Mar 9 | DOB | STEP | “Ta Yesu 'ieonedi wate, 'igwae, “Yaona 'ai'aila 'emiya 'aene tomota 'aimi geya'abo wamwawamwawasa ga 'ana laba Yaubada 'ina loina waiwaina 'ida apwesa be wada 'ita.” v38 Md 10:33

‏ Mark 9

1 “Ta Yesu 'ieonedi wate, 'igwae, “Yaona 'ai'aila 'emiya 'aene tomota 'aimi geya'abo wamwawamwawasa ga 'ana laba Yaubada 'ina loina waiwaina 'ida apwesa be wada 'ita.”v38 Md 10:33

Yesu 'ana 'ita dumadumana

(Madiu 17:1-13; Luke 9:28-36)

2 'Asiyata sikisi mulinaya Yesu 'ina tononoyao 'etoi 'i'au'ewedi, taudi Pita be Yemesa be Yoni, ga ma'enao situ'e 'oya 'ebweu kesolana 'enaya, ga taudimo simiyami; ga si'itena Yesu maninina 'ituyayala, 3 ta 'ana 'oama 'iwakeke 'ai'ailina, 'ana 'ita nigeya 'ebweu yaita bale'uya sawesawenaya be 'oama 'ida 'gie'esase be 'ana wakewakeke nadigega. 4 Ta wate Ilaitiya be Mosese siapwesama ga Yesu nina ma'edi si'awa'awa gwae.

5 'Enega Pita 'ilolagata ga Yesu 'ieonena, 'igwae, “'Inapwana, 'ida miya gete nadigega bobo'ana, 'enega 'imi yoeyoe 'etoi 'a'abidi, 'ebweuna 'oyo manuyo, ta 'ebweuna Mosese manuna, ta 'ebweuna Ilaitiya manuna.” 6 Nate Pita 'ionaona besobeso tuga, manuna magosenao simatauta.

7 'Enega pwana wate 'imwa'uta ga 'itala ekabobodi, ta pwana 'enega 'ebweu 'enana sinonona, 'igwae, “Gete natugu bobo'ai'ailina, 'ina onao wada nonodi.”

8 Ta silomanini ga silo'ita dadana ga Yesu tebweuna namo, ta nigeya 'ebweu wate yaita si'ita'ita. 9 'Enega 'oyega siebuebusima ga Yesu 'iloinedi, 'igwae, “Yage nidi ni'atu wa'itediya geya'abo tomota 'ediya wasimasimanedi ga 'ana laba 'abo'agu Tomota Natuna mwawasega yatoolo limana.” 10 'Enega yage nina sisa'u kwaiyena, ta taudimo sionaona, sigwae, “'Ina ona nina toololimana manuna mwa'adega 'ana mwalatoi?”

11 Ga Yesu 'ena sienaida wate, sigwae, “To'ase manuna loina 'ana toe'itao siona 'aene Ilaitiya 'igimi nuganama be muliyega To'etoseyana nina 'imama?”

12 Ta Yesu 'igwae, “O nadigega, Ilaitiya 'aene 'ida giminuganama be 'enega yage maibo'adi 'ida giepaepaludi. Ta sa'i Ilaitiya nina ni'atu 'imai saba, ta esi tomota siguinuwa besobeso 'enaya to'ase 'idi nuwena nadigega, nadigega Buki Tabu 'igimi simana'esena. Ta wate 'abo'agu Tomota Natuna, to'ase manuna Buki Tabu 'igimi simanegu 'aene 'elouya yaudi yalobadi be wate tomota sida guitoyasegu?”v2 Mk 5:37v7 Md 3:17; 2 Pi 1:16-18v12 Mal 4:5; Ais 53:3

'Ebweu gwama 'ana le'oasa lobwebwai manuna

(Madiu 17:14-20; Luke 9:37-43)

14 'Enega 'oyega simwa'uta ga 'ina tononoyao maibo'adi siloba limedi be boda yaudi ma'ediyao, ta wate loina 'ana toe'itao wate ma'ediyao siegewagewana. 15 Ga tuta nina pwalu Yesu si'inanena nuwadi 'iowana sinabwana, ga 'enaya sipili manini sabi 'itana.

16 Ta Yesu 'idi egewagewana manuna 'ienaida, 'igwae, “To'ase manuna waonaona?”

17 Ga 'ebweu tai boda nidi 'ediyega Yesu 'ieonena, 'igwae, “'Inapwana, 'idi egewagewana 'alena natugu, manuna 'ina le'oasa 'enega nigeya kapekapeyana be 'iona, 18 ta 'aina tuta yaluyaluwa bi'i 'ina guinuwega 'itatai ta 'awanega busobuso siapweapwesa, ta 'iesala'i'ita be 'idededela. Ta 'imu tononoyao ni'atu yasidedi be 'aene yaluyaluwa bi'i gwama 'enega siula apwese, ta nigeya sawesawediya.”

