Ecclesiastes 8
1ⲧⲥⲟⲫⲓⲁ ⲙⲡⲣⲱⲙⲉ ⲛⲁⲧⲣⲉ ⲡⲉϥϩⲟ ⲣ ⲟⲩⲟⲉⲓⲛ ⲁⲩⲱ ⲡⲉⲧⲟ ⲛⲁⲧϣⲓⲡⲉ ϩⲓ ϩⲣⲁϥ ⲥⲉⲛⲁⲙⲉⲥⲧⲱϥ 2ⲧⲧⲁⲡⲣⲟ ⲙⲡⲣⲣⲟ ϯϩⲧⲏⲕ ⲉⲣⲟⲥ ⲁⲩⲱ ⲙⲡⲣϭⲉⲡⲉ ⲉⲧⲃⲉ ⲟⲩϣⲁϫⲉ ⲛⲣⲁⲛⲁϣ ⲙⲡⲛⲟⲩⲧⲉ 3ⲛⲅⲛⲁⲙⲟⲟϣⲉ ⲅⲁⲣ ϩⲓ ϩⲓⲏ ⲙⲙⲟⲕ ⲙⲡⲣⲁϩⲉ ϭⲉ ⲉⲣⲁⲧⲕ ϩⲛ ⲟⲩϣⲁϫⲉ ⲉϥϩⲟⲟⲩ 4ⲛⲧϩⲉ ⲛⲟⲩⲣⲣⲟ ⲉⲩⲛⲧϥ ⲧⲉⲝⲟⲩⲥⲓⲁ ⲁⲩⲱ ⲛⲓⲙ ⲡⲉⲧⲛⲁϫⲟⲟⲥ ⲛⲁϥ ϫⲉ ⲟⲩ ⲡⲉⲧⲉⲕⲛⲁⲁϥ 5ⲡⲉⲧⲛⲁϩⲁⲣⲉϩ ⲉⲧⲉⲛⲧⲟⲗⲏ ⲛϥⲛⲁⲉⲓⲙⲉ ⲟⲛ ⲉⲩϣⲁϫⲉ ⲙⲡⲟⲛⲏⲣⲟⲛ ⲁⲩⲱ ⲡⲉⲟⲩⲟⲉⲓϣ ⲙⲡϩⲁⲡ ⲡϩⲏⲧ ⲙⲡⲥⲟⲫⲟⲥ ⲛⲁⲉⲓⲙⲉ ⲉⲣⲟϥ 6ϫⲉ ϩⲱⲃ ⲛⲓⲙ ⲟⲩⲛⲧⲟⲩ ⲡⲉⲩⲟⲩⲟⲉⲓϣ ⲙⲙⲁⲩ ⲙⲛ ⲧⲉⲕⲣⲓⲥⲓⲥ ϫⲉ ⲡⲥⲟⲟⲩⲛ ⲙⲡⲣⲱⲙⲉ ⲛⲁϣⲱϥ ⲉϩⲣⲁⲓ ⲉϫⲱϥ 7ϫⲉ ⲙⲛⲡⲉⲧⲉⲓⲙⲉ ϫⲉ ⲟⲩ ⲡⲉⲧⲛⲁϣⲱⲡⲉ ⲁⲩⲱ ⲕⲁⲧⲁ ⲧϩⲉ ⲉⲧⲉϥⲛⲁϣⲱⲡⲉ ⲛⲓⲙ ⲡⲉⲧⲛⲁⲧⲁⲙⲟϥ 8ⲙⲛⲣⲱⲙⲉ ⲉϥⲟ ⲛⲧⲉⲝⲟⲩⲥⲓⲁ ⲙⲡⲉⲡⲛⲉⲩⲙⲁ ⲉⲧⲣⲉϥⲕⲱⲗⲩ ⲙⲡⲉⲡⲛⲉⲩⲙⲁ ⲁⲩⲱ ⲙⲛⲡⲉⲧⲟ ⲛⲉⲝⲟⲩⲥⲓⲁ ϩⲙ ⲡⲉϩⲟⲟⲩ ⲙⲡⲙⲟⲩ ⲁⲩⲱ ⲙⲛⲕⲱ ⲉⲃⲟⲗ ϩⲙ ⲡⲉϩⲟⲟⲩ ⲙⲡⲡⲟⲗⲩⲙⲟⲥ ⲁⲩⲱ ⲧⲙⲛⲧϣⲁϥⲧⲉ ⲛⲥⲛⲁⲛⲟⲩϩⲙ ⲁⲛ ⲙⲡⲉⲧⲏⲡ ⲉⲣⲟⲥ 