‏ Mark 12

'Inapwana 'ina bagula 'ana topaisewao

(Madiu 21:33-46; Luke 20:9-19)

1'Enega Yesu 'iona semalimaliyedi, 'igwae, “'Ebweu tai 'ina bagula 'iasona oine daisinamo ga 'ali 'iguinuwena, ga oine 'ana 'ebebibi 'iguinuwena ga anuwa bagula solanaya 'i'abina, 'enega 'ina toguinuwao 'iloinedi be si'ita'i'isi, ta tauna 'itauya mali esenaya.

2“Ta sesoi 'ana tutaya, 'inapwana nina 'ina 'ali'ei 'ebweuna 'ietunena be 'aene oine uwana bagula 'ana to'ita'i'itao 'ediyega 'ida me'edi. 3'Itautauya ga nigeya si'ebwa'ebwa'e, ta esi sigiyaina ga sisapina 'enega ma'animenimenamo sietunena ga 'iila.

4“'Enega 'inapwana nina 'ina 'ali'ei 'eluwena wate 'ietunena 'ediya, ga siununa debanaya ga ma ina omayamaya 'iila.

5“Ta wate 'etonina 'ietunena 'ediya ga siloemwawasina. Ta yaudi wate 'ietunedi 'ediya ga 'aidi sisapidi ta 'aidi siloemwawasidi, ga 'enega maibo'adi sigie to'umaliyedi.

6“Gote 'ena 'ebweuna namo 'imiyami, tauna natu'ai'ailina. 'Enega tauna wate 'ietunena 'ediya, 'igwae, ‘Tauna sana natugu, 'enega sida 'amayabe.’

7“Ta ni'atu natuna 'iapwesa 'ediya ga to'ita'i'itao nidi taudimo 'ediya sigwae, ‘Gosemao, 'Inapwana gete natuna 'imeemai, 'enega batuwa nina taloemwawasi be 'abo'ada bagula taloine.’ 8Ta sigiyaina ga siloemwawasina ga bagula 'etaulunaya siula apwesena.”

9Ga ni'atu Yesu 'ina emwasala 'igumwala, ga 'ienaida 'ediya, 'igwae, “To'ase 'iabe 'inapwana nina 'iguinuwe? Ona'ai'aila 'inapwana nina 'imama be toguinuwa nidi 'iloemwawasidi, be 'enega bagula nina mali to'ita'i'itao 'i'ebwa'edi.”

10'Enega Yesu wate onasemalimali Buki Tabu 'enega 'isimanena, 'igwae, “Wanuwa'i'isi Buki Tabu 'ina simana gete nadigega:

‘'Ola nina lowa to'abi anuwa siguitoyasena.

Ta gete tugai ni'atu sietoolona be 'ie'ola nugana,

be 'ola maibo'adi 'iloinedi.

11Nate 'Inapwana 'ina guinuwa 'ebe nuwaowana 'edaya.’ ”

12Yesu 'ina onasemalimali gete totaliyao sinabwadi be Palisiyao sinonona ga simwalatonina 'aene taudi tuga manudi 'ionaona, 'enega 'aina 'eda'eda si'ebesena be sida giyai, ta esi nigeya sigiyagiyai manuna simatauta pwalu 'ediya. 'Enega sipilisinena ga sitauya.

Sisa 'ina takisi

(Madiu 22:15-22; Luke 20:20-26)

13Ta 'enega 'inapwanao nidi 'aina Palisiyao be wate Elodi 'ina bodao sietunedi Yesu 'enaya be enaidega sikaboe be 'ina loegesi siloba.

14'Enega Yesu 'ena simai ga sieonena, sigwae, “'Inapwana, ni'atu 'amwalatonimu 'aene 'oyo toe'ita 'ai'aila, ta tomota 'idi waiwai manuna nigeya 'umatamatauta, ta tuga ona 'ai'aila 'usimana leleleya tomota maibo'adi 'ediya, nate Yaubada 'ina 'eda 'ue'ita 'ai'aila. 'Enega mwa'adega? Sawesawenaya be Kini Sisa manuna takisi tasa'u, nai nigeya? 15Takisi nina taemaisi Kini 'enaya, nai nigeya?”

Ta Yesu 'idi kabo ni'atu 'imwalatonina, 'enega 'ieonedi, 'igwae, “To'ase manuna watootoogu? Abaga mani nina wame'e be ya'ita.”

