Rev 5 | DAD | STEP | Age de di, aya ĩ king nẽ sia bun ibodon anĩ ima biyalẽ, buk kori fiya si sitakã itotoya ado uris sewen nem ĩtã de fen, sile fiyan anĩ ailen.

‏ Revelation of John 5

Buk Kori Fiya Ado Sipsip Naal

1 Age de di, aya ĩ king nẽ sia bun ibodon anĩ ima biyalẽ, buk kori fiya si sitakã itotoya ado uris sewen nem ĩtã de fen, sile fiyan anĩ ailen. 2 Age afe fen, aya engel megeir ado taka ailen, ĩ ait odugem iweig iron, “Aim uris eneidi narĩ feid fen, buk kori fiya enei fara feleya kisi feleya?” 3 Anĩ ere, saa ilun be, tenebur be, teneub farumen tamal, taka nem buk kori fiya anĩ fara feleya be, namen fele fiya kisi feleya sã. 4 Aya fatuk bagai inã alen, ere nigin, taka nem buk kori fiya anĩ fara feleya be, namen fele fiya kisi feleya to wõ yen. 5 Age afe di, mudur adodo takam aya irokanan, “To inã wale! Ulef, Juda nẽ ibor bun tamal Laion, Dawid nẽ Warei mogo kusĩ wal fen. Inim, sã buk kori fiya anĩ yogon ĩtãfiya uris sewen ado fara falauf.”

6 Age ye di, aya Sipsip Naal dukesin anĩ gen, king nẽ sia ereb mata ibodõya aiwa adodo salili difiyen ado, mudur adodo atun ifar mog, ailen. Ĩ karat sewen ado mala sewen ado, mala sewen are Negur nẽ awa uur sewen teneub ganan bun susur fedin anidi. 7 Sipsip Naal ĩ isi fen, ĩ king nẽ sia bun ibodon anĩ nẽ ima biyalẽ buk kori fiya anĩ yalen. 8 Sain ĩ anĩ yalen, ereb mata ibodõya aiwa adodo, mudur adodo tuwenti-fo geid, Sipsip Naal wagen kuku den. Idi mugu mugu harp ^{▼▼5:8Harp anĩ gita gen musik kodẽ dedig.} ado beĩ gol nem kaau sumeĩ biya isokoseya ado guri difen, kaau sumeĩ biya are momoiya tamo kayau neid kosẽ. 9 Age de fen, idi seg mata dalen:

“Õ buk kori fiya anĩ wale fen,
yogon ĩtãfiya uris sewen anĩ fara feleya kisi feleya bagai,
ere nigin, õ dinõkesi di,
õ ogon naud bunem
ibor ganan bun, od fire fire ganan bun, tamo kayau ganan bun ado, teneub ganan bun, Negur nẽ tamo kayau na waledin.
10 Õ idi neda Negur aruna dalouf nigin, tano ado pris unenẽdin,
ago di, idi teneub ganan lo fiya nigin mudur dibodõf.”
11 Age de di, aya malau ara ken, engel musei bagai neid aiteid karĩ aun, idi tausen musei ado handred tausen musei wal fiya. Idi king nẽ sia, ereb mata ibodõya ado, mudur adodo salili difiyẽdin. 12 Age de fen, idi aiteid odugem seg dalen:

“Sipsip Naal dukesin ĩ
megeir, safina, kisi biya, totol, yana odug, fula fiya medeĩya ado,
yana yaleseya yaleya kisi feleya bagai!”
13 Agef fen, aya, ereb ereb ganan saa ilun difaref, tenebur difaref, teneub farumen difaref ado, maaĩ bun difaref, ereb ereb ganan anĩ namen mata difaref idi seg dale mog, karĩ aun:

“Ĩ king nẽ sia bun ibodok ado Sipsip Naal bun,
yana yaleseya, yana odug, fula fiya medeĩya ado, megeir,
gai gai ibodkalauf!”
14 Ereb mata ibodõya aiwa adodo diron, “Momoi,” age de di, mudur adodo kuku de fen, yana dalesen.