Luk 4 | DOB | STEP | 'Enega Yaluyaluwa Tabuna Yesu 'iloemaena ga Yolidaniyega Yesu 'i'au'ewena ga 'itauyena sena mitawa daitaya.

‏ Luke 4

Seitani Yesu 'itoo yogenena

(Madiu 4:1-11; Maki 1:12-13)

1 'Enega Yaluyaluwa Tabuna Yesu 'iloemaena ga Yolidaniyega Yesu 'i'au'ewena ga 'itauyena sena mitawa daitaya. ^{▼▼ *mitawa daita: Me Yudia 'idi mitawa kaukau be gulegulewa daisinamo, ta pwatula gidalina, be kaiwenao wate nigeya sinabwadi.} 2 Ga 'asiyata poti 'ediya Seitani 'itoowaiwai be 'aene Yesu 'igiebe'u, ta 'asiyata nidi 'ediya Yesu nigeya 'i'e'ai, ga 'enega 'ibotana sinabwana. 3 Ta Seitani nina Yesu 'ieonena, 'igwae, “'Eguma 'oyo Yaubada natuna, gulewa getedi 'uloinedi be sida emasula.” 4 Ta Yesu 'igwae, “Buki Tabu solanaya loina 'imiyami 'aene ‘Tomota yawasidi nigeya masula namo 'enega sida lobena.’”

5 'Enega Seitani Yesu 'i'au'ewa tu'eyena ga bale'u 'ina 'ebe loinao maibo'adi 'ie'itena tuta nina gote 'enaya, ga 'igwae, 6 “Gete 'ebeloina esaesa maibo'adi ya'ebwa'eyo 'abo 'eguya 'ubwagobwago. Manuna maibo'ana tuga 'igu 'ebeloina. Ta 'abo yaita 'ena nuwanuwagu be ya'ebwa'e, yada 'ebwaya tuga.” 8 Ta Yesu 'igwae, “Buki Tabu solanaya loina 'imiyami, 'igwae, ‘'Imu 'Inapwana Yaubada namo 'enaya 'uda bwagobwago be taunamo 'ina ona 'uda ematamatanedi.’

9 'Enega Seitani Yesu 'i'au'ewena ga 'itauyena Yelusalema ga Anuwa Tabu tabwana 'ai'ailaya 'itu'eyena ga 'ena 'ieonena, 'igwae, “'Eguma 'oyo Yaubada Natuna, gete 'enega 'usosobu ta geya'abo 'uesiesilae, 10 manuna Buki Tabu ni'atu 'isimana, 'igwae, ‘Yaubada 'ina aniloseyao 'ida loinedi be si'ita'i'isiyo.’ 11 Ta 'ebweu wate 'ina ona 'igwae, ‘'Ina aniloseyao sida 'aaliyo be 'enega geya'abo 'aeyo siesiesilae gulewa 'ediya.’ 12 Ta Yesu ona nina 'ie'isena 'igwae, “'Ebweu wate ona Buki Tabu 'ena 'imiyami, 'igwae, ‘Geya'abo 'imu 'Inapwana Yaubada 'utootoo.’

13 Ta ni'atu Seitani 'ina toona maibo'ana Yesu 'enaya 'ilosalonina, ga 'iebesinena be mali tuta 'ida ilama.v9-11 Sam 91:11-12v12 2 Loi 6:16; 1 Ko 10:9v13 Ib 2:18, 4:15

Yesu 'ina guinuwa Galili 'ena 'ie'alena

(Madiu 4:12-17, 13:53-58; Maki 1:14-15, 6:1-6)

14 'Enega Yesu Yaluyaluwa Tabuna 'ina waiwaiyega 'iila limana Galili. Ga gote 'ena Yesu tetelina 'i'elelewana Galili senanao 'ediya, 15 manuna me Galili nidi 'idi anuwa tapwalolo 'ediya 'iloguloguguya, ga 'enega maibo'adi si'awa bobo'anena. 16 Ga muliyega Yesu 'imai Nasaleta 'enaya, tauna gote 'ina 'asa 'ai'aila. Ga 'ebweu Sabate 'ena Yesu 'ilugu anuwa tapwaloloya, 'ina bubuna nadigega. 'Enega 'itoolo be Buki Tabu 'ida sawa, 17 'enega palopita Aisea 'ina 'etoladi si'ebwa'ena, ga 'ineyasina ga sawa nina 'ilobena, 'igwae,

18 “'Inapwana Yaluyaluwana 'eguya 'imiyami.

