Rev 19 | DAD | STEP | Anĩ bure fele di, aya saa ilun tamo kayau guru fiya mala odug neid aiteid gou reya gen, karĩ aun: “Halleluya! Kel gei fiya, fula fiya medeĩya ado, megeir are, neda Negur nẽ.

‏ Revelation of John 19

Halleluya!

1 Anĩ bure fele di, aya saa ilun tamo kayau guru fiya mala odug neid aiteid gou reya gen, karĩ aun:

“Halleluya!
Kel gei fiya, fula fiya medeĩya ado, megeir are, neda Negur nẽ.
2 Yogon es fiya are, momoi fen madur bagai.
Ĩ kayau bouwa na sur fedig odug,
ĩ yogon seseirã tobonunã bunem teneub daũ fen anĩ, es fiyen.
Ĩ yogon ferfer neid naudeid, anĩ mala solo ĩ bun ifenen.”
3 Idi baban diweig diron:

“Halleluya!
Ĩ bunem kaau faimud gai gai iselauf.”
4 Mudur adodo tuwenti-fo ado, ereb mata ibodõya aiwa adodo, kuku de fen, Negur king nẽ sia bun ibodon anĩ yana dalesen. Age de fen, idi diweig diron:

“Momoi, Halleluya!”
5 Age dife di, ait taka, king nẽ sia bunem wõ ye fen, iron:

“Ã in ferfer ganan,
ĩ anini wiyẽgedig,
nanaal ado odudug,
neda Negur yana waleseg!”
6 Age ye di, aya guru fiya mala odug aiteid gen karĩ aun, are naan fatuk wĩ ye fen, gou redig gen ado, kolimei gudũya odug gen, diweig dirõ mog, karĩ aun:

“Halleluya!
Ere nigin, neda Odug Negur saa ilun nẽ kusĩ tamo guri feid uyu iroudig anĩ, ĩ lo fiya nigin king ibodok.
7 Ada wauda kulĩ ye, wauda al fe fen,
fula fiya medeĩya tafenẽf!
Ere nigin, Sipsip Naal kayau yaleya nẽ naa mogo isin,
age fe di, yogon kayau mois mogo yogo nigin dodok fen.
8 Kolos lalau meli bagai, medeĩya ado filiya,
ĩ ifonũf nigin ifenen.”
(Kolos lalau meli bagai are, Negur nẽ tamo kayau neid tobonuneid madur anĩ.)

9 Anĩ bure fele di, engel aya irokanan, “Utot: ‘Idi Sipsip Naal kayau mois ado bagu fiya nẽ sifa bun ibodõya nigin iweignẽdin are, idi el fedif!’” Age ye fen, ĩ tobol fe iron, “Enei are, Negur nẽ od momoi bagai.”

10 Age fe di, aya ĩ yana alesauf nigin, ye gariyan kubũ aun. Anĩ ere, ĩ aya irokanan, “To ago! Aya, õ ado, ogon turã tar idi Jesus nẽ wogõya kafĩ difel dirouf anidi geid, ada in ferfer. Negur yana wales! Ere nigin, Jesus nigin wogõya are, profet od wogõya nẽ uur anĩ.”

Tamo Hos Lalau Teten Ibodon

11 Aya saa ilun kã feleya ifar mog, aya wageun an hos lalau ifar mog, ailen. Tamo anĩ teten ibodon are, yana ‘Feseya Sã Dõ Fiya Biya’ ado ‘Momoi Bagai’ dedig. Madur bagai bunem, ĩ es feid fen, kusĩ yedig. 12 Yogon mala are, yã mala fitotoleya gen, agef fen, yogon mudur bun teter musei biya. Ĩ yogo bun yana itotoya taka ado, are aibem taka to keleĩ, ĩ yogo dogol. 13 Ĩ kolos meluk naud bun nu fen anĩ ifonun. Yogon yana are, Negur nẽ Od. 14 Saa ilun nẽ kusĩ tamo, idi hos lalau tetedin dibodada ken, kolos meli bagai, lalau filiya difoun ken, ĩ dõ difiyen. 15 Ĩ yogon awa bunem, dimig waila ado, teneub ganan yũf nigin wõ yen. “Ĩ ain manig nem ulum iroukenẽdiyouf.” ^{▼▼19:15Sam 2:9} Ĩ, Negur saa ilun nẽ kusĩ tamo guri feid uyu iroudig anĩ nẽ didi totol nẽ wain asi fiya modoũ bun, asi fouf. 16 Ĩ, yogon kolos meluk bun ado yogon tukuri bun, yana enei itotoya ibodok:

KING NEID KING ADO ODUG NEID ODUG.

17 Age afe fen, aya engel taka gaa bun ifar mog, ailen, ĩ ait odugem ninã ganan ilun fatutu def anidi iweig irokenẽdin, “Usig, Negur nẽ sifa odug bun gurug, 18 agog fen, ã, king bouweid, kusĩ mudur bouweid, tamo megeir adodo neid bouweid, hos ado hos tetedin dibodadak anidi neid bouweid, tamo kayau ganan, kafĩ fiya sã tamo ado ferfer, nanaal ado odudug, bouweid wãgauf.”

19 Anĩ bure fele di, aya, gaar kuĩ, tenebur nẽ king ado, dogo neid kusĩ tamo idi, tamo hos teten ibodon anĩ, yogon kusĩ tamo geid weim kusĩ douf nigin, guru de mog, ailedin. 20 Anĩ ere, gaar kuĩ are dale diroun, age de fen, idegẽya profet, ĩ memelik nẽ uris gaar kuĩ mala bun inodin anĩg, gaar kuĩ ado dale diroun. Uris anidi bunem, ĩ, idi gaar kuĩ nẽ uris dalen anidi ado, idi yogon malakanon yana dalesedig anidi idegnẽdin. Idi urom mata dibod mog, ku kolili fiya meein salfa yã bobo reya barikã ado bun, gei de diraran. 21 Dogo neid kusĩ tamo ganan, dimig, tamo hos teten ibodon awa bunem wõ yen anim, idenkesin, age fe di, ninã ganan idi neid bouweid dõ dõ, teid isokosen.