Joh 10 | EMI | STEP | “Aghaulia ngakoronna etaimim va lo ateva taumattu, karika ekupikupi sso tale atamani valavala sipsipi eteae, ta etattakole tale valavala ateae, tau niainao ia, me aisari katoa ghinnaniira ia.

‏ John 10

Iesu masi tau ngai toi sipsipi ia

1 “Aghaulia ngakoronna etaimim va lo ateva taumattu, karika ekupikupi sso tale atamani valavala sipsipi eteae, ta etattakole tale valavala ateae, tau niainao ia, me aisari katoa ghinnaniira ia. 2 Lo ateva taumattu ekupikupi sso tale atamana ateae, ia tau ngai toi sipsipi ia. 3 Tau ngai toi atamana ateae etaatara kila tau ngai toi sipsipi eteva, me eotioti atamana ateae, me tau ngai toi sipsipi eteva ekupikupi sso, me sipsipi etoa la nongonongo kila lingi ngalona ateva. Ekolokoloa arariira kiena sipsipi etoa, me ekuukupieinila ghoa eleka. 4 Nau eteva ekuukupia ngakapa ghoa kiena sipsipi, me emuemueinila, me kiena sipsipi etoa la ghaimuli teeia, poli la nongonongo kila lingi ngalona ateva. 5 Karika la rooroo tani usi mene teva ppae taumattu. Me aue la ghele ilou vuli teeia, poli karika la nongonongo kila lingi ngalona ateva.” 6 Iesu ghe auliaala ia o kiukiu niaimatoongana ateae, me nannaaira karika ghe masalike teela voto ghe auliaala etaira.

7 Liuna avalua o me Iesu ghe mene uela etaira va, “Aghauliaa ngakoronna etaimim va aghi atamani sipsipi etoa ieghi. 8 Lo atoa laghe muemue mae akasina sio etaghi, tau niainao ila me aisari ghinna ila, me sipsipi etoa karika laghe nongo kilailala. 9 Aghi atamana ieghi. Lo ateva ekupikupi sso etaghi aue saanga. Aue esso me eghoa, me aue ghaa masi inana. 10 Tau niainao ateva emaemae tani ainao, me tani aiuvi emate, me tani tturuu. Me aghi aghe mae sio va la ghaa maulue, me maamauluaaira epasu tale masi voto. 11 Aghi masi tau ngai toi sipsipi ieghi. Masi aitoi sipsipi eteva, etautau maamauluaane tani sausi kiena sipsipi etoa. 12 Polipolina ateva taumattu, nau eteva ueli paua ateva emaemae tani nama sipsipi etoa, aue eilou vuli sipsipi etoa, poli karika va tau ngai toi sipsipi ia, me karika va kiena tuungi ila. Me paua ateva aue ghele namaila me ghele ameti reerekatainila. 13 Ia o taumattu ngateva eiilou vuli sipsipi etoa poli enim uungu tani ghaa viliki veu, me karika nannaane tani aitara sipsipi.

14 “Aghi masi aitoi sipsipi ieghi. Akilakila kieghi sipsipi, me ila la kilakilaieghi, 15 nongina Tamaghi ekilakilaieghi, me aghi akilakila Tamaghi, me atautau maamauluaaghi tani sausi kieghi sipsipi etoa. 16 Mene katoa tana kieghi sipsipi, karika ila elome tale ia oia valavala ateae. Aue atani ghaaila, me la mae kupi sso, me ila tee aue la nongo lingi ngaloghu eteva, me aue kateva nonga ila, me ekateva nonga tau ngai toiira. 17 Tamaghi eailousieinaghi, poli aue atau velu maamauluaaghi, me auena amene ghaa. 18 Karika teva erooroo tani ghaa velu maamauluaaghi. Aghi atautau velu maamauluaaghi, me aghi nonga arooroo tani tau velu maamauluaaghi me arooroo tani mene ghaa. Tamaghi ghe aulia tau mae isaa oia inangari va aghelei.”