Tauna 'iesinuwegu be togomabeso 'ediya tetela bobo'ana yaguguyae.

Ta yoniyonidi wate 'ediya 'ietunegu be 'adi li'ama manuna yada simane.

Ta tomatakebokebo wate 'idi 'esasa limana manuna yasimane.

Ta wate 'ietunegu be tomiyamwau 'adi talauwalao nimadiyega ya'etoli'amidi.

19 Ta yasimane yakwala nina ma'etamo 'Inapwana 'ida 'etoseyemi.”

20 Ta Yesu ni'atu 'etoladi nidi 'isawedi ga 'inunumina, 'enega buki 'ana to'ita'i'ita 'i'ebwaya limena, ga 'imiyatowa. Ta toenonoyao maibo'adi nuwadi 'i'ewena, 'enega simiyami ta siduneduneye.

21 'Enega 'ieonedi, 'igwae, “Ona gete ni'atu yasawena ga wanonona, lowa sigimi simanena, ta gete tuga ni'atu 'iapwesa saba.”

22 Ga taudi nuwadi 'iowana 'ai'aila, 'enega 'ina onao bobo'adi manudi situpuna sinabwana, sigwae, “Tai gete Yosepa natuna, aga? Ta mwa'adega sa'i?”

23 'Enega 'ieonedi, 'igwae, “Ni'atu yamwalatonimi manuna 'iabe onasemalimali gete 'enega waeonagu be wagwae, ‘'Oyo togile'oasa sa'i, 'enega tauyo 'uda giebobo'aneyo.’ Ta wate 'iabe 'imi ona 'ebweu 'enega waeonagu be wagwae, ‘Guinuwa nidi waiwaidi 'asa Kapaneumi 'enaya 'uguinuwediya, nadigega wate 'uda guinuwa'esedi bada 'ida 'asa gete 'enaya.’ 24 Ta yaeona 'ai'ailimi 'aene nigeya 'ebweu palopita 'ina bodao 'ediyega 'ana 'amayaba 'ida lobena. 25 Ta wanuwa'i'isi 'aene lowa palopita Ilaitiya 'ina tutaya kwabulao yaudi Isileli 'ena simiyami, ta Yaubada nigeya Isileli wainena 'iesiesinuwe be Ilaitiya 'i'ita'i'isi tuta nina botana sinabwana, manuna yakwala 'etoi ta tupwana 'ediya nigeya 'usana, 26 ta esiya 'ebweu kwabula Salepati 'enega Yaubada 'iesinuwena Ilaitiya 'ana 'ita'i'ita manuna, nate Saidoni sena nina, ta Yaubada Ilaitiya 'ietunena kwabula nina 'ina 'asaya ga 'i'ita'i'isina. 27 Ta palopita Ilaisa wate 'ina tutaya tolepelo yaudi Isileli 'enaya simiyami, ta nigeya 'ebweu yaita 'ediyega 'igiegie bobo'ane, ta esi 'ebweu namo goma Silia 'igie bobo'anena, 'ana esana Naamani.”