16'Enega mani 'ebweuna si'ebwa'ena. Ga Yesu 'ieonedi, 'igwae, “Wada eonagu, mani gete 'ena yaita 'ana ma'ama'yau ta 'ana esana?”

Ta sigwae, “Kini Sisa.”

17'Enega Yesu 'ieonedi, “O nadigega. 'Enega 'eguma Kini 'ina yage wa'ebwaya Kini 'enaya, ta 'eguma Yaubada 'ina yage Yaubada wa'ebwa'e.”

Ga Yesu 'ina ona gete manuna nuwadi 'iowana sinabwana.

Tomwawasa 'idi toololimana

(Madiu 22:23-33; Luke 20:27-40)

18'Enega wate Sadusiyao, taudi nigeya siemiemisa tomwawasa 'idi toololimana manuna, simai ga Yesu 'ena sienaida, sigwae, 19“'Inapwana, loina gete nadigega Mosese 'i'etoladina manuda, 'igwae, ‘'Abo 'ebweu tai 'iai be nigeya natunamo ta 'imwamwawasa, tai nina tasina kwabulinana ma'iyana sida ai, be 'enega 'abo waine 'ienatuna, natunao tokwaiya nina 'ana lopa'eluyao.’ ” 20'Enega 'ebe'ita si'ebwa'ena, sigwae, “'Ebweu tai matasinao simiyami 'adi yau site sebeni, ga 'adi tomatuwa nina 'iai ga nigeya natunamo ta tai nina 'imwawasa. 'Enega wate tasina selabenega kwabula nina 'iaina ga wate nadigega nigeya natunamo ta 'imwawasa. 21'Enega tasina selabenega kwabula nina 'i'ewena ga wate simiyamiyana ta nigeya natunamo, ta tai nina 'imwawasa. 22Ta nadigega tuga tasinao maibo'adi kwabula nina siaiai ta simwawamwawasa, ta nigeya wate natudimo. Ta muliyega waine wate 'imwawasa. 23'Enega toololimana 'ana tutaya waine nina to tai batu mwane 'ai'ailina? Manuna site sebeni nidi ni'atu siaina.”

24Ta Yesu enaida gete 'ie'isena, 'igwae, “Gete 'imi loegesi, manuna Buki Tabu nigeya wamwalamwalatoni, ta wate Yaubada 'ina waiwai nigeya wamwalamwalatoni. 25Toololimana mulinaya tomota geya'abo siaiai, ta esi 'idi miya aneloseyao galewaya nadigega.

26“Lowaenei Yaubada Mosese 'ieonena toololimana manuna, 'abo Buki Tabu wasawai wada 'italoba. Manuna tuta nina Mosese mitawaya 'itautauya ta Yaubada kaiwe sabelulu 'enega Mosese nina 'ieonena, 'igwae, ‘'Abo'agu Ebelaamo 'ina Yaubada ta Aisake 'ina Yaubada ta Yekobe 'ina Yaubada.’ 27Yaubada nigeya tomota mwawamwawasidi 'idi Yaubada, ta esi tomota mayawasidi 'idi Yaubada. Ta 'omi 'imi e'ita yage gete manuna nigeya palupaluna.”

Loina sinabwadi

(Madiu 22:34-40; Luke 10:25-28)

28'Enega loina 'ana toe'ita 'ebweu 'imai ga taudi 'idi egewagewana Yesu ma'edi 'inonona ga 'idi enaidao 'adi e'isa Yesu 'enega 'inonodi bobo'ana wawasae, 'enega tauna wate Yesu 'ena 'ienaida, 'igwae, “'Inapwana, loinao maibo'adi 'ediyega to loina sinabwana?”

29Ta 'enega Yesu 'igwae, “Loina sinabwana gete: 'Omi me Isileli 'igu ona gete wanonoi 'aene 'Inapwana Yaubada tebweuna namo, 30'enega 'imu 'Inapwana Yaubada 'uda obobome 'ateyo be yaluyaluwayo be nuwayo be wate 'imu waiwai maibo'ana 'ediyega.

31“Ta 'ebweu wate loina sinabwana gete: Gosemwao 'uda obobomedi, nadigega tauyo 'amu oboboma.

“Loina 'eluwa getedi loina maibo'adi sisinabwa sinedi.”