19 Isaa o inangarina ghe gheleila me aJiu etoa ghe ghalueilala. 20 Oroila taumattu ngatoa laghe ue va, “Raroai eteva etokatoka etana, me veeveena ia. Vaalua me am anna tani nongo inangarina?”

21 Me katoa laghe ue va, “Lo ateva raroai eteva etokatoka etana karika erooroo tani aulia isaa o voto. Raroai eteva karika erooroo tani oti mataira salusaluna atoa.”

AJiu etoa karika laghe aaiesoa ta Iesu

22 Nau eteva tani nna lao nau laghe tau saela ale manga ateva ghe rekatala. Ia o nivelu eitaua ngateae ghe lutulutu tale nau kkaili eJerusalem, 23 me Iesu eleka tale ale manga ateva ghe kasukasu tale varanda ngateva laghe asease Solomon etana. 24 Me aJiu etoa laghe mae sio tani tingina talieinia me ngila ghe ue etana va, “Lovisa uaulia kiemami? Ange matemate toitoiaaimami. Arova io Mesaea ngateva, uaulia ngamasina etaimami.”

25 Iesu ghe liula me ghe uela etaira va, “Aghaaulia etaimim, me karika am aiesoa. Niuungu aghe gheelei tale ararina ateae Tamaghi eaulia va aghi see ieghi. 26 Am tam aiesoa poli karika va kieghi sipsipi iem. 27 Kieghi etoa sipsipi la nongonongo kila lingi ngaloghu eteva. Akilakilaila me la ghaimuli teeieghi. 28 Atautaula maulue ateva etokatoka nau ekapa atoa, me karika aue la mate. Karika teva erooroo tani ghaa vella ta nimaghi. 29 Tamaghi, ghe taula mae sio etaghi, enaanamuu vulu isaa akapaaili taumattu, me karika teva erooroo tani ghaa vella ta nimane Tamaghi. 30 Aghi me Tamaghi kateva nonga iengalua.”

31 Me aJiu etoa ngila ghe mene reirei atu tani kumua. 32 Me Iesu ghe uela etaira va, “Aghe apasungala oroianaaili masi niuungu kanna Tamaghi. Am anna tani kumueghi tale mausi sa ateva tale isaa o niuungu?”

33 AJiu etoa laghe liula me laghe uela va, “Karika ami anna tani kumuo poli isaa o voto, ta poli uaulia saasakia ta God, poli nim taumattu io, me uue va io God.”

34 Me Iesu ghe liula me ghe uela etaira va, “Karika am ghe ritila tale uneimim inangari nipaopao, eue va, ‘Aghe uela va am goto iem’? ^{▼▼10:34Sams 82:6} 35 Emua arau God ghe ppoaala inangarina ta taumattu ngatoa me ghe uela va goto ila. Inangarina God tale Uru ngai Manga ateva karika eaikolikolia. 36 Me aghi, Tamaghi ghe amangaieghila me ghe sungieghila tani sio tale kosa ateva oia. Liuna avalua o me aue va Natuna ieghi God. Vaalua me am ue va aghaulia saasakia ta God? 37 Am rau mene aiesoa etaghi arova atam gheelei uunguaane Tamaghi. 38 Arova am tam aiesoa etaghi, am aiesoa tale niuungu agheelei, poli agheelei uunguaane Tamaghi, me aue am kila va Tamaghi etaghi me aghi ta Tamaghi.” 39 Laghe mene anna tani kuneia, me karika laghe roola.

40 Me Iesu ghe mene oghi lao sio, me ghe lau longotila eJodan, me ghe lao sio tale voto ateva Jon ghe aasuu taumattu etana, me ghe tokala tale ia o voto ateva. 41 Me oroieili taumattu ghe mae sio etana. Laghe ue va, “Koronna va Jon ghe tam gheleila teva niaimatoonga, me voto ghe auliaala tale ia oia taumattu ngateva koronna akapa.” 42 Tale ia o voto ateva oroi taumattu ghe aiesoala ta Iesu.