28 Yesu 'ina ona gete 'ediyega taudi totapwalolo nidi 'igie gamwasowalidi, 29 'enega sitoolo ga Yesu sigiyaina ta 'asega si'au'ewa apwesena ga sitauyena 'idi 'asa 'oyana 'enaya, ga 'oya debanaya sisa'una be 'aene siasepala mwa'ute babagaya. 30 Ta tauna boda nidi 'iaweyalidi ga 'itauya. 2 Kin 5:1-14

Yesu 'ebweu tai 'igie bobo'anena yaluyaluwa bi'i 'enega

(Maki 1:21-28)

31 Ga muliyega 'imwa'uta Kapaneumi 'ena, nate Galili senanaya ga nada Sabateya tomota 'ie'itedi. 32 Ta tomota maibo'adi nuwadi 'iowana manuna 'ina e'ita maibo'ana palupaluna ta waiwaina.

33 Ta anuwa tapwalolo nina 'enaya 'ebweu tai 'imiyami, ta tai nina 'enaya yaluyaluwa bi'i lowa 'ilugu ga 'imiyami, 'enega tai nina 'enana sinabwanega 'ibwau, 'igwae, 34 “Ya! Yesu, 'oyo goma Nasaleta, to'ase 'alena ga 'umai 'emaya? Nuwanuwayo be 'aene 'uda pe'uma, aga? Ta 'oyo sa'i ni'atu yamwalatonimu, 'oyo tuga Yaubada Natuna.”

35 Ta Yesu 'iloinena, 'igwae, “'Ulosa'u, be tai nate 'enega 'uapwesama.” Ga palupaluna boda matadiya yaluyaluwa bi'i nina tai 'iulaena bale'uya ta 'enega yaluyaluwa bi'i 'iapwesa, ta nigeya 'ebweu esilae tai nina 'ilobaloba. 36 'Enega maibo'adi silosuyaedi ga taudimo sienaidedi, sigwae, “Mwa'adega sana gete? Ga ona namo 'ina waiwai 'enega yaluyaluwa bi'i 'iloinedi ga siapwesa.” 37 Gote 'ena Yesu tetelina silelewanena Galili senanao 'ediya.

Yesu tole'oasa yaudi 'igie bobo'anedi

(Madiu 8:14-17; Maki 1:29-34)

38 'Enega Yesu anuwa tapwalolo nina 'enega 'iapwesa ga Saimoni 'ina anuwaya 'ilugu. Ga Saimoni lawana ooyaiyaiyega 'ile'oasa, 'enega Yesu sisidena be 'ida giebobo'ane. 39 'Enega Yesu 'ilugu ga 'ina 'ebe'eno selabenaya 'itoolo, ta le'oasa nina 'iloinena ga 'ina le'oasa 'isaligogo, 'enega waine nina 'itoolo ga 'adi masula 'igibubuna.

40 Ta ni'atu sinala 'isuguwa ga tomota 'idi tole'oasao 'adi le'oasao dumadumadi be dumadumadi si'au'ewedima Yesu 'enaya, ga maibo'adi 'ebweuna 'ebweuna 'igitoodi ga sibobo'ana. 41 Ta wate yaudi 'ediyega yaluyaluwa bi'i siapweapwesa ta sibwaubwau, sigwae, “Ona'ai'aila sa'i, 'oyo Yaubada Natuna!” Ga Yesu 'i'etobodedi be geya'abo nadigega sionaona'esa, manuna ni'atu simwalatonina 'aene tauna To'etoseyana nina Yaubada 'enega.

Yesu 'iloguguya sakowasi

(Maki 1:35-39)

42 Ta ni'atu tomwa 'iulisina ga Yesu 'asa nina 'ipilisinena ga tebweuna mwatui daitaya 'itauya. Ta tomota yaudi sie'ale be 'aene Yesu si'ebese, ta tuta nina silobena sieonena, sigwae, “Geya'abo 'utautauya. Bada tuga tamiyami.” 43 'Enega 'ieonedi, 'igwae, “'Aina wate 'asa 'ediya yatatauya be Yaubada 'ina loina tetelina yada loguguyae. Gete tetela nina manuna ga Yaubada 'ietuneguma.” 44 'Enega 'iapwesa ga 'itauya Yudia senanao maibo'adi 'ediya, ga 'idi anuwa tapwaloloyao soladiya 'iloguguya sakowasi.