Luk 5 | DOB | STEP | 'Ebweu tuta Yesu 'itootoolo ola Genesaleta tupitupinaya ta boda simai ga sitoolo pogipogina be 'aene Yaubada 'ina ona Yesu 'enega sida nono.

‏ Luke 5

Yesu 'ina tononoyao 'ibwauyedi

(Madiu 4:18-22; Maki 1:16-20)

1 'Ebweu tuta Yesu 'itootoolo ola Genesaleta tupitupinaya ta boda simai ga sitoolo pogipogina be 'aene Yaubada 'ina ona Yesu 'enega sida nono. 2 Gote 'enaya togomana 'idi waga 'eluwa 'i'itedi selabenaya silisidi dabalaya, ta togomana nidi ni'atu sisuya ga 'idi gomana si'utu'utudi. 3 'Enega Yesu waga 'ebweu 'ena 'igelu, nate Saimoni 'ina waga, ga Saimoni 'ieonena be tupwana 'italadolo, ga 'enega 'italadolo ni'uya ga waga nina 'ena Yesu 'imiyatowa ta 'ie'ita boda 'ediya.

4 Ta ni'atu 'ina e'ita 'igumwala ga Saimoni 'ieonena, 'igwae, “Saimoni, tupwana 'utaladolo ni'uya be 'imu gomana 'uyauye.”

5 Ta Saimoni 'igwae, “'Inapwana, boiboiya sa'i 'agomana masalina ta nigeya 'ebweu wate iyana 'a'ona'ona. Ta tuwa tuga 'imu ona manuna 'enega gomana yayauye.”

6 Siyauyena ga iyana yau wawasae si'onedi ga gomana nina abe 'i'esa'esabu. 7 'Enega gosediyao mali wagega silo'uyoedi be 'aene simama be silemedi. 'Enega taudi 'idi wagega simai ga waga 'eluwa siloemaedi ga abe sidamadamana. 8 Gote 'ena Saimoni Pita iyana 'ana yau 'i'itedi ga Yesu 'aenaya 'ibwagobwago, ta Pita 'igwae, “'Inapwana 'uda pilisinegu, manuna 'abo'agu toto'umaligu.” 9 Ona gete 'i'inanena manuna magosenao nuwadi 'iowana 'ai'aila iyana nidi si'onedi manudi, 10 ta wate nadigega Saimoni gosenao nidi Yemesa be Yoni, taudi Sebedi natunao. 'Enega Yesu Pita 'ieonena, 'igwae, “Geya'abo 'u'ate'ate sa'ala. Ta esi gete 'enega be tomota nadigega 'uda 'ona'esedi.”

11 'Enega maibo'adi silaga dabalaya ga yage yauyauna siebesinedi ga Yesu simuliyena.

Yesu 'ebweu tolepelo 'igie bobo'anena

(Madiu 8:1-4; Maki 1:40-45)

12 Ta mali tutaya Yesu wate 'ebweu 'asa 'ena 'imiyami. Sena nina 'enaya 'ebweu tai bwalana maibo'ana lepelo 'i'ewena. 'Enega tai nina Yesu 'i'italobena ga 'ibwago sanamwa'uta bale'uya ga 'isidena, 'igwae, “'Inapwana, 'eguma 'imu nuwanuwa nadigega, kapekapeyana be 'ugie bobo'anegu.” 13 Ta Yesu nimanega tai bwalana 'igitoona ta 'igwae, “O, bobo'ana! 'Uda 'esasa.” Ga tai nina 'ana lepelo 'igumwala manini. 14 'Enega Yesu tai nina 'iemataluwena, 'igwae, “'Utatauya ta geya'abo 'ebweu yaita wate 'ena 'usimasimanegu ta esi 'utatauya totaliya 'enaya be 'i'itayo, be 'enega 'imu taliya 'u'ebwaya Yaubada 'ena, to'ase nadigega 'ada loina Mosese 'enega, be 'enega tomota sida mwalatoniyo 'aene ni'atu 'u'esasemu.”

15 Ta esi gote 'enega ga Yesu tetelina 'isinabwa 'ai'aila ga pwalu yaudi sidelima be 'aene Yesu 'ina ona sida nono, ta wate 'adi le'oasao 'aene 'ida giebobo'anedi, 16 ta esi tuta yauyauna boda 'ediyega 'itautauya dumaduma be 'isidasida Yaubada 'enaya.

Yesu 'ebweu tokweno 'igiebobo'anena

(Madiu 9:1-8; Maki 2:1-12)

17 'Ebweu 'asiyata 'enaya Yesu boda 'ie'ie'itadi. Ta 'aidi Palisiyao be loina 'ana toe'itao taudi simai Galili be Yudia be Yelusalema 'asanao 'ediyega ga boda ma'ediyao simiyami ta sienoenono. Tuta gote 'ena Yaubada 'ina waiwaiyega Yesu tole'oasao 'igiegie bobo'anedi.

18 'Enega boda 'ebweu tokweno 'ina 'ebe 'enoega si'aalinama ga sitoona be 'aene siluguye anuwaya be Yesu matanaya sisa'u. 19 Ta nigeya sawesawediya, manuna pwalu sinabwa wawasae. 'Enega tokweno nina si'aala tu'eyena anuwa etaninaya ga 'ana 'atowa si'ewa yaulena ta 'enega tokweno nina ma 'ebe 'enona sietabetabeyena boda nidi gamwagamwanidiya, ga Yesu matanaya sisa'una. 20 Ga Yesu tomotai nidi 'idi emisa 'imwalatoninaya ga tai nina 'ieonena, 'igwae, “Gosiyagu, 'imu bubuna to'umalidi 'adi nuwatau ni'atu 'ulobedi.”

21 Ta sa'i, loina 'ana toe'itao be Palisiyao Yesu 'ina ona ni'atu sinonona ga taudimo 'ediya sienaenaida, sigwae, “Yesu gete mwa'adega ga Yaubada 'ena 'ioopa'ala? Manuna nigeya 'ebweu yaita sawesawenaya be tomota 'idi bubuna to'umalina 'ida nuwataudi, nate namo Yaubada sawesawenaya.”

22 'Idi nuwanuwa Yesu ni'atu 'imwalatonina, 'enega 'ieonedi, “To'ase manuna 'atemiya nate nadigega wanuwanuwa'esa? 23 Ta to'ase wanuwena yada onae tai gete 'enaya be 'aene yada gwae, ‘'Imu bubuna to'umalina ni'atu yanuwataudi,’ nai yada gwae, ‘'Utoolo be 'utatauya’? 24 Ta wada mwalatoni 'aene 'abo'agu Tomota Natuna ^{▼▼ *Tomota Natuna: Yesu tauna 'ieesena The Son of Man, 'ana mwalatoi tomota tuga. Yesu taunamo 'ieesena Tomota Natuna, ta 'ina e'itao 'ediyega tomota simwalatonina 'aene tauna To'etoseyana Keliso.} ma igu loina bale'uya be tomota 'idi bubuna to'umalina yanuwataudi.” 'Enega tokweno nina 'ieonena, 'igwae, “'Abo'agu gete yaeonayo, ‘'Utoolo be 'imu 'ebe'eno 'u'aala be 'utatauya 'imu 'asaya.’

25 Ta 'ilomanini ga boda matadiyega 'itoolo ga 'ina 'ebe'eno 'i'aalena ga 'itauya 'ina 'asaya ta ma ina gwausowala Yaubada 'ituputupu. 26 Gote 'ena boda maibo'adi nuwadi 'iowana sinabwana, ga ma idi 'amayaba Yaubada situpuna, ga siona, “Ni'a 'ebweu 'ebe nuwaowana ta'itena.”

Yesu Libai 'ibwauyena

(Madiu 9:9-13; Maki 2:13-17)

27 Ta muliyega Yesu 'iapwesa ga 'ebweu takisi 'ana to'ewa 'ana esana Libai 'i'itena 'ina anuwa 'ebe paisewa 'ena 'imiyami ta 'ieonena, 'igwae, “Libai, 'umuliyegu.” 28 'Enega Libai nina 'itoolo ta yage yauna 'ipilisinedi ga Yesu 'imuliyena.

29 'Enega Libai nina 'emasula sinabwana Yesu manuna 'iguinuwena, ga boda sinabwana simai Libai 'ina anuwaya 'e'ai nina manuna, ta takisi 'ana to'ewao yaudi wate ma'ediyao. 30 Gote 'ena Palisiyao be 'idi loina 'ana toe'itao silomugi Yesu 'ina tononoyao 'ediya, sigwae, “To'ase 'alena ga takisi 'ana to'ewao be wate toto'umalidi 'aina ma'emiyao wa'e'ai egogona?”

31 Ga Yesu 'idi ona nina 'ie'isena, 'igwae, “Taudi bobo'adi geya nuwadi togile'oasa, ta tole'oasa esiya nuwanuwadi togile'oasa. 32 'Abo'agu yamaiya nigeya topalupaludi manudi, ta esi toloegesiyao sabi lemedi, be 'aene nuwa 'ebuniyega sida bobo'ana.”

Yesu 'ina ona 'ebotana manuna

(Madiu 9:14-17; Maki 2:18-22)

33 Ta muliyega 'aidi tomotai Yesu sieonena, sigwae, “Yoni 'ina tononoyao tuta yauna mabotanidi sisidasida Yaubada 'enaya, nadigega wate Palisiyao 'idi tononoyao 'idi guinuwa, ta mwa'adega ga 'enega 'oyo 'imu tononoyao nigeya sida edidigula, ta tuga si'e'a ta sinumanuma besobeso.” 34 'Enega Yesu 'igwae, “Mwa'adega, 'ilobwenena be ai 'ana toyo'oyao siedidigula 'abo toai me'olotona ma'ediya siegwausowala? Nai nigeya, aga? 35 Ta wanuwa'i'isi 'aene tuta 'imeema be toai nina 'ipilisinedi 'enega esi sinuwamwau be siedidigula, ta si'ebotana.”

36 Ta wate 'ebweu onasemalimali 'iemwasalina 'ediya, 'igwae, “Nigeya sawesawenaya 'oama auwaunega senasenamina ta'ewa be 'oama kadekadelina 'enaya tabwabwadae. Nigeya! Ta 'eguma nadigega, ni'atu 'oama auwaunana tagie to'umaliyena, ta wate auwaunana senasenamina 'oama kadekadelina nigeya 'ilobwelobwena. 37 Ta wate nigeya 'ebweu yaita bwasi waiwaina nadigega oine auwauna 'ida siwena 'ebesiwa kadekadelidi 'ediya, 'abona nai si'alasabudi be bwasi ta 'ebesiwa 'adi mudala. 38 Ta esi tada siwa 'ebesiwa auwau daisidimo 'ediya. 39 Ta 'abo yaita oine kadekadelina 'inumai 'iabe 'iona 'aene geya nuwana auwauna, manuna 'aene ‘Oine kadekadelina esiya bobo'ana wawasae.’”