Acts 4
Pitaya Yonya yade koyare yeramiŋ
1Be, Pitaya Yonya beleŋ Solomonyen Paranda ineŋ haŋyende gor hinaryumya goyenbe gor gabu iramiŋ mar goyen Yesu kamde huwaryiŋ mere goke momoŋ yirde hinaryum. Gwaha teŋ heŋyabe Yesu tiyyiŋ gwahade goyen po al kamtiŋ manaŋ kame huwarnayiŋ yeŋ mel goyen saba yiraryum. Gwaha teŋ hikeb Al Kuruŋ doloŋ ird ird mata doyaŋ mar pris budaya, Al Kuruŋyen ya balem kuruŋ gote doyaŋ marte kuruŋmiŋyabe Sadusi marya beleŋ ▼ waŋ mere go nurdeb biŋ ar yamiŋ. 3Irkeb mel gore Pitaya Yonya yad merere yertek yeŋ yawaramiŋ. Gega bikkeŋ wawuŋ hiriŋ niŋgeb, gise ga yeŋbe yad koyare yeramiŋ. 4Gega irem gote mere nuramiŋ marbe budam wor po mere goyen fudinde yeŋ nurde Yesu niŋ dufaymiŋ tareŋ iramiŋ. Irkeb al yeŋ wa Yesu niŋ dufaymiŋ tareŋ iramiŋ mar bikkek goyabe gayamuŋkek goya gabu irde al parguwak po kapyaŋ hamiŋbe 5,000 gwahade hiriŋ.Pitaya Yonya mere kuruŋde hararyum
5Be, fay urkeb Yudia naŋare niŋ doyaŋ marya Yuda marte doyaŋ mar parguwakyabe Moseyen saba basaŋ heŋ tagal tagal marya beleŋ irem gote mere nurniŋ yeŋ Yerusalem gor gabu iramiŋ. 6Gabu iramiŋde gorbe Al Kuruŋ doloŋ ird ird mata doyaŋ mar pris buda gote karkuwaŋmiŋ Anas, Kaiafas, Yonya, Aleksandaya, irde Anas gote tayŋeŋ weŋ hoyaŋ manaŋ gor gabu iramiŋ. 7Be, mel gore Pitaya Yonya yawaŋbe yeŋ ge igiŋ ma nurde yuneŋya, “Ganuŋ beleŋ igiŋ dinkeb mata gogo tiyaruŋ? Ganuŋde saŋiŋde gogo tiyaruŋ?” yeŋ gusuŋaŋ yiramiŋ. 8Irkeb Pita gobe Holi Spirit beleŋ hard unkeb wol heŋbe gaha yinyiŋ: “Be, deŋ Yuda marte doyaŋ marya doyaŋ mar parguwakya, ga nurnaŋ ko! 9Deŋbe al kahaŋ simsimam faraŋ uryeke igiŋ hiyuŋ goyen goke muŋ teŋ merere derde daha mat igiŋ hiyuŋ gote miŋ nurniŋ yeŋ gusuŋaŋ dirhaŋ? 10Niŋgeb deŋya Israel mar hoyaŋ manaŋ tumŋaŋ mere tiyeŋ tihim gayen ga nurde bebak tinayiŋ. Be, al kahaŋ simsimam gabe Nasaret niŋ al Yesu Kristu deŋ beleŋ mayke kamuŋ gega, Al Kuruŋ beleŋ isaŋ heke huwaruŋ al gote tareŋde igiŋ hiyuŋ. Niŋgeb diltiŋ mat huwarke gago kenhaŋ. 11Yesu niŋ teŋ Al Kuruŋyen asaŋdebe siraw mere mat gahade katiŋ hi:‘Deŋ, ya ird ird mar beleŋ ya irniŋ yeŋ hora kura tawayamiŋ gega, igiŋ ma keneŋbe temeyamiŋ.
Goyenbe al hoyaŋ beleŋ tukuŋ gore po yamiŋ tareŋ wor po iryiŋ,’ yitiŋ hi. b
Niŋgeb hora gwahade goyenbe deŋ beleŋ Yesu gogo pel iraŋ. Gega Al Kuruŋ beleŋ teŋ meteŋ kuruŋ wor po unuŋ. 12Niŋgeb Yesu po ga neŋ mata buluŋde mat dumulgaŋ teŋ teŋ saŋiŋ goyen Al Kuruŋ beleŋ unuŋ. Niŋgeb megen niŋ al kura beleŋ epte ma Al Kuruŋ hitte alya bereya yumulgaŋ tiyyeŋ,” yinyiŋ.
