Mat 6 | DOB | STEP | Yesu wate 'igwae: 'Abo tuta nina nuwanuwami be wa'ebwayadaita taudi gomagomabesodi 'ediya, geya'abo tomota matadiya waguiguinuwe. 'Eguma nadigega waguiguinuwa'esa, geya'abo tupu nai e'isa walobaloba Tamami galewaya 'enega.

‏ Matthew 6

'Ebwayadaita manuna

1 Yesu wate 'igwae: 'Abo tuta nina nuwanuwami be wa'ebwayadaita taudi gomagomabesodi 'ediya, geya'abo tomota matadiya waguiguinuwe. 'Eguma nadigega waguiguinuwa'esa, geya'abo tupu nai e'isa walobaloba Tamami galewaya 'enega.

2 'Enega tuta nina wa'ebwayadaita gomagomabesodi 'ediya, geya'abo yoguli wamu'emu'e, nadigega tokaboyao taudi anuwa tapwalolo nai 'asa 'ediya 'idi 'ebwayadaita mulinaya yoguli simu'edi be 'aene tomota sida tupudi. Ona'ai'aila 'adi e'isa tuta gete namo 'enaya silobaloba, ta esi tuta 'imeemai geya'abo e'isa silobaloba. 3 Ta 'omi sa'i tuta nina wa'ebwa'ebwaya daita wada 'ebwaya kwaiya, 4 be 'enega geya'abo tomota si'ita'ita, ta Tamami namo 'imi 'ebwayadaita kwaiya 'i'ita be muliyega e'isa bobo'ana 'i'ebwa'emi.

Sidasida manuna

(Luke 11:2-4)

5 'Imi sidasida wate nadigega, 'eguma wasisida Yaubada 'enaya geya'abo tokabokabo nadigega wasidasida, manuna taudi nuwanuwadi be tomota matadiya tapwalolo solanaya nai 'asa 'ediya sitoolo be sisidasida. Ona'ai'aila 'adi tupu tuta gete namo silobaloba, ta tuta 'imeemai nigeya. 6 Ta 'oyo 'eguma 'usisida, 'ulugu nugana 'imu anuwa solanaya be 'awa 'ugibode ta 'enega 'usidasida kwaiya Tamayo 'enaya, be taunamo 'i'itayo be muliyega e'isa bobo'ana 'ida 'ebwa'eyo.

7 Ta wate 'imi sidasida 'ediyega geya'abo waonaona limalimana nadigega taudi tomiya guguyoi si'oba'oba. Taudi 'idi emisa 'aene ona yauna 'ediyega e'isa bobo'ana sida loba. 8 Geya'abo 'omi taudi nadigega, manuna 'omi Tamami 'imiyami, ta tauna 'ami mwauyao 'igimi mwalatonidi ta muliyega manudi wasidasida.

9 'Enega tuta sidasida 'ediya gete nadigega wada sidasida:

“Tamama galewaya 'amu esana 'a'amayabei,

ta 'asideyo be 'oyo 'uda loinema,

10 be 'enega 'imu nuwena 'ada guinuwe nadigega taudi me galewa siguiguinuwa'esa.

11 'Ama masula 'asiyata 'ebweuna 'ebweuna 'enaya 'uda 'ebwa'ema.

12 Ta 'ima bubuna to'umalina 'uda nuwataudi,

nadigega 'abo'ama wate gosemao 'idi bubuna to'umalina 'emaya 'anuwataudi.

13 Ta geya'abo 'utootooma, ta esi tauna toto'umalina nina 'enega 'uda 'etoseyema.”

14 'Eguma 'omi gosemiyao 'idi loegesiyao 'emiya wanuwataudi, Tamami galewaya wate 'imi loegesiyao 'inuwataudi. 15 Ta esi 'eguma gosemiyao 'idi loegesiyao 'emiya geya'abo wanuwanuwataudi, Tamami wate 'omi 'imi loegesiyao geya'abo 'inuwanuwataudi.

Edidigula manuna

16 Wate 'abo tuta nina 'ena tapwalolo manuna 'e'ai 'enega waedidigula, geya'abo maninimi watuetue goegowa 'atuwa tonuwamwau. Gete tokabo 'idi guinuwa nadigega, manuna taudi 'adi 'ita sigie to'umaliyedi be 'aene 'idi edidigula tomota sida mwalatoni. Ona'ai'aila 'adi tupu tuta gete namo silobaloba, ta ma'etamo nigeya. 17 Ta 'omi tuta nina 'e'ai 'enega waedidigula tapwalolo manuna, wa'atu maninisa be wasinate, 18 'enega tomota 'imi edidigula geya'abo simwalamwalatoni, ta Tamami namo to'ase 'atemiya 'imiyami 'imwalamwalatoni, be 'ana e'isa bobo'ana 'i'ebwa'emi.