19 Ta Yesu 'ieonedi, 'igwae, “'Omi sana mwa'adega? Ga debami pa'ala yaita! Ni'atu 'imi debapa'ala 'enega yalo'ame'ame. Baga gwama nina wame'e 'eguya be ya'ita.”

20 'Enega gwama nina sime'ena 'enaya, ta yaluyaluwa bi'i Yesu 'i'itena, 'enega 'iginao ga gwama 'itai ga bale'uya 'ibe'u ga 'idededela ta 'awanega busobuso siapweapwesa.

21 Ta Yesu gwama tamana 'ieonena, “To tuta 'ena 'ina le'oasa 'ie'ale?” Ga tamana 'igwae, “'Ina tuta gwamega. 22 'Enega 'abo 'itatai 'aina tuta 'ibebe'u kaiwe 'ala'alasidi 'ediya ta 'aina tuta bwasi ni'udi 'ediya be 'iabe 'iloemwawasi. 'Enega 'abo kapekapeyana 'uda 'atenuwa 'ole'oleyema be 'ulemema.”

23 Ta Yesu tai nina 'ieonena, 'igwae, “Ni'atu 'uona ‘'Abo kapekapeyana’, aga? Ta esi 'uda nuwa'i'isi 'aene 'eguma taemisa, yage maibo'ana kapekapeyana 'edaya.”

24 Gote 'ena tai nina 'iona toitoila, 'igwae, “Ona'ai'aila yaemisa, ta nigeya emisa 'ai'aila. Nuwanuwagu be 'igu emisa 'ugiewaiwaiye.”

25 Ta Yesu boda yauyaudi sipilipilima 'i'itedi, 'enega yaluyaluwa bi'i 'i'enapa'alina, 'igwae, “'Oyo yaluyaluwa to'umaliyo 'imu lobwebwai 'enega gwama 'ieuwauwa, yaloineyo be 'upilisine atae be geya'abo wate 'ebweu tuta 'ulugulugu limana 'ena.”

26 'Enega yaluyaluwa nina 'imagamagana ga gwama 'ana lobwebwai 'iginaona ga 'idededela sinabwana, ta yaluyaluwa bi'i 'enega 'iapwesa ga 'itauya. Ta boda gwama si'itena 'ana 'ita 'atuwa 'imwawasa, ga simatauta ta sigwae, “Ni'atu 'imwawasa.”

27 Ta Yesu gwama nimana 'igiyaina ga 'igietoolona, ta gwama nina 'itoolo, ni'atu 'ibobo'ana.

28 'Enega muliyega Yesu ma ina tononoyao silugu anuwaya, ga nada taudimo. 'Enega tonono nidi Yesu sieonena sigwae, “'Inapwana, mwa'adega 'abo'ama ga nigeya sawesawemaya be yaluyaluwa bi'i 'aula apwese?”

29 Ta Yesu 'igwae, “Nigeya 'ebweu to yage 'enega be yaluyaluwa bi'i taula apwese. Nate namo sidesidega, Yaubada 'enaya.”v23 Mk 11:23v24 Lu 17:5

Yesu 'ina mwawasa manuna 'isimana

(Madiu 17:22-23; Luke 9:43-45)

30 Gote 'enega Yesu ma ina tononoyao sena nina sipilisinena, ta Yesu geya nuwana be boda sida mwalatoni mane 'ena sitautauya, 'enega Galili 'edana 'ena sitauya, 31 ga 'ina tononoyao 'ie'itedi 'ina mwawasa manuna, 'igwae, “Ma'etamo Tomota Natuna ^{▼▼*Tomota Natuna: Yesu tauna 'ieesena The Son of Man, 'ana mwalatoi tomota tuga. Yesu taunamo 'ieesena Tomota Natuna, ta 'ina e'itao 'ediyega tomota simwalatonina 'aene tauna To'etoseyana Keliso.} 'ana totelesipupu 'ida 'ebwayae 'ana talauwalao 'ediya be siloemwawasi, be 'asiyata 'etoi muliyega 'ida toololimana.” 32 Ta 'ina e'ita gete manuna nigeya simwalamwalatoni, ta esi nigeya 'idi 'Inapwana 'ena sienaenaida, manuna simatauta.

Tonugana taudi tomuliya

(Madiu 18:1-5; Luke 9:46-48)

33 'Enega 'asa Kapaneumi 'ena siapwesa ga anuwaya silugu, ga nada Yesu 'ienaida 'ina tononoyao 'ediya, 'igwae, “To yage manuna waegewagewana 'edaya?” 34 Ta siomayamaya ga nigeya siee'isa, manuna 'idi egewagewana 'alena nate yaita 'ediyega 'ida anugana.

35 'Enega Yesu 'imiyatowa ga site tuwelo 'ibwauyedima ga 'ie'ita 'ediya, 'igwae, “'Abo yaita 'oyo nuwanuwayo be 'emiyega 'ue'inapwana, 'ilobwenemu be tauyo 'ugimwa'uteyo be 'uetoguinuwa gosemwao manudi.” 36 Ta 'ebweu gwama 'i'au'ewenama ga gamwagamwanidiya 'ietoolona ta 'i'atubwailina ga 'ieonedi, 37 'igwae, “'Eguma yaita 'oyo gwama gete nadigega 'uobobome manugu, nate 'abo'agu wate 'uobobomegu, ta nigeya 'aene taugumo 'uobobomegu, ta wate 'agu toetune Yaubada ma'iyagu 'uobobomema.”v35 Mk 10:43-44; Lu 22:24v36-37 Yo 13:20

'Abo yaita tauna nigeya 'ietaetalauwaleda tauna 'ilemelemeda

(Luke 9:49-50)

38 Ta Yoni 'ilolagata ga 'igwae, “'Inapwana, 'ebweu tai 'a'itena 'amu esanega yaluyaluwa bi'i 'iulaula apwesedi, 'enega 'a'etobodena, manuna tai nina nigeya 'ida boda.”

39 Ta Yesu esiya 'igwae, “Geya'abo wa'eto'etobode. Manuna 'abo 'ebweu yaita yage waiwaidi 'agu esanega 'iguiguinuwedi, geya'abo 'ebweu wate 'isinasinaligu. 40 Manuna 'eguma yaisigedi nigeya sietaetalauwaleda taudi silemelemeda.

41 “Ta wate wada nuwa'i'isi 'aene 'eguma tona'ami 'iyapayapasa be 'ebweu yaita 'ienumami manuna 'omi Keliso 'ina bodao, tauna 'ana pali bobo'ana ma'etamo 'iloba.v38 Num 11:27-29v40 Lu 11:23

To'ase 'igie to'umaliyeda

(Madiu 18:6-9; Luke 17:1-2)

42 “Ta esi 'eguma yaita 'itoo be 'agu toemisao gogama getedi 'ediyega 'ebweuna 'igie be'uye, tai nina nai waine nina 'ilobwenena be gulewa sinabwana 'otonaya silosipwa be magulewana siula mwa'utedi ni'uya.

43 “Wate 'eguma nimayo 'igie be'uyeyo 'ilobwenena be 'u'upwa yaule. Nate nigeya 'ana to'umalinamo 'eguma manima 'upwa'upwayo ta yawasiyo bobo'ana 'uloba. Ta esi to'umali wawasae 'emuya 'eguma manima luwaluwayo siula mwa'uteyo kaiwe 'ala'alata atayana 'enaya.

45 “Be wate 'eguma 'aeyo 'igie be'uyeyo 'ilobwenena be 'u'upwa yaule. Nate nigeya 'ana to'umalinamo 'eguma ma imu lopegoi ta yawasiyo bobo'ana 'uloba. Ta esi to'umali wawasae 'emuya 'eguma ma'ae luwaluwayo siula mwa'uteyo 'asagabugabu 'ena.

47 “Matayo wate nadigega, 'eguma 'igie be'uyeyo 'u'iwa yaule tuga, manuna nigeya 'ebweu wate 'ana to'umalinamo 'eguma mamata 'ebwe'ebweuyo ta Yaubada 'ina 'ebe loina 'uloba. Ta esi to'umali wawasae 'emuya 'eguma mamata luwaluwayo siula mwa'uteyo 'asagabugabu 'enaya. 48 Sena nina 'ena kokowa 'ediya ipwaipwa sisopisopila ataya, be wate kaiwe nigeya 'ida kweu.

49 “'Enega tomota maibo'adi 'awesabelulu 'ida giebobo'anedi, nadigega ola masula 'igie bobo'anena.

50 “Ola yage bobo'ana. Ta 'eguma 'ana lotoona 'isasawala, nigeya sawesawenaya be 'ibobo'ana limana. 'Enega 'ilobwenemi be 'imi bubuna taumi walotoona 'ana dibidibi nadigega waeoboobobomemi 'ebweuna 'ebweuna 'enaya.”v50 Lu 14:34; Kol 4:6; 1 Te 5:13