyus, w’u gyet nyi a m’ee gu’kihkyeen khi m’ee Luh’kang, tong ji. Bhi taah yill tekhem Jesu so’kumbokk nyi, tihh dum diy luh niy, 42p’ee laa’reep khinyi w’u gyet kihh byitt kaghapaad baa’vel, w’u gyet a nyi kyekk a l’aa khinyi, a gok biarr, dheeh kihh dhen a arr muutt.

Kaarooh Jesu arr dum, bhi dw’uu gurum w’u mwopp tuud yakhal dang nyi mwopp mokhos nyi pwetd. 43Bhi m’ee mat nhighin naar mwopp, w’u phigyet kihh zheell diy khi m’ee shw’al dheer teghem p’ee byitt kaghapaad baa’vel. Mat ni baa gyet t’u sarr rah kyes bhangg-bhangg kih mhiyen mwopp, dhangg baah m’ee mwopp mak bar nyi mou. 44Bhi mat ni byaah ji kihbwoon Jesu, ji bwum phi kleb bh’aar khinyi, bhi abet, dh’eer khi teghem ni dharr chikk.

45Bhi Jesu nang le, “A mee’wuyeh bwum a’n?”

Kaarooh koohweeh shiihshig bhi Bitrus satt nyi le, “Hah, Gwoohyon, dhok v’ur dw’uu gurum mwopp kaah mhitupp, mwopp mokhos gha dhen naar ru ‘y.” 46Weett kihhsheh bhi Jesu satt le, “M’ee gurum bwum a’n a ching, p’ee ih kad bhall mhi barr put sh’i san.”

47Dhangg kaarooh mat ni naah kad rah kihh arr zok bii w’u ra sh’in seh mihngg, bhi pun sat ji, shoopshik nyi kihh lapptam, ji taah yill tekhem Jesu, bhi yakshiiy bii w’u ra sh’in seh kihkyeen gurum mwopp weett, kihh bii w’u l’e tihh ra bwum Jesu, kihh kakhamm w’u ra kad abet. 48Bhi Jesu satt mat ni le, “Reep na, pihhzeenn keeyi bar yi; mwan yi arr mig choorr-choorr.”

49Kaarooh Jesu kudyi kaah laa’pwoo kihh mat mihhseh ni, bhi m’ee gurum tong luh Jariyus ji diy, bhi satt nyi le, “Ai’yaa, reep gha shi baa sihkhitt, kakkrooh ghi kihh daam’pee Gukamm dyi a mihyeh?”

50Kaarooh Jesu klihng kihhsheh bhi satt Jariyus le, “Tapp kihkhirmuut y’aa gha mou; wu’gha dei ghi pihhzeenn bhi reep gha ni p’ee bar.”

51Kaarooh Jesu ji’wull luh Jariyus, bhi baah yet tihh menguh wu’dyikk dhel diy luh dang niy mou, seeh a Bitrus mwopp kihh Yakub, kihh Yohanna, kihh puup khi laa’reep ni, kihhsheh kihh nhikhin khinyi kyekk. 52Gurum w’u luh Jariyus ni mwopp weett kaah wallmaab laa’reep ni. Bhi Jesu satt mwopp le, “Wu nook wall, laa’reep ni mih’muut mou, nyi a s’aam kyekk.”

53Bhi gurum ni mwopp sh’in shwar’zal Jesu, p’ee mwopp man le laa’reep ni baa mih’muut. 54Jesu y’aa sarr laa’reep ni bhi satt nyi le, “Reep na, yi yakhal!” 55Bhi riin laa’reep ni f’uk baa’ji, bhi abet, laa’reep ni yakhal dharr. Jesu satt mwopp le, “Wu pihh mee’bii nyi so.” 56Bii ni aa’phi puup khi reep ni kihh nhikhin khinyi harr nhikhin’teghem shwat mwopp pwetd, dhang Jesu delkom mwopp le, “Tapp wu satt bii mihhse menguh ‘y!”