Rev 8 | DAD | STEP | Sain Sipsip Naal ĩtãfiya uris namba sewen anĩ fara fele di, saa ilun hap aua age fiya karasã sã mutũ bagai yenen.

‏ Revelation of John 8

Ĩtãfiya Uris Namba Sewen Ado Aa Gaula Sumeĩ Biya Nẽ Gol Beĩ

1 Sain Sipsip Naal ĩtãfiya uris namba sewen anĩ fara fele di, saa ilun hap aua age fiya karasã sã mutũ bagai yenen.

2 Age fe di, aya engel sewen Negur wagen difaren anidi, taur sewen ifeneĩd mog, ailen.

3 Engel taka ĩ, aa gaula sumeĩ biya nẽ gol beĩ ado isi, alta bun ifaren. Ĩ aa gaula sumeĩ biya musei, momoiya tamo kayau ganan neid kosẽ ado, king nẽ sia wagen gol alta bun sesewi fouf nigin difenen. 4 Aa gaula sumeĩ biya nẽ kaau, momoiya tamo kayau neid kosẽ ado, engel ima bun tamal Negur wagen iselen. 5 Agef fen, engel aa gaula sumeĩ biya nẽ beĩ yale, alta bun tamal yã ife fen, tenebur iran, age fe di, kolimei gudũya, gurũya odug, kolimei filiya ado, mimĩ wõ yen.

Taur

6 Age fe di, engel sewen taur sewen ado, taur wese fiya nigin dodok difen.

7 Engel uyulil yogon taur wese fe di, uyẽ ais, yã naud ado bagu fen, isi di, tenebur iraran, age fe di, teneub tekelei faraf towo fiya gen anĩ taka adok isaikelen, aa ganan faraf towo fiya gen anĩ taka adok isaikelen, agef fen, fisir mata ganan isasaikelen.

8 Engel uyu wõ yen anĩ dõ fiya yogon taur wese fe di, ereb arei odug gen yã fitotoleya ado maaĩwõ iran. Maaĩ faraf towo fiya gen anĩ taka, naud falei felen, 9 maaĩwõ ereb ereb mata ibodõya faraf towo fiya gen anĩ taka gare den, agef fen, waag ganan faraf towo fiya gen anĩ taka daũ felen.

10 Anĩ dõ fiya engel taka yogon taur wese fe di, barisa odug yal gen kaur fen, saa ilunem, naan faraf towo fiya gen anĩ taka bun ado, naan warur anidi bun kubũ yen. 11 Barisa anĩ nẽ yana Dirikeĩ. Naan faraf towo fiya gen anĩ taka dirikeĩ kele di, tamo kayau musei, naan dirikeĩ kelen anĩ bunem gare den.

12 Anĩ dõ fiya engel taka yogon taur wese fe di, gaa faraf towo fiya gen anĩ taka, ogõ faraf towo fiya gen anĩ taka ado, barisa faraf towo fiya gen anĩ taka yũ di, idi ganan faraf towo fiya gen anĩ taka gugum kelen. Naa faraf towo fiya gen anĩ taka lalan sa kelen, agef fen, bõ faraf towo fiya gen anĩ takag age fen.

13 Aya lo afe mog, aya webi taka karĩ au mog, ilun fatutu ye fen, ait odugem iweig iron, “Malalon! Malalon! Malalon tenebur dibodok anidi bun, ere nigin, engel towog mogo taur ait wese difou fenẽ!”