Rev 18 | DAD | STEP | Anĩ bure fele di, aya engel taka saa ilunem isi mog, ailen. Ĩ megeir odug ado, age fe di, yogon fula fiya medeĩya anim teneub lalan len.

‏ Revelation of John 18

Babilon Narĩ Fen

1 Anĩ bure fele di, aya engel taka saa ilunem isi mog, ailen. Ĩ megeir odug ado, age fe di, yogon fula fiya medeĩya anim teneub lalan len. 2 Ĩ ait odugem, totol bagai iweig iron:

“Kubũ yen! Babilon Odug kubũ yen!
Ĩ, kaa sesen neid fõ,
kaa sesen ganan neid fõ ado,
ninã amuyẽ ado ninir sane to ile oroya ganan neid fõ falei fen.
3 Teneub ganan,
yogon seseirã tobonunã nẽ wain totol don.
Tenebur nẽ king, ĩ geid seseirã tobonunã dinon,
age fe di, tenebur nẽ bisnis tamo idi, yogon safina nigin oroya totol ado bunem, safina musei dalen.”
4 Anĩ bure fele di, aya ait taka saa ilunem eig ye mog, karĩ aun:

“Neu tamo kayau, ã yogon mosor anĩ utin to walogouf nigin ado,
ã in mala solo sane taka to walogouf nigin,
ã ĩ utornẽg fen, usig,
5 ere nigin, yogon mosor mogo mudu ilun isel saa ilune di,
Negur yogon idododin nigin weder fokõ yen.
6 Ĩ ifenein kilei abag wenẽgouf,
ereb ĩ age fen are, ĩ age fen anĩ ado, taka teten unog fen, wenẽgouf.
Ereb ĩ yogon kap bun falei fen are, ĩ falei fen anĩ ado, taka falei ge fen, teten unogouf.
7 Ĩ fula fiya medeĩya ado safina meli meli, yogo nigin yalen kilei,
darau ado wau gudũ fiya fatuk bagai wenẽgouf.
Ĩ yogon wau bun, yogo yana yales fen,
‘Aya kuin abodok, aya waab sã,
agef fen, aya to bagai wau gudũ fouf,’ yen.
8 Anĩ nigin, naa taka bun, in daũ fiyẽya nẽ sesen ĩ bun isiyouf,
are laa, wau gudũ fiya ado, kadir.
Agef fen, ĩ yã bun isaikalauf,
ere nigin, Odug Negur ĩ es fiyek, ĩ anĩ megeir barikã.
9 “Tenebur nẽ king idi, ĩ geid seseirã tobonunã dino fen, yogon safina meli meli foi difen anidi, ĩ isaĩ di, kaau dile fen, idi ĩ nigin waud gudũf fen, inã logurouf. 10 Idi in darau yaleya anĩ nigin fatuk bagai kumĩ de fen, gerõ difar fen, dirõf:

“‘Malalon! Malalon, O taun odug,
O Babilon, taun megeir ado!
Aua tekelei bun, ogon daũ fiya mogo isin!’
11 “Tenebur nẽ bisnis tamo idi ĩ nigin waud gudũf fen, inã logurouf, ere nigin, taka nem idi neid safina baban to na yalouf, 12 safina are, gol, silwa, meein meli meli ado, maaĩ tuwa meli bagai pel; gabar lalau medeĩya, gabar giriya tu releya medeĩya, gabar slika ado, gabar giriya bagai; aa meli meli fire fire; ereb ereb fire fire elefan karat nem, aa meli meli nem, bras nem, ain nem ado, mambol nem dinodin; 13 sinamon, ye, aa gaula sumeĩ nigin tõ fiyadig, moul aa bun tamal sumeĩ biya biya ado, moul biya takag; wain ado oliv moul; flawa ado wit, bulmakau ado sipsip; hos ado karis, ferfer ado tamo mata dibodok.

14 “Idi dirõf, ‘Ereb ereb yaleya nigin õ oroyon are, mogo sa kelen. Ogon safina musei ado ereb ereb fula fiya medeĩya ganan, mogo sa kelen, idi baban to bagai fotou difouf.’ 15 Bisnis tamo safina eneidi na sur dife fen, ĩ bunem safina musei dalen anidi, yogon darau nigin fatuk bagai kumĩ de fen, gerõ difarauf. Idi inã logur fen, waud gudũf fen, 16 diweig dirõf:

“‘Malalon! Malalon, O taun odug,
kolos lalau meli bagai, giriya tu releya medeĩya ado, giriya bagai ifoun ken,
gol, meein meli bagai ado, maaĩ tuwa meli bagai pel naki yen!
17 Aua tekelei bun dogol, safina odug bagai age fiya daũ felen!’
“Maaĩ bun ulum irouya tamo ganan, idi waag bun diyõdig ganan ado, idi maaĩ bunem dogo neid mata ibodõya nẽ safina daledig anidi ganan, gerõ bagai difarauf. 18 Sain idi ĩ isaĩ di, kaau dile fen, idi diweig dirõf, ‘Taun odug eig fiya taka tau ibodon?’ 19 Idi aas mudureid bun digu ken, waud gudũ fe di, inã logur fen, diweig dirõf:

“‘Malalon! Malalon, O taun odug,
an idi maaĩ bun waag adon ganan,
yogon safina odug bunem safina musei dalen!
Aua tekelei bun, are daũ felen!
20 O saa ilun, ĩ nigin waũ kulĩ ye!
Negur nẽ tamo kayau, aposel ado, profet, wauĩ kulĩg!
Ĩ ã age yein kilei, Negur ĩ es fiyen.’”
21 Age ye fen, engel megeir ado, meein odug wit itutuya nẽ age fiya, yale fen, maaĩwõ ira ken, iron:

“Waila sane eig fiya bunem,
Babilon taun odug agef daũ fe di,
baban to bagai dilouf.
22 Harp kodẽya tamo, seg tamo, kelel fĩya tamo ado, taur fũya tamo,
idi neid ailõ õ bun baban to bagai karĩ douf.
Kabĩ fire fire ganan nẽ keleĩ tamo,
õ bun baban taka to bagai wõ youf.
Wit itutuya nẽ meein ait,
õ bun baban to bagai karĩ douf.
23 Lam nẽ lalan õ bun baban to bagai so fouf.
Tamo kayau yalef yalef yeya ait,
õ bun baban to bagai wõ youf.
Ogon bisnis tamo idi, teneub ganan nẽ tamo odug.
Õ ogon idegẽya kosẽ bunem, teneub ganan udegnẽdin.
24 Profet, Negur nẽ tamo kayau ado,
tenebur ein didenkesin anidi ganan neid naudeid, ĩ bun dilen.”