Pali galewaya manuna

(Luke 12:33-34)

19 Geya'abo 'imi esaesa bale'uya waegoegogonedi, manuna manumanuwa be mwaulu esaesa bale'uya sigie to'umaliyedi ta wate to'ipwala silugulugu 'imi anuwa 'ediya sabi 'ipwalidi, 20 ta esi 'ilobwenemi be 'imi esaesa galewaya manuna waetapewa. Manuna galewaya nigeya wate manumanuwa nai mwaulu be 'ida gwegwe sigie to'umaliyedi ta wate nigeya to'ipwala. 21 Ta to sena 'enaya 'imi esaesa 'imiyami, nate sena nina 'ena 'imi nuwanuwa sida pili.

Ooda 'ana maedana

(Luke 11:34-36)

22 Matada 'atuwa ooda 'ana mayale. 'Enega 'eguma matada 'esasedi ooda maibo'ana maemaedanina, 23 ta 'abo matada sito'umali ooda wate maibo'ana siguguyoi, ta 'abo mayale nina 'edaya 'ikweu, 'etamo guguyoi 'ubwa'ubwa 'i'ali sakowasiyeda.

'Ada toloina 'ebweuna namo

(Luke 16:13)

24 Toguinuwa nigeya sawesawenaya be 'ietopaisewa 'ena'iyao 'eluwa 'ediya, ta 'ebweuna 'ida guitoyasei ta esi 'ebweuna namo manuna 'ida paisewa, be 'enega 'ebweuna 'i'awabobo'ane ta 'ebweuna 'i'awato'umaliye. 'Enega nigeya sawesawenaya be Yaubada 'ina guinuwa be esaesa bale'u tagiluwedi.

Geya'abo 'atesa'ala

(Luke 12:22-34)

25 'Enega yaeonami 'aene geya'abo 'imi miya bale'u manuna wanuwanuwa sinabwana, 'ami 'e'ai be 'ami bwasi be 'ami 'oama manudi. Manuna yawasida yage sinabwana 'edaya, ta gwegwe nidi bwala manudi nigeya yage sinabwana.

26 Gete 'ebweu 'ebe'ita ya'ebwa'emi manuwao 'ediya, tuta yauna nigeya sida dauna, nai sida sesoi, ta wate nigeya 'idi anuwa masulamo. Manuwao nidi yage gidalidi ta tuwa tuga Tamadai galewaya tuta yauna 'adi masula 'i'ebwa'ebwa'edi. Ta esi wada nuwa'i'isi 'aene 'omi sinabwami Yaubada 'enaya, 'enega sawesawenaya be 'ie'enimi. 27 Ta 'eisa 'emiyega 'ina nuwenuwega 'ina tuta bale'uya 'igieduduli? Nigeya, aga?

28 'Enega to'ase manuna wanuwanuwa sinabwana 'ami 'oama manudi? Ta 'ebweuna wate gete 'ebe'ita, seninao 'idi tabwa 'asaya manuna wada nuwaedaedadami. Tuta yauna nigeya sida paisewa, ta wate nigeya 'adi 'oama sida guinuwedi. 29 Ta ona'ai'aila, Solomoni 'ana 'oamao be 'ana iyaiyalao 'adi 'ita bobo'adi, ta senina 'adi 'ita esi bobo'ana wawasae. 30 'Enega wanuwanuwa Yaubada 'ina 'ita'i'ita 'emiya manuna. Tauna pwatula 'ieiyalidi senina bobo'adi 'ediyega; batuwa sisenina ta gibwa'i si'oapelu be sigabudi, ta 'omi pwatula wabobo'ana sinedi, 'enega ona'ai'aila, 'ami 'oamao 'ida 'ebwa'emi. 'Enega geya'abo 'imi emisa Yaubada 'ena 'ineeneta.

31 'Enega geya'abo wanuwanuwa sinabwana be 'aene wagwaegwae, “To'ase 'ada 'ani?” nai “To'ase 'ada numa?” nai “To'ase 'ada 'ote?” 32 Ona getedi nadigega taudi 'etamo guguyoi 'enaya simiyami 'idi ona. Ta to'ase 'imi nuwanuwa Tamami galewaya ni'atu 'isinapudi, nadigega 'ami masula be 'ami bwasi be wate 'ami 'oama, be 'i'ebwa'emi tuga.

33 'Enega 'ilobwenemi be nugana Yaubada 'ina loina ta 'ina 'eda palupaluna wada 'ebese be wada muliye, be 'enega 'ami masula ta 'ami 'oama wate 'i'ebwa'emi.

34 'Enega geya'abo wanuwanuwa sinabwana gibwa'i manuna. Nate namo batuwa namo manuna wada nuwanuwa. 'Enega 'asiyata simeema 'adi mwau geya'abo 'asiyata batuwa 'ana mwau ma'iyana taloeloepopoe, ta esi 'asiyata 'ebweuna 'ebweuna taudi sa'i 'adi mwau manudi tada nuwanuwa 'adi 'asiyata nidi 'ediya. 1 Kin 10:23v33 Sam 37:4,25; Lu 18:29-30