9ⲁⲩⲱ ⲡⲁⲓ ⲧⲏⲣϥ ⲁⲓⲛⲁⲩ ⲉⲣⲟϥ ⲁⲩⲱ ⲁⲓϯ ⲙⲡⲁϩⲏⲧ ⲉⲡⲧⲁⲙⲓⲟ ⲧⲏⲣϥ ⲛⲉⲛⲧⲁⲩⲧⲁⲙⲓⲟⲟⲩ ϩⲁⲣⲟϥ ⲙⲡⲣⲏ ⲛⲉⲛⲧⲁⲡⲣⲱⲙⲉ ϫⲓ ⲉⲝⲟⲩⲥⲓⲁ ⲛϩⲏⲧⲟⲩ ϩⲙ ⲡⲣⲱⲙⲉ ⲉⲧϩⲙⲕⲟϥ 10ⲁⲩⲱ ⲧⲟⲧⲉ ⲁⲓⲛⲁⲩ ⲉⲛⲁⲥⲉⲃⲏⲥ ⲉⲁⲩϫⲓⲧⲟⲩ ⲉϩⲟⲩⲛ ⲉⲡⲧⲁⲫⲟⲥ ⲁⲩⲱ ⲁⲩⲉⲓ ⲉⲃⲟⲗ ϩⲙ ⲡⲙⲁ ⲉⲧⲟⲩⲁⲁⲃ ⲁⲩⲧⲙⲁⲉⲓⲟⲟⲩ ϩⲛ ⲧⲡⲟⲗⲓⲥ ⲧⲁⲓ ⲧⲉ ⲧϩⲉ ⲛⲧⲁⲩⲁⲁⲥ ⲡⲁⲓ ϭⲉ ⲟⲩⲡⲉⲧϣⲟⲩⲉⲓⲧ ⲡⲉ 11ϫⲉ ⲙⲛϣⲁϫⲉ ⲉϥⲛⲁϯ ⲛϩⲏⲧϥ ⲛⲧⲟⲟⲧⲟⲩ ⲛⲛⲉⲧⲉⲓⲣⲉ ⲧⲁⲭⲏ ⲙⲡⲡⲟⲛⲉⲣⲟⲛ ⲉⲧⲃⲉ ⲡⲁⲓ ⲁⲡϩⲏⲧ ⲛⲛϣⲏⲣⲉ ⲛⲛⲣⲱⲙⲉ ⲧⲱⲧ ⲉⲣⲟⲟⲩ ⲉⲧⲣⲉⲩⲉⲓⲣⲉ ϩⲣⲁⲓ ⲛϩⲏⲧⲟⲩ ⲙⲡⲡⲟⲛⲏⲣⲟⲛ 12ⲡⲉⲛⲧⲁϥⲣⲛⲟⲃⲉ ⲁϥⲉⲓⲣⲉ ⲙⲡⲡⲟⲛⲏⲣⲟⲛ ϫⲓⲛ ⲛϣⲟⲣⲡ ⲁⲩⲱ ϣⲁ ⲧⲉⲩϩⲁⲏ ⲁⲩⲱ ϯⲥⲟⲟⲩⲛ ⲁⲛⲟⲕ ϫⲉ ⲟⲩⲛⲁⲅⲁⲑⲟⲛ ⲛⲁϣⲱⲡⲉ ⲛⲛⲉⲧⲟ ⲛϩⲟⲧⲉ ϩⲏⲧϥ ⲙⲡⲛⲟⲩⲧⲉ ϫⲉⲕⲁⲥ ⲉⲩⲣϩⲟⲧⲉ ϩⲁ ⲧⲉϥϩⲓⲏ 13ⲙⲛⲁⲅⲁⲑⲟⲛ ⲇⲉ ⲛⲁϣⲱⲡⲉ ⲙⲡⲁⲥⲉⲃⲏⲥ ⲁⲩⲱ ⲛϥⲧⲁϣⲉ ⲛⲉϥϩⲟⲟⲩ ⲁⲛ ϩⲁ ⲧϩⲁⲓⲃⲉⲥ ⲛϭⲓ ⲡⲉⲧⲉⲛϥⲟ ⲛϩⲁⲧ ⲁⲛ ϩⲏⲧϥ ⲙⲡⲛⲟⲩⲧⲉ 14ⲟⲩⲛ ⲟⲩⲡⲉⲧϣⲟⲩⲉⲓⲧ ⲉⲁⲩⲁⲁⲥ ⲉⲃⲟⲗ ϩⲙ ⲡⲕⲁϩ ϫⲉ ⲟⲩⲛϩⲉⲛⲇⲓⲕⲁⲓⲟⲥ ⲛⲁⲓ ⲉϥⲛⲁⲧⲁϩⲟⲟⲩ ⲛϭⲓ ⲡϩⲱⲃ ⲙⲡⲁⲥⲉⲃⲏⲥ ⲁⲩⲱ ⲟⲩⲛϩⲉⲛⲁⲥⲉⲃⲏⲥ ϩⲱⲟⲩ ⲉϥⲛⲁⲧⲁϩⲟⲟⲩ ⲛϭⲓ ⲡϩⲱⲃ ⲛⲛⲇⲓⲕⲁⲓⲟⲥ ⲁⲩⲱ ⲁⲓϫⲟⲟⲥ ϫⲉ ⲡⲉⲓⲕⲉ ⲟⲩⲡⲉⲧϣⲟⲩⲉⲓⲧ ⲡⲉ 15ⲁⲩⲱ ⲁⲛⲟⲕ ⲁⲓⲧⲙⲁⲉⲓⲉ ⲡⲛⲟⲩⲃ ⲁⲩⲱ ⲙⲛⲁⲅⲁⲑⲟⲛ ϣⲟⲟⲡ ⲙⲡⲣⲱⲙⲉ ϩⲁⲣⲟϥ ⲙⲡⲣⲏ ⲛⲥⲁ ⲟⲩⲱⲙ ϩⲓ ⲥⲱ ϩⲓ ⲉⲩⲫⲣⲁⲛⲉ ⲉⲡⲁⲓ ⲡⲉⲧⲛⲁϣⲱⲡⲉ ⲛⲁϥ ϩⲙ ⲡⲉϥϩⲓⲥⲉ ϩⲛ ⲛⲉϩⲟⲟⲩ ⲙⲡⲉϥⲱⲛϩ ⲛⲁⲓ ⲛⲧⲁⲡⲛⲟⲩⲧⲉ ⲧⲁⲁⲩ ⲛⲁϥ ϩⲁⲣⲟϥ ⲙⲡⲣⲏ 16ϩⲛ ⲛⲁⲓ ⲁⲓϯ ⲙⲡⲁϩⲏⲧ ⲉⲧⲥⲟⲫⲓⲁ ⲁⲩⲱ ⲉⲛⲁⲩ ⲉⲡⲡⲉⲣⲓⲥⲡⲁⲥⲙⲟⲥ ⲛⲧⲁϥϣⲱⲡⲉ ϩⲓϫⲙ ⲡⲕⲁϩ ϫⲉ ϩⲙ ⲡⲉϩⲟⲟⲩ ⲁⲩⲱ ϩⲛ ⲧⲕⲉⲟⲩϣⲏ ⲉⲛϥⲛⲁⲛⲁⲩ ⲁⲛ ⲉϩⲓⲛⲏⲃ ϩⲛ ⲛⲉϥⲃⲁⲗ 17ⲁⲩⲱ ⲁⲓⲛⲁⲩ ⲉⲛⲧⲁⲙⲓⲟ ⲧⲏⲣⲟⲩ ⲙⲡⲛⲟⲩⲧⲉ ⲁⲩⲱ ⲙⲡⲣⲱⲙⲉ ⲛⲁϣϩⲉ ⲁⲛ ⲉⲡⲧⲁⲙⲓⲟ ⲛⲧⲁϥϣⲱⲡⲉ ϩⲁⲣⲟϥ ⲙⲡⲣⲏ ⲉⲣϣⲁⲛⲡⲣⲱⲙⲉ ϩⲁⲥⲧϥ ⲉϥϣⲓⲛⲉ ⲛϥⲛⲁϭⲓⲛⲉ ⲁⲛ ⲁⲩⲱ ⲛⲉⲧⲉⲣⲉⲡⲥⲟⲫⲟⲥ ⲛⲁϫⲟⲟⲩ ⲉⲥⲟⲩⲱⲛⲟⲩ ⲛϥⲛⲁϣϩⲉ ⲉⲣⲟⲟⲩ ⲁⲛ ϫⲉ ⲡⲁⲓ ⲧⲏⲣϥ ⲁⲓⲧⲁⲁϥ ⲉϩⲣⲁⲓ ⲉⲡⲁϩⲏⲧ ⲁⲩⲱ ⲁⲡⲁϩⲏⲧ ⲛⲁⲩ ⲉⲡⲁⲓ ⲧⲏⲣϥ
Copyright information for
CopSahBible2