Mat 17 | DOB | STEP | 'Asiyata sikisi mulinaya Yesu 'ina tononoyao 'etoi 'i'au'ewedi, ga ma'enao situ'e 'oya 'ebweu kesolana 'ena. Tonono nidi taudi Pita be Yemesa matasina Yoni.

‏ Matthew 17

Yesu 'ana 'ita 'idumaduma

(Maki 9:2-13; Luke 9:28-36)

1 'Asiyata sikisi mulinaya Yesu 'ina tononoyao 'etoi 'i'au'ewedi, ga ma'enao situ'e 'oya 'ebweu kesolana 'ena. Tonono nidi taudi Pita be Yemesa matasina Yoni. 2 Tuta nina 'idi miya 'oyaya Yesu maninina si'itena tuyayalina 'atuwa sinala 'ana 'ita, ta 'ana 'oama 'iwakeke 'atuwa maedana 'isaesae. 3 Ta wate Mosese be Ilaitiya siapwesama ga Yesu nina ma'edi si'awa'awagwae.

4 'Enega Pita 'ilolagata ga Yesu 'ieonena, 'igwae, “'Inapwana, 'ida miya gete nadigega bobo'ana, 'enega 'ilobwenena be 'eguma 'utatagwala yoeyoe 'etoi ya'abidi be 'ebweu 'oyo manuyo, ta 'ebweu Mosese manuna, ta 'ebweu Ilaitiya manuna.”

5 Pita 'ina ona ma'etamo nigeya 'ilosalosaloni ta pwana maedanina 'italaekabobodi, ta pwana 'enega 'enana 'ebweu sinonona, 'igwae, “Gete natugu bobo'ai'ailina, tauna manuna yagwausowala sinabwana, 'enega 'ina onao wada nonodi.”

6 Ta tonono nidi ona nina sinonona ga ma idi matauta sibe'u sanamwa'uta, 7 ga Yesu 'imai ga 'igitoodi, 'igwae, “Watoolo. Geya'abo wamatamatauta.” 8 'Enega sisanatu'e ga Yesu tebweuna namo 'itootoolo si'itena.

9 'Enega 'oyega siebuebusima ga Yesu 'iloinedi, 'igwae, “Yage nidi ni'a wa'itedi geya'abo tomota 'ediya wasimasimanedi ga 'ana laba 'abo'agu Tomota Natuna mwawasega yatoolo limana.”

10 Ga Yesu 'ina tononoyao 'ena sienaida, sigwae, “To'ase manuna loina 'ana toe'itao siona 'aene Ilaitiya 'igimi nuganama, be muliyega To'etoseyana nina 'imama?”

11 Ta Yesu 'igwae, “O nadigega, Ilaitiya 'aene 'ida giminuganama be 'enega yage maibo'adi 'ida giepaepaludi. 12 Ta sa'i Ilaitiya nina ni'atu 'imai saba, ta tomota nigeya si'ina'inana ta esi siguinuwa besobeso 'enaya to'ase 'idi nuwena nadigega, 'iabe wate 'abo'agu Tomota Natuna nadigega 'eguya sibubuna'esa.” 13 'Enega tonono nidi gote 'ena sinuwena 'aene Yesu Yoni togiebapitaiso manuna 'ionaona. Md 11:14v13 Lu 1:17

'Ebweu gwama 'ana le'oasa lobwebwai Yesu 'igiebobo'anena

(Maki 9:14-29; Luke 9:37-43)

14 'Enega Yesu ma ina tononoyao simwa'uta boda 'ediya, ta 'ebweu tai 'imai ga 'i'aetulasa Yesu matanaya, 15 ta 'igwae, “'Inapwana, natugu 'uda 'atenuwa 'ole'oleyei be 'uda giebobo'ane, manuna tuta yauna 'ana lobwebwai manuna 'itaitai, ta bwalana siuyauya sinabwana, ta 'aina tuta 'ediya 'awesabelulu 'enaya 'ibe'ube'u, ta 'aina tuta bwasi ni'u 'ediya 'ibe'ube'u. 16 Ta 'imu tononoyao 'ediya yame'ena, ta nigeya sawesawediya be sigiebobo'ane.”

17 'Enega Yesu 'ieonedi, “'Omi sana mwa'adega? Ga debami pa'ala yaita! Nai nigeya waemiemisegu, aga? Ni'atu 'imi debapa'ala 'enega yalo'ame'ame. Baga, gwama nina wame'e 'eguya be ya'ita.”

18 'Enega Yesu yaluyaluwa bi'i 'iloinena ga lobwebwai gwama nina 'enega 'iapwesa ga 'ibobo'ana limana.

19 Muliyega Yesu 'ina tononoyao simai ga taudimo Yesu ma'enao, ta sieonena, sigwae, “'Inapwana, mwa'adega 'abo'ama ga nigeya sawesawemaya be yaluyaluwa bi'i 'aula apwese.”

20 Ga Yesu 'igwae, “Manuna 'imi emisa nenetana. Yaona'ai'aila 'eguma 'imi emisa 'ana waiwai beno atuna nadigega, ma'etamo 'oya gote 'ena wagwae, ‘Gete 'enega 'umiya dolo’, 'iabe 'ida ematamatana tuga. Nadigega wate yage maibo'ana sawesawemiya be waguinuwedi.”

Yesu 'ina mwawasa manuna 'iona limana

(Maki 9:30-32; Luke 9:43-45)

22 Muliyega Galili 'ena simiyami, ga Yesu 'iemataluwedi, 'igwae, “'Abo'agu Tomota Natuna, ta ma'etamo 'agu tosipupu 'ida 'ebwayaegu 'agu talauwalao 'ediya 23 be siloemwawasigu, be 'asiyata 'etonina 'enaya Yaubada 'igietoolo limagu.” Yesu 'ina simana gete manuna sinuwamwau 'ai'aila.

'Idi takisi Anuwa Tabu manuna

24 Muliyega sitauya Kapaneumi 'enaya, ta takisi Anuwa Tabu manuna 'ana toegogonao simai ga Pita 'ena sigwae, “Mwa'adega, sawesawenaya be 'imu toe'ita nina 'itakisi, nai nigeya?” 25 Ta Pita 'igwae, “O, 'iabe 'ina takisi 'isa'u.”

'Enega Pita 'iilama anuwaya, ta Yesu Pita 'ieonena, 'igwae, “Saimoni, to'ase 'imu nuwena toloinao bale'uya manudi, yaisigedi 'ediyega takisi si'ewa'ewa? taudi natudiyao 'ediyega? nai mali tomota 'ediyega?”

26 'Enega Pita 'igwae, “Mali tomota 'ediyega.”

Ga Yesu wate 'iona limana, 'igwae, “Ona'ai'aila! Ta esi taudi natudiyao nigeya 'adi mwaumo. 27 Ta geya'abo taloogwautoyasa, 'abona nai 'edaya sinuwamwau. 'Enega gete tuga bani 'u'ewa be 'udolo le'awaya be 'abo gimiiyana 'ulisi, 'awana 'ugigege be solanega mani 'u'ewenama be 'u'ebwa'edi, nate 'oyo be 'abo'agu 'ida takisi, sawesawedaya.”