32'Enega loina 'ana toe'ita nina Yesu 'ina ona 'inonona ga 'igwae, “'Inapwana, 'imu ona nate ona 'ai'aila 'aene tauna tebweuna tuga Yaubada, ta nigeya 'ebweu wate Yaubada 'imiyami. 33'Enega 'ilobweneda be taobobome 'ateda maibo'anega be nuwada maibo'anega be 'ida waiwai maibo'anega, be wate gosedao tada obobomedi nadigega tauda taobobomeda. Loina 'eluwa getedi taliya yauyaudi be 'ebwayadaitao maibo'adi sisinabwa sinedi, aga?”

34Ta Yesu tai nina 'ina ona 'inonona 'aene palupaluna, ga 'ieonena, 'igwae, “Nate ona 'ai'aila, ta 'oyo Yaubada 'ina 'ebeloina 'ena ni'atu 'uloselabena.”

'Enega muliyega tomota Yesu simatautena ga nigeya 'ebweu yaita 'itootoo be 'ienaida limana 'enaya.v33 Osi 6:6

To'etoseyana nina tauna Debida 'ina susu

(Madiu 22:41-46; Luke 20:41-44)

35Ta 'enega Yesu Anuwa Tabu solanaya 'ie'ie'ita tomota 'ediya, ga 'ieonedi, 'igwae, “Mwa'adega ga 'enega 'aina loina 'ana toe'itao sigwae 'aene Debida 'ina susuyega To'etoseyana Keliso 'iapwesa, 36manuna lowa Yaluyaluwa Tabuna Debida 'igiesinapuna ga Debida To'etoseyana nina 'i'awa 'inapwanena, 'igwae:

Yaubada 'iona 'igu 'Inapwana 'enaya, 'igwae,

“'Ataiguya 'umiyatowa be 'ana laba

'amu talauwalao yasa'u mwa'utedi 'aeyo 'ubuninaya.”

37Debida nina 'ina 'Inapwana Keliso, 'enega mwa'adega sana ga Debida 'ina susuyega muliyega Keliso 'iapwesama?”

Ta boda maibo'adi Yesu 'ina e'ita nuwadi 'i'ewena.

Yesu loina 'ana toe'itao 'i'awa to'umaliyedi

(Madiu 23:1-36; Luke 20:45-47)

38'Enega Yesu 'ieonedi, 'igwae, “Geya'abo loina 'ana toe'itao 'idi bubuna wamulimuliye. Manuna taudi adelidi tuga nadigega tuta yauna nuwanuwadi be 'adi 'oamao duduladi si'otedi be tomota gamwagamwanidiya sisakosakowasi be 'aene sida 'amayabedi. 39Ta wate nuwanuwadi 'ebemiya bobo'adi Anuwa Tapwalolo 'ediya, be wate sagali 'adi tutaya nuwanuwadi be bwaimaya sida miyatowa. 40Ta wate tuta yauna tomota matadiya Yaubada 'ena sisidasida dudulana, ta esi 'idi sida nina nigeya bobo'ana, manuna 'atediya sinuwanuwa mwa'adega 'iabe kwabulao sikabo'esedi be 'idi gwegweyao si'ewadi. 'Enega ma'etamo Yaubada e'isa to'umalina 'i'ebwa'edi.”

Kwabula 'ina 'ebwayadaita

(Luke 21:1-4)

41'Enega Yesu 'ebwayadaita 'ana 'ebesa'u deinaya 'imiyatowa, ga tomota yaudi 'idi 'ebwayadaita mani sisa'usa'u ta Yesu 'iyo'oyo'o, ga toesaesao 'idi 'ebwayadaita sinabwadi 'i'itedi, 42ta wate kwabula gomagomabesona 'i'itena 'ina 'ebwayadaita toea 'eluwa namo 'isa'udi.

43'Enega Yesu 'ina tononoyao 'ibwau egogonedima, ga 'ieonedi, 'igwae, “Ona'ai'aila, kwabula gote 'ina 'ebwayadaita maibo'adi 'idi 'ebwayadaita 'isinabwa sinedi. 44Manuna maibo'adi 'idi tupwa sinabwana 'imiyami, ta esi kwabula gote gomagomabesona ta 'ina mani maibo'ana 'isa'una, ga nigeya 'ebweu wate 'ina tupwa 'imiyami be 'enega 'ana masula 'ida gimwane.”