13Be, gor gabu iramiŋ mar goreb Pitaya Yonyabe saba kuruŋ ma titiŋ, irde al deŋem moŋ yeŋ nuramiŋ gega, ‘Neŋ ge kafura ma heŋ mere tareŋ po tagalde har,’ yeŋbe hurkuŋkat tiyamiŋ. Irde irem gobe Yesuya tumŋaŋ heŋ kuŋ waŋ teŋ hinhan mar goyen kurabe gago yeŋ biŋ bak yamiŋ. 14Irde al kahaŋ simsimam goyen igiŋ heŋ Pitaya Yonya irde tumŋaŋ huwarde hike keneŋbe Pita beleŋ mere tiyyiŋ goyen wol heŋ heŋ ge kukuwamŋeŋ nuramiŋ. 15Irdeb mere teŋ teŋ gasuŋde matbe yakira tike belŋeŋ muŋ po siŋare kukeb yiŋgeŋ uliŋ mere sege irde gaha yamiŋ: 16“Al irawa gabe daha yirtek? Al buda kuruŋ Yerusalem taunde haŋ kuruŋ gobe irem gore mata tiŋeŋ wor po goyen tike kenaŋ. Neŋ wor mata forok yiyuŋ gote igineŋbe kenhet gago niŋgeb, epte ma ‘usi’ yetek. 17Gega mata forok iraruŋ gote mere momoŋbe kuruŋ heŋ kuke al nurde pasi henayiŋ goke igiŋ ma nurde hite geb irem goyen, ‘Sopte Yesu ineŋ haŋyen al goke tagalkeb muduntek,’ yineŋ utaŋ yirtek,” yamiŋ. 18Gwaha yeŋbe irem go sopte hoy yirke wakeb, “Derbe al hoyaŋ hitte kuŋ Yesu niŋ ma wor po tagalde saba yiriryeŋ!” yeŋ mere tareŋ po yirdeb utaŋ yiramiŋ. 19Gega Pitaya Yonya beleŋ wol heŋbe, “Al Kuruŋbe da mata niŋ igiŋ nuryeŋ? Yende mere gama irtek ma dende mere gama irtek? Goyen dindikeŋ dufay henaŋ ko. 20Munaŋ deyyabe Yesuyen mata delderer yeneŋ meremiŋ nurde tiyaryum goyen tagal tagal niŋ epte ma wor po bada hereŋ,” yinaryum.
21Gega al kahaŋ simsimam miliŋ beleŋ gwahade po kawaŋ kiryiŋ, damam 40 fole irtiŋ goyen Pitaya Yonya beleŋ Al Kuruŋyen saŋiŋde sope iraryum goyen al budam wor po go keneŋbe Al Kuruŋ turuŋ iramiŋ geb, Yuda marte doyaŋ mar beleŋ goyen nurdeb gwaha mat kura irem goyen buluŋ yirtek moŋ hamiŋ. Niŋgeb duliŋ mohoŋde po kafura mere yirde yubul tike kwaryum.
Yesu niŋ dufaymiŋ tareŋ irde hinhan mar beleŋ Al Kuruŋ mere iramiŋ
23Be, Pitaya Yonya gobe yubul tike mulgaŋ heŋ diŋuŋ yago hitte kwaryum. Irdeb pris buda gote karkuwaŋmiŋya Yuda marte doyaŋ mar parguwakya beleŋ mere yiramiŋ goyen tumŋaŋ diŋuŋ momoŋ yiraryum. 24Irkeb mere goyen kandukŋeŋ nurdeb tumŋaŋde Al Kuruŋ uguŋ po gahade inamiŋ: “Doyaŋ Al Kuruŋ, ge beleŋ po naŋkiŋya megeŋya makaŋya yirdeb dawet bana goŋ haŋ kuruŋ gayen yirariŋ. Irde doyaŋ yirde ha. 25Ge beleŋ mere tike meteŋ alge asininiŋ Dewit gore Holi Spirityen tareŋde merege nurde basaŋ heŋ gaha yiriŋ:‘Daniŋ megen niŋ marbe yeŋ ge bearar teŋ haŋ?
Irde daniŋ dufay buluŋ kukuwamŋeŋ po yerde mere mayde haŋ?
