2 Samuel 8
1ⲁⲩⲱ ⲙⲛⲛⲥⲁ ⲛⲉⲓϣⲁϫⲉ ⲇⲁⲩⲉⲓⲇ ⲁϥⲡⲁⲧⲁⲥⲥⲉ ⲛⲛⲁⲗⲗⲟⲫⲩⲗⲟⲥ ⲁϥϭⲟⲧⲡⲟⲩ ⲉⲃⲟⲗ ⲁⲩⲱ ⲇ︤ⲁ︦ⲇ︥ ⲁϥϫⲓ ⲛⲧⲡⲟⲗⲓⲥ ⲉⲧⲛⲏϩ ⲉⲃⲟⲗ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ 2ⲁⲩⲱ ⲇⲁⲩⲉⲓⲇ ⲁϥⲡⲁⲧⲁⲥⲥⲉ ⲙⲡⲕⲁϩ ⲙⲙⲱⲁⲃ ⲁϥϣⲓⲧⲟⲩ ϩⲛ ϩⲉⲛⲛⲟⲩϩ ⲉⲁϥⲣⲟⲕⲧⲟⲩ ⲉⲡⲕⲁϩ ⲁⲩⲱ ⲁϥϣⲓ ⲡⲉⲥⲕⲛⲟⲩϩ ⲥⲛⲁⲩ ⲉⲙⲟⲩⲟⲩⲧ ⲙⲙⲟⲟⲩ ⲡϫⲱⲕ ϫⲉ ⲙⲡⲉⲥⲕⲛⲟⲩϩ ⲁϥϥⲓⲧⲟⲩ ⲉϥⲟⲛϩ ⲁⲩⲱ ⲡⲗⲁⲟⲥ ⲙⲙⲱⲁⲃ ⲁϥϣⲱⲡⲉ ⲉⲩⲟ ⲛϩⲙϩⲁⲗ ⲛⲇⲁⲩⲉⲓⲇ ⲉⲩϫⲓⲧⲁⲓⲟ ⲛⲁϥ 3ⲇⲁⲩⲉⲓⲇ ⲇⲉ ⲟⲛ ⲁϥⲡⲁⲧⲁⲥⲥⲉ ⲛⲁⲇⲣⲁⲁⲍⲁⲣ ⲡϣⲏⲣⲉ ⲛⲣⲱⲁⲃ ⲡⲣⲣⲟ ⲛⲥⲟⲩⲃⲁ ⲉϥⲛⲁⲃⲱⲕ ⲉⲕⲧⲉⲧⲟⲟⲧϥ ⲉϫⲙ ⲡⲓⲉⲣⲟ ⲡⲉⲩⲫⲣⲁⲧⲏⲥ 4ⲁⲩⲱ ⲇⲁⲩⲉⲓⲇ ⲁϥϫⲓ ϩⲁⲣⲱϥ ⲙⲡⲉϥⲙⲏⲏϣⲉ ⲁϥϥⲓ ⲙⲙⲏⲧ ⲛϣⲉ ⲛϩⲁⲣⲙⲁ ⲛⲧⲟⲟⲧϥ ⲁⲩⲱ ⲥⲁϣϥ ⲛⲧⲃⲁ ⲛϩⲓⲡⲡⲉⲩⲥ ⲁⲩⲱ ⲧⲃⲁ ⲥⲛⲁⲩ ⲛⲣⲙⲣⲁⲧⲟⲩ ⲛϩⲁⲣⲙⲁ ⲇⲉ ⲧⲏⲣⲟⲩ ⲛⲇ︤ⲁ︦ⲇ︥ ⲁϥⲧⲁⲕⲟⲟⲩ ⲁϥⲕⲱ ⲇⲉ ⲛⲁϥ ⲛϣⲉ ⲛϩⲁⲣⲙⲁ ⲉⲃⲟⲗ ⲛϩⲏⲧⲟⲩ 5ⲁⲥⲉⲓ ⲇⲉ ⲛϭⲓ ⲧⲥⲩⲣⲓⲁ ⲛⲇⲁⲙⲁⲥⲕⲟⲥ ⲉⲃⲟⲉⲓⲑⲉⲓ ⲉⲁⲇⲣⲁⲁⲍⲁⲣ ⲡⲣⲣⲟ ⲛⲥⲟⲩⲃⲁ ⲁⲩⲱ ⲇ︤ⲁ︦ⲇ︥ ⲁϥⲡⲁⲧⲁⲥⲥⲉ ⲛⲧⲥⲩⲣⲓⲁ ⲛϫⲟⲩⲧⲥⲛⲟⲟⲩⲥ ⲛϣⲟ ⲛⲣⲱⲙⲉ 6ⲁⲩⲱ ⲇⲁⲩⲉⲓⲇ ⲁϥⲕⲱ ⲛϩⲉⲛⲡⲁⲣⲉⲙⲃⲟⲗⲏ ϩⲛ ⲧⲥⲩⲣⲓⲁ ⲛⲇⲁⲙⲁⲥⲕⲟⲥ ⲉⲧⲣⲉⲩⲣⲟⲉⲓⲥ ⲁⲩⲱ ⲧⲥⲩⲣⲓⲁ ⲁⲥⲣϩⲙϩⲁⲗ ⲛⲇ︤ⲁ︦ⲇ︥ ⲉⲩⲛⲧⲁⲓⲟ ⲛⲁϥ ⲁⲩⲱ ⲡϫⲟⲉⲓⲥ ⲁϥⲧⲟⲩϫⲉⲇ︤ⲁ︦ⲇ︥ ϩⲛ ⲛⲉⲙⲁ ⲛⲧⲁϥⲃⲱⲕ ⲉⲣⲟⲟⲩ 7ⲇⲁⲩⲉⲓⲇ ⲇⲉ ⲁϥϫⲓ ⲛⲛⲉⲭⲗⲓⲛⲟⲛ ⲏ ⲛⲉⲕⲗⲁⲗ ⲛⲛⲟⲩⲃ ⲛⲁⲓ ⲛⲧⲁⲩⲧⲁⲙⲓⲟⲟⲩ ⲛⲁⲩ ⲛϭⲓ ⲛϩⲙϩⲁⲗ ⲛⲁⲇⲣⲁⲁⲍⲁⲣ ⲡⲣⲣⲟ ⲛⲥⲟⲩⲃⲁ ⲁϥⲉⲛⲧⲟⲩ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ ⲁϥϫⲓⲧⲟⲩ ⲛϭⲓ ⲫⲁⲣⲁⲱ ⲡⲣⲣⲟ ⲛⲕⲏⲙⲉ ϩⲙ ⲡⲧⲣⲉϥⲉⲓ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ ϩⲛ ⲛⲉϩⲟⲟⲩ ⲛϩⲣⲟⲃⲟⲁⲙ ⲡϣⲏⲣⲉ ⲛⲥⲟⲗⲟⲙⲟⲛ 8ⲁⲩⲱ ⲇ︤ⲁ︦ⲇ︥ ⲁϥϫⲓ ⲉⲃⲟⲗ ϩⲛ ⲛⲉⲙⲁⲥⲃⲁⲕ ⲉⲃⲟⲗ ϩⲛ ⲛⲉⲡⲟⲗⲓⲥ ⲉⲧⲥⲟⲧⲡ ⲛⲧⲉ ⲁⲇⲣⲁⲁⲍⲁⲣ ⲛⲟⲩϩⲟⲙⲛⲧ ⲉⲛⲁϣⲱϥ ⲉⲙⲁⲧⲉ ⲛⲧⲁⲥⲟⲗⲟⲙⲟⲛ ⲧⲁⲙⲓⲟ ⲛϩⲏⲧϥ ⲛⲧⲉⲑⲁⲗⲁⲥⲥⲁ ⲛϩⲟⲙⲛⲧ ⲙⲛ ⲛⲉⲥⲧⲩⲗⲗⲟⲥ ⲁⲩⲱ ⲛⲗⲟⲩⲧⲏⲣ ⲙⲛ ⲛⲉⲥⲕⲉⲩⲏ ⲧⲏⲣⲟⲩ 9ⲁⲩⲱ ⲁϥⲥⲱⲧⲙ ⲛϭⲓ ⲑⲟⲟⲩ ⲡⲣⲣⲟ ⲛⲉⲙⲁⲑ ϫⲉ ⲁⲇ︤ⲁ︦ⲇ︥ ⲡⲁⲧⲁⲥⲥⲉ ⲛⲧϭⲟⲙ ⲧⲏⲣⲥ ⲛⲁⲇⲣⲁⲁⲍⲁⲣ 10ⲁⲑⲟⲟⲩ ϫⲟⲟⲩ ⲛⲓⲉⲍⲟⲩⲣⲁⲛ ⲡⲉϥϣⲏⲣⲉ ⲉⲣⲁⲧϥ ⲙⲡⲣⲣⲟ ⲇⲁⲩⲉⲓⲇ ⲉⲥⲉⲡⲥⲱⲡϥ ⲉⲩⲉⲓⲣⲏⲛⲏ ⲁⲩⲱ ⲉⲥⲙⲟⲩ ⲉⲣⲟϥ ϫⲉ ⲁϥⲡⲁⲧⲁⲥⲥⲉ ⲛⲁⲇⲣⲁⲁⲍⲁⲣ ⲉⲃⲟⲗ ϫⲉ ⲛⲉⲣⲉⲑⲟⲟⲩ ⲡⲟⲗⲉⲙⲓ ⲙⲛ ⲁⲇⲣⲁⲁⲍⲁⲣ ⲁⲩⲱ ⲛⲉⲩⲉⲛⲧⲟⲟⲧϥ ⲛϭⲓ ϩⲉⲛⲥⲕⲉⲩⲏ ⲛϩⲁⲧ ⲙⲛ ϩⲉⲛⲥⲕⲉⲩⲏ ⲛⲛⲟⲩⲃ ⲙⲛ ϩⲉⲛⲥⲕⲉⲩⲏ ⲛϩⲟⲙⲛⲧ 11ⲛⲉⲛⲕⲟⲟⲩⲉ ⲁⲡⲣⲣⲟ ⲇ︤ⲁ︦ⲇ︥ ⲧⲃⲃⲟⲟⲩ ⲁϥⲉⲣⲏⲧ ⲙⲙⲟⲟⲩ ⲙⲡϫⲟⲉⲓⲥ ⲙⲛ ⲡϩⲁⲧ ⲙⲛ ⲡⲛⲟⲩⲃ ⲡⲁⲓ ⲛⲧⲁϥⲧⲃⲃⲟϥ ⲉⲃⲟⲗ ϩⲛ ⲛⲉⲡⲟⲗⲓⲥ ⲧⲏⲣⲟⲩ ⲛⲧⲁϥϭⲙϭⲟⲙ ⲉϩⲣⲁⲓ ⲉϫⲱⲟⲩ 12ⲉⲃⲟⲗ ϩⲛ ϯⲇⲟⲩⲙⲁⲓⲁ ⲁⲩⲱ ⲉⲃⲟⲗ ϩⲙ ⲙⲱⲁⲃ ⲁⲩⲱ ⲉⲃⲟⲗ ϩⲛ ⲛⲉϣⲏⲣⲉ ⲛⲁⲙⲙⲱⲛ ⲁⲩⲱ ⲉⲃⲟⲗ ϩⲙ ⲡⲁⲙⲁⲗⲏⲕ ⲁⲩⲱ ⲉⲃⲟⲗ ϩⲛ ⲛⲉϣⲟⲗⲥ ⲛⲁⲇⲣⲁⲁⲍⲁⲣ ⲡϣⲏⲣⲉ ⲛϩⲣⲁⲁⲃ ⲡⲣⲣⲟ ⲛⲥⲁⲃⲁ 13ⲇⲁⲩⲉⲓⲇ ⲇⲉ ⲁϥⲥⲙⲓⲛⲉ ⲛⲁϥ ⲛⲟⲩⲣⲁⲛ ⲛⲥⲟⲉⲓⲧ ⲁⲩⲱ ⲛⲧⲉⲣⲉϥⲕⲧⲟϥ ⲁϥⲡⲁⲧⲁⲥⲥⲉ ⲛϯⲇⲟⲩⲙⲁⲓⲁ ϩⲙ ⲡⲓⲁ ⲛⲛⲉϩⲙⲟⲩ ⲙⲙⲛⲧϣⲙⲏⲛ ⲛϣⲟ ⲛⲣⲱⲙⲉ 14ⲁⲩⲱ ⲁϥⲕⲱ ⲛϩⲉⲛⲣⲉϥⲣⲟⲉⲓⲥ ϩⲛ ϯⲇⲟⲩⲙⲁⲓⲁ ⲧⲏⲣⲥ ⲁⲩⲱ ⲛⲓⲇⲟⲩⲙⲁⲓⲟⲥ ⲧⲏⲣⲟⲩ ⲁⲩⲣϩⲙϩⲁⲗ ⲙⲡⲣⲣⲟ ⲁⲩⲱ ⲁⲡϫⲟⲉⲓⲥ ⲧⲟⲩϫⲉⲇⲁⲩⲉⲓⲇ ϩⲛ ⲛⲙⲁ ⲧⲏⲣⲟⲩ ⲛⲧⲁϥⲃⲱⲕ ⲉⲣⲟⲟⲩ 15ⲁⲩⲱ ⲁϥⲧⲣⲉⲇ︤ⲁ︦ⲇ︥ ⲉⲣⲣⲟ ⲉϫⲙ ⲡⲓ︤ⲏ︦ⲗ︥ ⲧⲏⲣϥ ⲇ︤ⲁ︦ⲇ︥ ⲇⲉ ⲛⲉϥⲉⲓⲣⲉ ⲛⲟⲩⲕⲣⲓⲙⲁ ⲙⲛ ⲟⲩⲇⲓⲕⲁⲓⲟⲥⲩⲛⲏ ϩⲙ ⲡⲉϥⲗⲁⲟⲥ ⲧⲏⲣϥ 16ⲁⲩⲱ ⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲉⲓⲁ ⲛⲉϥϣⲟⲟⲡ ⲉϫⲙ ⲡⲉϥⲙⲏⲏϣⲉ ⲁⲩⲱ ⲓⲱⲥⲁⲫⲁⲧ ⲡϣⲏⲣⲉ ⲛⲁⲭⲓⲁ ⲛⲧⲟϥ ⲡⲉ ⲉϥⲧⲣⲉⲡⲣⲣⲟ ⲉⲣⲡⲙⲉⲉⲩⲉ 17ⲥⲁⲇⲇⲟⲩⲕ ⲇⲉ ⲡϣⲏⲣⲉ ⲛⲁⲭⲓⲧⲱⲃ ⲁⲩⲱ ⲁⲃⲓⲙⲉⲗⲉⲭ ⲡϣⲏⲣⲉ ⲛⲁⲃⲓⲁⲑⲁⲣ ⲛⲧⲟⲟⲩ ⲛⲉⲧⲟ ⲛⲟⲩⲏⲏⲃ ⲁⲩⲱ ⲁⲥⲁ ⲛⲧⲟϥ ⲡⲉⲧⲟ ⲛⲅⲣⲁⲙⲙⲁⲧⲉⲩⲥ 18ⲁⲩⲱ ⲃⲁⲛⲁⲓⲁⲥ ⲡϣⲏⲣⲉ ⲛⲓⲱⲇⲁⲉ ⲛⲧⲟϥ ⲡⲉⲧⲟ ⲛⲥⲩⲙⲃⲟⲗⲟⲥ ⲡⲉⲭⲉⲗⲉⲑⲑⲓ ⲇⲉ ⲙⲛ ⲡⲉⲫⲉⲗⲉⲧⲧⲓ ⲛϣⲏⲣⲉ ⲛⲇ︤ⲁ︦ⲇ︥ ⲛⲧⲟⲟⲩ ⲛⲉ ⲛⲉⲁⲣⲭⲱⲛ ⲛⲧⲁⲩⲗⲏ ⲙⲡⲣⲣⲟ
Copyright information for
CopSahBible2