26Megen niŋ doyaŋ mar karkuwaŋya naŋa ga doyaŋ irde haŋ mar waŋ gabu irdeb Doyaŋ Al Kuruŋ asogo irde haŋ.
Fudinde, al buda kuruŋ gobe bikkeŋ Al Kuruŋ beleŋ basiŋa irde olip fimiŋ tonaŋde sam irtiŋ Al goyen gogo asogo irde haŋ,’ yiriŋ. c
27Niŋgeb, fudinde, Dewit beleŋ mata goke yiriŋ gwahade goyen po forok yiyuŋ. Yesube ge beleŋ bikkeŋ Mesaia ineŋ basiŋa irariŋ. Gega Israel naŋa doyaŋ al Herotya Roma gabmanyen al Pontius Pailatya beleŋ Yesu, gere Meteŋ Al, delger wukkeŋ wor po keneŋ hayen al goyen asogo irtek yeŋ Israel mar Yerusalem bana gaŋ haŋ goya al miŋ hoyaŋ Yuda mar moŋya gabu irde mere mayaŋ. Irdeb mayke kamuŋ. 28Goyenbe mata gobe mali ma forok yiyuŋ. Mel buda gore gwaha tinayiŋ yeŋ dufayge bikkeŋ kerariŋyen geb, gogo gwahade po forok yiyuŋ. 29Niŋgeb Doyaŋ Al Kuruŋniniŋ, Yesu niŋ tagalde hite goyen utaŋ dirniŋ yeŋ mel gore kafura dirde haŋ gabe yeneŋ ha. Niŋgeb neŋ meteŋ marge saŋiŋ dirkeb mel goke kafura ma heŋbe igiŋ merege tagalde tukutek. 30Irde Yesu, gere Meteŋ Al, delger wukkeŋ wor po gote deŋemde garbam mar sope yirde, mata tiŋeŋ kurayen kurayen forok yirde hitekeyab tareŋge kuruŋ goyen alya bereya yikala yirde hayiŋ.” inamiŋ.
31Be, Pitaya Yonya irde gabu iramiŋ mar beleŋ Al Kuruŋ mere irde pasi irkeb goyare po Al Kuruŋ beleŋ wol heŋbe mel go hinhan gasuŋ goyen aŋsok iryiŋ. Irkeb gor hinhan mar gobe tumŋaŋ Holi Spirit beleŋ hard yunkeb Al Kuruŋyen mere tagal tagal niŋ kafura ma heŋbe tagalde kuŋ hinhan.
Yesu niŋ dufaymiŋ tareŋ irtiŋ marbe detmiŋ kadom guneŋ teŋ hinhan
32Be, Yesu niŋ dufaymiŋ saŋiŋ irde hinhan mar gobe tumŋaŋ dufaymiŋya matamiŋya uŋkureŋ po hamiŋ. Irdeb al kura beleŋ, “Detne kuruŋ haŋ gabe nere kudiŋeŋ moŋ,” yeŋ hinhan, irde detmiŋ kuruŋ goyen yiŋgeŋ uliŋ kadom guneŋ teŋ hinhan. 33Be, aposel buda beleŋ Yesu kamyiŋde mat huwaryiŋ goyen Al Kuruŋyen tareŋde tagalde hike al beleŋ fudinde yeŋ nurde hinhan. Irde al tumŋaŋ megeŋ miŋyaŋya ya miŋyaŋ marbe al beleŋ damu tikeb muruŋgem goyen aposel hitte yawaŋ haniŋde yerde hinhan. Irkeb aposel beleŋ al kura det kuraŋ amu heŋ hinhan mar tumŋaŋ gale heŋ yuneŋ hinhan. Gwaha teŋ hikeb al kura det kuraŋ ma amu heŋ hinhan. Be, Al Kuruŋ beleŋ yeŋ gama irde hinhan mar goyen mata gwahade teŋ hikeb guram yirde igiŋ igiŋ wor po yirde hinhin.36Be, al kura, deŋembe Yosep manaŋ megeŋ tapummiŋ kura al beleŋ damu tike muruŋgem goyen tawaŋbe aposel buda yunyiŋ. Yeŋbe Liwai mar al, irde Saiprus motmotde niŋ al. Aposel buda beleŋbe Banabas ineŋ hinhan. Deŋe gote miŋbe, “kadom faraŋ yurde tareŋ yird yird al.”
Copyright information for
DAH